བརྩེ་བའི་གྲོགས་པོ་ལགས། མི་ཟེར་བ་འདིས་སེམས་ནང་དུ་འདྲ་མིན་བཅོ་བརྒྱད་ཅིག་མི་འདོད་ཀྱང་རང་དབང་མེད་པར་ཤར་བཞིན་ཡོད་ཀྱང་། དེའི་ནང་གི་དྲན་གདུང་གི་དྲན་ཕྱོགས་འདི་ནི་མི་རང་ཉིད་ལ་མནར་གཅོད་གཏོང་བ་ཞིག་ལས་གཞན་གང་ལ་ཡང་མི་ཕན་པ་ཞིག་ཡིན་པ་ནི་ངས་མ་བཤད་ཀྱང་ཉིད་ཀྱིས་གསལ་བོ་ཤེས་སྲིད་རེད། དེའི་ཕྱིར་དྲན་གདུང་གི་སྡུག་བསྔལ་དེ་དག་ལ་བཟོད་བསྲན་བྱས་དེ་དྲན་ཕྱོགས་མང་བོ་ཞིག་རང་གི་སེམས་གཏིང་ནས་དྲན་ཕྱོགས་ལ་འགྱུར་བ་བཏང་ནས་ཁ་ཕྱོགས་གཞན་ཞིག་ནས་རང་ཉིད་ལ་སྟོབས་ཤུགས་བླ་མེད་སྟེར་ཐུབ་མཁན་གྱི་དྲན་ཕྱོགས་རེ་ལ་བསམ་བློ་ཞིག་གཏོང་ཐུབ་གནོང་རོགས། ངས་དེ་རིང་འདི་ནས་བཤད་བཞིན་པའི་སྐད་ཆ་དག་ནི་གྲོགས་མཆོག་ཁྱེད་རང་ལ་སེམས་གསོ་ཞིག་ཐུབ་ན་བསམ་ནས་བཤད་ཀྱི་ཡོད་པ་ལས་ཁ་བརྡ་སློབ་གསོའི་སྐད་ཆ་དེ་འདྲ་ཞིག་གཏན་ནས་མིན། ང་རང་ལྟ་བུ་ཞིག་གིས་ཉིད་ལ་ཁ་བརྡ་སློབ་གསོ་བྱེད་རྒྱུ་དེ་ནི་སངས་རྒྱས་ཀ་ཁ་ཟེར་བས་དཔེ་ལས་མེད་པ་རེད། དེའི་སྟབས་ཀྱི་དེ་རིང་གི་སྐད་ཆ་འདི་དག་ནི་ཉིད་དང་ཉིད་ཀྱི་བཟའ་མི་གང་བོ་དགའ་དགའ་སྤྲོ་སྤྲོའི་ངང་དུ་ཕན་ཚུན་གྱི་གདོང་དུ་ལྷད་མེད་དྲོད་ཁོལ་གྱི་འཛུམ་འདང་རེ་སྔར་ལས་ཀྱང་མང་རེ་འཕེལ་རྒྱུ་བྱུང་ན་བསམ་ནས་འབྲི་བཞིན་ཡོད།
ང་ཚོ་ས་མཐའ་ནས་རྒས་ཀྱང་ས་མཐའ་ནས་མི་ཤི་བའི་དམ་བཅའ་ཞིག་ང་ཚོ་སུ་ལ་ཡིན་ཡང་ཡོད་ངེས་ཡིན་དུས། མི་འགོར་བར་ཕ་རྒན་དྲིན་ཆེན་དེ་ལ་ཡང་ཁྱེད་བཟའ་མི་གང་བོ་འཇལ་འཕྲད་བྱེད་ཐུབ་ངེས་རེད། ང་ཚོ་དངོས་ནས་སྐྱེ་ས་གང་ནས་ཡིན་ན་འཆི་ས་ཡང་དེ་ནས་བྱེད་རྒྱུར་གྲོགས་པོ་ཁྱེད་རང་ལ་ཡང་འདོད་པ་ཡོད་ངེས་ཡིན་ལ་ང་རང་ལ་ཡང་འདོད་པ་དེ་འདྲ་ཞིག་དུས་རྟག་དུ་སེམས་ཁོང་དུ་ཡོད། དེའི་སྟབས་ཀྱིས་ང་ཚོས་རང་རང་གི་དྲིན་ཆེན་ཕ་མ་དག་གི་རེ་བ་དང་རྨི་ལམ་ཐུང་ཐུང་རེ་ཡིན་ཡང་ཨེ་འགྲུབ་ལ་བརྩོན་པ་བྱེད་དགོས།
