ཁྱེད་ཀྱིས་ཕུ་བོ་ངས་ཁྱེད་རང་ལ་བཅིངས་པའི་རེ་བ་ཡོད་ཚད་སྟོང་ཟད་དུ་གཏོང་མི་ཉན། ང་རང་སེམས་གཏིང་གི་རེ་བ་ཆེ་ཤོས་དེའི་དབང་གིས་ངའི་རང་ཉིད་ཀྱི་ཡོད་ཚད་བློས་གཏོང་འཕོད་ཀྱི་ཡོད། དེ་ནི་ཁྱེད་རང་གི་མི་ཚེ་དེ་ནི་རང་འགར་གྱི་བུད་མེད་སྤྱི་མཚུངས་ལྟར་མི་ཚེ་དཀྱིས་མ་ཞིག་རོག་རྒྱུ་དེ་མ་ཡིན་པར། ཤེས་རིག་གི་ལང་ཚོ་རྒྱས་ཤིང་། རྣམ་དཔྱོད་ཀྱི་བློ་གྲོས་ལ་འོད་སྟོང་འཕྲོས་དེ། ཁྱེད་ཀྱིས་བོད་མི་རིགས་ཀྱི་གངས་ཅན་ལྗོངས་ཀྱི་སྐྱེས་མ་དག་ལ་རླབས་ཆེན་གྱི་རྣམ་དཔྱོད་དང་གཟི་བརྗིད་རང་བཞིན་གྱི་སྤོབས་པ་སོགས་ཡོད་པ་གསལ་སྤྲོད་བྱེད་ཐུབ་དགོས། དེ་ཡང་ཁྱེད་ཀྱིས་རང་ཉིད་ཀྱི་སྐྱེ་སྟོབས་ཀྱི་ཤེས་རབ་ལ་བརྟེན་ནས་རང་མི་རིགས་ཀྱི་སྐད་ཡིག་གཙོ་བོར་བཟུང་དེ་འདབ་གཤོག་གཉིས་ལྡན་གྱི་བྱ་རྒོད་ཇི་བཞིན། དབྱིངས་པའི་ནམ་མཁའ་ཆེན་མོ་འདིར་འཕུར་བསྐྱོད་ཤིག་བྱེད་ཐུབ་ཉིན། ཕུ་བོ་ང་ཤི་རང་བློ་སེམས་བདེ་རུ་འབབ་ཐུབ་ངེས་ཡིན།
དེ་རིང་ངས་འདི་ནས་ཁྱེད་རང་ལ་སྐད་ཆ་བཤད་བཞིན་པ་འདི་དག་ནི་མི་ཞིག་གི་མི་ཚེ་ནང་དུ་འབད་བརྩོན་བྱོས་པ་ཡིན་ན། འགྲུབ་ཐུབ་པ་ཞིག་བཤད་བཞིན་ཡོད་པ་ལས་རྨི་ལམ་ལྟ་བུ་ཞིག་ལག་པར་འཛིན་རེག་མེད་པ་ཞིག་གཏན་ནས་བཤད་ཀྱི་མེད། དེའི་སྟབས་ཀྱིས་ནུ་མོ་ཁྱེད་རང་གིས་ཕུ་བོ་ངའི་སྐད་ཆ་ལ་ཉན་པར་བཞག་ནས་གསན་རོགས་ཞུ།
ཕུ་བོ་ངས་རྒྱང་རིང་ནས་ཁྱེད་རང་ལ་དུས་དང་རྣམ་པ་ཀུན་དུ་འཕྲིན་ཡིག་རེ་བྲིས་དེ་བསྐུར་ངེས་ཡིན། འཕྲིན་ཡིག་དེ་དག་གི་ནང་གི་སྐད་ཆ་རེ་རེ་ནི། ཕུ་བོ་ངས་ས་ཁུལ་གཞན་ཞིག་ ཏུ་མི་སྐད་གསར་བ་དང་གོམ་གཤིས་གསར་བ་ཁོར་ཡུག་གསར་བ་སོགས་ཀྱི་དཀའ་ངལ་ལ་གདོང་ གཏད་དེ་ཧུར་བརྩོན་བྱེད་དགོས་པའི་དོན་དག་གི་སྙིང་བོ་དེ་ཡིན། ཁྱེད་ཀྱིས་ཉིན་མ་རེ་རེ་བཞིན། སློབ་ཕྲུག་གཞན་དག་ལྟར་སྣང་བ་གཡེང་ནས་རྩེད་མོའི་རིགས་ ལ་མགོ་བོ་མི་འཁོར་བར་རང་གི་ཕུ་བོ་ཁྱེད་རང་གི་འོད་སྟོང་ལྡན་པའི་མི་ཚེ་དེ་ལམ་ ལྷོང་ཡོང་ཆེད་དུ་གཞན་ཡུལ་དུ་དཀའ་ལས་རྒྱག་གི་ཡོད་པ་སེམས་སུ་བཅིངས་དེ། ཁྱེད་རང་གི་མདུན་གྱི་ཡི་གེ་དང་སློབ་ཚན་དེ་དག་ནི་རང་གི་གཅེས་པའི་སྲོག་ལས་ཀྱང་གལ་ཆེན་དུ་བཟུང་དེ་སློབ་སྤྱོང་ཁོ་ན་ལ་འབད་བརྩོན་བྱེད་རྒྱུ་ལས། སྒོར་མོ་ཡོད་མེད་དང་སློབ་གྲོགས་གཞན་པ་སུས་གོན་པ་ཡག་པོ་གོན་ཡོད་མེད་དང་། སློབ་གྲོགས་སུས་ཁ་པར་དང་དེང་རབས་འཕྲུལ་ཆས་རྩེད་རིགས་སོགས་ཡོད་མེད་ལ་སེམས་པ་གཏན་ནས་མ་འཁོར་རོགས། དེ་དག་ནི་ཁྱེད་རང་གི་མ་འོངས་འོད་སྟོང་ལྡན་པའི་མི་ཚེའི་བཀག་རྡོ་ལས་གང་མིན་སེམས་སུ་བརྟན་པོར་གཉར་རོགས་ཞུ།
ནུ་མོ་ལགས། སྒོར་མོ་ང་རང་གིས་བཙལ་ཆོག ཁྱེད་རང་ལ་སྒོར་མོ་ཡོད་མེད་ཀྱི་དཀའ་ངལ་དང་གུང་གསེང་སླེབས་དུས་སུ་འགྲོ་ས་ཡོད་མེད་སོགས་དང་། ཁྱེད་རང་ལ་གོན་པ་ཡག་པོ་གོན་རྒྱུ་ཡོད་མེད་སོགས་ལ་གཏན་ནས་བསམ་བློ་མ་གཏོང་རོགས། དེ་དག་ཡོད་ཚད་ཀྱི་འགན་འཁུར་ཕུ་བོ་ངས་འཁུར་ཆོག ནུ་མོ་ལགས། དམིགས་གསལ་གྱིས་རང་ཉིད་བོད་པ་ཞིག་ཡིན་པ་གཏན་ནས་བརྗེད་མི་རུང་། དེ་བས་ཀྱང་བོད་ཀྱི་སྐད་ཡིག་ནི་རང་ཕ་མ་དང་ཕུ་བོ་སོགས་ལས་ཀྱང་རིན་ཐང་ཆེན་པོ་ཡིན་པ་ཤེས་དགོས་ཀྱི་ཡོད། དེ་དག་མ་ཤེས་པ་ཡིན་ན་ནི། ཕུ་བོ་ང་རང་གཞན་ཡུལ་ནས་དཀའ་ལས་བརྒྱབ་པ་ཡང་དོན་མེད་དུ་གྱུར་བ་ཡིན་ལ། ཁྱེད་རང་རྒྱ་གར་དུ་ཕུ་བོ་ངས་འཁྲིད་དེ་ཡོང