་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།
བློ་བཟང་ལྡི་ལུར་འགྲོ་བའི་རླངས་འཁོར་ནང་དུ་ལམ་ལ་ཆས་བཞིན་ཡོད་ལ། ནོར་བུ་བཟང་མོ་དང་གྲོགས་པོ་ཁ་ཤས་ཤིག་བསྐྱེལ་མ་བྱེད་དུ་ཡོང་ཡོད། གྲོགས་པོ་དག་གིས་བདེ་མོ་བཞག་ནས་བུད་སོང་བའི་ཤུལ་དུ། ནོར་བུ་བཟང་མོ་རླངས་འཁོར་ནང་དུ་བློ་བཟང་གི་མཉམ་དུ་ཡོད་པ་མ་ཟད། བློ་བཟང་ལ་ང་རང་ཁྱེད་དང་ལྷན་དུ་ཁྲིད་ནས་འགྲོ་རོགས་ཟེར་ནས་ཞུ་བ་བྱས་དུས། བློ་བཟང་གིས་ལས་ཤིག་ཡོད་ན་ལམ་ཞིག་ཡོད་ཟེར་བ་རེད། བདེ་མོ་བྱོས། ད་ཁྱེད་རང་གི་ཨུ་ཚུགས་མ་བྱེད། ངས་ཁ་ལ་ཉོན། ད་རེབས་ངས་ཀྱང་རང་ཉིད་ཀྱི་ལས་ཀ་གང་འདྲ་ཞིག་ཡིན་མིན་སོགས་མི་ཤེས།
རླངས་འཁོར་འགྲོ་བའི་མགོ་བཙུགས་པ་དང་བློ་བཟང་གིས་ནོར་བུ་བཟང་མོ་ལ། ད་བདེ་མོ་བྱོས། ངས་བཤད་པའི་སྐད་ཆ་དེ་སེམས་སུ་འཛིན་རོགས་ཞུ་ཟེར་ནས་བདེ་མོ་བཞག
ནོར་བུ་བཟང་མོས་མིག་ཆུ་ཕྱི་ཞོར་རླངས་འཁོར་ལས་འབབ། རླངས་འཁོར་ནང་གི་མི་དག་གིས་ངང་ཚུལ་དེར་བལྟས་དེ་གདུང་སེམས་མཉམ་བསྐྱེད་བྱེད་པ་དང་འདྲ་བར་ནོར་བུ་བཟང་མོའི་ཕྱོགས་སུ་མིག་ཟུང་ཅེར་ནས་ཡོད།
ལྡི་ལུར་མེ་འཁོར་ས་ཚིགས་ཤིག་དུ་བློ་བཟང་ལ་བསྐྱེལ་མ་བྱེད་མཁན་བོད་པའི་ཕོ་གསར་གཉིས་ཡིན་ལ། ཕོ་གསར་གཅིག་ནི་ངོ་ཤེས་རྒྱ་མཚོས་ཁ་པར་ཨང་གྲངས་སྤྲོད་སའི་མི་དེ་རེད། ཁོས་བློ་བཟང་ལ། ཉལ་ས་ཡོད་སའི་མེ་འཁོར་གྱི་འཛིན་བྱང་རེག་རྒྱུར་དུས་ཚོད་ཐུང་ཐུང་དུ་དཀའ་ངལ་ཡོད་རབས་དང་། ད་ལྟའི་འཛིན་བྱང་དེ་ནི་རྐུབ་སྟེགས་ཡོད་པའི་མེ་འཁོར་འཛིན་བྱང་དེ་ཡང་གོང་ཆེན་སྤྲད་དེ་ཉོས་པ་ཡིན་ཚུལ། ཕར་ཕྱོགས་ཀྱི་མེ་འཁོར་ས་ཚིགས་སུ་འབྱོར་དུས་དང་། དེ་ནས་རླངས་འཁོར་ཇི་ལྟར་འཚོལ་དགོས་མིན་སོགས་རེ་རེ་བཞིན་འགྲེལ་བཤད་གནང་བ་དེར་གཟབ་ནན་གྱིས་ཉན།
