ཕུང་བོའི་འགྲུལ་བཞུད།

བསེ་རུ་ལགས་ཀྱིས་བྲིས་པའི་ཚིགས་རྐང་གཞི།།
བློ་བཟང་ལགས་ཀྱིས་བརྩམ་པའི་རྩོམ་ཡིག་གཉིས།།
ཞིབ་དུ་ཀློག་དུས་གཅིག་ལས་གཅིག་ནི་མཚར།།
འདི་འདྲའི་དྲ་གྲོགས་དག་གི་རྒྱབ་སྐྱོར་ལ།།
ནུས་མེད་བུ་ལོའི་སེམས་པ་དར་ཞིང་རྒྱས།།

རིགས་ཞེན་འདི་འདྲ་མཐོང་བའི་ཕྱིར་ཉིན་ནས།།
དགུང་གི་ཉི་ཟླ་ནུབ་ཀྱང་སེམས་འཁྲལ་མེད།།
ཕུང་བོ་དུར་ལ་ལུས་ཀྱང་འཕོང་སེམས་མེད།།
སེམས་ཀྱི་འདུས་པ་གཞུར་བའི་སྙན་ཚིགས་ཀྱི།།
རང་གི་རིགས་ལ་སྲུ་ཞུ་གང་ནུས་བྱེད།།

སྤོབས་པའི་སེམས་རྩ་དམར་པོ་ལྷོག་ལྷོག་ལྡིང་།།
བོད་ཀྱི་ལས་དབང་ཕྱོགས་སུ་འབད་ཐུབ་ན།།
ད་ནི་འགྱོད་སེམས་མེད་པར་ཉིན་མཚན་ཀུན།།
སྤས་པའི་སེམས་ཀྱི་སྒོ་མོ་ཡོངས་ཕྱེ་ནས།།
དྲ་གྲོགས་བོད་མི་ཡོངས་ལ་སེམས་གཏམ་འབྲི།

བྲིས་པའི་ཡི་གེ་ནོར་བ་འཐོལ་ལོ་གཤེགས།།
མ་མཐུན་བསམ་ཚུལ་བྱུང་ན་སྐྱོན་འཛུགས་བྱོས།།
གྲོས་གཞི་གཅིག་དུ་སྤྲེལ་ནས་བོད་དོན་ཆེད།།
རང་གི་གང་ཤེས་ཁྱེད་ཚོར་བཤད་ཆོག་ལ།།
ཁྱེད་ཚོས་གང་མཁྱེན་ང་ལ་སློབ་སྟོན་གནོང་།།

དྲན་སེམས་རླུང་ལ་ཞོན་ཏེ་ཕྱོགས་མེད་དུ་འཁྱམས་དུས། །
ངལ་དུབ་བཟོད་སྲན་ཐུབ་པའི་སྙིང་སྟོབས་དེ་མེད་ན། །
ཡུལ་གྱར་འཚོ་བར་འཁང་པའི་སྨྲེ་ངག་ཅིག་བཏོན་ཀྱང་། །
ལུས་སེམས་བདེ་དྲོད་སྦྱིན་པའི་དྲིན་ཆེན་ཞིག་དཀོན་ནོ། །
ངེས་མེད་མི་རྟག་འཁོར་བའི་རང་གཤིས་དེ་བསམ་ནས། །
མི་ཁོམ་གནས་ལས་ཐར་པའི་སྐལ་བཟང་དེ་ཤར་འོང་། །
ཐམས་ཅད་ཡིད་བརྟན་དབེན་པའི་གནས་ལུགས་ཤིག་ལོས་རྙེད། །
མི་ཁོམ་གནས་ལས་ཐར་པའི་སྐལ་བཟང་དེ་ཤར་འོང་། །
ཤ་ཁྲག་རུས་གསུམ་གཏན་བདེའི་གོ་འཕང་ཞིག་ཐོབ་ངེས། །