་བ་ཡང་། གཏན་ནས་དོན་དག་མ་འགྲུབ་པ་རེད་བསམ་ཐུབ་དགོས་པ་མ་ཟད། རང་གི་སྐད་ཡིག་གི་ཞོར་ཏུ་གཞན་གྱིས་ཡི་གེ་ཡང་ཡག་པོ་སྤྱོང་དགོས་རྒྱུ་དེ་ནི་གལ་ཆེན་པོ་ལོས་ཡིན། འོན་ཀྱང་། རང་གི་བོད་ཀྱི་སྐད་ཡིག་ལས་གལ་ཆེ་བ་ཞིག་གཏན་ནས་མེད་པ་རེད། གལ་ཏེ། ཁྱེད་རང་སློབ་མཐར་བྱིན་དུས་སུ། རང་གི་སྐད་ཡིག་གི་སྟེང་ནས་རྩོམ་ཡིག་འབྲི་བ་དང་གཞན་གྱི་བརྩམ་པའི་རྩོམ་ཡིག་དེ་དག་གི་རོལ་མྱོང་བྱེད་མ་ཐུབ་པ་ཡིན་ན་ནི། ཕུ་བོ་ང་རང་ཁྱེད་ཀྱིས་དམར་གསོད་བྱས་པ་དང་གཅིག་པ་ཡིན།
ནུ་མོ་ལགས། ཁྱེད་རང་གིས་ཕུ་བོ་བདག་གིས་བཤད་པའི་སྐད་ཆ་འདི་དག་སེམས་སུ་གཉར་ ནས་རང་ཉིད་ལ་དམིགས་གསལ་གྱི་འགན་ཞིག་ཡོད་པ་སེམས་སུ་དམ་པོར་བཟུང་དེ་རྒྱང་རིང་ གི་ཕ་མ་དང་རང་ཉིད་ལ་གོ་སྐབས་དེ་འདྲའི་བཟང་བོ་ཞིག་སྤྲོད་གནང་མཁན་གྱི་བོད་ ཀྱི་འདི་ཕྱི་གཉིས་ཀྱི་སྐྱབས་གནས་༧གོང་ས་མཆོག་དང་བོད་གཞུང་གི་ལས་ཀྱི་སྣེ་མོ་ བ་དག་གིས་བཀའ་དྲིན་ལ་བསམ་ཤེས་དང་དྲིན་ལན་འཇལ་དགོས་པ་ཉིན་མ་རེ་རེའི་ནང་གི་ སློབ་ཚན་རེ་རེ་སྐབས་སུ་སེམས་ནང་དུ་དྲན་ཐུབ་པ་བྱེད་དགོས་ཀྱི་ཡོད།
བདག་གི་སྙིང་ནས་བརྩེ་བའི་ནུ་མོ་ལགས། ཕུ་བོ་ངས་བཤད་པ་འདི་དག་སེམས་སུ་འཛིན་རོགས་ཞུ། སླར་ཡང་འཕྲིན་ཐེངས་གཞན་ཞིག་ནས་འཇལ་ཡོང་།
ལགས་སོ། དེ་ལྟར་གང་ན་བཟོ་བཅོས་བྱེད་དགོས་ས་ཡོད་པ་དེ་དག་ལ་དུས་ཐོག་ནས་ལན་རེ་བསྐུར་བ་དེ་དག་ལ་སྙིང་ནས་ཐུགས་རྗེ་ཆེ་ཞུ།
ཁར་སང་ངས་ཁྱེད་ཀྱི་རྩོམ་དེ་ཡིག་གཟུགས་ཆུང་དྲགས་པས་ྐློག་མ་ཐུབ་པར་དེ་ལུགས་ཁྱེད་ལ་ཞུས་པར་ཁྱེད་ཀྱིས་བཟོ་བཅོས་བརྒྱབ་སྟབས་ད་ལྟ་ཡག་པོ་ྐློག་ཐུབ་ཀྱིན་འདུག ཐུགས་རྗེ་ཆེ།