ཨ་རོགས། ཁྱེད་རང་བཀྲ་ཤིས་ཡིན་ནམ། ང་རང་བློ་བཟང་ཡིན། ཁྱེད་རང་ང་ལེན་དུ་ཡོང་ན་འགྲིག་གམ། ང་རང་ད་ལྟ་གཞུང་ལམ་སུམ་མདོ་ཞིག་ནས་རླངས་འཁོར་ཁ་ལོ་བས་བཤད་པ་ལྟར་ས་ལ་འབབ་ནས། སྤྱི་སྤྱོད་ཁ་པར་ཁང་ཞིག་ནས་ཁྱེད་རང་ལ་ཁ་པར་གཏོང་བཞིན་ཡོད་ཅེས་ལྡི་ལུ་ནས་རང་ཉིད་ལ་ཕོ་གསར་དེས་ཁ་པར་ཨང་གྲངས་སྤྲད་པ་དེའི་སྟེང་ནས་བཀྲ་ཤིས་མིང་ཅན་དེར་ཁ་པར་བརྒྱབ།
བཀྲ་ཤིས་ཀྱིས་ཉིན་འགའི་སྔོན་དུ་མི་ཞིག་སླེབས་གྲབས་ཡོད་ཟེར་བ་དེ་ནི་ཁྱེད་རང་ཡིན་པ་རེད། དོ་ནུབ་འདི་ནས་བསྡོད་དང་། སང་ཞོགས་སྤྱིན་བདག་རྒན་པོ་ཁྱེད་རང་ལེན་དུ་ཡོང་གི་རེད།
བཀྲ་ཤིས་ཀྱིས་ལས་མཚམས་བཞག་ནས་བློ་བཟང་ཁྲིད་དེ་ཐོག་ཁང་དུ་སོང་། ཐོག་ཁང་ནས་བཀྲ་ཤིས་རང་ཉིད་ཀྱི་རྡ་སའི་བསྐོར་དང་རང་གི་གྲོགས་པོ་དག་གི་བསྐོར་སོགས་མི་ཉུང་བ་ཞིག་གླེང་མོལ་བྱས། ཁོ་རང་རྐུབ་སྟེགས་སོབ་སོབ་རིང་བོ་དེའི་སྟེང་ནས་ཉལ་རྒྱུ་དང་བློ་བཟང་ཁྱེད་རང་ས་ཐག་རིང་ནས་ཡོང་བས་ཐང་ཆད་ཡོད་ངེས་ཡིན་སྟབས། ཉལ་ཁྲིའི་སྟེང་ནས་ཉལ་རོགས་ཞེས་བཤད།
གླ་བྱེད་རླངས་འཁོར་ཞིག་གི་ནང་དུ་ཟ་ཁང་གི་སྤྱིན་བདག་རྒན་པོ་དོན་འགྲུབ་ཀྱིས་བློ་བཟང་ལ་ཁོ་རང་ལ་ཟ་ཁང་གོང་འོག་གཉིས་ཡོད་པ་དང་། གོང་མ་དེར་ཚོང་ཡག་པོ་ཡོད་ན་ཡང་དཀའ་ལས་ཧ་ཅང་ཆེ་རབས། འོག་མ་དེ་ནི་ཡོང་སྒོ་མི་བཟང་རབས། ད་ལྟའི་བར་དུ་བློ་བཟང་ཁོ་རང་མ་རྩིས་པར་འདིར་བོད་པའི་ཕོ་གསར་བཞི་ལྔ་ཞིག་ལས་ཀ་བྱེད་དུ་ཡོང་ན་ཡང་། སུ་ཡང་ཡུན་རིང་འདུག་མ་ཐུབ་རབས། ས་དེས་མི་གཤིས་རྩུབ་ཚུལ། ཁོ་རང་ལ་གླ་ཆ་ཟླ་གཅིག་གི་རིང་དུ་ཧིན་སྒོར་གཅིག་སྟོང་སྤྲོད་རྒྱུ་དང་རིམ་གྱིས་འཕར་ན་འགྲིག་ཚུལ། རྒྱ་གར་བ་ལས་ཀ་མི་ཉུང་བ་ཞིག་ཡོད་ཀྱང་། དེ་དག་གིས་ལོ་ངོ་གཉིས་གསུམ་ནས་བཞི་ལྔའི་རིང་དུ་ལས་ཀ་བྱས་ཀྱང་གླ་ཆ་མཐོ་ཤོས་ནི་བདུན་བརྒྱ་བརྒྱད་བརྒྱ་ཡིན་པ་དང་། བློ་བཟང་ཁྱེད་རང་ནི་བོད་རིགས་གཅིག་པ་ཡིན་དུས་བསམ་བློ་བཏང་བ་ཡིན་རབས་སོགས་མང་བོ་ཞིག་བཤད་བཞིན་ཁོ་གཉིས་ཟ་ཁང་ཞིག་གི་སྒོ་འགྲམ་དུ་འབྱོར།
ཟ་ཁང་ནང་དུ་རྒན་པོ་དོན་འགྲུབ་མགོ་བྱས་དེ་་འཛུལ་ནས་རྐུབ་སྟེགས་ཤིག་གི་སྟེང་དུ་བསྡད། བློ་བཟང་ལ། ཡ་ དེ་ནས་སྡོད་ཅེས་རྐུབ་སྟེགས་ཤིག་ལ་འཛུབ་མོ་བསྟན།
