གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། སོ་བཞི།

གྲོགས་པོ་བུ་ཆུང་གིས་ཚང་མར་རྒྱ་གར་ཇ་མངར་མོ་ཞིག་བཟོས། ངས་དེ་དག་འཁུར་ནས་ནང་དུ་སོང་ནས་མི་རེ་ལ་ཇ་ཕོར་རེ་རེ་སྤྲད། བརྙན་འཕྲིན་གྱི་མདུན་ནས་གྲོགས་པོ་གྲོགས་མོ་ཚང་མ་ཧད་ནས་བསྡད། ཡུན་རིང་ཞིག་ལ་མ་བལྟས་པའི་རྒྱ་གར་གྱི་གློག་བརྙན་ཞིག་ལ་ང་ཚོ་ཚང་མས་མཉམ་གཅིག་དུ་བལྟས། ང་རང་གིས་འདང་དགོང་ནས་མཛའ་མོས་ཁ་པར་གང་ཡང་མ་སླེབས་སྟབས། ག་རེ་ཡིན་ནམ་སྙམ་ཞོར་དུ། མོ་རང་ལ་ཁ་པར་ཞིག་བཏང་། མོ་རང་བདེ་མོ་ཡིན་པ་མ་ཟད། སྐད་ཆ་བཤད་སྟངས་ཅུང་རྩུབ་མོ་ཞིག་འདུག་པ་དང་ང་རང་ལ་ཁྱེད་ཀྱིས་སྐྱིད་པོ་གཏོང་རོགས་གནོང་ཟེར། ངས་ང་རང་སྐུའི་འཁྲུངས་སྐར་ལ་འདི་ནས་ཐད་ཀར་གྲོགས་པོ་རྡོར་རྒྱལ་གྱི་རླངས་འཁོར་དུ་ཡོང་རྒྱུ་དང་མོ་དང་བུ་མོ་ཐར་མ་མཚོ་གཉིས་ཐད་ཀར་ནང་ནས་དེར་ཡོང་བར་བཤད་པ་ཡིན།

ཉིན་གུང་རྒྱབ་དུ་ང་ཚོ་གྲོགས་པོ་བུ་ཆུང་གི་ནང་ནས་སྐུའི་འཁྲུངས་སྐར་ཚོགས་ཡུལ་གྱི་ཕྱོགས་སུ་ལམ་ལ་བུད། གྲོགས་པོ་བུ་ཆུང་གི་མཉམ་དུ་ཁོ་རང་གི་དགའ་རོགས་དང་ལྷག་པ་གཉིས་བསྡད། གྲོགས་པོ་རྡོར་རྒྱལ་གྱི་རླངས་འཁོར་ནང་དུ་ང་དང་ཨ་ཅེ་སྒྲོལ་དཀར། ཚེ་རིང་དབྱངས་སྐྱིད། བློ་དོན་བཅས་བསྡད། གྲོགས་པོ་རྡོར་རྒྱལ་གྱི་རླངས་འཁོར་ཡག་པོ་ཡོད། ཁོ་རང་ལ་ལས་ཁུངས་ཀྱི་རིན་མེད་དུ་གཏོང་དུ་བཅུགས་ཡོད་པ་རེད། ཁོ་རང་གི་ལས་ཀ་ནི་འཕྲུལ་ལས་ཀྱི་རིགས་ཡིན། བརྙན་ཕབ་གསར་བ་དང་། སྒྲ་རྡུལ་གསར་བ་སོགས་ཚོང་ཁང་དང་སྤྲོ་ཁང་། ལས་ཁུངས་སོགས་གང་ནས་སྐད་བཏང་ན་རླངས་འཁོར་བཏང་ནས་ཐད་ཀར་འགྲོ་དགོས་པའི་ཡིན་པ་དང་། ཁོ་རང་ཡང་ལས་ཀ་དེ་ཡི་རིགས་ལ་འཇོན་པོ་ཡིན།

