དུས་བབ་ཚང་གི་གསལ་བསྒྲགས་འདི་སྤེལ་མ་ཐག

དུས་བབ་ཚང་གི་གསལ་བསྒྲགས་འདི་སྤེལ་མ་ཐག་ངས་འདི་ལ་བསམ་ཚུལ་ཞིག་འབྲི་རྩིས་བྱས་པ་ཡིན་ཡང་། དེ་ནས་ཅུང་ཙམ་སྒུག་ནས་མི་མང་གི་ལྟ་ཚུལ་འམ་ཡང་ན་འོས་ཤོག་གི་མིང་ཉུང་ལ་གཅིག་བལྟ་དགོས་བསམ་ནས་སྒུག་པ་ཡིན། འོན་ཀྱང་། འོས་ཤོག་གི་མང་ཉུང་ནི་གོང་ནས་མཐོང་བ་དེ་རེད། འདི་ནི་དངོས་ནས་དུས་བབ་ཚང་གི་མི་མང་ལ་བསམ་ཚུལ་འདྲི་མི་དགོས་པ་ཞིག་རེད་འདོད། གང་ཡིན་ཟེར་ན། ང་ཚོ་ནི་དྲ་རྒྱའི་བརྒྱུད་ལམ་གསར་དུ་དར་བཞིན་ཡོད་པ་ལས་རྒྱུན་ལྡན་གྱང་ཆགས་མེད་པ་མ་ཟད། དྲ་ཐོག་དུ་ཡོང་མཁན་གྱི་གྲངས་ཀ་བོད་མི་ཚང་གི་མི་མང་གི་གྲངས་ཀ་དང་བསྡུར་ནས་འོང་ན་དེ་བས་ཀྱང་ཧ་ཅང་ཉུང་ཉུང་ཞིག་ལས་གང་ཡང་མ་རེད་ལ། དྲ་ཐོག་གི་གསར་འགྱུར་ཀློག་ཤེས་མཁན་དང་ཆ་རྐྱེན་ཡོད་མེད་དེ་ཡང་གནད་དོན་གཅིག་རེད། ད་དུང་། བོད་མི་ཚང་གི་མི་མང་བོ་ཞིག་གིས་དེ་བས་ཀྱང་རང་གི་སྐད་ཡིག་གི་དྲ་ཚིགས་ཤིག་ཡོད་མེད་ཀྱང་ཤེས་མ་ཤེས་པའི་མཚམས་རེད་ཅེས་བཤད་ཀྱང་ཆོག འདི་འདྲའི་གནས་སྐབས་ཤིག་ལ་དྲི་བ་འདི་འདྲ་ཞིག་ནི་དངོས་ནས་དགོད་བྲོ་བ་ལས་གང་ཡང་མ་རེད་འདོད། གང་ཡིན་ཟེར་ནས་དྲ་བའི་བརྒྱུད་ལམ་ཆེས་ཚད་མཐོ་བའི་རྒྱལ་ཁབ་ཁག་དུ་ཡང་ད་ནི་དྲ་བའི་བརྒྱུད་ལམ་ཚད་མཐོར་བྱིན་སྟབས། ཚགས་ཤོག་ཉུང་དུ་གཏོང་དགོས་ཀྱི་འདུག་ཟེར་མཁན་ལས་ཚགས་ཤོག་དེ་བས་ཀྱང་མང་དུ་བྱིན་པ་མ་ཟད། ཟླ་གཅིག་རིང་གི་ཚགས་ཤོག་བདུན་ཕྲག་དུ་བསྒྱུར་བ་དང་། བདུན་ཕྲག་གི་ཚགས་ཤོག་ཉིན་རེ་བསྒྱུར་བ་སོགས་ཀྱི་གནས་ཚད་ལས་དྲ་རྒྱའི་བརྒྱུད་ལམ་ཕྱུག་པོ་ཡིན་པས་ཚགས་ཤོག་དགོས་རབས་མེད་མཁན་གླེང་མཁན་དེ་བས་དཀོན་པོ་རེད། ལྷག་པར་དུ་བོད་པ་ངེད་ཚང་ལ་མཚོན་ན་དེ་བས་ཀྱང་དུས་བབ་ཚགས་ཤོག་འདི་ཉིན་བཅུ་རེའི་ཚགས་ཤོག་ལས་ཉིན་གཅིག་རེ་བསྒྱུར་མ་ཐུབ་ཀྱང་ཉིན་ལྔའི་ཚགས་ཤོག་དང་ཡན་ལག་ལས་ཁུངས་བོད་ཀྱི་གཞིས་ཆགས་གང་སར་ཡོད་པ་དེ་རུ་འཛུགས་ཐུབ་པ་ཡིན་པ་དེ་བས་ཀྱང་དགའ་བསུ་ཞུ་དགོས་པ་ཞིག་རེད་འདོད། དེའི་ཐད་ཀྱི་འབོད་སྐུལ་གཞུང་དང་སྒེར་གང་ལ་འབྲེལ་བ་འཛིན་དགོས་ཀྱི་ཡོད་ན་འབད་བརྩོན་བྱེད་པ་ལས། ཚགས་ཤོག་མི་འདོན་པའི་སྐད་ཆ་དེ་ནི་དངོས་ནས་ཡོང་ཤེས་པ་མ་རེད་སྙམ་པའི་བསམ་ཚུལ་འདི་དུས་བབ་ཚང་གི་ལས་བྱེད་ཐུན་མོང་དང་དྲ་གྲོགས་ཡོངས་ཀྱི་དཔྱད་གཞིར་བྲིས་པ་ཞིག་ལས་ང་རང་གིས་སྒེར་སེམས་དང་དམོད་ཚིག་འབོར་འདོད་དེ་འདྲ་ཡོད་མེད་དེ་ནི་ཀློག་མཁན་ཡོངས་ཀྱིས་བལྟས་དེ་བཤད་རྒྱུ་ཞིག་ལས་ང་རང་ལ་འདི་ནས་དབང་ཚད་གང་ཡང་མེད་པར་ཐག་བཅད་ཆོག་པ་རེད།