བོད་ཕྱི་ནང་གི་འཕར་མཆོང་གི་བར་ཐག

རྒྱ་ནག་གཞུང་ཚབ་ཁང་གི་སྒོ་འགྲམ་དུ། བོད་མི་དག་གིས་ང་རང་རྒྱ་ནག་གི་མི་སེར་ཡིན་ཟེར་བའི་ཡིག་ཆ་དག་ལ་ཐམ་ཁ་རྒྱགས་པ་དང་མཛུབ་ཐེབས་རྒྱག་མཁན་ཡོད། དེ་ཡང་རེག་མི་རེག་གི་སྐོར་ནས་སེམས་འཁྲལ་བྱེད་ཀྱི་ཡོད། ཨ་རིའི་གཞུང་ཚབ་ཁང་གི་སྒོ་འགྲམ་ན། ང་རང་ཆོས་ཚོགས་ཅིག་གི་མགྲོན་པོ་ཡིན། ང་རང་སློབ་གྲྭ་ཅིག་ཅིག་གི་སློབ་མ་ཡིན། ང་རང་མི་ཚང་ཅིག་ཅིག་གི་ཉེ་འབྲེལ་ཡིན། ང་རང་ས་ཕྱོགས་ཤིག་གི་སྤྱིན་བདག་ག་གེ་མོའི་མགྲོན་ཤོག་ཡོད་ཟེར་ནས་འཚང་ཁ་ཤིག་ཤིག་བྱེད་ཀྱི་ཡོད།

བོད་ནང་དུ་བོད་མི་དག་གིས་རང་རང་གི་སྒོ་འགྲམ་ན། འདི་ནི་ངེད་ཚང་གི་ས་གཞི་ཡིན། འདི་ནི་ངེད་ཚང་གི་ཁྱིམ་གཞི་ཡིན། འདི་ནི་ངེད་ཚང་གི་བདག་དབུང་ཡིན། འདི་ནི་ངེད་ཚང་གི་མི་རབས་ཀྱི་རྟེན་ས་ཡིན། ཕྱི་ན་ངེད་ཅག་གི་མགྲིན་ཚབ་པ་ཡོད་ཟེར་ནས་སྐད་འབོད་བྱེད། འུ་ཐུག་ནས་རང་གི་སྲོག་ཡང་འབེན་དུ་བཞག་ནས་བདེན་དབུང་བྱེད་ཀྱི་ཡོད། རང་གི་རྒྱུ་ནོར་ལོང་སྤྱོད་ཡོད་ཚད་བློས་གཏོང་གི་མི་རིགས་ཤིག་གི་བདེན་པ་སྒྲོག་བཞིན་ཡོད། འགྱུར་མེད་ཀྱི་དམ་པ་དམ་ཚིག་ཞིག་གིས་ངེད་ཚང་གི་བླ་མ་བོད་དུ་ཡོང་བར་ཆོག་ཆན་དགོས། བོད་མི་དག་ལ་རང་དབང་དགོས། ཉེས་མེད་ཀྱི་བོད་མི་རྣམས་ལ་མནར་གཅོད་གཏོང་མི་ཆོག་ཟེར་ནས། རང་ཉིད་ཀྱི་ལུས་པོ་འདོམ་བཀང་དེ་རྒྱ་ནག་སྲིད་གཞུང་གི་རྒྱུགས་ཁྱི་དམར་ནག་དག་གི་མེ་མདའི་ཁ་རུ་མཆོང་བཞིན་ཡོད།

བོད་ཡུལ་ན། ཨ་མ་ཞིག་གིས་རང་གི་བུ་ཕྲུག་བཙོན་ནས་ཤི་བར་སྨྲས་ངག་འདོན་བཞིན་ཡོད། གྲྭ་བ་ཞིག་གིས་རང་གི་ཕ་རྒན་རྒྱ་དམག་གིས་གསད་པར་སྨོན་ལམ་འདོན་བཞིན་ཡོད། བུ་ཆུང་ཞིག་གིས་རང་གི་ཕ་མ་གར་སོང་ཆ་མེད་དུ་སོང་བར་ངུ་འབོད་བྱེད་ཀྱི་ཡོད། བུད་མེད་ཅིག་གིས་རང་གི་ཁྱོ་ག་ཉེས་པ་མེད་བཞིན་དུ་བཙན་ཁྲིད་བྱས་པར་རྒྱ་གཞུང་ལ་ངོ་རྒོལ་བྱེད་ཀྱི་ཡོད། སྐྱེ་བ་ཞིག་གིས་རང་གི་ཆུང་མ་ལ་དམར་དམག་ཁྱི་སྤྱང་དག་གིས་བཙན་གཡབ་བྱས་པར་ཁོང་ཁྲོ་ཟ་བཞིན་ཡོད། བོད་ནང་དུ་ཇ་ཁ་ཆང་ཁ་ན་བོད་དོན་གླེང་བཞིན་ཡོད་ལ། གླུ་ལེན་གར་རྩེད་ཁྲོད་ན་ཡང་བོད་ཀྱི་ལ་རྒྱ་གླེང་བཞིན་ཡོད།