ཚེ་རིང་དབྱངས་སྐྱིད་ཀྱིས་ཕྱིར་རྗོ་སུ་ལམ་དུ་འགྲོ་དུས་སུ། ངའི་མཛའ་མོའི་རླངས་འཁོར་ནང་དུ་ཁྲིད་རྒྱུ་བརྗེད་མི་ཉན་ཞེས་ཡང་དང་བསྐྱར་དུ་བཤད། ང་ཚོ་སྐུའི་འཁྲུངས་སྐར་གཏོང་ཡུལ་ལ་སླེབས་དུས་སུ། དེར་རོགས་སྐྱོར་ཚོགས་པ་དེ་ཡི་ཚོགས་མི་ཁ་ཤས་ཤིག་གི་སྒྲོལ་མའི་རླུང་རྟ། དར་ལྕོག་སོགས་ཤིང་སྡོང་དག་གི་སྒང་དུ་བཀལ་བཞིན་འདུག ང་ཚོས་རང་རང་གི་རྒྱབ་ཁུགས་དག་རླངས་འཁོར་ནས་བཞག ཐད་ཀར་ཤིང་སྟོང་གི་སྒང་དང་སྐེད་སོགས་ལ། དར་ལྕོག་དང་རླུང་རྟའི་རིགས་གང་སར་བཏགས་པ་དང་། གྲོགས་པོ་རྡོར་རྒྱལ་གྱིས་རོལ་དབྱངས་ཀྱི་འཕྲུལ་རིགས་སྐོར་ལ་ལས་ཀ་བྱས།

ང་ཚོ་དེར་འབྱོར་ནས་ཕྱི་དྲོ་སླེབས་པ་དང་། སོ་ནམ་སློབ་མ་ཕོ་མོ་ལྔ་བཅུ་དེ་ཡང་རླངས་འཁོར་ཞིག་གི་ནང་དུ་མཉམ་དུ་སླེབས་སོང་། ཁོང་ཚོ་ནི་རོགས་སྐྱོར་ཚོགས་པ་འདིའི་ལོ་ལྟར་རྒྱ་གར་ནས་སོ་ནམ་སློབ་སྤྱོང་གི་ཆེད་དུ། རྒྱ་གར་ནས་བོད་གཞིས་ཆགས་སོ་སོ་ནས་ལོ་ལྟར། སློབ་མའི་མིང་ཐོག་ནས་མི་ལྔ་བཅུ་ཞིག་ལེན་གྱི་ཡོད་པ་དང་། འདི་རུ་སླེབས་པ་དང་གཟའ་འཁོར་གཅིག་གི་ནང་དུ་འཛིན་གྲྭ་ཐེངས་གཉིས་ཡོད་ལ། དེ་ལས་ཉི་མ་གཞན་དག་ལ་ཞིང་ལས་ཀྱི་ལས་ཀ་བྱེད་ཀྱི་ཡོད། ལས་ཀའི་གླ་ཆ་ཆུང་བ་དང་། འདུག་ས་ཡང་བཟང་རྒྱུ་མེད། མཐུན་རྐྱེན་ཡང་དེ་འདྲའི་འཛོམས་པོ་མེད་ས་ཞིག་དུ་ཡོད། གང་ལྟར། ལོ་རེ་རེ་ལ་འདི་ནས་བསྡོད་ཡུན་གྱི་དུས་ཚོད་ནི་གཏན་ནས་མི་འདྲ་བ་ཡིན། སྐབས་རེར་ཁ་ཤས་ཤིག་ཟླ་བཅུ་དང་བཅུ་གཅིག་ལ་འདུག་ཐུབ་ཀྱི་ཡོད། སྐབས་རེར་ཟླ་བ་དེ་ལས་ཉུང་བ་ཡིན། ད་ལོའི་སློབ་མ་འདི་དག་ནི་ཟླ་བ་ཉུང་ཤོས་ཀྱི་གྲངས་ཆགས་ཡོད།

ཁོང་ཚོ་མི་རིང་བར་ཕྱིར་རྒྱ་གར་དུ་ལོག་དགོས་པ་མ་ཟད། ཡོང་མཁན་རྗེས་མ་དེ་དག་གི་གྲྭ་སྒྲིག་བྱེད་བཞིན་པའི་སྒང་ཡིན། མང་ཤོས་ཤིག་ལོ་ལྟར་ཡོང་མཁན་དག་ནི་ཕ་མ་ཆགས་པ་ཤ་སྟག་ཡིན་ལ། རང་གི་ནང་དང་བུ་དང་བུ་མོ་ཚོ་དྲན་མཁན་ནི་ཉུང་ཉུང་ཞིག་གཏན་ནས་མིན། ལྷག་པར་དུ་སྐབས་རེར་སྟབས་མ་ལེགས་པ་ཡིན་ན། ལས་ཀ་བྱེད་མ་ཐུབ་པར་ན་བ་སོགས་བྱུང་ན། རང་གི་གནམ་གྲུའི་གླ་ཆ་ཡང་མི་འདང་བའི་དཀའ་ངལ་ཡོང་སྲིད་ཀྱང་། ད་ལྟའི་བར་དུ་མི་གཅིག་གཉིས་ཤིག་ཕྱིར་ལོག་བྱས་པ་བྱུང་བ་ལས། བརྒྱ་ཆའི་གོ་དགུ་ཡི་དུས་ཡུན་ཚར་རེག་བར་དུ་ཞིང་ལས་ལ་འབད་ནས་ཕར་འགྲོ་ཁར་སྒོར་མོ་མི་ཉུང་བ་རེ་གསོག་ཡོད་མཁན་ཡང་ཡོད་པ་ཡིན།

