མཛའ་མོ་ལགས། ང་ལ་བདེན་ཁ་མི་དགོས།

དེ་རིང་ནས་བཟུང་ ང་ལ་བདེན་ཁ་མི་དགོས་ལ་གནས་ལུགས་ཀྱང་མི་དགོས
མཛའ་མོ་ལགས ཡོད་ཚད་ཁྱེད་རང་ལ་བྱིན་པ་ཡིན
ང་རང་ཁུ་སིམ་མེར་ཞོག་དང་ ཁྱེད་རང་ལ་བདེན་ཁ་སྤྲད་ཆོག
མི་ཟེར་བ་འདིས་རང་ཉིད་མ་གཏོགས་མི་མཐོང་
དེའི་རྒྱུ་མཚན་གྱིས་རྙོག་དྲ་མ་གཏོགས་མེད་པར་གྱུར་བ་རེད
མཛའ་མོ་ལགས ང་རང་ལ་རྙོག་དྲ་དང་སུམ་སྣང་མི་དགོས
ངས་དེ་རིང་གི་སློབ་ཚན་འདི་བརྒྱུད་དེ ང་རང་གི་གང་བྱེད་དགོས་པ་ཤེས་སོང་
མི་ཡུལ་ནས་གླེང་བཞིན་པའི་བདེན་པ་ཟེར་བ
དྲང་བདེན་ཟེར་བ་ནི་སྐྱག་རྫུན་ཞིག་ལས
ཐོབ་དང་གོ་ས་མེད་པ་ནས་མིང་ལ་དགའ་བ་ནས་སྒྱིད་ལུག་དང་ལེ་ལོ་བ་དག་གི
རང་རང་གི་ཚེ་སྲོག་སྲུང་བྱེད་ཀྱི་བརྡ་རྟགས་སྙན་པོ་ཞིག་དང་
བལྟས་ན་མིག་ལ་མཛེས་པ་ཞིག་མ་གཏོགས
སུ་ལ་དབང་ཆ་དང་ནུས་པ་ཡོད་ན་དེ་ལ་བདེན་ཁ་ཐོབ་དགོས་པ་ལས
གཞན་གང་ཡང་མེད་པའི་མིའི་སྤྱི་ཚོགས་འདི་ནས
མཛའ་མོ་ལགས ཁྱེད་རང་གི་བཤད་ཟིན་པ་དང་བཤད་སྲིད་པ་དེ་དག་ཡང་
དེ་དག་གི་བཟོས་པའི་སྒྲིག་གཞི་ལས་བརྒལ་ཐུབ་ཀྱི་མི་འདུག་ལ
དེ་ལས་བརྒལ་དགོས་པར་གླེང་ན ཁྱེད་རང་གི་མི་ཚེ་ལ་གཏོར་བཤིག་དང་
ངས་ཁྱེད་རང་གི་བསམ་བློ་ལ་བརྩི་བཀུར་མ་བྱས་པར་འདོད་ཀྱི་ཡོད་པ་རེད
དེ་ལ་བརྟེན་ནས མཛའ་མོ་ལགས
ངས་ཡོད་ཚད་ཀྱི་ཡོད་ཚད ཉིན་མ་དེ་རིང་ནས་ཁྱེད་རང་ལ་རྩོད་པ་མི་བྱེད
ངས་ཁྱེད་རང་ལ་ཡོད་ཚད་ཀྱི་བདེན་ཁ་སྤྲད་ཆོག
ང་རང་ཁུ་སིམ་མེར་ཁ་བཙུམ་ནས་བསྡོད་ལུགས་ཤིག
ང་རང་གིས་འབད་བརྩོད་བྱེད་ཀྱི་ཡིན
ད་ནི་ཁྱེད་རང་ལ་སུན་སྣང་དང་ལྟ་བ་མ་མཐུན་པ་བཟོ་མཁན་གྱི་མཛའ་བོ་ཞིག
ཁྱེད་རང་གི་འཁྲིས་སུ་ཡོད་མི་སྲིད་ལ ད་ནས་བཟུང་
མཛའ་མོ་ལགས ཁྱེད་རང་གི་འཁྲིས་སུ་ཡོད་པའི་མཛའ་བོ་ནི
མི་སྐད་བཤད་ཤེས་པའི་ལྐུགས་པ་ཞིག་ལས་གང་ཡང་མིན་པ་ཤེས་པར་གྱིས་ཤིག
མཛའ་མོ་ལགས ཁྱེད་རང་ལ་དགོས་པའི་བདེན་ཁ་ཡོད་ཚད
དེ་རིང་ནས་ཁྱེད་རང་ལ་དབང་ཟིན་པ་ཡིན
དགའ་དགའ་སྤྲོ་སྤྲོ་བྱོས་དང་ རྗེས་སུ་དགོས་མཁོ་ཡོད་མེད་ལ་མ་བལྟས་པར
ང་རང་ཁྱེད་ཀྱི་བྲན་གཡོག་ལྟར
གང་ཡང་བཤད་དབང་མེད་པའི་མི་ཞིག་བྱེད་འདོད་ཡོད
འདི་ནི་ང་རང་གི་ཐབས་ཤེས་ཤིག་ལས ཁྱེད་རང་ལ་ནོར་འཁྲུལ་མེད་པར་སྨོན