བཙན་བྱོལ་དུ། བུད་མེད་ཅིག་གིས་རང་གི་ཁྱོ་ག་ཕྱི་རྒྱལ་དུ་ཡོད་པ་དེ་ཡིས་དངུལ་སྒོར་ལེན་དུ་དངུལ་འདྲེན་ཁང་དུ་འགྲོ་བཞིན་ཡོད། བཙུན་པ་ཞིག་གིས་རང་གི་སྤྱིན་བདག་ལ་འཕྲིན་ལན་འབྲི་བཞིན་ཡོད། སློབ་མ་ཞིག་གིས་རང་ཉིད་ཕྱི་རྒྱལ་གང་རུང་ཞིག་གི་སློབ་རྒྱུགས་ལོན་པར་དབྱིན་ཡིག་སྤྱོང་བཞིན་ཡོད། ཨ་མ་ཞིག་གིས་རང་གི་བུ་དང་བུ་མོ་ལ་ཕྱི་རྒྱལ་ནས་བཟའ་ཚང་ཞིག་རེག་པར་སྨོན་ལམ་འདེབས་ཀྱི་ཡོད། སྐྱེ་བ་ཞིག་གིས་ཕྱི་རྒྱལ་བུད་མེད་ཅིག་གི་ཨམ་ཕྲག་གི་འཐིག་སྲབ་ལ་བལྟས་དེ་སྲང་བར་ན་ཁྱི་བཞིན་དུ་འདུར་བཞིན་ཡོད། སྐྱེ་བོ་མི་ཉུང་བ་ཞིག་གིས་རང་ཉིད་ཕྱི་རྒྱལ་གང་རུང་ཞིག་དུ་ཐར་བར་ཐབས་ཤེས་ཡོད་དགུ་འཐེན་བཞིན་ཡོད། ཆབ་སྲིད་བཙོན་པ་མི་ཉུང་བ་ཞིག་གིས་རང་ཉིད་ལ་རྒྱན་ཤོག་དེ་ཐོབ་པར་སྐྱབས་མཇུག་ཞུ་བཞིན་ཡོད། དགེ་འདུན་པ་མི་ཉུང་བ་ཞིག་གིས་རང་ཉིད་ལ་ཆོས་ཚོགས་གང་རུང་གི་མགྲོན་ཤོག་རེག་པར་རེ་བ་རྒྱག་གི་ཡོད། བཙན་བྱོལ་དུ་ཇ་ཁ་ཆང་ཁ་ན་ཕྱི་རྒྱལ་གླེང་བཞིན་ཡོད། གླུ་ལེན་གར་རྩེད་ཁྲོད་ན་ཡང་གཞན་གྱི་ལད་ཟློས་ཁོ་ནར་འཐིམ་ཡོད།

འདི་ནི་དེ་རིང་གི་བོད་ཕྱི་ནང་གཉིས་ཀྱི་གནམ་འོག་ཡིན་ལ། བོད་མི་དག་གིས་བོད་དོན་བརྩོད་སྟངས་དང་བོད་དོན་འཐབ་རྩོད་བྱེད་ཕྱོགས་ཀྱི་བར་ཐག་ཡིན། བར་ཐག་འདིས་བོད་མི་དག་གི་རྩ་དོན་ལ་ནུས་པ་མེད་པར་འགྲོ་བཞིན་ཡོད་ལ། ནུས་པ་མེད་པ་ནས། ནུས་པ་འདོན་མཁན་གྱི་དབའ་བོ་དབའ་མོ་དག་ལོ་རེ་བཞིན་རྒྱ་ནག་སྲིད་གཞུང་གིས་མེད་པར་གཏོང་བཞིན་ཡོད་ལ། བྱེས་སུ་ཡང་རེ་ཟུང་འབུར་དུ་ཐོན་པར་གྲྭ་སྒྲིག་བྱས་ཀྱང་། སྤྱི་ཚོགས་ཀྱི་ནད་སྙིང་ལྕི་མོའི་ཕྱི་ནང་གསང་གསུམ་ལ་མནར་གཅོད་ཐེབས་ནས་འགུལ་མེད་དུ་གྱུར་ཡོད།