ངའི་བུ་མོ་ཐར་མ་མཚོ།

ཤར་སྐྱེས་གངས་བུ་ཁྱུང་རྒོད་ལགས། འདི་རུ་ཕེབས་ནས་བསམ་ཚུལ་ལྷུག་པོར་གནང་བ་དང་བདག་གི་བུ་མོ་ལ་སྨོན་ཚིག་དང་ཁ་གཡང་བོས་པ་སྙིང་ནས་བཀའ་དྲིན་ཆེ་ཞུ།
ང་རང་ཉིད་ལ་ངོ་གནོང་བ་དང་བཅས་དེ་ལན་གསལ་བོ་ཞིག་འདེབས་རྒྱུ་ཡོད་པ་ནི། རེད་ལགས། ངེད་ཀྱི་བུ་མོ་འདི་ནི་ར་ལུག་འདྲེས་མ་ཞིག་ཡིན། རྒད་པོ་ང་ལུག་ཡིན་པའི་དབང་དུ་བཏང་ན། ངའི་དགའ་རོགས་མ་ར་ཡིན་ནི་རེད་ལགས། ངས་བསགས་པའི་ནག་ཉེས་འདི་ནི་བསྐལ་བའི་བར་དུ་འདགས་ཐབས་ཡོད་པ་མ་རེད་ལགས།

འོ་དྲི་ལྟ་བའི་སྐད་ཆའི་དབྱངས་འགྲོས་ཤིག།
ཐིགས་པ་རེ་རེ་བསགས་ནས་ཡོང་དུས་སུ།།
སེམས་ཀྱི་ལྷད་མེད་ཁ་གཡང་སྙན་མོ་འདིས།།
བདག་གི་བུ་མོའི་སེམས་པ་ཚིམས་གྱུར་ཅིག།

འོ་འཛིན་ནོར་བུའི་བདག་མོ་ཁྱེད་ཉིད་ཀྱིས།།
ཐིགས་ཕྲེང་མུ་ཏིག་བརྒྱུས་པའི་སྙིང་གཏམ་འདི།།
བདག་གི་བུ་མོར་སྤྲིངས་པ་བཀའ་དྲིན་ཆེ།།
དྲི་མ་མེད་པའི་ཁ་གཡང་འགྲུབ་པར་ཤོག།

སྤུན་ཟླ་ཁྱེད་ཅག་ཚང་མ་འདི་རུ་ཕེབས་ནས་བདག་གི་བུ་མོ་ཐར་མ་མཚོའི་མ་འོངས་པ་ལ་ཁ་གཡང་དང་གཤིས་ཚིག་བརྗོད་པ་དེ་དག་ལ་སྙིང་དབུས་ནས་ཐུགས་རྗེ་ཆེ་ཞུ། ང་རང་ཉིན་མ་འདི་དག་གི་རིང་དུ་གུང་གསེང་དུ་སོང་ནས་དེ་རིང་མ་གཏོགས་ཕྱིར་ནང་དུ་སླེབས་ཐུབ་མ་སོང་། དུས་ཐོག་དུ་སྤུན་ཟླ་དག་ལ་ལན་སྤྲད་མ་ཐུབ་པ་དགོངས་དག་ཞུ།

སེམས་ཁུར་མ་བྱེད་ཟེར་ན་ཁྱོད་ལ་སེམས་ཁུར་མེད་པ་ཞིག་ཏུ་མི་འགྱུར་མོད། བུ་མོ་འདིའི་མ་འོངས་པ་ཡོད་ཚད་ཁྱོད་ཀྱི་ལག་ཏུ་ཡོད་པས་ཁྱོད་རང་ཕ་རྒན་སྤྲེའུ་བྱང་ཆུབ་སེམས་དཔའ་ཞིག་མོའི་འཚར་ལོང་གི་འགྲོས་དང་བསྟུན་ནས་བྱ་ལོས་དགོས། ཕ་མ་རིགས་ཞེན་ཅན་ཞིག་ཡིན་ན་དེའི་བུ་ཕྲུག་དག་ཀྱང་དེ་ལྟར་ཕལ་ཆེར་ཡོང་ངེས། རྨོངས་དད་རེད་མ་བསམ་ན་ངས་ཀྱང་བུ་མོ་འདི་ཁྱོད་ཀྱི་རེ་བ་འགེངས་ནུས་པའི་མ་འོངས་མཛངས་མ་ཞིག་ཏུ་འཚར་ལོང་ཡོང་སྨོན་ལམ་རྒྱག་གི་ཡིན། བདེ་མོ།

