སེམས་ཀྱི་དུངས་པ་གཅིག་ལ་བསྲེས་ཉིན་ནས།།
རྒྱང་རིང་ས་མཐའི་གྲོང་དུ་ཕན་ཚུན་ལ།།
གླེང་མོལ་སྣ་ཚོགས་བྱས་པའི་བསྐོར་དྲན་དུས།།
ཤི་གསོན་འབྲེལ་ཐག་བར་གྱི་གཏམ་རྒྱུད་དག།
གསལ་བོར་ཤེས་པའི་གྲོགས་ཀྱི་དངས་མ་ཉིད།།
ད་སྐབས་རྒྱང་རིང་དཔག་མང་བོ་ཡི།།
ལུས་ཀྱི་འཚོ་ལམ་བར་ཐག་རིང་ན་ཡང་།།
ནང་གི་བརྩེ་ཞེན་རིང་དུ་སོང་མེད་པར།།
ཉིན་མཚན་ཁོམ་ལོངས་ཁྲོད་དུ་དྲ་ཁང་ནས།།
གཅིག་གི་གཅིག་ལ་སེམས་ཀྱི་གཏམ་གླེང་དུས།།
རྒྱང་རིང་ཡིན་པའི་སྣང་བ་རང་འགར་ཡལ།།
ཉིད་དང་བཟའ་མི་བུ་ཕྲུག་ཚང་མ་ལ།།
སྐུ་ཁམས་གསལ་ཐང་ཡིན་པར་རེ་བ་ཡོད།།
སེམས་ཀྱི་ངལ་གསོ་ཐོབ་པར་དེ་ལས་གལ།།
རྒྱུས་མེད་ཡུལ་འདིར་རྒྱུས་མེད་ལས་བྱེད་དུས།།
དུས་ཚོད་ཡོད་མེད་དཀའ་ངལ་མང་ན་ཡང་།།
དྲ་ཁང་ནང་དུ་བསྐོར་བ་ཡང་ཡང་ཞིག།
བྱེད་རྒྱུར་ང་ལ་སུན་སྣང་མེད་པ་དང་།།
སྒོར་མོའི་འགྲོ་སོང་མང་ཉུང་གང་ཡིན་ཡང་།།
ང་རང་དེ་ལ་འཕོངས་སེམས་གཏན་མེད་པར།།
ཉིད་དང་འདྲ་བའི་བོད་ཀྱི་དྲ་གྲོགས་ཚོས།།
བྲིས་པའི་ཟིན་བྲིས་དག་ལ་ཀློག་སྤྲོ་ནས།།
དུས་ཚོད་གང་ཡོད་འདི་རུ་ཡོང་གི་ཡོད།།
ཉིད་ཀྱང་དེ་ལྟར་དུས་ཚོད་གང་རེག་ལ།།
ཡང་ཡང་ཕེབས་ནས་ཟིན་བྲིས་སྤེལ་བ་འདིས།།
སེམས་ཀྱི་ངལ་བ་མེད་པར་སྐྱིད་སྣང་འདུག།
དེ་རིང་འདི་ཙམ་ཞིག་གི་མཇུག་བསྡུས་དེ།།
སླར་ཡང་མགྱོགས་པོར་འཇལ་བར་རེ་བ་ཡོད།།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
དྲ་གྲོགས་ཚོ་དེ་རིང་བོད་ནང་གི་དྲ་ཚིགས་མཆོད་མེ་དང་འབྲེལ་བའི་དྲ་ཚིགས་མང་བོ་ཞིག་སླར་ཡང་སྒཽ་ཕྱེ་འདུག ཀློག་མཁན་སུ་ཞིག་ཡོད་ན་དེ་རུ་ཕེབས་དང་ཀློག་ཐུབ་ཀྱི་འདུག ཡིན་ཡང་ཧི་གཟུགས་ཟིན་བྲིས་ད་དུང་སྒོ་ཕྱེ་མི་འདུག