ཀ་ལུའི་ཕྲེང་ཐག་འདི་ནས་བསྟར་ན་ཡང་།།
ཁ་སེམས་བྲང་དུ་སྤྱར་ནས་གཏམ་རེ་ཟུང་།།
ག་ནས་བསྡད་ཀྱང་ཐོས་དེ་འོང་དུས་སུ།།
ང་ཡི་རིགས་ལ་སེམས་ཀྱི་ཚིག་འདུ་སྤྲིངས།།
ཅ་ཅོ་རི་ལུང་འཁེང་བ་སྒྲོག་ནུས་ཀྱང་།།
ཆ་རྒྱུས་རང་གི་སེམས་ལ་ཡོད་དུས་སུ།།
ཇ་ཁང་ཉུལ་ནས་ཉིན་མ་གཏོང་བ་ལས།།
ཉ་ཆུ་འཚོ་བའི་ལས་དེ་སྲུང་ན་འོས།།
ཏ་ལེན་ཕྲག་པར་འཁུར་བའི་རྒད་པོ་དང་།།
ཐ་སྙད་ཚིག་ལ་བྱང་བའི་ཤེས་ཡོན་པ།།
ད་ལྟའི་དུས་འདིར་མཁོ་བ་རྩོད་གླེང་མིན།།
ན་ནིང་བྱུང་བའི་ལས་ལ་བསམ་གཞིགས་གནོངས།།
པ་སངས་ལྷག་བསམ་བོད་ལ་ཡོད་མཁན་དག།
ཕ་ཡུལ་བོད་དུ་གནས་པའི་སྤུན་ཟླ་ཚོ།།
བ་གླང་གཤིས་ལས་གདུག་པའི་རྒྱ་གཞུང་འོག།
མ་བུ་གསོན་བྲལ་སྡུག་བསྔལ་ཇེ་ལྕི་རེད།།
ཙ་རི་གནས་ཡུལ་འགྲིམ་ནས་ཕྱི་ལ་འབྱོར།།
ཚ་བའི་ཡུལ་ལུང་མི་ཡུལ་བྱེས་སུ་གནས།།
ཛ་དྲག་དུས་འདིར་རང་རིགས་བདེན་དོན་ཆེད།།
ཝ་མ་ཝོལ་དུ་བསྡོད་རྒྱུ་ངོ་གནོངས་རན།།
ཞ་ཞོར་ཟ་བཏུང་འགྲོ་འདུག་གང་ཡིན་ལ།།
ཟ་ཟུར་ཚིག་གི་མདའ་མོ་ནང་ལོག་དུ།།
འ་འུར་ཙམ་ལ་བཅོལ་ནས་བེད་སྤྱོད་པ།།
ཡ་རབས་བོད་པའི་ལུགས་ཀྱི་དགྲ་རུ་འཛིན།།
ར་ས་འཁྲུལ་སྣང་འགྲུམ་འགྲིལ་ཁང་དུ་སྒྱུར།།
ལ་མོའི་རྒྱབ་ཀྱི་རང་གི་གནས་མཆོག་དེ།།
ཤ་ཁྲག་གཅིག་པའི་སྤུན་ཟླའི་སྲུང་བ་དེ།།
ས་མཐའི་ང་ཚོའི་སེམས་སུ་འཇག་རན་ཡིན།།
ཧ་ཅང་གཅེས་པའི་སྙིང་གཏམ་ཡོད་མེད་དེ།།
ཧ་ཧ་ཟེར་ནས་དགད་མོ་མ་ཤར་གོང་།།
ཨ་རིའི་ཡུལ་ལ་སྨོན་ལམ་འདེབས་པ་ལས།།
ཨ་མའི་བུ་རྒོད་གངས་ཅན་བོད་དོན་སྙོགས།།
ཡིག་ནོར་སྔོགས་འདོད་་་་་་་་་་་་་སྔོག་འདོན་ཟེར་ཡིན
རང་ཉིད་གཙང་མ་ཡིན་ན་སྙན་ངག་གི་ལམ་ནས་ཡོད་ཚད་སྔོགས་འདོད་བྱོས་དང་ད་ཡིན་ན་་བྲོ་བ་རེ་འཕེལ་རྒྱུ་འདུག་གོ།
ཀ་ཕྲེང་སུམ་ཅུའི་སྙན་ཚིག་རྒྱུད་མང་ལས།།
ཁ་བ་ཅན་ལ་ཤ་ཚའི་མཛའ་སེམས་ཞིག།
ག་ལེར་ཀློག་སྐབས་རིག་པའི་དཔའ་ཡང་རྒྱས།།