བོད་ཤ་ཁྲག་རུས་གསུམ་ལགས།
ངས་ཐོས་པའི་གསར་འགྱུར།

ཕྱིར་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་འདུ་ཞིག་སང་ཉིན་ནས་ཉིན་གསུམ་གྱི་རིང་ཚོགས་རྒྱུ་ཡིན་འདུག
ཚོགས་འདུའི་དབུ་འབྱེད་མཛད་སྒོར་བཀའ་ཁྲི་ཟམ་གདོང་རིན་པོ་ཆེ་ཆིབས་སྒྱུར་གནང་རྒྱུ་ཡིན་འདུག།

ཆུ་ཐིགས་སྔོན་མོས་ཡག་པོ་ཞིག་གསུངས་འདུག ཆུ་ཐིགས་ལགས།ཁྱེད་ཕོ་ཡིན་དང་མོ་ཡིན།

ཨ་ཕ་ཤ་ཁྲག་རུས་གསུམ་ལགས་ལ་རྟེན་འབྲེལ་ཞུ།

ཁྱེད་ཀྱིས་བུ་མོ་ཐར་མ་མཚོ་གླེང་སྐབས་ངས་ཀྱང་སྲིང་ཆུང་མ་དྲན་བྱུང་།མི་ཡུལ་འདི་ནས་ཁོ་ཚོ་ཇི་ལྟར་ཁོ་ལག་རྒྱས་རྒྱུ་ཡིན་ནམ།ཡིན་ཡང་ཁྱེད་ཀྱིས་བུ་མོར་སློབ་གསོ་ཡག་པོ་རྒྱག་ན་སྐྱོན་མི་ཡོང༌།

ལོ་ནི་བརྒྱ་ཕྲག་དུ་མའི་སྔ་རོལ་དུ།།
ཁྲག་གི་བརྫེས་པའི་གདོང་བག་དམར་པོ་ཅན།།
ཇིང་གར་རྒྱལ་པོ་འབོད་པའི་དཔའ་པོ་དེས།།
རིགས་རུས་བོད་ནས་བཞག་པའི་ཚ་བོ་ཡིན།།

ངས་ཁྱེད་ལ་རྟེན་འབྲེལ་དང་ཐུགས་རྗེ་ཞུ།  ཁྱེད་ཀྱིས་གདོང་དམར་ཚང་གི་རིགས་རྒྱུད་ཀྱི་རྒྱུན་བསྲིངས་བ་འདི་ལ་ང་ངོ་མའི་སེམས་སྟེང་ནས་དགའ།བུ་མོ་འདི་ཡང་ཁྱེད་ལྟ་བུའི་ཁ་ཞེ་གཉིས་མེད་ཀྱི་མི་གཞུང་དྲང་དང་རྒྱུད་འཇམ་ཞིག་ཡིན་པ་ང་ཡིད་ཆེ་ཡོད།མཐར་ཁྱེད་ཀྱི་བུ་མོ་རིག་བཟང་མ་འདིའི་ལུས་ལ་ནད་མེད་པ་དང་ཚེ་རིང་བ་བསམ་དོན་ཇི་བཞིན་འགྲུབ་པའི་སྨོན་འདུན་ཞུ།

མིའུ་ཐུང་ཞེས་སུ་རང་གི་སྨྱུག་མིང་གྲགས།།
ཕྲུག་གུ་ཞིག་ནི་མིན་རབས་སྔ་ནས་ཤེས།།
དུས་ཚོད་གང་ཡོད་རང་རིགས་སྐྱིད་སྡུག་ལ།།
བསམ་གཞིགས་བྱེད་པའི་བོད་ཀྱི་བུ་རྒོད་ཅིག།