བློ་བཟང་གིས་རང་གི་རྒྱབ་ཁུག་ཆུང་ཆུང་དེ་ས་རུ་འཇོག་རྩིས་བྱེད་ཀྱིན་པའི་སྐབས་སུ། ལོ་ན་བཞི་བཅུ་ལས་བརྒལ་བའི་ཨ་ཅག་ཞིག་གིས་ཁོ་གཉིས་ཡོད་སའི་རྐུབ་སྟེགས་ཀྱི་ཁ་གཏད་དུ་ཡོད་པའི་སྒོར་མོ་ལེན་སའི་ཅོག་རྩེ་ཞིག་གི་འགྲམ་ནས། བློ་བཟང་ལ། བུ་བཀྲ་ཤིས་བདེ་ལེགས་ཞེས་འཛུམ་མདངས་ཤིག་དང་བཅས་ལག་ཟུང་ཐལ་མོ་སྤྱར་ནས་འཚམ་འདྲི་བྱས།
དོན་དངོས་སུ་ཟ་ཁང་དེར་ཆང་རྐྱང་རྐྱང་བཙོང་བཞིན་ཡོད་ལ། ཟ་མ་ནི་མིང་ཙམ་ཞིག་ལས་བཙོང་གི་མེད་པ་རེད། རྒན་པོ་དོན་འགྲུབ་ཀྱིས་བློ་བཟང་ལ་ཆང་དམ་རེ་རེ་ངོ་སྤྲོད་བྱེད་ཞོར་དུ། དབྱིན་ཡིག་ཕྲན་པུ་ཤེས་པ་ཡིན་ན་ཆང་གི་མིང་བྱང་དག་ཤེས་རྒྱུར་དཀའ་ངལ་མེད་པ་རེད།
ས་རུབ་དེ་འོང་བཞིན་ཡོད་ལ། སྐུ་མགྲོན་དག་ནི་གཅིག་ལས་གཅིག་མགྱོགས་མྱུར་ཆ་ལྡན་པའི་ངང་ཨ་ཅག་ཚེ་འཛོམ་གྱི་འགྲམ་དུ་ཚང་ཁ་རྒྱག་བཞིན་ཡོད་པ་མ་ཟད། བློ་བཟང་གིས་ཀྱང་རྒྱ་གར་ནག་རིལ་ལས་ཀ་བ་དེས་སྐད་ཅོར་ཉོ་ཞོར་དུ་ཆང་དམ་པུ་ཁ་ཤས་ཤིག་ཨ་ཅག་ཚེ་འཛོམ་ལ་སྤྲོད་ཀྱིན་ཡོད།
བློ་བཟང་། ཁྱེད་རང་དོ་ནུབ་འདི་ནས་ཉལ་དགོས་པ་རེད། དེ་རིང་གྲྭ་སྒྲིག་ཀྱང་ཡག་པོ་མ་བྱུང་སྟབས། བཙོ་མའི་ཕྱེ་ཁུག་འདིའི་སྒང་དུ་རས་གདན་འདི་གཡོག་ནས་ཉལ་རོགས། སང་ཉིན་ག་ལེར་ཁྱེད་རང་ལ་གྲྭ་སྒྲིག་བྱེད་ཆོག་ཟེར་ནས། ཤིང་གི་ཉལ་ཁྲི་ཆག་པོ་ཞིག་གི་སྒང་དུ། བཙོ་མའི་ཕྱེ་ཁུག་གཉིས། དེའི་སྟེང་དུ་རས་གདན་རལ་པོ་ཞིག ཉལ་ཐུལ་ཡང་རལ་བོ་ཞིག མྱེལ་མགོ་ཡང་དེ་མཚུངས་ཤིག ཁང་བ་དེ་ཡང་སྐུ་མགྲོན་དག་གི་གཅིག་སྐྱག་གཏོང་སའི་འགྲམ་དུ་སྣུམ་སྣོད་ལྕགས་ཤོག་སྟོང་བ་དང་། ཤིང་ལེབ་མི་འཁོ་བ་དག་ལ་འཛེར་མ་བརྒྱབ་དེ་བཟོས་པ་ཞིག་ཡིན།
བློ་བཟང་གིས་ལགས་སོ་ཞེས་བཤད་དེ། རང་གིས་རང་ལ་སེམས་གསོའི་ཚབ་དུ། ཉིན་ཐོ་ཐུང་ཐུང་འདི་འདྲ་ཞིག་བྲིས་དེ་ཉལ་མགོ་བརྩམས།
བློ་བཟང་གི་ཉིན་ཐོ།
