བཅུ་གཅིག
ཕྱི་རྒྱལ་བས་འགྲོ་སྲོལ་ཡིན་ན། ཉལ་ཁར་ཚང་མ་ལ་གཟིམ་ཞག་གནོང་ཞེས་སྨོན་སྐུལ་བྱེད་སྲོལ་ཡོད་ན་ཡང་། དོ་ནུབ་ང་ཚོར་ཉལ་ཁར་སྐད་ཆ་དེ་ནི་མེད་པར་གྱུར་ཡོད། སྤྱིར་བཏང་གིས་ང་རང་གིས་བུ་མོ་ཉལ་སའི་ནང་དུ་འཇོག་གི་ཡོད་ཀྱང་། དོ་ནུབ་ཁོང་ཁྲོ་དེ་ཡིས་དབང་གིས་མཛའ་མོས་བུ་མོ་པང་དུ་བླངས་དེ་སྐད་ཆ་ཚིག་གཅིག་ཀྱང་མ་བཤད་པར། ཐོག་ཁར་ཉལ་དུ་བུད་སོང་བའི་ཤུལ་དུ། འོག་ཤོད་དུ་ང་རང་གློག་ཀླད་སྟེང་དུ་གསར་འགྱུར་དང་ཟིན་བྲིས་དག་ཀློག་ནས་བསྡད་ཡོད་ལ། མོ་རང་གི་མ་རྒན་གྱིས་བརྙན་འཕྲིན་གསར་འགྱུར་དང་ཆ་འཕྲིན་སྐོར། དངོས་བྱུང་གཏམ་རྒྱུད་ཐུང་ཐུང་དག་ལ་བལྟ་བཞིན་ཡོད།
ཆུ་ཚོད་བཅུ་བ་ནི་མོ་རང་ཉལ་དུ་འགྲོ་བའི་དུས་ཡིན། མ་རྒན་མ་ཁ་རོག་གེར་ཉལ་དུ་བུད་ཐལ། ནམ་རྒྱུན་གྱི་གཟིམ་ཞག་གནོངས་རོགས་ཤེས་པའི་སྐད་ཆ་དེ་མེད་པར་བུད་ཐལ། ད་གཟོད་ང་ཡིས་གཞན་ཁྱིམ་གྱི་བྲོ་བ་དེ་མྱོང་འགོ་བཙུགས་པ་ཡིན་པ་ཤེས་ཀྱི་འདུག ངས་དགོང་ཟས་ཟས་ཤུལ་གྱི་སྣོད་ཆས་རིགས། དཀྲུས་གཤོང་ནང་གི་དེ་དག་ཡོངས་རྫོགས་གཙང་མ་བཟོས་རྗེས། གཞི་ནས་ཉལ་དུ་སོང་བ་ཡིན། སང་ཉིན་གང་འདྲ་ཡོད་དམ་སྙམ་ཞོར་ཉལ་དུ་སོང་།
དུས་ཚོད་ལྟར། ང་རང་ལས་ཀ་འགྲོ་བའི་དུས་ཚོད་ལ་འགྱུར་བ་མེད། སྔར་བཞིན་ཡིན། མཛའ་མོས་ང་རང་ལ་དེ་རིང་ང་ཁྱེད་རང་གི་འགྲམ་དེར་ལས་ཀ་འགྲོ་བཞིན་ཡོད། ཅུང་ཙམ་སྒུག་ནས་ང་རང་གི་རླངས་འཁོར་དུ་སོང་ན་ཞེས་པའི་སྐད་ཆ་དེ་བཤད་སོང་། ངས་མིན། ཁྱེད་རང་གིས་ངལ་ཅུང་ཙམ་གསོས་ཤིག བུ་མོ་ཡང་གཉིད་འདུག་ཞེས་བཤད་པ་ཡིན་ལ། མོ་རང་དང་མཉམ་དུ་མཚམས་རེར་འགྲོ་ཡི་ཡོད་ན་ཡང་། མོ་དང་མཉམ་དུ་སོང་དུས། ང་རང་ལས་ཀར་རྗེས་ལུས་ཐེབས་ཀྱི་ཡོད།