དགོངས་དག་ཞུ་རྒྱུ་ཞིག་ལ་ངའི་བུ་མོའི་མིང་ལ་ཐར་མ་མཚོ་ཞེས་བཏགས་དོན་གང་ཡིན་འགྲེལ་བཤད་ཅིག་རྒྱག་རོགས་ཟེར་ནས་འབོད་སྐུལ་གནང་བ་དེར་དགོངས་དག་ཞུ་འདོད་ཡོད། གང་ཡིན་ཟེར་ན། ད་ལྟའི་འཆར་མིང་འདིའི་ནང་དོན་ལ་སྤུན་ཟླ་ཁྱེད་རང་གི་གཙོ་བའི་ནང་དོན་ཞིག་ཤེས་འདོད་དང་མིང་ཁྱད་མཚར་དུ་འདོད་མཁན་དག་གིས་རང་རང་གི་གང་བསམ་པའི་ནང་དོན་རེ་བཞག་ན་འགྲིག སྐབས་འདིར་བདག་གིས་རང་གི་བུ་མོའི་མིང་ལ་ཐར་མ་མཚོ་ཟེར་དོན་གྱི་འགྲེལ་བཤད་དེ་རྒྱག་ཐུབ་ཀྱི་མི་འདུག་པ་མ་ཡིན་པར་འོས་འཚམ་ཞིག་མཐོང་མ་སོང་ལགས། དེའི་སྟབས་ཀྱི་སྤུན་ཟླ་མིའུ་ཕྲུག་ཉིད་ལ་དགོངས་དག་ཞུས་པ་ཡིན།

རྫ་རི་ནགས་རིའི་ཡུལ་ལྗོངས་མཛེས་ས་ནས།།
སྲས་ཀྱི་ངང་ཚུལ་འཛིན་པ་རིག་གྱི་བུ།།
བདེ་སྐྱིད་དགོད་སྒྲའི་བསུ་བ་ཉིད་ཀྱི་སེམས།།
ཆེན་པོ་བོད་ཀྱི་ལུགས་སྲོལ་བཟང་བོ་ཉིད།།

གདོང་དམར་བོད་ཀྱི་ཤ་ཁྲག་རུས་པའི་རྒྱུད།།
མི་ཆད་སྤེལ་བའི་ལས་སྐལ་བདག་གིས་བཞེས།།
ངལ་དུབ་ཁུར་དུ་ལེན་པའི་མཚན་མོ་ཞིག།།
གངས་ཅན་བོད་པ་འདི་ཡི་ཚེ་སྲོག་བསྐྲུན།།
ཤ་ཁྲག་རུས་གསུམ་གངས་ཅན་བོད་ཀྱི་རྒྱུད།།
དྭངས་གཙང་སེམས་པ་དགེ་བའི་འདུན་པ་ཅན།།
འཛུམ་ཆུང་དྲོན་མོ་ཁྱེད་ཀྱི་སྙིང་སྲོག་ཉིད།།
བྱིས་པ་འདི་ལ་བཀྲ་ཤིས་བདེ་ལེགས་ཞུ།།
བོད་ཤ་ཁྲག་རུས་གསུམ་གྱི་བྱིས་པ་འདི་ལ་བཀྲ་ཤིས་བདེ་ལེགས་ཞུ་རྒྱུ་དང་བྱིས་པ་འདི་ཡི་མིང་ཐར་མ་མཚོ་ཞེས་པའི་དོན་གང་ཡིན་འགྲེལ་བཤད་གཅིག་ཞུ།།

ཨ་ཕ་ལྟ་བུའི་བོད་མི་རིགས་ཀྱི་དྲི་མ་ཞིམ་པོ་ཅན་ཞིག་ཡིན་པར་ཤོག ཨ་ཕ་ནང་བཞིན་ཕ་སྐད་གཙང་མའི་འཇིག་རྟེན་ལ་དུངས་ཀ་ཧ་ཅང་ཟབ་པར་ཤོག

