རང་གི་མགོ་བོ་གནམ་གྱི་ཀ་བ་བཞིན།།
གཞན་གྱི་མགོ་བོ་ལྕགས་ཀྱི་འཕུར་བ་ལྟར།།
འདི་འདྲ་འདི་ཡང་དེང་རབས་གཞོན་སྐྱེས་ལུགས།།
ཁ་ནས་གང་ཐོན་གསར་གཏོད་མ་འདོད་ཅིག།
མིག་གིས་གང་རིག་བདེན་པར་འཛིན་མིན་ནི།།
མ་རིག་བློ་ཡིས་དཔྱད་པ་ཞིབ་མོ་གནོང་།།
བྲག་ཆ་ལྟ་བུ་སྐད་ཤུགས་ཆེ་ན་ཡང་།།
སྟོང་བའི་དབྱིངས་ནས་གཞུར་དུས་ཚར་ནི་རེད།།
དེ་ལས་དགེ་སྡུག་ལེགས་ཉེས་ཡ་རབ་ལུགས།།
མི་ཆོས་རྩ་བ་མཐུན་པའི་གཏམ་རེ་ཤོད།།
དེ་མིན་ང་འགྲོ་ཁྱོད་བསྡོད་སྐད་ཆའི་རིགས།།
བཤད་ཀྱང་སྙིང་བོ་དེ་ཙམ་མི་འདུག་ལ།།
ཐོས་ཀྱང་ཉན་འདོད་དེ་འདྲ་མེད་པའི་གཏམ།།
གཞུག་ནས་འདི་རུ་མ་སྒྲོག་བོད་ཀྱི་བུ།།
བོད་སེམས་བོད་པའི་འཛིན་སྟངས་ཅི་ཡིན་སོགས།།
མེས་པོ་དག་གིས་རླབས་ཆེན་ཤུལ་བཞག་ལ།།
ཉིན་མཚན་ལྷོད་མེད་ཤ་དང་རུས་པའི་བརྩོན།།
དེ་ཡི་རྗེས་སུ་རང་རིགས་བདེན་རྫུན་ལ།།
རླུང་ཁའི་སྤུན་ལས་འདུས་པའི་གཏམ་རེ་ཤོད།།
དེ་མིན་མི་དང་ལྷ་འདྲེ་རྩོད་རྒྱུ་ནི།།
གངས་ཅན་བོད་པ་ཚང་གི་ད་ལྟའི་དགོས།།
སྒྲུབ་བྱའི་དམིགས་དེ་དེ་ཉིད་མ་ཡིན་པར།།
ཁ་ནས་སྨྲ་བརྗོད་དགོས་ཞེས་བཤད་སླ་ཡང་།།
དོན་ལ་སྨྲ་བརྗོད་བྱེད་ལུགས་དེ་འདྲ་མིན།།
སྨྲ་བརྗོད་ཡོད་ན་ཁོར་ཡུག་དོག་ས་ནས།།
རང་གི་འགྲོ་འདུག་སྤྱོད་གསུམ་གང་བྱེད་སོགས།།
དོག་དང་སྐྲག་སྣང་ངང་དུ་འཚོ་བ་ཡི།།
རང་རིགས་མི་བོ་དེ་དག་ཅི་ཞིག་བྱུང་།།
སྐུ་མཁྱེན་སྐུ་མཁྱེན་གཞོན་སྐྱེས་ཞོགས་མིང་རིགས།།
མ་བརྗེད་མ་བརྗེད་ཤ་དང་རུས་པའི་ཁུངས།།
མི་རིགས་ལར་ཞེན་འཛིན་ལུགས་ཐུགས་ལ་གཉོར།།
འདི་ནི་བདག་གིས་སེམས་ཀྱི་སྐད་ཆ་ཡིན།།
ངེད་ཅག་མི་རིགས་གཅིག་གི་བདེ་སྡུག་ལ།།
ཤི་ཡང་འགན་འཁུར་བྱེད་མཁན་ཆགས་པ་ཡི།།