ང་ཚོའི་གངས་ཅན་ཕ་སྐད་ངོ་མཚར་ཆེ།།
ང་ནི་བོད་པ་ཡིན་ཀྱང་བོད་སྐད་སྐྱོ།།
ག་ཆད་འུ་ཐུག་རང་ཡུལ་ལྷག་ཏུ་དྲན།།
ཁ་ཙམ་ཚིག་གིས་དོན་ཆེན་འགྲུབ་དཀའ་བས།།
ཀ་ཡེ་དྲ་གྲོགས་ཡོངས་ཀྱིས་ལམ་ཞིག་བསྟོན།།
ཀ་རྩོམ་རྩོམ་པར་བྱང་ཆ་ལྡན་པའི་རིག་བཟང་བོད་ཀྱི་མི་རབས་རྣམས།།
ཁ་རྩོད་བྱ་བར་བྲེལ་བ་ཆེ་བའི་དྲ་སྟེང་གསར་བུ་སྣང་མཐོ་རྣམས།།
ག་རེ་ཡིན་ཡང་གོ་བ་རྙེད་ལ་དྲན་གཤིས་བརྟན་པའི་རིག་རྒོད་རྣམས།།
ང་རང་ནང་བཞིན་ལོ་ལོ་མེད་པས་བརྩེ་འདང་ཆེ་བའི་དྲ་གྲོགས་རྣམས།།
ཅ་ཆ་ཇ་ཉའི་དབྱངས་རྟའི་ཁྲོད་ནས་ཏ་ཐ་ད་ནའི་ནང་སྙིང་སྔོགས།།
པ་ཕ་བ་མའི་ཞལ་ཆེམས་བཞིན་དུ་ཙ་ཚ་ཛ་ཝའི་མཛད་རྗེས་ཞོག།
ཞ་ཟ་འ་ཡའི་ཞི་བདེ་ལམ་ནས་ར་ལ་ཤ་སའི་རང་བཙན་རྩོད།།
ཧ་ཡེ་ཧེ་ལོའི་ཁྱད་ཆོས་མ་རྒྱག་ཨ་མའི་གནང་བའི་བསླབ་བྱ་ཉོན།།
ཏ་ལའི་བླ་མའི་རེ་བ་སྙིང་བཅངས་ནས།།
ཐ་ཐོར་ཁ་ཆད་སྣ་རལ་སྤེལ་པ་ལས།།
ད་ལྟར་མིག་སྔར་ལྷག་པའི་དཀའ་ཁག་ཕྱིར།།
ན་བཟའ་འོག་ཏུ་ནང་མོལ་བྱ་ན་དགའ།།
རང་རང་དགའ་བའི་ཕྱོགས་ལ་གླུ་ཞིག་ལེན།།
རང་རང་སྡང་བའི་ཕྱོགས་ལ་མཆིལ་ཞག་འཕེན།།
རང་རང་སེམས་པ་གསོ་བའི་རང་གཤིས་དེ།།
རང་རང་ས་ནས་བརྡོལ་བ་ཆོས་ཉིད་ཡིན།།
ཁྱེད་ཀྱིས་བསྟོད་པའི་མཐེ་བོང་ཀེར་བ་དེ།།
ཁོ་བོར་བསྔགས་པའི་བརྡ་ཐབས་ཡིན་ན་ཡང་།།
ང་ཚོ་ཐུན་མོང་བསྟོད་སའི་གང་ཟག་དེ།།
རང་རིགས་དཔའ་བོའི་ཚོགས་རྣམས་ཅིས་མ་ཡིན།།
བསེ་རུ་ཉིད་ཀྱིས་དེ་འདྲ་མ་གསུང་རོགས།།
ཉིད་ཀྱི་རྩོམ་གཤིས་དྲང་མོ་མདའ་ལས་མྱུར།།
ཉིད་ཀྱི་རང་གཤིས་སེར་པོ་གསེར་ལས་ལྷག།
ཉིད་ཀྱི་ལྷག་བསམ་གངས་དཀར་རི་བོ་བཞིན།།
ཁྱེད་འདྲ་ཁྱེད་ནི་བོད་ཀྱི་རིགས་ལས་མཆེད།།
བོད་མིའི་སྐྱིད་སྡུག་ཉིན་མཚན་སེམས་སུ་དྲན།།
བོད་ཀྱི་སྐད་ཡིག་ཁ་དོན་གཉིས་ནས་སྒྲུབ།།
ཁྱེད་འདྲ་ཁྱེད་ནི་ནམ་ཡང་བོད་ལ་མཁོ།།
མཁོ་བའི་སྤུན་ཟླ་ཁྱེད་ཀྱི་བསམ་དོན་ཀུན།།
ལེགས་པར་འགྲུབ་པའི་རེ་བ་བདག་ལ་ཡོད།།
