དགུ
ཞོགས་ཉལ་ཞིག་རྒྱགས་ཁུལ་བྱས་ཀྱང་། སེམས་ལྷོད་དུ་འབབ་པའི་གཉིད་ཅིག་གཏན་ནས་ཁུགས་ཐུབ་ཀྱི་མི་འདུག རྒྱུ་མཚན་ནི་དེ་རིང་མཛའ་མོའི་ཕུ་བོ་དང་རྒན་མོ། བུ་ཕྲུག་སོགས་ཡོང་གི་ཡོད་པ་ཡིན་ལ། ཁོང་ཚོས་བར་དུ་བུ་ཕྲུག་ཞིག་གི་བྱ་སྤྱོད་ལས་འཕྲོས་པའི་ཁ་རྩོད་ཤོར་ནས་ཟླ་ངོ་བརྒྱད་ལྷག་གི་རིང་དུ་སྐད་ཆ་བཤད་རྒྱུ་མེད་པ་དང་ཐུགས་འཕྲད་མེད་པར་ལུས་པ་རེད། དེ་ཡིན་དུས་ང་རང་ཡང་དེ་དག་གི་ནང་དུ་ཡོད་པའི་ནང་མིའི་འཁྲིས་ཤིག་ཡིན་དུས། སེམས་པ་ལྷོད་ལྷོད་ཅིག་མེད་ཀི རང་གི་མཛའ་མོ་ལ་སྐྱོན་མེད་པ་མིན་ན་ཡང་། མཛའ་མོས་ཁོ་རང་གི་ཕུ་བོའི་བུས་མ་རབས་བྱས་པ་དེར་དེ་འདྲ་བྱེད་མི་རུང་བར་བཤད་པ་དེར། ཕུ་བོའི་རྒན་མོ་ཁྲོས་དེ་ཁ་རྩོད་ཆུང་ཆུང་ཞིག་ཤོར་བ་ཡིན། རྒྱུ་མཚན་དེ་ལས་གཞན་གང་ཡང་མེད། ཉིན་མོ་དེ་ནས་ཁོང་ཚོའི་བར་དུ་ཁ་བསྲེ་མེད་པར་གྱུར་བ་རེད།
དེ་རིང་ནི་མོ་རང་གི་ཨ་མའི་མ་རྒན་གྱི་སྐྱེ་སྐར་གྱི་དུས་ཤིགས་ཡིན་ལ། ཉིན་མ་ཁ་ཤས་ཤིག་ཕྱིན་ཚར་ན་ཡང་། དེ་རིང་ནི་ཕུ་བུའི་བཟའ་མི་དག་གིས་རང་གི་ཨ་མའི་ནང་དུ་ཨ་མ་རྒན་མོ་ལ་སྐྱེ་སྐར་རོལ་རྒྱུའི་དུས་ཚོད་བཟོས་པ་ཡིན། ད་དུང་། ཕན་ཚུན་གྱི་འདུམ་སྒྲིག་དེ་ཞི་བར་འཇགས་པའི་ཆེད་དུ། མཛའ་མོའི་མ་རྒན་གྱིས་ཐབས་ཤེས་སྣ་མང་བྱས་པ་རྒྱུད་དེ་རིང་ང་ཚོ་ཅོག་རྩེ་གཅིག་ལ་སླར་ཡང་འདུས་ནས་ཡོད་ཀྱང་། མོ་རང་གི་ཨ་ཅེ་ཡི་ནང་མི་སླེབས་མ་སོང་། ནམ་རྒྱུན་ལྟར་དཀའ་ངལ་ཞིག་ཡོད་པ་དེ་ནི། ཁ་ལག་མང་ཤོས་ང་རང་གིས་བཟོ་བཞིན་ཡོད་ན་ཡང་། མོ་རང་གི་ཕུ་བོའི་བུ་མོ་གཉིས་ལ་ང་རང་གིས་འདི་ཟ་མི་འདོད་ཀི