ཚུགས་ཀ་མེད་ཀྱང་བཟོ་ལྟ་བཏོན་ཡོད།

ཚོང་ཟེར་བ་འདི་ཕུ་ཐུང་ནང་ནས་འགྲིག་རུང་ཆོག་ལ་ཕུ་ཐུང་ཕྱི་ནས་འགྲིག་རུང་ཆོག་གི གཙོ་བོ་ཚོང་རྒྱག་དགོས་ནི་རེད། ཡིན་ནའང་། ཚོང་ལམ་འདི་བཟང་རྒྱུ་མེད་ཀྱང་། གཙོ་བོ་ངའི་ཚོང་རྫས་ས་གནས་གང་སར་སླེབས་རྒྱུ་གལ་ཆེན་རེད་ལ། ཚོང་པ་རྙིང་པ་ཁྱོད་ལྟ་བུའི་ལག་ཏུ་འབྱོར་རྒྱུ་དེ་བས་ཀྱང་གལ་ཆེ་བས་ངས་ཚོང་ལམ་འདི་མི་བརྒྱུད་ཐབས་མེད་རེད་ཡ། ཀུ་རེ་ཡིན།

ངས་དང་པོ་ཉིད་ནས་རང་རེ་གཉིས་ཀྱི་ཚོང་དེ་ཕུ་ཐུང་ནང་ནས་གཏམ་དགོས་པ་ཞིག་ཏུ་མཐོང་སོང་། ལྟོས་དང་། ད་ཡིན་ན་ཕུ་ཐུང་ཕྱི་ནས་འགྲིགས་སོང་། ཡིན་ན་ཡང་གཟབ་གཟབ་བྱོས་མ་གཏོགས་ཚོང་ལམ་འདི་བརྒྱུད་ནས་ཡོང་མཁན་ཇེ་མང་དུ་གྱུར་ན་ཁྱོད་ལ་གྱོང་རེག་གི་རེད་དོ། །གང་ལྟར་ཐུགས་རྗེ་ཆེ།

དྲ་གྲོགས་འབྲོག་རུ་བ། ཨ་རིག་གླེན་རྒན་ངས་ཐེངས་འདིར་ཡང་གླེན་རྟགས་ཚ་ཐག་ཆོད་ཅིག་བསྟན་པར་ཁྱེད་ཀྱིས་གདེང་འཇོག་གནང་བར་ཐུགས་རྗེ་ཆེ་ཞུ། ཉིན་ལྔ་ནང་ཚུན་དུ་དེབ་གཉིས་ངྷ་ས་དབུས་ལས་ཁུངས་སུ་འབྱོར་ངེས་པས་དེ་རུ་རག་ཐུབ། ཐུགས་འཇགས་འཚལ།

ཧཧཧཧ
འུ་གཉིས་ལ་ཚོང་གཏན་ནས་འགྲིག་ས་མ་རེད། ཀུ་རྩེད་ཞུས་པ་ཡིན།
སྐུ་ཉིད་ནི་དེབ་ཀློག་པར་སྤྲོ་ཞིང་རང་རེའི་བཙན་བྱོལ་བའི་སྤྱི་ཚོགས་ཁྲོད་ཀྱི་རྩོམ་པ་བོ་རྒན་གྲས་ཤིག་ཡིན་སྟབས། ཉིད་ཀྱིས་ཕྲན་ཆུང་གཉིས་ཀའི་དེབ་ཀློག་པ་ཙམ་གྱིས་ངེད་གཉིས་ཀྱིས་འདོད་པ་ཡོངས་སུ་ཁེངས་པ་ཡིན་པས། ཉིད་ཀྱི་སྡོད་གནས་ཁ་བྱང་སྤྲོད་དང་རིན་མེད་དུ་སྐུར་ཆོག ཐེངས་འདིར་རིན་མེད་ཟེར་བ་ལས་དེབ་གླ་དང་བསྐུར་གླ་གཉིས་ཀ་བཤད་ཀྱི་མེད། ད་ངེད་གཉིས་ཚོང་ཡོང་ས་ཨེ་རེད།

ཁ་བྱང་ཤིག་ཅེས་པ་ཞིག་ཏུ་བཅོས་རོགས།

དེབ་དེ་ཨ་རི་ནས་མངགས་ཉོ་བྱེད་ཐུབ་བམ། ང་ནི་ལས་དབང་དམན་པར་མགོ་གནམ་ལ་མི་རེག་རྐང་བ་ས་ལ་མི་ཐུག་པའི་ས་མཐའ་སྡེ་མཐའ་ཞིག་ཏུ་འདི་ལྟར་ལྷུང་སོང་།

