གྲོགས་པོས་ང་རང་ལ་བཤད་པ་ལྟར། ངས་ཀྱང་ཁོང་ཉིད་ཀྱི་གཡར་བའི་དོར་མ་དང་ལྷམ་འགོ ཁོ་རང་གི་རྒན་མོས་གྲ་སྒྲིག་བྱས་པའི་ཉིན་གུང་གི་ཁ་ལག་བཅས་བཟུང་དེ་ཁོ་རང་གི་རླངས་འཁོར་ནང་དུ་བསྡད་ནས་ལས་ཀའི་ཕྱོགས་སུ་ཕྱིན་པ་ཡིན།
སྐར་མ་བཅོ་ལྔ་ཉི་ཤུའི་རྗེས་སུ་རླངས་འཁོར་ས་ཚིགས་ཤིག་གི་སྐྱུར་ནས་གཞུང་ལམ་འགྲམ་དུ་ངེད་གཉིས་ཀྱི་ལས་དཔོན་ལ་སྒུག ལམ་འགྲམ་གྱི་བུད་མེད་མཛེས་མ་ཚོར་མིག་ཞགས་རེ་འཕངས་སྟེ་བསྡོད་ཀྱིན་པའི་སྐབས་སུ། སྐར་ཆ་ཉི་ཤུའི་རྗེས་སུ་ལས་དཔོན་ངེད་གཉིས་སར་རླངས་འཁོར་ཞིག་སྐོར་ནས་སླེབས་པ་དང་། ཁོང་གིས་དགོངས་དག དེ་རིང་ང་ཅུང་འཕྱི་སོང་ཟེར།
ང་རང་གི་མི་ཚེའི་ནང་དུ་ལས་ཀ་དེ་འདྲ་ཞིག་སྔོན་ཆད་རྩ་ནས་བྱས་མྱོང་མེད་སྟབས། གྲོགས་པོས་གང་བཤད་ལྟར་ལས་དཔོན་དེ་ཡི་ཟུར་ནས་ཡར་རྒྱུགས་མར་རྒྱུགས་བྱས། ང་ཚོའི་ལས་ཀ་ནི། ལྡུམ་ར་གཙང་མ་བཟོ་བ་དང་ལྡུམ་ར་གསར་དུ་འཛུགས་པ་སོགས་རེད། ཞོར་དུ་མེ་ཏོག་ཀྱང་འདེབས་ཀྱི་ཡོད་པ་རེད་འདུག དེང་རབས་འཕྲུལ་ཆས་ཁ་ཤས་ཤིག་ལ་འཐམ་ནས་ལས་ཀ་ཧུར་ཐག་འབད་ཐག་བྱས། གྲོགས་པོ་ནི་བདག་ལ་ཆེས་བཟང་བ་ནི་བཤད་མི་དགོས་པ་ཞིག་ཡིན། ལས་དཔོན་ཡང་བསམ་ཤེས་ཤིག་རེད།
ང་ཚོས་སྡོམ་པའི་མི་ཚང་བདུན་གྱི་ལྡུམ་ར་གཙང་མ་བཟོས། ཞོགས་པ་ཆུ་ཚོད་བདུན་དང་ཕྱེད་ཀ་ནས་འགོ་བཙུགས་དེ་ཕྱི་དྲོ་ཆུ་ཚོད་བཞི་དང་ཕྱེད་ཀ་བར་དུ་ལས་དུས་ཡིན་ཡང་སྐར་མ་བཅོ་ལྔ་ཙམ་ཞིག་འགོར་འདུག ལས་དཔོན་གྱིས་ང་རང་ལ་མུ་མཐུད་དུ་ལས་ཀ་དེར་སྤྲོ་སྣང་ཡོད་མེད་དང་རླངས་འཁོར་སྐོར་འདོད་ཡོད་མེད་སོགས་མི་ཉུང་བ་ཞིག་དྲིས་རྗེས་སུ་ངེད་ཅག་གི་ལས་མཚམས་བཞག་པ་ཡིན།