མིག་གསུམ་པ་ལགས། རེད་ལགས། འཇིག་རྟེན་ས་སྒང་འདིས་སྟེང་གི་སྒང་བ་བོད་པ་ཚང་གི་ལུས་ཤིག་བླངས་པའི་འུ་ཅག་གི་མི་ཐོག་འདིས་ཁྲོད་ཀྱི་སྐྱེ་བོ་མི་ཉུང་བ་ཞིག་གིས་རང་རང་གི་ཕ་མའི་བཀའ་དྲིན་ཟེར་ན་འགྲིག ཕ་ཡུལ་ནས་འཚར་ལོངས་བྱུང་དྲིན་ཟེར་ན་རེད། གང་ལྟར། འུ་ཅག་གིས་བོད་སྐད་བཤད་ཤེས་པ་ནས་བོད་མིའི་སྐྱིད་སྡུག་ལ་བསམ་བློ་གཏོང་བཞིན་ཡོད་པ་ནས་རང་ཡུལ་ནས་བྱེས་སུ་གྱར་ཞིང་། ཉིན་མོ་དེ་ནས་དཀའ་ཚེགས་དང་སྡུག་ཡུས་ཀྱི་ལོ་ཟླ་གྲངས་མེད་ཀྱི་ཁྲོད་དུ་འུ་ཅག་གི་མ་མྱོང་བའི་རྒྱལ་ཁབ་མེད་པའི་སྡུག་བསྔལ་ནི་དངོས་ནས་བཤད་ཀྱི་མི་ལོངས་པ་ཞིག་ཡོད་པ་དེའི་སྟབས་ཀྱི་བོད་སྐད་ལ་དགའ་བ་དང་བོད་ཞེན་ཆེ་བར་ཆགས་ཡོད་ཟེར་ན་འགྲིག་ན་ཡང་། ད་ནི་རང་གི་བུ་ཕྲུག་འདི་དག་ནི་འཚར་ལོངས་བྱུང་ཡུལ་ནི་བྱེས་དང་འཛམ་གླིང་གི་ཁོར་ཡུག་རང་དབང་ཅན་དུ་གྲགས་པ་དག་ནས་འཚར་ལོངས་བྱུང་དེ་འོང་གི་ཡོད་དུས། ཕ་མའི་ཁ་འགུལ་བ་ལས་ལག་པས་རེག་ཙམ་བྱས་པ་ཡིན་ན་ཁྲིམས་ཁང་དུ་འགྲོ་དགོས་པའི་ལུགས་སྲོལ་གསར་བ་འདི་དག་ནི་བོད་མི་རིགས་ཀྱི་རིག་གཞུང་གི་གོམ་གཤིས་ཤིག་ལྡོག་ཕྱོགས་ཀྱི་འཚོ་བའི་བཞུད་སྟངས་ཤིག་ཆགས་ཡོད་ལ། ད་ལྟ་ངེད་ཅག་གི་བོད་མི་མི་ཉུང་བ་ཞིག་གིས་ཀྱང་། འདི་ལྟར་དེའི་བསྐོར་ལ་བསམ་གཞིགས་ནན་པོ་བྱེད་མ་ཐུབ་པར། ཡོད་ཚད་ཕྱི་ལུགས་ལ་ལེགས་སྲོལ་དུ་འདོད་པ་དང་ཡར་རྒྱས་ཅན་དུ་འདོད་པའི་དུས་རབས་འདིས་ཁྲོད་ཀྱི་འུ་ཅག་གི་བུ་རབས་ཚ་རྒྱུད་དག་བསྐྱེད་སྲུང་བྱེད་རྒྱུ་དེ་ནི་ཕ་མ་གཅིག་བུའི་འགན་ཞིག་ལ་གཏན་ནས་ཆགས་ཐུབ་ཀྱི་མེད་པ་རེད། ཡིན་ཡང་། ཉིད་ཀྱིས་བསམ་སྐུལ་གནང་བ་དེ་དག་ལ་བདག་གིས་ཀྱང་ཅི་ཐུབ་གང་ཐུབ་ཀྱི་བསམ་བློ་གཏོང་མྱོང་ཡོད་ལ། རང་གིས་ཀྱང་གང་ཤེས་གང་ཐུབ་ཅིག་ཧུར་ཐག་བྱེད་འདོད་ཡོད་ལགས།