དྲ་གྲོགས་གངས་རིའི་གངས་བུ་ལགས།
སྐུ་ཉིད་ཀྱིས་རྭ་རྒྱ་བློ་དབང་དང་ཕྲན་ཟུང་ལ་ཡང་དང་རིམ་པས་ཐུགས་ཁུར་དང་རྒྱབ་སྐོར་གནང་བ་མ་ཟད། འདིར་སླེབས་ནས་དེབ་སྐོར་ལས་འཕྲོས་པའི་བསམ་ཚུལ་བརྗོད་པ་བཅས་ལ་སྙིང་ཐག་ནས་ཐུགས་རྗེ་ཆེ་ཞུ།

དྲ་གྲོགས་བསྟན་འཛིན་ཚེ་དཔག་ལགས། ངས་ཁྱེད་ཀྱི་མིག་མདུན་དུ་ཚགས་ཤོག་ཡིག་ནོར་ཅན་མང་བོ་ཞིག་སྤུངས་ཟིན་པས་མི་ཚད། ད་ཡང་དེབ་ཅིག་དྲུད་ནས་ཡོང་དུས་ཁྱེད་རང་རྦད་དེ་ཉོབ་འགྲོ་བར་ཧ་ཅང་སྐྲག དེ་ནི་དེབ་བསྒྲགས་སྐབས་ཁ་བར་ལག་བར་ནས་ཤོར་བའི་ཡིག་ནོར་མང་དག་ཅིག་ཁ་སང་དེབ་དཔར་ཚར་དུས་གཞི་ནས་རེ་རེ་བཞིན་མཐོང་ཡོང་གི་འདུག་པས་ཡིན། ཡིན་ནའང་། ཁྱེད་ཀྱིས་ལྷག་བསམ་རྣམ་དག་གིས་རྟེན་འབྲེལ་ཞུས་པ་དང་། དེབ་ཇི་ལྟར་རག་མིན་སྐོར་ཞིག་དྲིས་པ་ཙམ་གྱིས་བདག་ཉིད་དགའ་སྤྲོས་མྱོས་ཡོད། ཐུགས་རྗེ་ཆེ་ཞུ་བ་ཡིན།
གལ་སྲིད་སྐུ་ཉིད་ལ་སེ་ར་དགོན་ན་ངོ་ཤེས་འདྲ་ཡོད་ཚེ་སེ་ར་དགོན་ནས་རག་གི་ཡོད། དེབ་གླ་ཧིན་སྒོར་ ༥༠ རེ་ཡིན་པས་འཁོས་ཀ་ཞན་ཡང་ཉོ་ཐུབ་ལ། དེ་ཡང་སྦྱིན་ཐུབ་ཀྱི་མེད་ཚེ་འབུལ་ཆོག

དྲ་གྲོགས་ཚོ། ངས་ལག་ཟུང་ཐལ་མོ་སྦྱར་ཏེ་ཁྱེད་ཅག་གི་ལྷག་བསམ་རྣམ་པར་དག་པའི་གསུང་མོལ་དག་ལ་ཐུགས་རྗེ་ཆེ་ལན་བརྒྱར་ཞུ་རྒྱུ་ཡིན། ཁ་སང་ཉིན་དེབ་བཀྲམས་པ་རེད། ངས་བསམ་ན་དྲ་གྲོགས་ཚོས་འདིའི་དགེ་སྐྱོན་གཉིས་ཐད་ནས་མང་དག་ཅིག་མཐོང་ཡོད་རྒྱུ་རེད་ལ། གླེང་འདོད་པ་མང་དག་ཅིག་ཀྱང་སེམས་ངོགས་སུ་འཚང་ཁ་རྒྱག་བཞིན་ཡོད་ངེས་པས་ངེས་པར་དུ་གསུངས་རོགས་མཛོད།