བརྩེ་བའི་གྲོགས་པོ་ལགས། སྐྱོ་གདུང་གི་མིག་ཆུ་རེ་རེ་སེམས་གཏིང་ནས་གཞུར་ནས་དཀར་གཙང་གི་ཤོག་ངོས་སམ་དེང་དུས་ཀྱི་དར་ཆེ་བའི་གློག་ཀླད་ཀྱི་ནང་དུ་འབྲི་ཐེངས་རེར། ཉིད་ཀྱིས་ཕ་རྒན་དྲིན་ཆེན་གྱི་བཀའ་དྲིན་དྲན་བཞིན་སོས་དཀའ་བའི་དྲན་གདུང་གི་རྨ་ཁ་ལ་ཡང་ཡང་རེག་དུས། ཁྱེད་ཀྱིས་རང་གི་རང་ལ་ཚུགས་པ་ཟ་ཡི་འདུག་གམ། ངོ་མ་འུ་ཅག་ནི་ལས་ངན་ནང་གི་རྒྱུ་བཟང་ཞིག་ཡིན་ཆོག་ན་ཡང་། བོད་ཡིག་གི་ཡུ་ཀ་འགག་པའི་ས་མཐའ་ནས་ཁྱེད་རང་ལ་སྙིང་ནས་བརྩེ་བའི་གྲོགས་པོ་ཞིག་གི་ངོས་ནས་ལན་འདེབས་ཕྲན་བུ་རེ་བྱོས་དེ། ཉིད་ཀྱིས་ཐུགས་ཉམས་ལེགས་པོ་ཞིག་བཞེས་དེ་བསམ་བློ་གཏོང་ཁོམ་ཡོད་དམ། ཡོད་ན་ནི་ངས་ཁྱེད་རང་ལ་སྐད་ཆ་ཞིག་བཤད། ང་ཚོ་ནི་ས་མཐའ་ནས་རྒས་བཞིན་ཡོད་ལ་རང་གི་ཕ་མ་ཚོ་རང་ཡུལ་ནས་རང་དབང་གང་ཡང་མེད་པའི་གནས་བབ་ཞིག་གི་ཁྲོད་དུ་རྒས་དེ་སོང་དུས། ཁྱེད་རང་ལ་ཡང་དྲན་གདུང་གི་སྡུག་བསྔལ་ཡོད་པ་དེ་བཞིན་དུ་ང་ཚོ་བྱེས་ཡུལ་ནས་བསྡོད་མཁན་གང་མང་ལ་རང་རང་གི་ཕ་མ་དྲན་པའི་སྡུག་ཡས་དེ་ནི་སུ་ཡིན་ཡང་ཡོད་པ་ནི་བཤད་མ་དགོས་པ་ཞིག་ལོས་ཡིན། དེའི་ཕྱིར་རང་སྡུག་རང་གི་ཉོས་པ་རེད་ཟེར་སྲོལ་ཡོད་པ་ལྟར། སེམས་ཁོང་གི་ནད་ཚ་འདི་དག་ལ་དྲག་བསྐྱེད་བྱེད་ཐུབ་མཁན་ཡང་རང་ཉིད་ལས་ལྷ་རྗེ་གཞན་སུ་ཡང་མེད་པ་ཉིད་ཀྱིས་ཀྱང་ང་རང་ལ་བཤད་མྱོང་ཡོད་པ་མ་ཟད། ངས་ཀྱང་དེ་ལ་མོས་མཐུན་བྱེད་ཀྱི་ཡོད། ད་ལྟ་ཉིད་ཀྱིས་སྐད་ཆ་དེ་དག་ལ་ཕྱིར་འདང་རེ་བརྒྱབ་ནས་རང་སེམས་རང་གི་གསོས་དེ་ས་མཐའ་མི་སྐྱིད་ཀྱང་སྡུག་བསྒོམ་བྱེད་རྒྱུར་གོམ་གཤིས་བརྟེན་དགོས་པ་མ་རེད་དམ། ངས་དེ་འདྲ་ཞིག་བསམ་པ་དེ་ལྟར་ཁྱེད་རང་ལ་ལན་འདི་སྤྲིངས་པ་ཡིན།
