བཙལ་ཡང་མ་རྙེད་པའི་བརྩེ་དུང་། བཅུ་བཞི།

ཁ་པར་འབྱོར་མཁན་དེ་ནི་ང་རང་གི་ངོ་ཤེས་ཤིག་ཡིན་པ་དང་། ཁོ་ལ་དངོས་ནས་དོན་དག་གལ་ཆེན་ཞིག་ཡོད་པས་ངས་རླངས་འཁོར་གྱིས་བསྐྱེལ་ཐུབ་མིན་སྐོར་དྲིས་སོང་།

ངས་བདེ་སྐྱིད་འཚོ་ལ། དགོངས་དག དོ་ནུབ་ང་རང་གི་གྲོགས་པོ་ཞིག་ལ་དོན་དག་གལ་ཆེན་ཞིག་བྱུང་འདུག ང་རང་ད་ལྟ་རང་འགྲོ་དགོས་ཐུག་སོང་། དོ་ནུབ་གཅིག་བྱས་ན་ང་རང་ཕྱིར་ཡོང་ནས་ཁྱེད་རང་གི་གཏམ་རྒྱུད་ཀྱི་འཕྲོར་མུ་མཐུད་དུ་ཉན་ཐུབ་རྒྱུ་ཁག་ས་རེད། ཡིན་ཡང་། ངས་དུས་ཚོད་གང་ཡོད་ལ་ཁྱེད་རང་ལ་སུན་པོ་བཟོ་བར་ཡོང་ཁོ་ཐག་ཡིན།

བདེ་སྐྱིད་འཚོས། གློ་བར་དུ་གང་ཞིག་ནས་གཉིད་སད་པ་བཞིན་མགོ་བོ་ཡར་ལ་བཀྱགས་ནས། ཡིན་དང་ཡིན། ཁྱེད་རང་དངོས་ནས་རང་གི་གྲོགས་པོ་ཚོ་ལ་བརྩེ་བ་ཟབ་མོ་ཡོད་པ་མ་ཟད། གྲོགས་པོ་དག་གི་ཆེད་དུ་ལས་ཀ་གང་ཡོད་ལ་ཧུར་ཐག་གིས་བྱེད་པ་དེ་ནི་ང་རང་གིས་དངོས་ནས་སེམས་གཏིང་ནས་མོས་གུས་ཡོད་ལ། རྗེས་སུ་ཡི་རུང་ཡོད། ལོས་ཡིན། ཁྱེད་རང་སོང་། ག་དུས་ཁོམ་ན་དེ་དུས་ཕེབས་ཤོག ངའི་གཏམ་རྒྱུད་ཀྱི་མཇུག་མ་ཁྱེད་རང་གིས་ཉན་རྒྱུར་བདག་གིས་ཀྱང་རེ་བ་བྱེད་ཀྱི་ཡིན།

གྲོགས་པོ་བཟང་བོ་སྐྱབས་ཀྱི་ངོ་ཤེས་ཤིག་སྒེར་སྤྱོད་སྣུམ་འཁོར་ཞིག་གིས་རྡབ་ནས་སྨན་ཁང་དུ་བསྐྱེལ་ཡོད་པ་དང་། ཁོ་རང་ཨ་རིར་གསར་དུ་འབྱོར་ནས་ཟླ་ཤས་ལས་འགྲོ་ཡི་མེད་པ་དང་། གྲོགས་པོ་ངོ་ཤེས་བསྟེན་ས་བཟང་བོ་སྐྱབས་མ་གཏོགས་མེད་པ་ཞིག་རེད་འདུག ལམ་སྐབས་སུ་བཟང་བོ་སྐྱབས་ཀྱི་ཁོ་རང་གི་སྐོར་མི་ཉུང་བ་ཞིག་ང་ལ་བཤད་པ་དང་ངས་ཀྱང་གང་ཐུབ་ཅི་ཐུབ་ཅིག་རོགས་བྱེད་འདོད་ཀྱི་སེམས་ཤུགས་ཀྱང་འཕར་དུ་བཅུགས་སོང་།

ཁོས་ང་ལ་དེ་སྔོན་ངས་ཁྱེད་རང་ལ་ཁ་པར་བཏང་དུས་ཁྱེད་རང་གང་དུ་ཡོད། ང་རང་ཁྱེད་ཀྱི་སྒོ་འགྲམ་བར་དུ་སོང་བ་ཡིན། ཁྱེད་རང་ནང་དུ་མེད་པ་ཤེས་ནས་ཁ་པར་མི་གཏོང་ཐབས་མེད་བྱུང་བ་རེད།

ང་རང་བདེ་སྐྱིད་འཚོའི་ནང་དུ་ཡོད། ཉེ་སྔོན་ངས་ཁྱེད་ལ་་བཤད་པའི་མོ་རང་གི་གཏམ་རྒྱུད་ཀྱི་མཇུག་དེར་ཉན་བཞིན་ཡོད། དངོས་ནས་་་་་

བཟང་བོ་སྐྱབས་ཀྱིས་མགོ་བོ་འཕུར་འཕུར་ཞིག་གཏོང་བཞིན། ང་ཚོ་ལས་ངན་རེད། གང་དུ་སོང་ན་ཡང་ལྷོད་ལྷོད་ཅིག་མེད་ཀི ལྷག་པར་དུ་བདེ་སྐྱིད་འཚོ་ལྟ་བུའི་བུད་མེད་མི་ཉུང་བ་ཞིག་མི་འདོད་ཀྱང་རང་དབང་མེད་པར་ས་གནས་ཨ་རིར་གནས་བཅའ་བཞིན་ཡོད་པ་རེད། སྐབས་རེར་ང་སྐྱེ་བ་ཕོ་ཞིག་ཡིན་ཡང་། རང་གི་མི་ཚེ་ལ་ཕྱིར་དྲན་བྱེད་དུས་སུ། སྐྱེ་བ་ཕོ་ཞིག་ལ་དེ་འདྲའི་སྐྱོ་སྣང་རེ་ཡོང་བའི་སྐབས་སུ་མིག་ཆུ་རང་དབང་མེད་པར་ཤོར་འགྲོ་ཡི་འདུག་ན། སྐྱེ་བ་བུད་མེད་ཅིག དེ་ཡི་ནང་ནས་སྐྱིད་ཅིག་མ་རིག སྡུག་བསྔལ་ཁོ་ནའི་མི་ཚེ་བསྐྱལ་དགོས་བྱུང་བའི་ཁོ་མོ་ལྟ་བུ་དག་དངོས་ནས་ཡ་ང་བའི་གནས་རེད་བཤད།

ངས་དབུགས་རིང་ཞིག་འཐེན་ཞོར་དུ། རེད་རེད་་་ མདུན་གྱི་སྒམ་ཆུང་དེ་ཁ་ཕྱེ་ནས་ནང་གི་ཐ་མག་སྒམ་ཆུང་ཕྱིར་ལེན་རོགས། ནང་གི་རྐང་གཅིག་མེ་ལ་སྒྲོན་དང་་