དེ་མིན་དྲ་གྲོགས་ལྕགས་རྒྱ་འགྲམ་ནག་ལགས། གོང་གི་མཆན་མཁན་དག་གིས་ཁྱོད་ལ་བསྐུལ་བ་ལྟར་དེ་རིང་ནས་ཉིད་ཀྱིས་ཀྱང་ཟིན་བྲིས་རེ་སྤེལ་ན་བཟང་གི་སྙམ། ང་ཚོས་ཁྱོད་ཀྱིས་བཤད་པའི་གསུང་མོལ་ཐུང་ངུ་ཞིག་ཡིན་ནའང་རིན་ཐང་ཆེན་པོ་ཞིག་ཏུ་ཚོར་གྱི་ཡོད་ལ། དངོས་གནས་དེ་ལྟ་བུའི་རིན་ཐང་ཡང་ལྡན་ནས་འདུག

དྲ་གྲོགས་ཡོངས་ལ་སྙིང་ནས་བསྟོད། ཁྱེད་རྣམ་ཞལ་བྲོ།

གནས་སྐབས་རིང་སྒྱིད་ལུག་གི་དབང་དུ་ཤོར་ནས། དྲ་ཐོག་ཏུ་ཡོང་ཐུབ་མ་སོང་། དེ་རིང་དྲ་གྲོགས་མང་དག་ཅིག་གི་རྩོམ་ཡིག་བཀླགས་ཏེ་སྣང་བ་སྐྱིད་པོ་བྱུང་། ཁ་སྔོན་བོད་ནང་གི་དྲ་རྒྱ་ཁག་དེ་དག་ཀློག་སྐབས་བཙན་བྱོལ་གྱི་ཟིན་བྲིས་པ་ཁག་ཅིག་གིས་ཀྱང་ཟིན་བྲིས་ཐོ་འགོད་བྱས་ཡོད་པ་མཐོང་ནས་ཧ་ཅང་དགའ་སོང་། ཡིན་ནའང་དེ་རིང་རྡོ་འབུམ་དཔེ་འཕྲིན་གྱི་ཝེ་ཁེ་རིག་མཛོད་ཆེན་མོའི་དྲ་རྒྱ་རུ་འཛུལ་སྐབས། དེའི་ཐོག་ཏུ་གནས་ཚུལ་སྤེལ་གྲངས་ཧ་ཅང་ཉུང་བ་མཐོང་ནས། ཡང་སྐྱར་དྲ་ཐོག་ཏུ་ཡོང་སྟེ་དྲ་གྲོགས་ཚོ་དང་མཉམ་དུ་དེའི་སྐོར་ལ་ཁ་བརྡ་ཤིག་བྱས་ན་བསམ་བྱུང་། དུས་ཚོད་དང་འདོད་མོས་ཡོད་མཁན་ཚོས་ཝེ་ཁེ་རིག་མཛོད་ཆེན་མོ་དེར་མིག་བཤེར་ཤིག་བྱོས་དང་། http://bo.wikipedia.org ང་ཚོར་དེའི་ཐོག་ན་སྟོང་ཆ་མང་པོ་ཞིག་ཁ་སྐོང་བྱེད་རྒྱུ་འདུག ས་ཆའི་ཁོངས་ནས་གཅན་ཚའི་གནས་ཚུལ་ཅུང་ཙམ་ཞིབ་ཕྲ་འདུག དེ་མ་གཏོགས་ཕལ་ཆེར་ས་བཅད་མ་སྟོང་ཙམ་རེད། ཕན་ཚུན་སྡིགས་རེས་བྱས་ཏེ་དུས་ཚོད་སྐྱེལ་བ་ལས་ང་ཚོས་ལས་གཞི་འདིའི་ཐོག་ཏུ་མཉམ་རུབ་བྱས་ན་མི་རབས་ཚ་རྒྱུད་ལ་ཕན་པའི་ལས་ཞིག་ཏུ་འགྱུར་རྒྱུ་རེད་ཨང་སྙམ།