ཕྱི་དྲོ་ང་རང་ལ་ལས་ཀ་ཡོད་དུས་ཁ་པར་སླེབས་བྱུང་། དེ་ནི་གྲོགས་པོ་བློ་བཟང་རེད། ཁོས་ང་རང་ལ་ཁྱེད་རང་ལ་གུར་ཞིག་ཡོད་པ་དེ་གཡར་ན་འགྲིག་གི་རེད་དམ་ཟེར། ངས་དེ་འགྲིག་གི་རེད། ངེད་གཉིས་ཀྱིས་དེ་ནི་མི་གཉིས་ནང་དུ་གཤོང་བ་དེ་ཡིན་ཞེས་བཤད་དུས། ཁོས་ཁྱེད་རང་ལ་སྔོན་ཆད་ཆེན་པོ་ཞིག་ཡོད་པ་དེ་ག་རེ་རེད་ཅེས་དྲིས་པ་དེར། ངས་དེ་ནི་ངེད་གཉིས་ཀྱི་མིན་པ་དང་། མོ་རང་གི་ཨ་ཅེ་ཡི་ཡིན་པ་བཤད་པ་ཡིན། དེ་དུས་ཁོ་རང་གིས་ང་རང་ཡང་ཁོང་ཚོ་དང་མཉམ་དུ་ཨེས་ལ་ཀྲི་ལ་འགྲོ་ཐུབ་མིན་སྐོར་དྲིས་སོང་།
ངས་ང་རང་འགྲོ་ཐུབ་མིན་སྐོར་ལ་སང་ཉིན་ནངས་ཉིན་ཁ་པར་གཏོང་ཆོག་ཞེས་ཁ་པར་གྱི་ཁ་བརྒྱབས་པ་ཡིན། ཅུང་མ་འགོར་བར་མཛའ་མོས་ཁ་པར་སླེབས་སོང་། མཛའ་མོས་ཁྱེད་རང་གི་ལས་ཀ་གྲོལ་ན། དངུལ་ཁང་འགྲམ་གྱི་སྡེབ་ཚོང་ཁྲོམ་རྭ་དེར་ཤོག་དང་། བུ་མོ་ངེད་གཉིས་ཀྱིས་དེ་ནས་སྒུག་འདུག་ཟེར། ངས་འགྲིག་གི་རེད། ང་རང་ལས་ཀ་གྲོལ་མ་ཐག དེ་རུ་ཡོང་ངེས་ཡིན་ཞེས་བཤད་པ་ཡིན། ང་རང་དུས་ཚོད་དེ་རུ་སླེབས་ཐུབ་མིན་གྱི་སེམས་འཚབ་བྱེད་ཀྱིན། ཐབ་ཚང་ནང་གང་མགྱོགས་ཅི་མགྱོགས་ཀྱིས་དཀྲུས་ན་ཡང་། རོགས་པ་ཁ་ཆེ་དེ་གཉིས་ཀྱིས་གཙང་མ་ཐེངས་གསུམ་པ་དེ་བཟོ་རྩིས་བྱས་སོང་། ད་གཟོད་ང་རང་དུས་ཚོད་ཀྱི་རྗེས་སུ་མི་ཟིན་པ་ཤེས་ནས་དགོངས་པ་ཞུས་དེ་སྔོན་དུ་སྒོ་ལ་བུད་པ་ཡིན།
བུ་མོ་དང་ངེད་གསུམ་ནང་དུ་འབྱོར་དུས། བུ་མོ་ལམ་བར་དུ་རླངས་འཁོར་ནས་གཉིད་སོང་སྟབས། མཛའ་མོས་ཐོག་ཁང་དུ་འཁུར་ནས་བུད་སོང་། ང་རང་གཟུགས་པོ་ཞིག་དཀྲུ་རུ་སོང་ནས་ཕྱིར་སླེབས་དུས། མོ་རང་གི་མ་རྒན་མ་སླེབས་འདུག་ལ། མོ་རང་གི་ཉལ་ཁང་ནང་དུ་འཛུལ་ནས་སྒོ་ཕྱི་ལ་ཐོན་གྱི་མི་འདུག མཛའ་མོ་མོ་རང་ནི་མཚམས་རེར་སེམས་ཁམས་རིག་པ་ཞིག་གི་སར་སློབ་ཚན་ཉན་དུ་འགྲོ་ཡི་ཡོད་པ་ཡིན། མོ་རང་དེ་རིང་དེར་འགྲོ་ངེས་ཡིན་ཞེས་དུས་ཚོད་ལྔ་བ་མ་ཟིན་ཙམ་ནས་ཕྱིན་སོང་། སྤྱིར་ཡིན་ན་དུས་ཚོད་དྲུག་དང་ཕྱེད་ནས་བརྒྱད་པ་བར་དུ་ཡིན་མོད། དོ་ནུབ་དེ་འདྲའི་སྔ་བོ་འགྲོ་དོན་ང་ལ་བཤད་མ་སོང་ལ། ངས་ཀྱང་དྲིས་མེད།
