གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། དྲུག

ང་རང་ལས་ཀ་ནས་ནང་དུ་འབྱོར་ནས་མཛའ་མོ་དང་བུ་མོ་ངེད་གསུམ་གྱིས་ཟ་མ་ཟས་ཚར་མ་ཐག ང་རང་ལ་གྲོགས་པོ་ཞིག་གིས་ཁ་པར་འབྱོར་སོང་། དེ་ནི་ངས་ཀྱང་རྒྱུན་ལྡན་ལྟ་བུ་ཞིག་ལ་ངེས་འཛིན་གྱིས་ཁ་པར་ག་ལེར་སྒོ་ཕྱེ་ནས་ཨ་རོགས། ཨ་རོགས་ཞེས་ཐེངས་གཉིས་གསུམ་ཞིག་ལ་ཕར་བོས་དུས། གྲོགས་པོའི་ཁ་པར་གྱི་ནང་ནས་གོ་འོང་བ་ནི། ཁོ་རང་གི་རྒན་མོ་དང་ལྷན་དུ་སྐད་ཤུགས་ཆེན་པོས་སྒོ་ནས་གང་ཞིག་བཤད་ཀྱིན་ཡོད་པ་དེ་རེད། སྐབས་དེར་ངའི་སེམས་སུ་གང་བྱུང་བ་ཡིན་ནམ་སྙམ་ཞོར། ཡང་བསྐྱར་སྐད་ཤུགས་ཆེན་པོས་སྒོ་ནས་ཨ་རོགས་ཞེས་བོས།

དེ་ནས་གྲོགས་པོ་བློ་དོན་གྱིས་ང་ལ་བདེ་མོ་ཡིན་ན། རྡོར་རྒྱལ་ལ་དོན་དག་ཞིག་བྱུང་འདུག ད་ང་ཚོས་རོགས་པ་རེད་བྱེད་དགོས་ཀྱི་ཡོད་ས་རེད། ཁོ་རང་གི་ཐོངས་ཆེན་གྱི་དུས་ཚོད་རྫོགས་ཡོད་པ་དེ་ལ་སླར་ཡང་ཐོངས་ཆེན་མ་སྤྲད་པའི་སྒང་ལ། ཁོ་རང་ལ་ལོ་ངོ་གཉིས་སུམ་གོང་དུ་ཐོབ་པའི་མི་མང་ཐོབ་ཐང་ལག་ཁྱེར་དེ་ཡང་གཞུང་བཞེས་བཏང་འདུག ཟླ་ངོ་གཅིག་གི་དུས་ཚོད་སྤྲད་ནས། དེ་ཡི་ནང་ནས་ཕྱིར་ལོག་དགོས་པར་བཤད་འདུག

གྲོགས་བློ་དོན་གྱིས་སྐད་ཆ་དེ་ཡིས་ང་རང་ལ་རང་དབང་མེད་པར་གྲོགས་པོ་རྡོར་རྒྱལ་གྱི་ག་རེ་བྱེད་དགོས་ཀྱི་ཡོད་མེད་ཐད་དུ་བསམ་བློ་གཏོང་དགོས་སུ་བཅུགས་པ་མ་ཟད། བོད་རིགས་གཅིག་པ་ཡིན་པའི་ཤ་ཞེན་དེ་ཡིས་ག་རེ་བྱེད་ཐུབ་པ་འདྲ་ཡོད་ན་ང་ཚོས་ཚང་མས་རོགས་པ་བྱེད་རྒྱུར་མོས་མཐུན་བྱུང་སོང་། གྲོགས་པོ་བློ་དོན་གྱིས་བཤད་ན། ཁོ་རང་གིས་ཁྲིམས་རྩོད་པ་ཁ་ཤས་ཤིག་འཚོལ་བཞིན་འདུག་ན་ཡང་། དངོས་ནས་ཁྲིམས་རྩོད་པ་དེ་དག་ལ་གླ་ཆ་ཆེན་པོ་སྤྲོད་དགོས་ཀྱི་ཡོད་རབས་བཤད་སོང་། དེ་ནས་ངེད་གཉིས་ཀྱིས་བཤད་མཚམས་བཞག་མ་ཐག ངས་གྲོགས་པོ་རྡོར་རྒྱལ་ལ་ཐད་ཀར་ཁ་པར་བཏང་བ་ཡིན།

ཨ་རོགས། ད་ཁྱེད་རང་ལ་དཀའ་ངལ་ཞིག་འཕྲད་འདུག་ཟེར་གྱི་འདུག ངས་ཁྱེད་རང་ལ་རོགས་པ་བྱེད་ཐུབ་པ་གང་ཡོད་པ་དེ་དག་ཡིན་གཅིག་མིན་གཅིག་བཤད་དགོས་པ་རེད། གོ་ཐོས་སུ་ཉིད་ཀྱིས་ཐོབ་ཐང་ལག་ཁྱེར་ཡང་ཕྱིར་བསྡུ་གནང་འདུག་ཟེར་གྱི་འདུག ད་ཁྱེད་རང་གིས་ག་རེ་བྱེད་རྩིས་ཡོད་དམ། སེམས་ཁྲལ་མ་བྱེད་ཅིག

