གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བཅུ་བཞི།

ནམ་རྒྱུན་དུ་ང་རང་ལ་གུང་གསེང་ཡོད་དུས་སུ་བུ་མོ་མ་སྐྱེ་སྔོན་དུ་ཆུ་ཚོད་བཅུ་དང་ཕྱེད། ཡང་ན། བཅུ་གཅིག་བར་དུ་ཉལ་གྱི་ཡོད། བུ་མོ་སྐྱེ་བ་ནས་བཟུང་། མཚམས་རེར་ང་རང་ཆུ་ཚོད་དགུ་བ་མ་གཏོགས་ཉལ་ཐུབ་ཀྱི་མེད་པ་དེ་ནི་མཛའ་མོ་ལ་བུ་མོ་ཅུང་ཙམ་རེ་བལྟ་རོགས་བྱེད་དགོས་པ་དེ་ཡིན། སྐྱེ་བ་གཞན་དག་ལ་བསྡུར་བ་ཡིན་ན། ང་རང་ནི་འདི་ཁུལ་གྱི་སྐྱེ་བ་ལས་ཅན་གྱི་གྲངས་ཤིག་ཡིན། མཛའ་མོས་བདག་ལ་བསམ་ཤེས་བྱེད་པའི་གྲངས་ཀ་ནི་དངོས་ནས་ཉུང་ཉུང་མིན། དེ་བཞིན་དུ་མོ་རང་གིས་ང་རང་གི་འདོད་པ་མང་བོ་ཞིག་ལ་བསྟུན་ཤེས་བྱེད་པ་ཡིན། གནད་འགག་ཆེ་ས་ནས་ངེད་གཉིས་མི་མཐུན་སའི་ཆ་ཞིག་ཡོད་པ་དེ་ནི་ཕན་ཚུན་གྱི་སེམས་ངོགས་ལ་བརྐོས་ཤིང་། འདག་ཐབས་མེད་པའི་སེམས་ཀྱི་རྒྱུན་ཐག་གི་འགྲོ་ལུགས་དེ་ཡིན།

ང་རང་མགྲོན་ཁང་གི་འོག་ཤོད་དུ་སླེབས་དུས་མོ་དང་བུ་མོ་གཉིས་ཀ ཞོགས་ཟས་ཟ་སར་སླེབས་འདུག་པ་མ་ཟད། བུ་མོ་རྐུབ་སྟེགས་ཤིག་གི་སྒང་ལ་བཞག་ནས་ང་རང་ལ་སྒུག་ནས་འདུག ང་དེ་རུ་འབྱོར་མ་ཐག མོ་རང་གིས་ཁྱེད་རང་གིས་ག་རེ་འཐུང་འདོད་འདུག སྐོམ་ཆུ་མངར་མོ་ཡིན་ནམ། འཚིག་ཇ་ཡིན་ནམ། འོ་མ་ཡིན་ནམ། ག་རེ་འཐུང་ཞེས་དྲིས་སོང་། ངས་འཚིག་ཇ་ཞིག་འཐུང་གི་ཡིན་ཞེས་ལན་བཏབས་དུས། མོ་རང་གིས་གྲོད་ཁོག་ཆེན་པོ་དེ་འཁུར་ནས་ང་ཚོ་ལ་ཞོགས་ཟས་ལེན་དུ་འགྲོ་སོང་།

གུང་གསེང་གི་ཉིན་གཉིས་ནི་དེ་ལྟར་ཚར་བ་དང་། ངེད་གསུམ་ཕྱིར་མཚོ་དམར་པོ་དང་མཚོ་ཤི་བོའི་འགྲམ་རྒྱུད་དེ་རྗོ་སུ་ལམ་དུ་ལམ་ལ་ཆས། ལམ་བར་དུ་བུ་མོ་མ་ཉལ་སྟབས། ངེད་གསུམ་༡༠༡་ཟེར་བའི་ས་ཁུལ་ཞིག་ཡོད་པ་དེ་རུ། རིན་མེད་དུ་འགྲོ་བསྐྱོད་བྱེད་ཆོག་པའི་རི་དྭགས་ཁང་ཞིག་ཡོད་པ་དེ་རུ་སོང་ནས། དུས་ཚོད་ཅུང་ཙམ་བཏང་། རི་དྭགས་ཁང་དེ་རུ་སེམས་ཅན་མི་ཉུང་བ་ཞིག་ཡོད་ན་ཡང་། གཏན་ནས་རིག་མྱོང་མེད་པའི་སེམས་ཅན་གཅིག་གཉིས་ཤིག་མ་གཏོགས་མེད་ཀི དེ་ནི་བྱ་ཆེན་པོ་ཨོ་སུ་ཀྲི་ལེ་ཡ་ནས་འཁུར་ཡོང་བ་ཞིག་དང་། སེམས་ཅན་རི་བྲག་ལ་གནས་པ་ཞིག་བཅས་རེད།