དྲ་གྲོགས་ཁ་བ་དཀར་པོའི་ཐུགས་རེ་ལྟར་གུས་པ་གཉིས་ཀྱི་དེབ་ཀྱི་དཀར་ཆག་འདིར་འགོད་ཀྱི་ཡིན། དེབ་གཉིས་ཀར་ཤོག་གྲངས་ ༡༧༤ རེ་ཡོད། དེ་ཆེད་དུ་དམིགས་པ་མ་ཡིན་པར་སྟེས་དབང་གིས་དེབ་གཉིས་ཀར་མང་ཉུང་མེད་པ་ཞིག་ཆགས་སོང་།
ཨ་རིག་འགྱུར་མེད་ཀྱི་རྩོམ་དེབ། གླེང་མོལ་གྱི་དཀར་ཆག
༡གླེང་མོལ་གྱི་རང་གཏམ། ༢བལྟས་བལྟས་རིག་རིག་ཏུ། ༣ང་ཚོའི་འདོད་རྔམ་དང་དཔལ་འབྱོར་གནས་བབ། ༤ངའི་ཀུན་སྤྱོད་དག་ཉམས་རྒུད་དུ་འགྲོ་བཞིན་འདུག ༥༸གོང་ས་མཆོག་སྐུ་ངལ་གསོ་དགོས་ཀྱི་འདུག་གམ ༦༸གོང་ས་མཆོག་སྐུ་ངལ་གསོ་རན་འདུག ༧བགྲེས་སོང་ཁོང་གི་བདུན་ཕྲག་གཉིས་རིང་གི་མཛད་འཕྲིན་ཁག ༨བཙན་བྱོལ་བོད་གཞུང་སྒོ་བརྒྱབ་པའི་ཉིན་ནི་བོད་དོན་ཐག་གཅོད་བྱུང་བའི་ཉིན་ཡིན། ༩བོད་རྒྱ་མི་རིགས་གཉིས་ཇི་ལྟར་མཉམ་གནས་བྱེད་དམ། ༡༠པར་ཐོག་གི་བཟའ་ཟླ། ༡༡དཀྲོག་གཏམ་འདི་དག་སུས་བཟོས་པ་རེད། ༡༢བོད་མིའི་སེམས་ཁོང་གི་བོད་མི། ༡༣གླུ་མ་རིག་འཛིན་སྒྲོལ་ལ་གདངས་སུ་གྱེར་བ། ༡༤སྤྱི་ཚོགས། རྩོམ་པ་པོ། རྩོམ་རིག ༡༥ང་རྩོམ་པ་པོ་དང་གསར་འགོད་པ་ཞིག་མ་རེད། ༡༦མར་མེ་འདི་གཟིམ་པ་མེད་པར་སྨོན། ༡༧ངས་འདི་ལྟར་ཞུ་འདོད། ༡༨སྟོང་ལོ་བརྒྱད་པའི་ཤར་དུང་རི་ལས་འཕྲོས་པའི་གཏམ། ༡༩དུས་འགྱུར་རྩོམ་ཡོན་དང་བདག་གི་རྨི་ལམ། ༢༠ཟླ་བ། ངའི་བརྩེ་དུང་གི་དཔང་པོ། ༢༡ཐུགས་རྗེ་ཆེ་ཞུ།
བཅས་ཡིན། རྩོམ་དེབ་ལ་ཤོག་གྲངས་༡༧༤་ཡོད།

རྭ་རྒྱ་བློ་དབང་གི་དེབ། གྲྭ་སའི་ཟིན་ཐོའི་དཀར་ཆག
༡སྔོན་དུ་བཏང་བའི་ཚིག་འགའ། ༢མི་གཞིའི་འཕྲོས་བཤད། ༣གྲྭ་སའི་ཟིན་ཐོ་ལས། གྲྭ་བ་དང་བོད་ཀྱི་ཤེས་རིག་གི་འབྲེལ་བ། ༤བོད་ལ་རང་སྐྱོང་གི་ཐོབ་ཐང་མེད། ༥ང་སྤེ་ཏི་ནས་ངུས་པ། ༦ཡར་ལངས། ལས་འགུལ། ༧གྲྭ་བ་ཚོ་མི་མ་རེད། ༨གྲྭ་སའི་ཟིན་ཐོ་ལས། བོད་ཀྱི་ཤེས་རིག་བསྐྱར་ཟློས་དང་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་གདོང་རིས། ༩འཛམ་གླིང་འདི་ན་བོད་པ་གཅིག ༡༠བཙན་བྱོལ་བོད་མིའི་དམིགས་བསལ་གྱི་འོས་འགན་དང་བོད་ཀྱི་སྤྱི་ཚོགས། ༡༡མིའི་རིན་ཐང་ནི་ནམ་ཡང་ཆ་མཉམ་ཡིན། ༡༢བཙན་བྱོལ་བོད་མིའི་རྩོམ་རིག་སྣང་ཚུལ་ལས་འཕྲོས་པའི་བསམ་ཚུལ་འགའ། ༡༣མཐོང་ཆུང་ཚད་མེད་མྱོང་བའི་བོད་མི་དམངས། ༡༤ཡི་གེ་འགའ་ཞིག་གི་སྒྲ་གདངས་ལས་འཕྲོས་པའི་བསམ་ཚུལ་ཐོར་བུ། ༡༥བོད་ཀྱི་གཞིས་ཆགས་ཁག་ལ་བོད་ཡིག་གཏན་ནས་མི་མཁོ། ༡༦ཉིན་འདི་ཚོར། ༡༧འོད་དང་མུན་པའི་རྣམ་བཤད།
ཤོག་ངོས་༡༧༤ ཡོད།