གྲོགས་པོ་ངེད་གཉིས་ལས་མཚམས་བཞག་ནས་ཁོ་རང་གི་རླངས་འཁོར་ཡོད་སའི་འགྲམ་དུ་འབྱོར་ལ་ཉེ་བའི་སྐབས་སུ་ཁོ་རང་གིས་གད་སྙིགས་བླུགས་སྣོད་ཆེན་པོ་ཞིག་གི་ནང་དུ་མེ་ཏོག་བཙོང་མཁན་གྱི་ཚོང་ཁང་ཞིག་ནས་མེ་ཏོག་རྙིང་བ་དག་གད་སྙིགས་དུ་འཕྱོ་ཡོད་པ་མཐོང་། ཁོ་རང་གིས་ནང་དུ་འཁུར་རྒྱུ་ཡིན་ཟེར། ངས་ཀྱང་ཁོ་རང་གི་རེ་འདོད་ལྟར། གད་སྙིགས་ཀྱི་སྣོད་ཆེན་པོ་དེ་ལས་མེ་ཏོག་རྙིང་བ་མི་ཉུང་བ་ཞིག་ཡར་སྒུམ་རོགས་བྱས་པ་ཡིན།
ངས་ཁོ་རང་ལ་མེ་ཏོག་དེ་དག་གིས་གང་བྱེད་ཅེས་དྲིས་དུས། ཁོ་རང་གིས་ང་རང་གི་བུ་མོ་འགྲོ་སའི་སློབ་གྲྭའི་ར་བའི་ནང་དུ་སྤྲོད་རྒྱུ་ཡིན་ཟེར། དེ་ནི་དངོས་ནས་རང་ལས་གཞན་གཅེས་ཀྱི་བསམ་བློ་ཞིག་ལག་ལེན་དུ་བསྟར་བ་རེད་སྙམ་ན་ཡང་། ཁྱེད་རང་གི་མིང་ལ་ངས་གད་སྙིགས་སྐྱབས་བཏགས་པ་ཡིན་ཞེས་རྩེད་མོ་རྩེད་ཞོར་དུ་ངེད་གཉིས་ཁོ་རང་གི་རླངས་འཁོར་ནང་དུ་བུད་དེ་ཕྱིར་ལམ་ལ་ཆས།
ལྡུམ་རའི་ལས་ཀ་བྱེད་མྱོང་། ལྡུམ་རའི་ནང་གི་རྩྭ་ངན་བསལ་སྐབས་རྐེད་པ་ཅུང་ཟད་ན་བ་དང་ཉོབ་སྣང་ལྟ་བུ་ཞིག་བྱུང་། དེ་བཞིན་གྱོན་ཆས་ཆ་ཚང་རློན་པ་དང་ས་་འདམ་གྱིས་གོས་ནས་ཕྱི་དྲོ་སྡོད་གནས་སུ་ཡོང་དུས་ལྟ་ཉན་ཞིག་མི་འདུག མཚམས་རེར་ཉི་མ་ཚ་བོ་དང་ཆར་བའི་ནང་དུ་ཡང་ལས་ཀ་བྱེད་དགོས་པ་འདུག་མོད་དེ་ལ་དམིགས་བསལ་འཚེར་སྣང་འདྲ་གང་ཡང་སྐྱེས་མ་སོང་། གང་ལྟར་ཡང་ངས་ལས་ཀ་འདི་ལ་ཅུང་གུ་ཡངས་ཀྱི་ཚོར་སྣང་འདྲ་ཞིག་ཚོར་བྱུང་། ངས་ལྡུམ་རའི་ལས་ཀ་བྱེད་སའི་ཚོགས་པ་དེས་ང་སློབ་ཕྲུག་ལས་ཀ་བའི་ངོ་བོར་ཉར་རྒྱུ་ཡིན་ལབ་ཀྱིན་འདུག་མོད་ལྡུམ་ར་བ་བྱ་རྒྱུར་ཐག་ཆོད་མ་སོང་། ད་ལྟ་ཟས་ཁང་གི་ཐབ་ཚང་ལག་གཡོག་བྱེད་ཀྱིན་ཡོད།
སྤོབས་པ་མཐའ་ཡས་ལགས། ཉིད་ནས་ལྡུམ་རའི་ལས་བྱེད་མྱོང་ཡོད་དམ། ད་ལྟ་ཉིད་ནས་ལས་ཀ་གང་བྱེད་ཀྱི་ཡོད་དམ།
ང་ལས་ཀ་འདི་ལ་ཅུང་དགའ། འདི་ལུས་ཐོག་གི་ངལ་རྩོལ་ཆེན་པོ་འདྲ་ཞིག་ཡིན་ན་ཡང་གནོན་ཤུགས་དང་མགོ་རྙོགས་ཆེན་པོ་མེད་པའི་གུ་ཡངས་འདྲ་ཞིག་ཡིན། ཁྱེད་སྡོད་ཡུལ་དེར་ཚ་བ་ཆེན་པོ་མེད་ན་དེ་ལས་ཀྱང་དྲག