བུ་མོ་ཆུ་ཚོད་ལྔ་དང་ཕྱེད་ཀའི་སྒང་ནས་གཉིད་ལས་སད་པ་དང་། ང་རང་གིས་ཐེངས་ཁ་ཤས་ལ་ལག་པར་ལེན་རྩིས་བྱོས་ཀྱང་། ཨ་མ་ཟེར་ནས་འབོད་པ་ལས། ང་རང་མི་དགོས་ཞེས་མ་རྒན་གྱི་སྐད་ཀྱི་སྟེང་ནས་ལན་ཡང་ཡང་བཏབས་དུས། ངའི་སེམས་པ་ཅུང་སྐྱོ་ན་ཡང་། ཅུང་ཙམ་བཞག་རྗེས་མོ་རང་གི་འགྲམ་དུ་སོང་ནས། པ་ཁོ། མ་ངུ་། ཁ་རོག་གེར་བསྡོད། ཤོག འུ་གཉིས་འོག་ཁང་དུ་སོང་ནས། ཁྱེད་རང་ལ་ཟ་མ་ཞིག་སྟེར། ཨ་ཕའི་ཁ་ལ་་ཉོན་ཞིག་ཞེས་བཤད་དུས། མོ་རང་གིས་གང་ཞིག་གོ་བ་ལྟར། ངུ་མཚམས་བཞག་ནས་ང་རང་གི་བང་དུ་སླེབས།
ཟ་མ་ཟ་ཞོར་དུ་མོ་རང་གི་རེ་འདོད་ལྟར། བྱིས་པའི་བརྙན་འཕྲིན་ཞིག་སྟོན་བཞིན་དུས་ཚོད་བདུན་དང་ཕྱེད་ཀར་སླེབས་དུས། གཞི་ནས་མོ་རང་གིས་ཨ་མ་རྒན་མོ་ཡང་ངེད་གཉིས་ཀྱི་འགྲམ་དུ་སླེབས་སོང་། རྒྱུ་མཚན་ནི་མོ་རང་གི་གསར་འགྱུར་བལྟ་བའི་དུས་ཚོད་ལ་ཉེ་བས་ཡིན། ངས་དེ་ནས་བུ་མོའི་སོ་ཞིག་དཀྲུས། ཉལ་ལྭ་གོན་ནས་ཐོག་ཁར་ཉལ་དུ་འགྲོ་ཞེས་བཤད་དུས། མོ་རང་གིས་མ་རྒན་གྱིས་སྐད་ཀྱི་སྟེང་ནས་མི་དགོས། མི་དགོས་ཞེས་ལན་བཏབས་སོང་། གང་ལྟར། ངས་མོ་ལ་སྐད་ཆ་སྙན་མོ་ཞིག་བཤད་ཀྱིན་ཐོག་ཁང་དུ་ཁྲིད་ཐབས་སོང་།
ཐོག་ཁང་ནས་ཉལ་སའི་ནང་དུ་བཞག་ནས། ང་རང་གིས་ཁྱི་སྐད་བརྒྱབས་པ་དང་། བྱི་བའི་སྐད་བརྒྱབས། ལུག་གི་སྐད་བརྒྱབས་དེ་བུ་མོ་དགོད་དུ་བཅུགས། མོ་རང་གིས་ཀྱང་ཡང་བསྐྱར། ཡང་བསྐྱར་ཞེས་པའི་མ་རྒན་གྱི་སྐད་དེ་བཤད། ངས་ཀྱང་ཡང་དང་བསྐྱར་དུ་མོ་རང་ལྷན་དུ་རྩེས། བར་སྐབས་ཤིག་ལ་མོ་རང་ཐང་ཆད་པ་དང་། ཉལ་ཐུལ་ལག་པར་བཟུང་ནས་ཉལ་འགོ་བཙུགས། ཆུ་ཚོད་དགུ་བ་ཟིན་པར་ཉེ་བ་དང་མོ་རང་གི་ཨ་མ་ཕྱིར་འབྱོར་ནས། འོག་ཁང་དུ་མོ་རང་གི་ཨ་མ་རྒན་མོ་གཉིས་ཀྱིས་སྐད་ཤུགས་ཆེན་པོས་མོ་རང་གཉིད་ལས་དཀྲོགས་སོང་བ་བསྟུན། མོ་རང་གིས་ཨ་མ་ཞེས་སྐད་ཤུགས་ཆེན་པོས་ངུ་འབོད་བྱས། མོ་རང་གིས་ཨ་མར་ཐོག་ཁང་དུ་སླེབས་ནས། གཉིད་མིན་སྐོར་ཙམ་མི་འདྲི་བར། ང་རང་ལ་ཁྱེད་རང་གིས་ད་ལྟ་ནས་ཉལ་དུ་བཅུགས་ནས་གཉིད་ནི་མ་རེད་ཅེས་མོ་རང་གིས་ནམ་རྒྱུན་གྱི་སྐད་ཆ་ལས་བརྒལ་བའི་སྐད་ཆ་ཞིག་བཤད་ཞོར་དུ། མོ་རང་གིས་ཨ་མས་བཤད་ན་ཆུ་ཚོད་དྲུག་དང་ཕྱེད་ཀའི་རྗེས་སུ་གཉིད་ལས་སད་སོང་ཟེར། མོ་རང་ག་དུས་གཉིད་ལས་སད་པ་རེད་ཟེར།
ངས་ཁྱེད་རང་གིས་ཨ་མས་བཤད་པ་བདེན་པ་རེད། ཁྱེད་རང་གི་ཨ་མ་ཁྱེད་རང་སོང་དུས་མོ་རང་གི་ཉལ་ཁང་དུ་འཛུལ་ནས་བསྡད་ཡོད་པ་དེ་ནས་ཕྱི་རུ་ཆུ་ཚོད་བདུན་པའི་རྒྱབ་དུ་མ་གཏོགས་ཐོན་མེད་དུས། མོ་རང་གིས་བུ་མོ་གཉིད་ལས་ཆུ་ཚོད་དྲུག་དང་ཕྱེད་ཀའི་རྗེས་སུ་སད་པ་ཇི་ལྟར་ཤེས་པ་རེད། ད་འགྲིག་གི་རེད། ཁྱེད་རང་གིས་ཨ་མས་བཤད་པ་བདེན་ནི་རེད་ཅེས་ལན་བཏབས་དུས། མོ་རང་གིས་དེས་ན་ག་དུས་གཉིད་ལས་སད་པ་རེད་ཅེས་དྲིས་པ་དེར། ཁྱེད་རང་གིས་ཨ་མས་བཤད་པ་བདེན་པ་ཡིན་ནི་རེད། ད་ནི་ཁྱེད་རང་གིས་བུ་མོ་ག་དུས་ཉལ་མིན་དང་། ག་རེ་བྱེད་མིན་སོགས་ཀྱི་ཐད་དུ་རང་གིས་འདོད་པ་ལྟར་བྱོས་ཤིག་ཞེས་བཤད་ཞོར་དུ། ང་རང་ཤིང་གི་སྐེས་འཛེགས་དེ་ལས་མར་བབས་དེ་གློག་ཀླད་ཀྱི་སྟེང་དུ་བསྡད་པ་ཡིན། མོ་རང་གིས་བུ་མོ་ལག་པར་བཟུང་ནས་འོག་ཁང་དུ་སླེབས་སོང་།
མུ་འགོད།
རྩོམ་ཡིག་འདི་ངོ་མ་ང་རང་གིས་དང་ཁོ་རང་གིས་སོགས་ང་རང་དང་ཁོ་རང་བེད་སྤྱོད་བྱེད་རྒྱུ་མང་དྲགས་ནས་ཀློག་འདོད་ཀྱང་མི་འདུག
ཡ་ཡ་དེ་ནས།
རྩོམ་ཡིག་འདི་འབྲི་སྟངས་ཧ་ཅང་ཡག་གི བརྩམས་ཆོས་འདི་ལ་བལྟས་རྗེས་སྔོན་ཆད་ཁྱོད་ཀྱིས་བྲིས་པའི་བརྩེ་དུང་གི་ཨ་ལོང་ལས་ཤོར་བའི་སེམས་འཕྲིན་དམར་པོ་ཡིད་ལ་དྲན་དུ་བཅུག་ཡོང་གི