གྲོགས་པོ་རྡོར་རྒྱལ་གྱིས། རེད་དངོས་ནས་ཐུགས་རྗེ་ཆེ། སེམས་ཁྲལ་བྱེད་ཀྱི་མེད། ཁྲིམས་རྩོད་པ་ཁ་ཤས་ཤིག་དང་སྐད་ཆ་བཤད་པ་ཡིན། སང་ཉིན་ནངས་ཉིན་བར་དུ་གང་བཟང་བ་ཞིག་འཚོལ་ཞིབ་བྱེད་ཀྱི་ཡིན། ལས་ཀ་བྱེད་སའི་སྤྱིན་བདག་གིས་ཀྱང་ཁྲིམས་རྩོད་པ་རེ་བལྟ་བཞིན་ཡོད་པ་རེད། ཁ་ཐོར་སོང་བའི་རྒན་མོས་ཀྱང་ཁྲིམས་རྩོད་པ་བལྟ་བཞིན་པའི་སྒང་ཡིན། གལ་སྲིད། སླར་ཡང་མ་རེག་པ་ཡིན་ན། ཕྱིར་རྒྱ་གར་དུ་སོང་། དེ་ནས་བོད་དུ་ཕ་མ་གཉིས་ལ་བལྟ་རུ་འགྲོ་འདོད་འདུག ཕ་མ་གཉིས་ལ་མ་ཐུག་པར་ལོ་མང་འགྲོ་སོང་། དེ་མིན་ད་གང་བྱེད།

ངས་སེམས་ཁྲལ་མ་བྱེད། དངོས་ནས་ཡིན། གང་ཅིའི་ཐད་ནས་རོགས་པ་བྱེད་རྒྱུ་ཡོད་ན་ཡིན་གཅིག་མིན་གཅིག་ང་ལ་ཁ་པར་གཏོང་རོགས། ག་དུས་ཡིན་ན་ཡོད། སེམས་ཆུང་མི་དགོས། དེ་སེམས་ལ་བཟུང་། ཁྲིམས་རྩོད་པ་བཙལ་ན་སྒོར་མོས་དཀའ་ངལ་ཡོད་ན་ང་ལ་ཤོད་དང་། ངས་གང་ཐུབ་རེ་བྱེད་ངེས་ཡིན་ཞེས་བཤད་དུས། ཁོ་རང་གིས་ད་ལྟ་སྒོར་མོའི་དཀའ་ངལ་མེད་ཟེར།

གྲོགས་པོ་རྡོར་རྒྱལ་ནི། རྒྱལ་ཁབ་འདིའི་ནང་དུ་བོད་པ་བརྒྱད་ཡོད་པ་དེ་ཡི་ནང་གི་གཅིག་ཡིན། སྤྱིར་ན་བོད་པ་མི་ཉུང་མོད། ད་ལྟའི་འཆར་ངས་བོད་པ་བརྒྱད་ཟེར་དོན་ནི། བོད་པ་བརྒྱད་འདི་ནི་ང་དང་འདྲ་བ་དག་ཡིན། རྒྱལ་ཁབ་འདིའི་བུད་མེད་ཚོ་དང་ལྷན་དུ་རྒྱལ་ཁབ་འདིར་ཡོང་བ་དག་ལ་ཟེར་གྱི་ཡོད། རེད་དེ། ང་རང་ཁོང་ཚོ་དང་མ་འདྲ་ས་ཞིག་གཅིག་ཡོད་པ་དེ་ནི། ང་རང་གིས་ད་ལྟ་ཡང་ཆང་ས་བརྒྱབས་མེད་པ་དེ་ཡིན། གྲོགས་པོ་རྡོར་རྒྱལ་ནི། རྒྱལ་ཁབ་འདིའི་བུད་མེད་གཅིག་དང་ལྷན་དུ་བཟའ་ཚང་བྱས་དེ་འདིར་ཡོང་བ་ཡིན་ལ། འདིར་འབྱོར་ནས་ཟླ་ངོ་ཁ་ཤས་ཀྱི་རྗེས་སུ་བུད་མེད་དེ་དང་ཁོ་གཉིས་ལ་རིགས་རྒྱུད་ཅིག་ཀྱང་བྱུང་བ་ཡོད། དེ་ནི་བུ་མོ་ཞིག་ཡིན། དེ་དང་མཉམ་དུ་ཁོ་རང་ལ་རྒྱལ་ཁབ་འདིའི་ཐོབ་ཐང་ལག་ཁྱེར་ཡང་རེག་ཡོད་པ་རེད།