དུས་བབ་ཚང་གི་གོ་ཁ་ནས་གླེང་མོལ་ཡང་ཡང་བྱས་མྱོང་བའི་བཀུར་འོས་དྲ་གྲོགས་ལྕགས་རྒྱ་འགྲམ་ནག་ལགས། ཡུན་རིང་ཞིག་ལ་མཐོང་རྒྱུ་མ་བྱུང་བར་བློ་ཕམ་ཡང་ཡང་སྐྱེས་མྱོང་ལ། སྐད་ཤུགས་ཆེན་པོས་ཁྱོད་ཕྱོགས་སུ་ཀུ་རིང་རེ་འདེབས་རྒྱུའང་དྲན་མོད། ཡང་ཆུ་ནང་རྟུག་དྲི་བཏང་བ་ལས་མེད་པར་བསམ་ནས་འདི་ལྟར་ཁ་རོག་གེར་བསྡད་པ་ཡིན། དེ་རིང་སྟབས་ལེགས་ཏེ་ཁྱོད་རང་སླར་ཡང་འདིར་སླེབས་པར་འཚམས་འདྲི་དང་དགའ་བསུ་ཞུ། དེ་བས་སྔར་བཞིན་ངེད་ཟིན་བྲིས་པ་ཚོའི་སྐུ་མགྲོན་དུ་ཕེབས་པའི་རེ་བ་ཡོད།

དེ་རིང་གྲོགས་པོ་བློ་དབང་དང་འགྱུར་མེད་གཉིས་ཀྱིས་དེབ་བཏོན་པ་ལ་རྗེས་སུ་ཡི་རང་ཞུ། ད་དུང་ཁྱོད་གཉིས་ཀྱིས་དེབ་ཀྱི་རྒྱབ་ཤ་དང་ཚོན་མདངས་ཀུན་གྱིས་ཡག་རབས་དང་རྒྱན་རབས་ཟེར་གྱིན་འདུག ཚིག་སྦྱོར་དང་དག་ཆ་ཐད་ནས་གཞན་གྱིས་ཡིད་སྨོན་མ་ཤོར་ན་དམའ་འབབ་མི་བྱེད་པ་ཕྲན་ལ་གདེང་འཇོག་དང་ཡིད་ཆེས་ཡོད། འདི་ལྟ་བུའི་དེབ་སྤུས་གཙང་ཞིག་རིག་དུས། སེམས་དང་བསམ་པའི་ངོས་ནས་དགའ་རྒྱུ་ཞིག་ཡོང་གིན་འདུག དེ་ནི་ཕལ་ཆེར་ང་ཚོ་རིང་ནས་འགྲོགས་འདྲིས་ཟབ་པ་དང་ཕན་ཚུན་ལ་ལྷད་མེད་པའི་བརྩེ་དུང་ཞིག་ཡོད་པའི་ཡིན་རྒྱུ་རེད། མཐར་ཁྱེད་གཉིས་ཀྱི་བསམ་དོན་མྱུར་འགྲུབ་ཡོང་བའི་སྨོན་འདུན་ཞུ། ཁ་བྲོ་བཀྲ་ཤིས།

དྲ་གྲོགས་གསར་བརྗེ་སྐྱབས་དང་། བོད་ཤ་ཁྲག་རུས་གསུམ། ཁ་བ་དཀར་པོ། ལྷ་ཆབ་སྦྱིན་པ། བོན་རྒྱ་བསྟན་འཛིན་རབ་རྒྱས། མེ། མི་ཞུན། ཇིང་སྲས་མིག་གསུམ་པ། གངས་རིའི་གླིང་བུ་བཅས་ཀྱིས་རྒྱབ་སྐྱོར་དང་སེམས་ཤུགས་ཀྱི་སྐུལ་བརྡ་བཏང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ངེད་གཉིས་ཀྱི་དཔེ་དེབ་ནི་ཤེད་མ་རྒྱས་པའི་རྟེའུ་སྤང་དུ་ལྷུང་བ་དང་འདྲ་བར་སྤྱི་ཚོགས་ཀྱི་གཡོ་སྐྱོམས་དྲག་པོ་ཁྲོད་སྒྱིད་པ་འདར་བའི་ངང་ཚུལ་ཕྱིར་བསྟན་པ་ཙམ་ལས་མ་འདས་མོད། བོད་ཡིག་གི་འཁོར་བསྐྱོད་རྒྱ་ཆེར་འགྲོ་བཞིན་པ་འདིར་སྙིང་དགའ་བའི་རང་བཞིན་རྨ་མེད་པ་ཞིག་ཁུར་ཡོད་པས། ཕྱིས་འབྱུང་གི་ཁྲོད་ནས་གུས་པ་གཉིས་ལ་དྲ་གྲོགས་ཚོའི་ལམ་སྟོན་དང་རྒྱབ་སྐྱོར་མུ་མཐུད་ཡོང་བའི་འབོད་སྐུལ་ཞུ། དེ་མིན་གུས་པ་གཉིས་ཀྱི་དེབ་དེ་བཀླགས་ཟིན་པའི་དྲ་གྲོགས་ཚོས་དགེ་སྐྱོན་ཐད་ཀར་གསུང་བའི་རེ་འབོད་ཡང་ཡང་ཞུ་བ་ལགས།

ཨ་རིག་འགྱུར་མེད། ཁྱོད་དངོས་གནས་ངར་བ་རེད། དེབ་ཆུང་གཉིས་ཀྱི་ཚེ་སྲོག་ངལ་གྱིས་བསྐྲུན་པ་ལ་ཞེ་བསམ་པའི་གཏིང་ནས་རྟེན་འབྲེལ་དང་དགའ་འབོད་ཡིད་རངས་བྱེད་བཞིན་ཡོད་ལགས། ཨ་མའི་བུ། མུ་མཐུད་དུ་ཤུགས་སྣོན་བརྒྱག་ཡ་ཡིན་ད།

ཁྱེད་རྣམ་པ་ཚོའི་ཞལ་བྲོ། སྙིང་ནས་ཐུགས་རྗེ་ཆེ་ཞུ་བ་ཡིན།

དྲ་གྲོགས་རྭ་རྒྱ་བློ་དབང་དང་ཨ་རིག་འགྱུར་མེད་གཉིས་ཀྱིས་རྩོམ་སྒྲིག་བྱས་པའི་དེབ་འདི་གཉིས་དངོས་གནས་ཡག་པོ་འདུག འདི་ནི་རྒྱབ་སྐྱོར་ཞུ་དགོས་ས་དང་ཡི་རངས་ཞུ་དགོས་ས་ཞིག་རེད། ད་དུང་འདི་ནི་ལྷག་བསམ་རྣམ་པར་དག་པའི་རྩོལ་བ་ཞིག་ཀྱང་རེད། རྒྱང་རིང་བྱང་མཐའ་ནས་ལྷོ་མཐའི་གྲོགས་པོ་གཉིས་ལ་བཀྲ་ཤེས་བདེ་ལེགས་གྲངས་མེད་ཞུ་བ་དང་ཆབས་ཅིག་ཁྱེད་གཉིས་ཁ་བྲོ། བྱ་གཞག་ལམ་ལྷོང་བྱུང་བར་རྟེན་འབྲེལ་ཞུ་ཞེས་ལྷ་ཆབ་པས་སོ།།

ཁྱེད་གཉིས་ལ་བཀྲ་ཤིས་བདེ་ལེགས་ཞུ། དེབ་དེ་མཐོང་མེད་ན་ཡང་དྲ་རྒྱའི་ནང་གི་ཟིན་བྲིས་དག་དཔར་བསྐྲུན་བྱས་པ་ཡིན་དུས། ཀློག་མཁན་དང་བོ་ཞིག་གིས་གྲངས་ཆགས་ཡོད་པ་རེད། དངོས་ནས་དགའ་བོ་བྱུང་། འདི་ལྟར་ཁ་ཡོད་ལག་ཡོད་ཀྱིས་ལམ་དུ་ཞུགས་དེ་བོད་པ་ཚང་གི་བོད་ཡིག་གི་སྤྱོད་སྒོ་རྒྱ་ཆེ་རུ་གཏོང་ཐབས་སུ་ཚང་མས་ཧུར་ཐག་བྱེད་ལོས་དགོས།