ཁྱོད་ཀྱི་རྩོམ་དེབ་དང་པོ་དེ་ཕྲན་གྱིས་ཐེངས་དང་པོ་མཐོང་སྐབས། ང་རང་ཀན་སུའུ་ནང་བསྟན་སློབ་གྲྭར་ཡོད། དེབ་དེ་ལག་སོན་བྱུང་བར་དཀའ་ངལ་མང་པོ་བརྒྱུད་གཟའ་ཉི་མའི་ཉིན་ཞིག་ལ་གྲོགས་པོ་ཞིག་གི་ས་ནས་ལག་སོན་བྱུང་། ལག་སོན་བྱུང་སྐབས་དེ་མ་ཐག་བམ་ཀློག་ཐེངས་གཅིག་བྱས་ཀྱང་འདོད་བློ་མ་ཁེངས་སྟབས། ཕྱིར་ནང་དུ་སོང་ནས་ཞིབ་བཀླགས་ཐེངས་གཉིས་བྱས་པ་ཡིན། དེབ་དེ་བཀླག་ཚར་བ་ན་ཏག་ཏག་སྐྱ་རེངས་གསལ་ཞིང་ནམ་ལང་གིན་འདུག་པ་ཤེས།
དེ་ནི་ང་ལ་མཚོན་ན་བཙན་བྱོལ་འཚོ་བའི་གནས་བབ་དང་། མི་ཡུལ་གྱི་བརྩེ་དུང་། དེ་བཞིན་འཚོ་བའི་སྲོག་སྙིང་ལ་ཟུག་པའི་འདོད་པའི་འདོད་པ་དེ་ཉིད་ལ་ངེས་ཤེས་དང་། ཤེས་རྟོགས། རྒྱུས་ལོན་བཅས་བྱུང་བའི་དུས་སྐབས་ཐོག་མ་དེ་ཡིན་ལ། ཚེ་བརྟན་རྡོ་རྗེ་ཟེར་བའི་གསར་བུ་སྣང་དྭངས་ཤིག་གིས་བརྩེ་བའི་བདེན་པར་སྙེག་ཚུལ་གྱི་ལོ་རྒྱུས་མཐོང་བ་ཐེངས་དང་པོ་ཡིན།
ཁ་བ་ནག་པོ་ལགས། ཉིད་ནས་ལྷག་བསམ་གྱི་ཁ་བརྡ་དག་སེམས་སུ་བཟུང་ཡོད། ང་རང་ཡང་ས་མཐའ་རང་གིས་འདོད་པ་ལྟར་ཡོང་བ་ཡིན་དུས། དེ་ལྟར་དུ་སེམས་སུ་བཞག་ནས་ཁོང་ཚོས་བཀའ་དྲིན་ལ་བསམ་ཤེས་ལོས་བྱེད། མི་སེམས་ཀྱི་ཚོར་བ་ཐན་ཐུན་རེ་ཡིས་མཚམས་རེར་མི་སྐྱིད་པ་ཡོང་ན་ཡང་། ནང་ཆོས་ཀྱི་བག་ཆགས་ཟེར་ན་རེད། བོད་ཀྱི་སྲོལ་རྒྱུན་གྱི་གོམ་གཤིས་ཟེར་ན་རེད། རང་སེམས་རང་གི་གསོ་བའི་ཐབས་ཤེས་ཁ་ཁེར་རེ་ད་དུང་བརྗེད་མེད་པར་སྙིང་དུ་ཉལ་འདུག དེ་ཡིན་དུས་མཚམས་རང་འདོད་ཆེ་བའི་སྤྱོད་པ་ཞིག་གིས་མ་བདེ་བ་ཡོང་བ་དེར་གདོང་ལེན་ལོས་བྱེད། བྱེད་ཐུབ་ངེས་ཡིན།
མུ་མཐུད་དུ།
ད་དུང་མ་རྒན་གྱིས་ཁྱེད་གཉིས་ལ་རོགས་པ་ཡག་པོ་བྱས་པའི་བཀའ་དྲིན་དང་ཁ་སང་དེ་རིང་གི་དོན་དག་ཆུང་ཆུང་འདི་གཉིས་མཉམ་དུ་བཞག་ནས་གང་ཞིག་ལྗིད་ཁོག་ཚ་བ་དང་གང་ཅིག་གལ་ཆེན་པོ་ཡིན་པ་དེ་ལ་བསམ་བློ་ཐོངས། བོད་གངས་ཅན་པའི་བུ་རྒོད་ཅིག་ཡིན་ན་བློ་ཁོག་ཕ་ཡུལ་གྱི་རྩྭ་ཐང་ཇི་བཞིན་ཡངས་ཤིང་། བཟོད་སྒོམ་རྒྱ་མཚོ་ལྟ་བུ་ཞིག་ཡོད་པའི་ཁྱད་ཆོས་དེ་ཡང་ཕྱིར་མངོན་པའི་དུས་ཚོད་ཡག་པོ་ཞིག་ནི་ཁ་སང་དེ་རིང་ཡིན་པས། དགའ་རོགས་དང་མོའི་མ་རྒན་ཞི་མོ་བཅས་ཀྱི་མཉམ་དུ་ཉི་མ་གཅིག་ལ་གནས་ཀྱང་ཧ་ཧ་ཧོ་ཧོའི་ངང་སྡོད་ཅི་ཐུབ་བྱོས་དང་རང་གི་མི་ཚེའི་མཛེས་སྡུག་རེད། དོན་དག་ཆུང་ཆུང་ཞིག་ལ་བཟོད་སྒོམ་བྱེད་མ་ཐུབ་ན་ང་ཚོའི་མི་རབས་ཤིག་གི་འཐབ་རྩོད་ཇི་ལྟར་བྱེད་དགོས་པ་འདི་ལ་ཡང་བསམ་བློ་རེ་ཐོངས། འདི་ནི་ལོ་ངོ་གཉིས་གསུམ་རིང་གི་དྲ་གྲོགས་འདང་ཅན་ཞིག་གི་སེམས་གཏམ་ཡིན་པས་ཐུགས་ལ་ཉར་རོགས།
kawakarpo@yahoo.comའདིའི་སྟེང་དུ་ཁ་པར་ཨང་གྲངས་ཤིག་ཞོག་དང་དུས་ཚོད་ཡོད་དུས་ངས་ཁྱེད་ལ་ས་ཁེ་ཡེབ་སྟེང་ནས་ཁ་བརྡ་བྱེད་ན་འདོད་ཀི
ཨ་རོགས་མྱི་ལྡང་། ཁོག་རྒྱ་ཆེན་པོས་ཁོ་མ་དང་བུ་མོ་གཉིས་ལ་གདོང་ལེན་བྱོས། ངས་འདི་ནས་བླ་མ་ཞིག་དང་ཁོང་གི་གསང་ཡུམ། བླ་མའི་བུ་ལྔ་དང་དེ་ལྔའི་མནའ་མ་ལྔ། བླ་མའི་སྲིང་མོ་གཉིས་དང་གཅིག་གི་ཁྱོ་ག བླ་མའི་དྲུང་ཡིག་རྒྱ་མོ་དང་ཆོས་ཚོགས་ཀྱི་འགན་འཛིན་རྒན་གཞོན་ཁྱོན་བསྡོམས་མི་ཉི་ཤུ་རྩ་གྲངས་ཤིག་གི་ཁ་ཡ་བྱས་ནས་མི་ལོ་དགུ་བསྐྱལ་ཚར་བ་ཡིན། ཁོག་རྒྱ་ཆེན་པོ་ཞིག་མེད་དུས་ཧ་ཅང་དཀའ་ངལ་ཆེ། ཡིན་ན་ཡང་ཁོག་རྒྱ་བསྐྱེད་དེ་མིའི་རྒྱུན་ལོན་ཡོད་མདོག་མདོག་གིས་བསྡད་ན་མི་སྐྱོན་གི ཉིད་ཀྱིས་ཞ་ཞིའི་གཉིས་ཀྱི་ཨ་མ་དང་མོའི་མ་རྒན་ལ་བསྟུན་ཐུབ་ས་ནས་བསྟུན། བསྟུན་མི་ཐུབ་ས་ནས་རླུང་མ་སྟོན་པར་འདི་ལ་འདི་མི་དགའ་བས་ངས་བཤད་ཀྱང་ཕན་ཐོགས་མེད་བསམ་པའི་སྒོ་ནས་སྡོད། འདི་ལ་སྤྱོད་འཇུག་ལས། གལ་ཏེ་བཅོས་སུ་ཡོད་ན་ནི། །དེ་ལ་མི་དགའ་བྱེད་ཅི་དགོས། །གལ་ཏེ་བཅོས་སུ་མེད་ན་ནི། །དེ་ལ་མི་དགའ་བྱས་ཅི་ཕན། །ཞེས་གསུངས་འདུག་པས། བུ་རྒོད་པོ། ས་མཐའ་ནས་ཁོག་རྒྱ་བསྐྱེད་པ་འདི་ལས་ཡག་ག་ཞིག་མི་འདུག