སྔོན་བྱོན་དམ་པ་མང་བོ་གར་སོང་ནི་མི་ཤེས།
མེས་པོ་རླབས་ཆེན་དག་གི་ཤུལ་རྗེས་ནི་མ་ཟིན།
དུས་རབས་གསར་བའི་སྟོན་པ་བགྲེས་ཡོལ་ལ་གཞུགས་ཡོད།
ད་ནི་གཞོན་སྐྱེས་ཡོད་ན་འདི་ག་ལ་ཐོན་ཤོག
རིགས་ཀྱི་མདུན་པ་ཟེར་ནས་སྟོང་ལབ་ཀྱི་མི་ཕན།
སེམས་ཀྱི་འདུ་ཤེས་གླེང་ནས་ཚོར་རྙོག་གི་མི་ཡོང་།
དགའ་མོས་དགའ་སྡུག་བཤད་དེ་ཕྱོགས་རུས་ཀྱི་མི་འགྲིག
རིགས་ལ་གཅེས་ཞེན་ཡོད་ན་ཁ་ལག་གཉིས་མཉམ་དགོས།
ང་དང་ཁྱོད་ཞེས་གླེང་བའི་གཞིས་བྱེས་ཀྱི་བར་ཐག
གདུང་སེམས་མཉམ་བསྐྱེད་ཟེར་བའི་འབོད་སྒྲ་ལ་འཐམ་ནས།
གཞིས་ན་རོ་དང་ཁྲག་གི་མཚོ་མོ་རང་གཞུར་དུས།
བྱེས་སུ་ཚོགས་སྐྱིད་བར་གྱི་གླུ་གར་གྱི་འཚོ་ཡོད།
ཤི་ན་ཤི་དོན་ཡོད་པའི་ལས་གཞི་ཞིག་བརྩམས་རྒྱུར།
བོད་ཀྱི་མི་ལ་ཞེན་ཁོག་རུས་གསུམ་གྱི་མ་འདང་།
བཤད་ན་བཤད་ལ་དགའ་བའི་ཆབ་སྲིད་ཀྱི་དབུ་ཁྲིད།
སྔོན་ཡང་མང་ལ་ད་ནི་དགོས་དོན་ཡང་མི་འདུག
བདེན་པ་ཟེར་ནས་འཛམ་གླིང་མི་ཀུན་ལ་བསྒྲགས་པའི།།
རྩྭ་ཚིག་སྣ་ཚོགས་སྐྱོར་བའི་ལས་སྣེ་བ་མང་ཡང་།
རྩ་དོན་སྲོག་བཞིན་སྐྱོང་རྒྱུར་འབད་བརྩོན་རང་མེད་དུས།
འཛམ་གླིང་མཉམ་འབྲེལ་ཟེར་ཡང་བྲག་སྐད་ཀྱི་ཟླ་ཡིན།
གཅིག་ཤོར་གཉིས་ཤོར་གནད་དོན་སྣ་ཚོགས་ཀྱི་ཁྲོད་ནས།།
བཙན་བྱོལ་ཟེར་བའི་མིང་ཡང་མི་གླེང་བར་འབད་རྒྱུར།།
བྱོལ་བའི་གཞུང་གི་ལས་གཞི་འཆར་བཀོད་དེ་བསམ་ན།
བོད་པ་ཟེར་ནས་འབོད་ས་མེད་པ་ཞིག་བཟོས་འདུག།
འཁོར་བ་འཁོར་ལོ་ལྟ་བུའི་རི་གྲོང་གི་མཐའ་ནས།།
འཁོར་བའི་རྨིང་གཞི་མ་ཤེས་ས་མཐའ་ན་ལུས་པའི།།
སྐྱེ་བ་བོད་ལུས་ཐོབ་པའི་མྱི་ངན་ངའི་ཚོགས་ལ།།
རྗེས་རབས་བོད་པ་དག་གིས་བསྡིག་དམོད་ཅིག་ཡོང་ངེས།།
ཤ་ཁྲག་ཁྲི་བཙན་གཉིས་ཀྱི་སེམས་ཁུང་གི་ཆུ་རྒྱུན།། བོད་པའི་རིགས་མྱུག་བསྲུང་བའི་བདུད་རྩི་དེ་ཡིན་ཀྱང་།། དེང་དུས་འགྱིག་ལས་གྲུབ་པའི་ལྗང་མདོག་གི་མྱུ་གུར།། ཆུ་མོའི་རྒྱུན་གྱི་ཕན་པའི་གནད་དོན་དེ་ཁག་སོང་།།
ངས་ཀྱང་བོད་རིགས་སྤུན་ཟླ་ཚོར་སྐད་ཅིག་བསྐུར།
བོད་ལ་དགའ་ཞེན་ཡོད་ན་བོད་ཡིག་ལ་འབད་རོགས།།
བོད་ལ་བསམ་ཤེས་ཡོད་ན་བོད་སྐད་རེ་བཤད་རོགས།།
བོད་པས་བོད་པར་མཐོང་ཆུང་ཟུར་ཟ་ཞིག་མེད་རོགས།།
བོད་པས་བོད་པར་ལག་རྡང་གཅིག་ཏུ་ཞིག་སྦྲེལ་རོགས།།