ད་ལྟའི་དུས་རབས་འདི་ཡིས་གཞོན་སྐྱེས་རེད།།
ཀློག་ཐེངས་རེ་སེམས་པ་འདར་ཟུག་རྒྱག་སྟབས། ཤར་མར་ཐོལ་བྱུང་དུ་བྲིས་པ་ཡིན།
གཤམ་གསལ་གྱི་འདི་ནི་བོད་ནང་གི་རྩོམ་པ་པོ་ལྷམ་ཀོག་གིས་རྩོམ་ཡིག་འདི་ལ་བཏབ་པས་བསམ་ཚུལ་ཞིག་ཡོད་པ་འདི་རུ་བཀོད་པ་ཡིན།
ཤ་དང་ཁྲག་དང་རུས་པ་བོད་ཀྱི་ཡིན།།
སྙིང་དང་གློ་དང་སེམས་ཀྱང་བོད་ལ་འཁོར།།
ལུས་དང་ངག་དང་ལུས་ཀྱིས་བོད་དོན་སྒྲུབ།།
གྲོགས་ཁྱོད་རིང་དུ་གནས་ཀྱང་རང་གི་མྱི།།
གཞིས་བྱེས་ཀུན་གྱི་སེམས་དོན་འོ་ཆུ་བཞིན།།
གཅིག་ཏུ་འདྲེས་པའི་དོན་ལ་འབད་པའི་སླད།།
སྐབས་ཀྱི་དགོས་པ་དོན་གྱི་དམིགས་པ་དག།
ཞེ་ལ་ཞོག་ཅིག་ང་ཡི་རྒྱང་རིང་གྲོགས།།
དོན་མེད་ཀུ་ཅོ་མ་ཡིན་རང་གི་སེམས།།
དཀྱིལ་ལ་བཞག་ཏེ་ནང་གཏམ་སྨྲ་བ་ལ།།
ཞེ་འཁོན་རིང་ནས་མ་འཛིན་བས་མཐའི་གྲོགས།།
ནང་གི་འཁོར་རྒྱ་ཅུང་ཟད་ལྷོད་ལྷོད་གྱིས།།
བོད། ཤ་ཁྲག་རུས་གསུམ་ལགས་བྲིས་བ་བཟང་ཧ་ཅང་ཡག་པོ་འདུག་མུ་མཐུད་དུ་འབད་པ་བྱེད་རྒྱུ་འུ་ཅག་བོད་པ་ཚང་གི་མི་རབས་གསར་བ་ཚོའི་ཕྲག་གཏེང་ལ་བབ་པའི་འགན་འཁྲི་རེད།
འཇམ་མགོན་ལགས་ཀྱིས་བསྟོད་བསྔགས་མགོ་ནས་གནང་།།
བསེ་རུ་ལགས་ཀྱིས་གཞུག་ནས་རམ་འདེགས་མཛད།།
འདི་འདྲ་འདིས་ཀྱང་བོད་སེམས་འདྲིས་པའི་སྤུན།།
དྲ་ཐོག་འདི་ནས་ཡང་ཡང་འཇལ་བ་སྤྲོ།།
དྲ་གྲོགས་ཉིད་ཀྱི་སེམས་ཚོར་ཅི་ཡོད་པ།།
མ་གསང་དྲང་པོར་ཟིན་བྲིས་དོ་རར་བཤམས།།
བདེན་རྫུན་སྲང་ལ་འདེགས་པའི་གཟུ་བོའི་མི།།
དྲ་བའི་གོ་ལ་འདི་ལ་གཅིག་གཉིས་མིན།།
གྲོགས་བོད་། ཤ་ཁྲག་རུས་གསུམ་ལགས། བཀླགས་ཟིན་པ་ཡིན། ཁྱེད་ཀྱི་ལྡུམ་ར་ལ་ང་གཡུ་སྦྲང་བཞིན་འཁོར་ནས་ཡོད། བྲིས་བ་ཧ་ཅང་ཡག་གི་མུ་མཐུད་འབད་པ་བྱོས།