སྐར་ཚོགས་ཁྲོད་ཀྱི་ཟླ་བ་ཇི་བཞིན་དུ།།
ཁྲི་འཛིན་ཉི་མའི་བུ་རྒྱུད་ཁྱེད་ཡིན་ན།།
བཙན་པོའི་ཕ་ས་ཤོར་ནས་ལོ་མང་འདས།།
ད་ནི་རང་ཡུལ་ལོག་རྒྱུར་བསམ་བློ་ཐོངས།།
དྲ་གྲོགས་འདི་ཚོ་སྙན་ངག་འབྲི་བར་ཐོགས་པ་མེད་པ་རྐྱང་རྐྱང་ཡིན་ས་རེད།
ང་ནི་བོང་བུ་གཞོན་ཏེ་གླུ་ཞིག་ལེན་བཞིན་སྡོད་རྒྱུ་ལས་ཅང་མ་མཆིས།
གཅིག་ལས་གཅིག་མགྱོགས་ཟིན་བྲིས་དོ་རར་ཕེབས།།
གཅིག་ལས་གཅིག་སྙན་ཀ་ཕྲེང་སྙན་རྩོམ་སྤེལ།།
གཅིག་ལས་གཅིག་མཁས་སྒྱུ་རྩལ་རིན་ཐང་ངོམས།།
གཅིག་ལས་གཅིག་སྡུག་བསེ་རུ་དཔའ་ཡང་ཞུམ།།
བྱང་གི་ཡུལ་ནས་ཐོན་པའི་གངས་རིའི་བུ།།
གྲོལ་བའི་ཐབས་ཤིག་ཡོད་ན་མྱུར་དུ་བྱོས།།
བོད་མིའི་སྐྱིད་སྡུག་ལ་ཁའི་ཉི་མ་བཞིན།།
བསམ་ཞིང་བསམ་ན་སྐྱོ་བ་མཐའ་མི་འདུག།
ཀ་ར་བུ་རམ་ཁ་ལ་ཞིམ་ཡང་དུང་སོ་སུམ་བཅུར་གནོད་པར་ངེས་པས་ག་ས་གང་ནས་རིག་རིག་མ་ཟ་ང་ཡི་སྙིང་གི་སྤུན་གྲོགས་ལགས།།
ཅ་ནེ་ཙམ་ལས་ང་ཚོར་མེད་ཀྱང་ཆ་ལུགས་བཟང་བོའི་རིགས་རྒྱུད་ཡིན་པས་ཇ་རྐྱང་འཐུང་དགོས་བྱུང་བའི་དུས་ཀྱང་ཉ་མོ་བཞིན་དུ་འབྲེལ་ཐག་ཉེ་དགོས།།
ཏ་ལེ་བླ་མའི་ཐུགས་རྗེའི་འོད་ཀྱིས་ཐ་ཤལ་དགྲ་ཡང་གྲོགས་སུ་འགུག་པས་ད་ལྟ་ང་ཚོར་ཐབས་གཞན་མེད་ན་ན་སོ་རྒས་པ་ཁོང་དང་བསྟུན་དགོས།།
པ་གོ་མང་བའི་རྒྱལ་ཁབ་འདི་ནི་ཕ་མེད་ང་ཚོར་དྲིན་ཅན་ཡིན་པས་བ་གླང་ལྷ་རུ་བཀུར་བ་ཡིན་ཡང་མ་གཞི་ཁོང་ལ་བཀའ་དྲིན་ཞུ་དགོས།།
ཀ་ཕྲེང་ལྟར་ལ་རྒྱུད་པའི་སྙན་ཚིག་གིས།།
ཁ་བའི་བུ་ལ་སེམས་གསོའི་བདུད་རྩི་ཞིག།
ག་སར་བོད་དོན་གླེང་བའི་དཔའ་རྒོད་རྣམས།།
ང་རྒྱལ་མ་ཞོམ་ལག་ཟུང་དགུང་ལ་བཏེགས།།
བཀྲ་ཤིས་བདེ་ལེགས།
བཀྲ་ཤིས་བདེ་ལེགས།
ཅ་ག་ཙམ་ཡང་ཨ་མཚར་གཏམ་གླེང་མཁན།།
ཆ་ཡོད་རིག་པ་རྣོ་བའི་གྲྭ་རྒན་ཁྱེད།།
ཇ་བཀང་འདྲེན་དོན་དགེ་བའི་ཆེད་ཡིན་ན།།
ཉ་བེ་ཉོབ་བེ་མཐོང་དུས་མ་བརྗེད་ཅིག།
ཀ་དག་དྲི་མེད་ལྷ་ཡི་མཇལ་དར་ཞིག།