མི་ཟེར་བ་ནི་རིགས་གཞུང་དང་གོམ་གཤིས་མི་འདྲ་བ་ཡིན་དུས་བཟའ་ཚང་བྱས་དེ་ཡུན་རིང་བོ་མི་ཚེ་བསྐྱེལ་དགོས་དུས། དགའ་སྐྱོ་ཆགས་སྡང་གི་གནས་ཚུལ་ནི་རིགས་གཅིག་པ་ཞིག་དང་ལྷན་དུ་བསྡད་པ་ལས་དཀའ་ངལ་མང་བ་ནི་བཤད་མི་དགོས་པ་ཞིག་ཡིན་དུས། ཁོ་རང་ནི་དཀའ་ངལ་དེ་ལས་རྒྱལ་མ་ཐུབ་པར་བཟའ་ཚང་ཁ་ཁར་སོང་བའི་ཁྲོད་ཀྱི་གཅིག་ཡིན། དེ་ཡིན་དུས། རྒྱལ་ཁབ་འདིའི་ཁྲིམས་ལྟར་ན་བུ་མོ་ལ་ཟླ་རེ་ལ་ནུ་རིན་ཟེར་ན་རེད། ཟས་རིན་ཟེར་ན་རེད། རང་གིས་གླ་ཆ་ལས་བཞི་ཆ་གཅིག་སྟེར་དགོས་པ་ཡིན། ཁོ་རང་གིས་ཀྱང་དེ་ལྟར་ཁས་ལེན་གྱིས་སྤྲོད་བཞིན་ལོ་ངོ་འདི་དག་སོང་བ་རེད།

སྟབས་མ་ལེགས་པ་ཞིག་ལ་ལོ་ངོ་འདི་དག་གི་རྗེས་སུ་ཁོ་རང་གིས་ཡིག་ཆ་མུ་མཐུད་དུ་རྒྱལ་ཁབ་འདིའི་ཁྲིམས་གཞི་ལྷན་ཁང་ནས་གཉར་ཚགས་བྱས་ཡོད་ཀྱང་ཁ་མ་ཕྱེ་སྟབས། ཐོངས་ཆེན་ལས་ཁུངས་ཀྱིས་ཁོ་རང་གིས་ཐོབ་ཐང་ལག་ཁྱེར་ལག་ནས་བླངས་དེ་ཕྱིར་འགྲོ་དགོས་པའི་བརྡ་ཁྱབ་དེ་བཏང་བ་རེད་འདུག འདི་ནི་རྒྱལ་ཁབ་འདིའི་ཁྲིམས་ཤིག་ཡིན་ལ། ཁོང་ཚོས་བུད་མེད་དང་ལྷན་དུ་གཉེན་སྒྲིག་ནས་ལྷན་དུ་བསྡད་ཡོད་ན། ལོ་ངོ་བཞི་ལྔའི་རྗེས་སུ་རྒྱལ་ཁབ་འདིའི་མི་སེར་ལག་ཁྱེར་སྤྲོད་ཀྱི་ཡོད་པ་ཡིན། འོན་ཀྱང་། ཁོ་རང་མུ་མཐུད་དུ་བཟའ་ཚང་བྱས་ནས་བསྡད་མེད་པ་ཡིན་དུས། ཁོ་རང་ལ་རྒྱལ་ཁབ་འདིའི་མི་སེར་ལག་ཁྱེར་མི་སྤྲོད་པའི་ལམ་ཁ་དེ་ལ་དེད་པ་རེད།

ངས་སྔོན་ཆད་བརྙན་འཕྲིན་ལས་རྒྱལ་ཁབ་འདིའི་སྐྱེ་བ་ཞིག་གིས་རྒྱལ་ཁབ་གཞན་གྱི་བུད་མེད་ཅིག་ལ་བཟའ་ཚང་བྱས་དེ་ཁོ་གཉིས་ཕྲུ་གུ་ཞིག་ཀྱང་ཡོད་འདུག་པ་དང་། ཕྱིས་སུ་བུ་མོ་དེ་འཚར་ལོངས་བྱུང་ནས་ལོ་ངོ་བཅུ་ཙམ་ལ་སླེབས་འདུག་པའི་སྐབས་དེར། སྐྱེ་བ་དེ་ནད་མནར་གྱིས་ཤི་འདུག སྐབས་དེར་བུད་མེད་དེ་ལ་ཁྱེད་རང་གིས་བུ་མོ་རྒྱལ་ཁབ་འདི་ནས་བསྡད་ཆོག་པ་མ་གཏོགས་ཁྱེད་རང་བསྡོད་ཆོག་གི་མ་རེད། ཁྱེད་རང་ཕྱིར་འགྲོ་རོགས་ཞེས་བཤད་འདུག་པ་དེ་ཐོས་དུས། ང་རང་དངོས་ནས་རྒྱལ་ཁབ་འདིའི་ཆབ་སྲིད་ཀྱི་བྱེད་སྟངས་ལ་སྐྱག་མེར་བླངས་སོང་། དེ་རིང་དངོས་སུ་རིགས་གཅིག་སྤུན་ཟླ་ཞིག་ལ། རང་གི་གཅེས་པའི་བུ་མོ་བཞག་ནས་རྒྱལ་ཁབ་འདི་ནས་འཕུད་ཀྱིན་པའི་གནས་ཚུལ་འདི་ཐོས་དུས་སུ། དངོས་ནས་སེམས་སྐྱིད་པོ་མེད་ཞིག་བཟོས་སོང་།