དེ་ཟ་ན་མི་འདོད་ཀི འདི་སྣང་བ་འགྲོ་བཞིན་མི་འདུག་ཟེར་ནས་བཤད་དེ་འོང་དུས། མ་རྒན་དེས་ཀྱང་བྱིས་པ་དེ་དག་གི་རྒྱབ་སྐྱོར་དུ་འོང་ནས་གང་བྱེད་ཅི་བྱེད་ལ་རང་དབང་སྟེར་བ་ཡིན། རང་དབང་དེ་ནི་ཁྱིམ་མི་བཀང་བོ་སྟབས་བདེ་རུ་མི་འཇུག་པའི་རང་དབང་ཞིག་ལས། བུ་ཕྲུག་ལ་ཐོབ་དགོས་པའི་རང་དབང་ཞིག་མ་རེད་ཅེས་བཤད་ཆོག་ན་ཡང་། བཤད་ས་ཞིག་མེད་པ་ཡིན།
མཛའ་མོའི་མ་རྒན་ནི་ད་ལོ་ལོ་གྱ་བཅུ་གྱ་བརྒྱད་ལ་གསོན་པ་ཡིན་ལ། དངོས་ནས་བཤད་ན་མོ་རང་གི་སྐྱེ་སྐར་འདི་རོལ་ཐེངས་གསུམ་པ་ཡིན། དང་བོ་དེ་ནི་ང་དང་མཛའ་མོ། ཐར་མ་མཚོ། མོ་རང་གི་ཕ་རྒན། མོ་རང་གི་ཨ་ཅེ་ཡི་ནང་མི་དང་མོ་རང་གི་ཨ་མ་བཅས་ཡིན། དེ་ནི་སྐྱེ་དུས་ཀྱི་ཉིན་གཉིས་ཀྱི་སྔོན་ཡིན། སྐྱེ་སྐར་གཉིས་པ་དེ་ནི་མོ་རང་གི་སྐྱེ་སྐར་ཉིན་ཡིན་ལ། ཟ་ཁང་དུ་ཁ་ལག་ཟ་རུ་ངེད་གསུམ་དང་མོ་རང་གི་ཨ་མ། ཨ་མའི་མ་རྒན། མ་རྒན་དེ་ལ་ཞབས་ཞུ་སྒྲུབ་མཁན་གྱི་ཧྲེས་ལེ་ཕེན་གྱི་བུད་མེད་གཅིག་ཡོད་པ་ང་ཚོ་ཡིན། དེ་རིང་ནི་གསུམ་པ་དེ་ཡིན། ཕུ་བོའི་རྒན་མོས་ནང་མི་འདིའི་ཁྲོད་ཀྱི་མི་ང་མ་གཏོགས་ཁ་རྩོད་མ་ཤོར་ས་མེད་ལ། དེ་དག་གིས་ནང་ནས་གཏན་ནས་ཁ་བསྲེས་མེད་པར་ལོ་ངོ་མང་བོ་སོང་བ་དེ་ནི། མོ་རང་གི་བཟའ་ཚང་གི་ཕ་རྒན་ཡིན། དེ་ཡིན་དུས་ང་ཚོས་འདི་ལྟར་སྐྱེ་སྐར་ཞིག་རོལ་བ་དེ་ལ་ཡང་། ནང་མི་ཚང་མ་འཛོམ་ནས་ཁ་བགད་ནས་གཏམ་སྙན་མོ་རེ་དང་། སེམས་དྲོ་ནས་གཅིག་གཅིག་ལ་གུས་བརྩི་བྱེད་པའི་སྲོལ་དེ་མེད་པ་ཆགས་ཡོད་པ་ཡིན།