ཇིང་སྲས་ཞིག་གི་མཚན་ཐོབ་མཁན།།
མིག་གི་ལྟ་ཞོག་བཟང་བོ་ཡིས།།
གསུམ་འཛོམ་གཡང་གི་འབོད་པ་དེས།།
པ་ལོའི་སེམས་པ་སྤྲོ་རུ་བཅུགས།།

ཨོ་རེད་ལགས། ཉིད་ལ་དྲི་བ་ཞིག་འདུག་ལགས། ཇིང་ཟེར་བ་འདི་ནི་ས་མིང་ཞིག་རེད་དམ། ཡང་ན་རུས་མིང་ཞིག་ལ་གོ་ཡི་ཡོད་པ་རེད། དེ་མིན་ནང་དོན་གཞན་ཞིག་ཡོད་པ་རེད་དམ་ལགས། ཉིད་ཀྱིས་དེའི་བསྐོར་ལ་འགྲེལ་བཤད་ཅིག་རྒྱག་ཆོག་པ་ཞིག་ཡིན་ན་འགྲེལ་བཤད་ཅིག་གསུང་རོགས་ཞུ།

བསེ་ཁྲབ་འདི་ལ་འགྱུར་བ་གཏན་མེད་པ།།
རུ་ཁག་གཅིག་གི་གཙོ་མཁན་ལྟ་བའི་ཉིད།།
དུས་དང་ནམ་ཀུན་ཐུགས་འཁུར་བླ་མེད་ཀྱིས།།
སྐད་ཡིག་དར་རྒུད་སེམས་སུ་གཉར་བ་དང་།།
རིགས་ཞེན་དུངས་པའི་བརྩེ་ཞེན་དྲོན་མོ་ཡི།།
རང་གི་རིགས་ལ་དབྱེར་མེད་འགན་འཁུར་ཅན།།
ཉིད་ཀྱིས་དྲིས་པའི་ཚིག་གི་ལན་ཞིག་ནི།།
བདག་གི་སེམས་སུ་གསལ་ལེར་གཏན་མེད་ཀྱང་།།
འདི་ནི་ང་རང་གོམ་སྲོལ་ཞིག་ལས་འགྲེལ་བཤད་ཅིག།
རྒྱུ་མཚན་ལྡན་པ་བདག་ལ་ཞུ་རྒྱུ་མེད།།
ཤད་ཅིག་རྒྱག་མཁན་དག་ལ་ཁུངས་ཡོད་དང་།།
ཤད་ཅིག་མེད་མཁན་དག་ལ་ཁུངས་མེད་སོགས།།
དེ་འདྲ་དེ་ཡི་རྩོད་པ་བྱེད་རན་དང་།།
ཁུངས་ཤིག་ཡོད་མེད་བཙལ་རྒྱུའི་རིན་ཐང་སོགས།།
བདག་གི་སེམས་སུ་དྲན་མྱོང་མེད་པ་ན།།
ནོར་བའི་བྱེད་སྟངས་ཤིག་ལ་གཟིགས་པས་ཚེ།།
དགོངས་དག་ཟེར་ཡུལ་ཞིག་ལ་ལོས་ཟེར་ཆོག།
དེ་མིན་ཉིད་ཀྱིས་བདག་གི་བུ་མོའི་གཙོ།།
དུས་རབས་གསར་བའི་བོད་ཀྱི་ཕྲུ་གུ་དག།
འཚར་ལོང་བྱུང་ལུགས་ཕྱོགས་སུ་རྒྱབ་སྐྱོར་དེ།།
གནང་བ་སེམས་དང་རུས་པའི་གཏིང་ནས་སྤྲོ།།

སྐར་མའི་གཟི་འོད་གནམ་མཁའི་དབྱིངས་སུ་བཀྲ།
ཁྲི་རལ་ཅན་གྱི་རྗེས་སུ་ཞུགས་ཉིན་ནས།།
བཙན་པོའི་མཛད་རྗེས་ཡིད་ལ་དྲན་མཁན་ཁྱེད།།
ནམ་ཡང་སེམས་ཤུགས་དྲོན་མོ་འབར་གྱུར་ཅིག།