རྗོ་སུ་ལམ་དུ་འབྱོར་དུས་ས་རུབ་ཙམ་ཡིན་ལ། མོ་རང་གི་ཨ་མ་ནང་དུ་མི་འདུག་ན་ཡང་། ངེད་ཚོ་ལ་ཟ་མ་བཟོས་ནས་བཞག་འདུག མོ་རང་ལ་ཟ་ས་མེད་པར་བཤད། ངས་རང་གི་ཕོར་བའི་ནང་དུ་རན་པ་ཞིག་བླུགས་དེ་འཁུར་ནས་ཡོང་ནས་བུ་མོའི་འགྲམ་དུ་བསྡད་ནས་བུ་མོ་ངེད་གཉིས་ཀྱིས་ཟས་པ་ཡིན། ང་རང་གིས་ཁོང་ཁྲོ་ཐུང་ཐུང་ཞིག་གིས་མོ་རང་གི་མ་རྒན་ལ་ཁ་ལན་ལོག་པ་དེ་ནི་དངོས་ནས་ཡག་པོ་མེད་པའི་ངེས་པ་དེ་སེམས་ཁུངས་ནས་རྙེད་སྟབས། ངས་མོ་རང་གི་མ་རྒན་མ་ཕྱིར་ནང་དུ་སླེབས་པར་སྒུག་པ་ཡིན།

བུ་མོ་གཉིད་སོང་བ་དང་མཛའ་མོས་ཚགས་པར་ཞིག་ཀློག་ནས་བསྡད་ཡོད་ལ། ང་རང་གློག་ཀླད་སྟེང་དུ་བསྡད་ནས་དྲ་རྒྱ་ཁག་ལ་ཉུལ་ནས་བསྡད་ཡོད་པའི་སྐབས་དེ་འདྲ་ཞིག་ལ་མོ་རང་གི་མ་རྒན་མ་ནང་དུ་སླེབས་སོང་། དེ་དུས་ངེད་གཉིས་ཀྱིས་འཚམ་འདྲི་བྱས་པ་ཡིན། མོ་རང་གིས་ཀྱང་སླར་ཡང་ངེད་གཉིས་ལ་འཚམ་འདྲི་བྱས་སོང་། ངས་སྐར་མ་ཁ་ཤས་ཤིག་གི་རིང་དུ་གློག་ཀླད་དུ་བསྡད་རྗེས། མཛའ་མོ་ལ་མོ་རང་ལ་གློག་ཀླད་དགོས་མིན་བཤད་དུས། མོ་རང་གིས་ཅུང་ཙམ་རིང་དུས་ཚོད་གཏོང་གི་ཡིན་ཟེར། དེ་ནས་ང་རང་ཡར་བླངས་དེ། ཁྱམས་རྭར་སོང་ནས་ཐ་མག་ཞིག་འཐེན་རྗེས་ཕྱིར་ནང་དུ་ཡོང་།

མཛའ་མོས་གློག་ཀླད་སྒང་དུ་ཅེར་ནས་ཡོད་ལ། མོ་རང་གིས་མ་རྒན་གྱིས་འཁྱག་སྒམ་ནང་དུ་ཟས་ལྷག་དག་འཇོག་གིན་ཡོད། སྐབས་དེར་ངས་ཁྱེད་གཉིས་ལ་ང་རང་གིས་སྐད་ཆ་ཞིག་བཤད་རྒྱུ་ཡོད། དེ་ནི་ཉིན་འགའི་སྔོན་དུ་ང་རང་གིས་ཚོར་བ་ཆུང་ཆུང་ཞིག་གི་རྐྱེན་བྱས་ནས། སྐད་ཅོར་བརྒྱབས་པ་དེར་དགོངས་དག་ཞུས་པ་ཡིན་ལ། ཕྱིས་སུ་སླར་ཡང་དེ་འདྲའི་ནོར་འཁྲུལ་མི་བཟོ་བར་དམ་བཅས་པ་ཡིན། སེམས་གཏིང་ནས་དགོངས་དག་ཞུ། དམིགས་བསལ་གྱིས་ཨ་མ་ཁྱེད་རང་ལ་ཞུས་པ་ཡིན།

མོ་རང་གིས་མ་རྒན་གྱིས་དེ་སྐྱོན་ནི་མ་རེད། སྐབས་དེར་ངས་ཁྱེད་རང་ལ་བུ་མོའི་སྔོན་ནས་སྐད་མ་རྒྱགས་ཅེས་བཤད་པ་ཡིན། དེ་མ་གཏོགས་སྐྱོན་ཡོད་པ་མ་རེད་ཟེར། མཛའ་མོས་གློག་ཀླད་ལ་ཅེར་མཚམས་བཞག་ནས་གདོང་ཡོངས་ལ་འཛུམ་གྱིས་བཀང་ནས་ང་ལ་བལྟས་དེ་བསྡད་འདུག སྐད་ཆ་དེ་ཡིས་མོ་རང་གི་སེམས་པ་བཟི་བ་འདྲ། གང་ལྟར། ངས་ད་ནི་ང་རང་གི་སེམས་པ་བདེ་བ་ཡིན། དགོངས་དག་ཞུ་བའི་གོ་སྐབས་རེག་སོང་། ཉིན་གཉིས་སྔོན་དུ་དགོངས་དག་ཞུ་འདོད་ཡོད་ཀྱང་། ལས་ཀ་ཚར་ནས་ངེད་གསུམ་ལྷོ་ཕྱོགས་སུ་སོང་བ་རེད། ད་ནི་ཕྱིར་འབྱོར་བ་ཡིན་དུས་གོ་སྐབས་འདི་དམ་འཛིན་བྱས་པ་ཡིན། ད་ང་རང་ཉལ་དུ་འགྲོ་རྒྱུ་ཡིན། གཟིམ་ཤག་གནོང་།

མཛའ་མོ་དང་ང་རང་གི་མ་ཚབ་གཉིས་ཀྱིས་ང་རང་ལ་གཟིམ་ཤག་གནོང་ཟེར།