བློ་བཟང་། རང་གིས་རང་ལ་ཐེངས་མང་བོ་བཤད་མྱོང་བའི་སྐད་ཆ་དེ་དག་སེམས་སུ་བཟུང་དེ། སྐེས་འཛེགས་ཤིག་གི་འོག་དུ་སླེབས་ཡོད་པ་ལྟ་བའི་ངང་ཚུལ་འདིར་སླེབས་པ་རེད། སྐེས་འཛེགས་སྟེང་དུ་ཡར་འགྲོ་ཐུབ་མིན་དེ་ནི་རང་ཉིད་ལ་རེག་ལས་ཡོད་པ་རེད། ཁོང་རྒན་རྒོན་གཉིས་ལ་ཁག་ཆེ་ཡོད། མི་རྒྱུས་མེད་ཅིག འདི་ལྟར་ས་ཆ་རྒྱུས་མེད་ཅིག་ལ་སླེབས་ན་དོག་གཟོན་བྱེད་ལོས་དགོས། ལྷག་པར་དུ་ཁྱེད་རང་མི་ག་འདྲ་ཞིག་ཡིན་མིན་གཏན་ནས་མི་ཤེས་སྟབས། ཁྱེད་རང་ཐད་ཀར་ཁང་མིག་སྐྱིད་པོ་ཞིག་གི་ནང་དུ་འཇོག་ག་ལ་ཐུབ། ད་ནི་ཁྱེད་ཀྱིས་རང་གི་སྐྱིད་སྡུག་གང་ལ་ཐུག་ཡང་ཆོག་ལ། ལས་ཀ་ཡག་བཙོག་གང་དང་འཕྲད་ཀྱང་བྱེད་ཐུབ་ཟེར་མྱོང་བ་མ་ཡིན་ནམ། རང་གིས་རང་ལ་བདག་སྐྱོང་བྱོས། སང་ཉིན་ནི་ཉིན་མ་གསར་བ་རེད།
མུ་འགོད།
སྤུན་ཟླ་དག་སུན་སྣང་མེད་པར་མུ་མཐུད་དུ་ཕེབས་ཀྱིན་པ་དེར་སེམས་གཏིང་ནས་གུས་བཀུར་ཡོད།
དངོས་སྒྲུང་རིང་པོའི་བརྗོད་དོན་ལང་ལོང་ཁྲོད།།
སྐྱབས་བཅོལ་བོད་མིའི་འཚོ་བའི་སྣང་བརྙན་བཞེངས།།
སྤྱི་ཚོགས་ཡམ་ཡོམ་འཁྱོར་བའི་ས་གཞིའི་ཁྲོད།།
མྱ་ངན་ལོ་ཟླར་འཐམས་པའི་གདོང་དམར་མང་།།
ཨ་རོ་ཤ་ཁྲག་རུས་གསུམ། དེ་འདྲའི་ཐག་ཉེ་དེ་འདྲའི་ངོ་ཤེས་ད་ཁྱེད་རང་ཤེས་སོང་། ལོ་རྒྱུས་འདི་ར་སུས་ལོ་རྒྱུས་ཡིན་མིན་ཤེས་སོང་་།
འཇིག་རྟེན་སྐྱིད་སྡུག་ཟེར་བ་དེ་རང་གི་ཆོག་ཤེས་ལ་རག་ལས་པས་བདེན་པའི་བུ་ཞིག་དང་འཇིག་རྟེན་ལ་ལྟ་ཚུལ་ཡག་དག་ཡོདཔ་ཞིག་། ས་གང་དུ་སོང་ཡང་བདེ་སྐྱིད་ཀྱི་དྲོད་ཁོལ་ཁོ་དང་གྲིབ་མ་བཞིན་ཡོད་རེད། མ་འོང་བའི་ཕུགས་འདུན་བསུ་བའི་ནུས་བ་ཆ་ཚང་རང་ངོས་ན་ཡོད་པར་རེ་བ་དང་ཡིད་ཆེས་ཀྱིས་ཁེངས་བའི་བློ་བཟང་ལྟ་བུརའཚོ་བའི་བརྒྱུད་རིམ་ཁྲོད་ཀྱི་དར་རྒུད་ཙམ་གྱིས་འགུལ་ལྕོག་རྒྱག་ཐུབ་ཀྱི་མ་རེད་འདོད་ཀྱིན།
དགོན་ཁྲ་ཁྲའི་འདུ་ཁང་ནང་དུ། །སྡུག་མེད་ཀྱང་རྐུབ་རིལ་ན་གི འདི་འཇིག་རྟེན་འཁོར་བའི་ནང་དུ། །སྐྱིད་མེད་ཀྱང་སྐྱོ་བ་སངས་ཀི ཞེས་བྲིས་ན་ལེགས།