བོད་མིང་ཅན་བུ་མོ་འདི་ཤ་ཞེན་རིགས་ཞེན་ཅན་ཞིག་ཡོང་བའི་རེ་བ་ཡོད།

དེ་རིང་ང་རྗེས་ལུས་ཐེབས་སོང་བ་རེད།
ཡིག་ནོར་བཅོས་ཁོམ་མ་བྱུང་བས་དགོངས་འགལ་མེད་པ་ཞུ།
ད་དུང་རང་མོས་སྙན་ངག་ལ་ཤད་མི་འབྲི་བའི་རྒྱུ་མཚན་ངོ་མ་དེ་གང་ཡིན་ནམ།
འདིར་ཤད་འབྲི་མཁན་གྱི་སྡེ་གཅིག་དང་མི་འབྲི་མཁན་གྱི་སྡེ་གཅིག་ཁག་གཉིས་སུ་གྱེས་འདུག མི་འབྲི་བའི་རིགས་ཀྱིས་རྒྱ་མཚན་འདི་ཡིན་ཞེས་ད་བར་ལན་རྒྱུ་མཚན་ལྡན་པ་ཞིག་བརྒྱབས་པ་མཐོང་མ་བྱུང་། ཁྱེད་ལྟར་ན་འདོད་ཚུལ་ཇི་ལྟར་ཡིན་ནམ། རྒྱ་མཚན་ཅི།

ཡུལ་གྱར་གྱི་ལས་དབང་མཇུག་མ་རྫོགས་པ་དེ་སྲིད་དུ་ང་ཚོའི་གསར་སྐྱེས་བྱིས་པ་ཚོའི་ལས་དབང་དང་ཁོང་ཚོས་མི་རིགས་འདི་དང་། མི་རིགས་འདི་སྐད་ཡིག་སོགས་ལ་འཛིན་པའི་འདུ་ཤེས་དེར་དོགསད་པ་དང་ཐེ་ཚོམ་དངངས་སྐྲག་ཡོང་གིན་ཡོད་པ་ནི་ཅི་འདྲའི་བདེན་པ་ཞིག་མ་རེད་དམ།

ས་བོན་ཆུང་ཆུང་།
འཇིག་རྟེན་འདིའི་ངུ་སྐད་ཐོག་མའི་རྗེས་སུ་ཁྱེད་ཀྱིས་མཐོང་བ་དང་པོ་ནི། ཨ་མ་ཡི་འཛུམ་མདངས་ཡིན་ལ། འཐུང་བ་དང་པོ་ཡང་ཨ་མ་ཡི་འོ་མ་ཡིན། ཁྱེད་ཀྱིས་ཨ་ཕ་ཡི་སྐྱོ་ཉམས་སྣ་ཚོགས་མིག་མདུན་དུ་འཆར་བ་དང་སྡུག་སྐད་སྣ་ཚོགས་རྣ་ལམ་དུ་ཐོས་དུས། ད་བཟོད་ཁྱོད་ཀྱི་ཕྲག་ཐོག་ན་གདེག་དཀའ་བའི་ཁུར་བོ་ཞིག་ཡོད་པ་གཞི་ནས་ཚོར་ངེས།
ལྗང་མདོག་གི་ཁྱིམ་གཞི་ཞིག་གི་ཆེད་མཚར་སྡུག་གི་ལང་ཚོ་མངོན་པའི་སྨོན་འདུན་གྲངས་མེད།
ས་བོན་ཆུང་ཆུང་།

ཚེ་རིང་ལོ་བརྒྱ་ཁ་དྲོ་བཀྲ་ཤིས།
བུ་མོ་མཛངས་མ་ཞིག་ཏུ་འགྱུར་བར་སྨོན།
ཨ་ཕ་ཤ་ཁྲག་རུས་གསུམ་བཞིན་རིགས་ཞེན་དང་ལ་རྒྱ་ཅན་ཞིག་ཡིན་པར་སྨོན། བུ་མོ་ཡ་རབ་འུ་ཚང་གི་བདག་མོ་ཉན་པར་ཤོག