འཐག་བཞིན་པའི་སེམས་ལུགས། དྲུག་པ།

དྲན་གཤིས་རྟ་རྒོད་འདྲ་བོ་བརྗེད་ཀྱིས་འཁྱེར།།
བརྩེ་བ་དངས་མའི་སྙིང་ཁམས་སད་ཀྱིས་བཅོམ།།
སྐྱེ་གཟུགས་མདའ་མོ་འདྲ་བོ་གཞི་ལྟར་འཁྱོག།
ཕར་བཤད་ཚིག་གི་རིན་ཐང་བྲག་ཆའི་སྤུན།།

སོ་ཕྲེང་སུམ་བཅུའི་འཕྲེང་ཐག་རྩ་བཞིན་འཐོར།།
ལུས་ཀྱི་རྩལ་དགུ་རུས་སྤལ་ནུར་དང་མཚུངས།།
ཐོད་པ་མེ་ལོང་གཟུགས་ལ་ཆག་སྐྱོན་ཤོར།།
ཐོས་འཛིན་བུ་རམ་མངར་མོ་སྐྱུར་ཁའི་བྲན།།

སྣ་འཛོམ་ཟས་ཀྱི་དངས་ཀ་ཡུན་གྱིས་འགག།
མིག་གི་རྒྱང་རིང་རི་བོ་རབ་རིབ་གྱུར།།
རོ་འཛིན་ལྕེ་ཡི་རེག་བྱ་མི་ཤེས་པར།།
དལ་མོ་སོང་ཡང་དབུགས་འདི་སྟོད་ལ་འཚང་།།

དད་པའི་སེམས་ཀྱིས་ཞལ་གཟུགས་འཇལ་འདོད་ཀྱང་།།
རྒས་པའི་ཁུར་རོ་འདི་ཡིས་མི་གཏོང་བར།།
སྐྱེ་ས་འདི་ནས་གོམ་བཀང་སྤོ་དབང་མེད།།
ད་ནི་སྨོན་ལམ་རེ་ཡིས་ཚིམས་པར་བྱེད།།

སྐུད་སྣེ་གཅིག་གི་སྣེ་མོ་ཨ་མྱེ་ཡོད།།
སྐུད་སྣེ་གཞན་གྱིས་སྣེ་རུ་ང་རང་འཇུས།།
ནང་གི་བཤད་པའི་གཏམ་གྱི་ཚོམས་པུ་འདིས།།
མི་སེམས་དམར་པོ་ལྷོག་ལྷོག་ལྡིང་དུ་བཅུགས།།