ང་རང་གིས་ནམ་རྒྱུན་ནང་མི་འཛོམ་དུས་ཀྱིས་ལས་དེ་དང་དུ་བླངས་པ་ཡིན། ཚང་མ་ཅོག་རྩེ་སྒང་དུ་བསྡད་ནས་ཟ་མ་ཟ་བཞིན་ཡོད་ཀྱང་། ངས་མུ་མཐུད་དུ་བྱ་ཤ་དང་ཟ་མ་གཞན་གཉིས་ཀྱིས་མཇུག་འཕྲོ་སྐྱོང་བཞིན་ཡོད། མཛའ་མོས་ང་རང་ཅོག་རྩེ་སྒང་དུ་ཡོང་རོགས་ཟེར་ནས་འབོད་ཀྱི་ཡོད། ངས་དེ་ལ་ང་རང་གིས་བཟོས་ཚར་ན་ཡོང་གི་ཡིན། བུ་མོ་རེ་ཞིག་རིང་གཉིད་ཡོད་དུས། མོ་རང་གིས་ལྷོད་ཀྱིས་ཟ་མ་ཟ་ཆོག་པ་ཡིན། ང་རང་ཡང་སྐར་མ་བཅུ་གྲངས་ཤིག་གི་རྗེས་སུ་ཅོག་རྩེ་སྒང་དུ་ཞུགས་པ་ཡིན།
མི་ཡུལ་གྱི་གོམས་གཤིས་ནི་བརྩི་བཀུར་ཡོད་ས་ཞིག་ན་ཏན་ཏན་ཡོད་ངེས་ཡིན་ཡང་། ཕ་མ་དང་སྤུན་མཆེད་ཀྱི་བར་དུ་བོད་མི་ལ་ཡོད་པའི་གུས་སྲོལ་དེ་གཏན་ནས་མེད་ཟེར་ན་ཕལ་ཆེར་ང་རང་ནོར་མེད། ཟ་མ་ཟས་ཚར་སོང་བ་དང་མཛའ་མོ་ངེད་གཉིས་ཀྱིས་ཅོག་རྩེ་སྒང་གི་སྡེར་མ་དང་ཟས་ལྷག་དག་བསྡུ་གསོག་བརྒྱབས། མོ་རང་གིས་ང་ལ་སྡེར་མ་དང་ཤེལ་ཕོར། སྣོད་སོགས་དཀྲུ་མི་དགོས་ཟེར་ནས་ཡང་ཡང་བཤད། ངས་ཀྱང་དང་ལེན་བྱེད་པར་བསམ་ན་ཡང་། མ་བསམ་ས་ནས་བུ་མོ་གཉིད་ལས་སད་སོང་བ་མ་ཟད། མོ་རང་གིས་བུ་མོ་ལ་ཟ་མ་སྟེར་དགོས་དུས། ང་རང་གིས་མུ་མཐུད་དུ་སྡེར་མ་དང་ཤེལ་ཕོར། ཟས་སྣོད་སོགས་དཀྲུས་རྗེས་སུ། གད་སྙིགས་འཁུར་ནས་རེ་ཞིག་གི་ངལ་གསོའི་ཆེད་དུ་ཕྱི་ལ་ཐོན་པ་ཡིན།
ཕྱིར་འབྱོར་ནས་སྐར་མ་ལྔ་མ་སོང་གོང་དེར་མཛའ་མོས་ང་རང་ལ་ཤིང་ཏོག་དེ་དག་གཏུབ་རོགས་གནོངས་ཞེས་བཤད་པ་དེར། ངས་ཅུང་ཙམ་སྒུག་དང་ཞེས་བཤད་དེ། ཤིང་ཏོག་ཁུ་ཞིག་བཏུང་ནས་བསྡད་དུས། མོས་མོ་རང་གི་ཨ་མར་སྐུལ་བ་དང་། མོ་རང་གི་ཨ་མས་ནང་གི་མནའ་མར་རོགས་བྱེད་དུ་བོས་སོང་། ཤིང་ཏོག་གཏུབ་ཚར་བ་དང་སྒོང་སྤོར་དང་འཚིག་ཇ་སོགས་མོ་རང་གིས་ཕུ་བོས་འཁུར་ནས་སླེབས། མི་རེ་ལ་ག་ཚོད་དགོས་མིན་སྐོར་དྲིས། ངས་ང་རང་ལ་དུམ་པུ་གཅིག་དགོས་པར་སྐུལ་བ་ལྟར། ཁོ་རང་གི་རྒན་མོས་བཟོས་པའི་སྒོང་སྤོར་དུམ་པུ་ཞིག་ལྕགས་ཚེབ་དང་བཅས་ང་ལ་སྤྲད་སོང་།
ད་ནི་རེ་ཞིག་རིང་ང་ཚོ་རང་རང་གི་ས་ནས་ཇ་དང་འཚིག་ཇ། སྒོང་སྤོར་རེ་ཟ་ཞོར་དུ། ཁ་རོག་གེར་བསྡད་ཡོད་ལ། ངས་ཀྱང་དྲ་སྒོ་ཕྱེ་ནས་དྲ་ཚིགས་དག་ལ་བལྟ་ཀློག་བྱེད་ཀྱིན། རང་ཉིད་བོད་མི་ཞིག་གི་སེམས་འདིས་བཏང་བའི་མནར་གཅོད་ལ་ཀུ་ཡངས་རེ་གཏོང་ཨེ་ཐུབ་སྙམ་བཞིན་དུ། བོད་མི་ཞིག་གི་འགན་འདི་ངས་འདི་ལྟར་འཁུར་ཐུབ་ངེས་ཡིན་མིན་སྐོར་ལ་བསམ་བློ་རེ་བཏང་བ་ཡིན། ལྷག་དོན་དུ་ང་དང་འདྲ་བའི་གཞན་ཡུལ་ན་འཚོ་བའི་སྤུན་ཟླ་དག་གིས། རང་གི་མ་འོངས་པའི་སྐྱེ་རྒྱུད་དེ་དག་བོད་སྐད་གཙང་མ་ཞིག་ཤོད་པར་མཐུན་རྐྱེན་ཇི་ལྟར་སྒྲུབ་བམ་སྙམ་ཞོར་དུ། ངས་བུ་མོ་བང་དུ་བླངས་དེ། བུ་མོའི་ཐོད་པར་འཛུབ་མོ་བཙུགས་དེ། ཐོད་པ་ཞེས་བསྐྱར་ཟློས་ཁ་ཤས་ཤིག་བྱས་པ་ན། བུ་མོས་ཀྱང་ཐོད་པ་ཟེར། དེ་ནས་རྫུ་མ་དང་སྣ། ངས་རང་ལ་ཡིད་ཆེས་ཤིག་བྱེད་ཞོར་དུ། སེམས་ཤུགས་ཤིག་ཡོད་པ་སྔར་ལས་ཆེ་རུ་ཕྱིན་སོང་།
མུ་འགོད།
ཁོང་ཚོའི་བར་གྱི་འགལ་ཟླ་དེ་སེལ་ཐུབ་མེད་པ་འདྲ།
འབྲི་གི་སྡོད་ད་ཡོང་གི་ཡོད། ཀློག་ནས་བུད་སོང་ང། གནད་འགག་གང་མང་ཞིག་བཤད་ཡོད་ཀི
དྲ་གྲོགས་ལགས་དང་བོ་ནས་བཟུང་དགུ་བའི་བར་བཀླགས་ཚར་ཡིན་ངོ་མ་ཡག་པོ་འདུག་ཐུགས་རྗེ་ཆེ་ཞུ། ད་དུང་ཡང་སང་ཉིན་གྱི་ཟིན་བྲིས་ལ་རེ་སྒུག་བྱེད་བཞིན་ང་བུད་སོང་།
དང་པོ་ནས་དགུ་བ་བར་དུ་ཀློག་ཡོད་ད་དུང་སྒུག་ནས་ཡོད།