ཁ་སེམས་གཙང་མའི་ཆབ་ཀྱི་སྣེ་མོ་རུ།།
ག་ནས་གང་དུ་སྤྱིན་འཕོད་སྙིང་གི་གྲོགས།།
ང་ཡི་སེམས་པ་དྭངས་པའི་ཁྱེད་གསུང་འཛིན།།
ཧ་ཅང་མིག་གི་རིག་སར་མ་འབུད་ཀྱང་།།
ཨ་མཆོད་གསུམ་ལ་གུས་བརྩི་བྱེད་ལུགས་ཤིག།
ཧ་ཧ་ཟེར་ནི་ཞིག་གི་རུས་ཞེན་པ།།
ཨ་ལན་ད་ལན་གནང་བ་སྙིང་ནས་གུས།།
ར་བ་གངས་རིའི་ལྗོངས་ཀྱི་གནམ་མཁའི་སྐར།།
ལ་ལུང་ཁྲི་ཕྲག་འགྲིམ་པའི་བུ་རྒོད་ཅིག།
ཤ་ཁྲག་བཙན་པོར་གཏོགས་པའི་བྱེས་པ་ཁྱེད།།
ས་ལའི་ལྗོངས་ལ་བཅིངས་པའི་ལ་ཞེན་ཟབ།།
ཞ་སེར་བསྟན་པའི་སྲོལ་གཏོད་གཉའ་ཁྲི་མིན།།
ཟ་ཧོར་དམག་ལ་འདྲེན་མཁན་འབྲོང་རྒྱུད་མིན།།
འ་ཅག་བོད་ཀྱི་ཐུ་སྲས་རིགས་རྒྱུད་ཅིག།
ཡ་རབས་གངས་ཅན་བོད་ཀྱི་བུ་ཞིག་རེད།།
གོང་དུ་ནོར་བ་བཅོས་རྒྱུ་ཞིག་ལ་ཝ་མ་ཝོལ་ལ་ཞེས་དང་འདི་མཇུག་མཐུད་ནས་ཨ་པར་དུ་ཁྱེད་ཀྱིས་ལན་མ་འདེབས་རོགས།
ཙ་གེ་ཙིག་གེ་བྲིས་ན་ཁྱེད་ངར་གི།
ཚྭ་ཁུ་བཞིན་དུ་གང་སར་ཁྱེད་མཁོ་གི།།
ཛ་དྲག་ཅན་གྱིས་ཁྱེད་ལ་སྡིགས་ན་ཡང་།།
ཝ་མ་ཝོལ་མ་བཞག་ནོ་འདི་ཡ་མཚན།།
མཇུག་དྲ་གྲོགས་གཞན་པ་ཞིག་གིས་འབྲི་རོགས།།
པ་ཕའི་བརྟུལ་ཞུགས་བཟུང་བའི་གྲོགས་པོ་ཁྱོད།།
ཕ་རོལ་གཞན་ཡུལ་འགྲིམ་པ་ལེགས་མོད་ཀྱང༌།།
བ་གླང་མཛོ་ལས་གྱོང་བའི་གཤིས་ཀ་ཅན།།
ཝ་རྔའི་མགོ་ཅན་དག་ལ་གཟབ་པར་འཚལ།།
ཏ་ཐ་ག་ཏའི་ལམ་ཁ་རིང་ནས་དོར།།
ཐ་ཤལ་བུ་ཡི་ལུགས་སུ་འཛིན་མིན་ཏེ།།
ད་ལྟའི་ཟིན་བྲིས་མཁན་པོར་བསྐོས་འོས་པ།།
ན་གཞོན་ང་ཚོའི་མིག་དཔེར་བལྟ་ངེས་ཡིན
ཅ་ཅོའི་གཏམ་ལ་དགའ་བའི་གདོང་དམར་བའི་སྨན།།
ཆ་ལུགས་འགྱུར་ལ་དགའ་བའི་ཅོལ་ཆུང་ཚོའི་སྨན།།
ཇ་ཆང་བདུད་རྩི་ལྟ་བའི་རིན་ཆེན་གྱི་རིལ།།
ཉམ་ཆུང་ཁྲི་མ་འབུམ་གྱི་བདུད་རྩི་རུ་གྱུར།།
ཀ་ཕྲེང་བསྟར་ལ་བརྒྱུས་པའི་དབྱངས་ཀྱི་འགྲོས། །
ཁ་བ་ཅན་ལ་སྙིང་ནས་སྤྲིང་བ་ནི། །
ག་དང་དེ་ཡིས་ཁས་ལེན་མི་བྱེད་ཀྱང་། །
ང་ནི་ཁྱེད་ཀྱི་རྗེས་ན་རྒྱུན་དུ་ཡོད། །