སོ་ནམ་སློབ་མ་དེ་དག་གིས་ཟ་མ་བཟོས་ནས་འཁུར་འདུག་པ་མ་ཟད། གླུ་དང་ཞབས་བྲོ་སོགས་གྲྭ་སྒྲིག་ཡང་བྱས་འདུག ལྟ་རུ་ཡོང་མཁན་ནི་དེ་འདྲའི་མང་བོ་ཞིག་མེད་ན་ཡང་། གང་སླེབས་ཡོད་པ་དེ་དག་ནི་དངོས་ནས་སྣང་བ་སྤྲོ་བོ་བྱུང་འདུག ཟ་མ་རིན་མེད་ཡིན་པ། འཐུང་རྒྱུ་རིན་མེད་ཡིན་པ། ཡིད་སྐྱོ་བ་ཞིག་ལ་དེ་ཉིན་ཟ་མ་བཟོས་ནས་འཁུར་ཡོད་ཀྱང་། ཚོགས་པ་དེ་ཡིས་སྡེར་མ་འཁུར་ཡོང་དགོས་པའི་སྐོར་ནས་བཤད་མེད་སྟབས། མི་མང་བོ་ཞིག་ལ་ཟ་བྱེད་ཀྱི་སྡེར་མ་མེད་པར་ལུས་ཀྱང་། གཅིག་ནས་གཉིས་རྒྱུད་དེ་ཟས་ཚར་བའི་འགྱིག་སྡེར་ཁ་ཤས་ཤིག་གཙང་བཟོ་བྱས་ནས་རྗེས་མ་དག་གི་ཟ་བྱེད་དུ་བེད་སྤྱོད་མི་བྱེད་ཐབས་མེད་ཆགས།

ངའི་མཛའ་མོ་ལ། ཕྱིར་འགྲོ་དུས་སུ་ཚེ་རིང་དབྱངས་སྐྱིད་ལ་རླངས་འཁོར་དུ་འཇོག་དགོས་པའི་སྐོར་ནས་བཤད་པ་དང་། ཁོ་མོ་ཚེ་རིང་དབྱངས་སྐྱིད་དྲན་གསོས་ཀྱི་འདུག་གམ་ཞེས་དྲིས་དུས། མོས་ལོས་དྲན། ཐེངས་སྔོན་མ་དེར་ལོ་སར་སྐབས་སུ་ལམ་གི་རིང་ཐུང་ཡོད་ཚད་ལ་ཁྱེད་རང་ལ་ཁ་བརྡ་བྱོས་ནས་ཡོང་མཁན་གྱི་བུད་མེད་དེ་རེད་མོད་ཟེར་ནས་ལན་བཏབས་དུས། ངའི་སེམས་ནང་དུ་སྣང་གང་ཡང་མེད་ཀྱང་། ངའི་མཛའ་མོས་མི་དགོས་ས་ཞིག་ནས་ཕྲག་དོག་བྱེད་ཀྱི་ཡོད་པ་གཞི་ནས་ཤེས་སོང་།

ང་ཚོས་སློབ་མ་དག་གི་གླུ་དབྱངས་དང་ཞབས་བྲོ། རོགས་སྐྱོར་ཚོགས་པ་དེ་ཡི་གཏམ་བཤད་སོགས་ལ་ལྟ་ཉན་བྱས་ཚར་བ་དང་ཟ་མ་ཟ་བའི་འགོ་བཙུགས། ཟ་མ་ཟ་བའི་སྐབས་སུ་ང་དང་མཛའ་མོ། གྲོགས་པོ་རྡོར་རྒྱལ་གྱི་བཟའ་ཐོར་རྒན་མོ། གྲོགས་པོ་བུ་ཆུང་གི་བཟའ་ཐོར་རྒན་མོ་ཤེས་རབ་ལྷ་མོ། བུ་མོ་གཉིས། པད་མ་དང་སྐར་མ། ད་དུང་། གྲོགས་པོ་བློ་བཀྲ་ཡི་རྒན་མོ་དང་བུ་མོ་གཉིས། ང་ཚོ་ཚང་མ་ལྷན་དུ་ཡོད། ཟ་མ་ཟ་བཞིན་པའི་སྐབས་ཤིག་ལ། གྲོགས་པོ་བུ་ཆུང་གིས་ཁོ་རང་འགྲོ་དགོས། མ་སོང་ན་བྱང་ཆུབ་དང་ལྷག་པ་གཉིས་འགོར་འགྲོ་ས་རེད། བདེ་མོ་བྱོས་ཟེར་ནས་ང་ལ་བཤད།

ངས་ཀྱང་ཁོང་ཚོས་རིག་ས་ནས་ལག་གཡུགས་བྱས་ནས་བདེ་མོ་བཞག སྐབས་དེ་འདྲ་ཞིག་ལ་ཤེས་རབ་ལྷ་མོས་ང་ལ་སྐད་ཆ་འདྲི་འགོ་བཙུགས། ཨ་ཅེ་སྒྲོལ་དཀར་ལ་མཛུབ་མོ་བསྟན་ནས། བུད་མེད་དེ་གང་དུ་བསྡོད་ཀྱི་ཡོད་པ་རེད་ཟེར། ངས་མོ་རང་གི་ལས་ཀ་ཨ་རིའི་གཞུང་ཚབ་ཁང་དུ་བྱེད་ཀྱི་ཡོད། ཀྲེ་ལ་བེས་ན་བསྡད་ཡོད་པ་རེད་ཅེས་བཤད་པ་ཡིན། དེ་དུས་མོ་རང་གིས་ང་ལ་དེས་ན་བུ་ཆུང་གིས་སྤིར་ཤེས་བ་ནས་རེད་ཟེར་གྱི་འདུག དེ་གང་རེད་དམ་ཟེར། དེ་དུས་ངས་ཤེས་པ་དེ་ཡིན། བསྟུད་ནས་མོ་རང་གིས་འདང་ནུབ་ཁྱེད་ཚོ་བུ་ཆུང་གི་ནང་དུ་མི་སུ་སུ་ཡོད་དམ། བུད་མེད་དེ་ཡང་ཡོད་པ་རེད་དམ་ཟེར། ངས་ཨ་ཅེ་སྒྲོལ་དཀར་ལ་མཛུབ་མོ་བསྟན་ནས། རེད། མོ་རང་ཡོད། དེ་ནས་བློ་བཀྲ བློ་དོན། རྡོར་རྒྱལ། ང་བཅས་བརྩི་བཞིན་པའི་སྐབས་སུ་གྲོགས་པོ་བུ་ཆུང་གིས་རང་གི་བུ་མོ་པད་མ་ཁྲིད་ནས་མོ་རང་གི་སར་སླེབས་སོང་། དེ་དུས་ཁོ་མོས་བུ་ཆུང་ལ་ཁྱེད་རང་གིས་ང་ལ་སྐྱག་རྫུན་བཤད་ནས་གང་བྱེད། རྡོ་རྗེ་ཡིས་བུད་མེད་དེ་ཀྲེ་ལ་བེས་ན་ཡོད་པ་རེད་ཟེར་གྱི་འདུག་ཟེར་ནས་བྱང་ཆུབ་ཀྱི་ཕྱོགས་སུ་མཛུབ་མོ་བསྟན་དུས་སུ། གཞི་ནས་ང་ཚོའི་བར་དུ་གོ་ལོག་ཐེབས་ཡོད་པ་ཤེས་སོང་།

ང་རང་དངོས་ནས་སྟབས་བདེ་བོ་མི་འདུག གྲོགས་པོ་བུ་ཆུང་དང་ཁོ་མོ་གཉིས་བཟའ་ཐོར་བྱུང་བ་དེ་ཡི་རྗེས་ནས་བཟུང་། ཤེས་རབ་ལྷ་མོ་དང་ཐུག་འཕྲད་བྱེད་ཐེངས་རེར། སྐད་ཆ་བཤད་བདེ་བོ་མི་འདུག རྒྱུ་མཚན་ནི་སྐད་ཆ་དྲང་མོའི་ལན་འདེབས་མི་ཐེབས་པ་དེ་ཡིན། དྲང་མོས་ལན་བཏབས་པ་ཡིན་ན། ཕན་ཚུན་གཉིས་ཀ་ལ་འཕོག་གི་ཡོད། དེ་ལས་ཐུག་འཕྲད་མ་བྱས་ན་བཟང་ན་ཡང་། ང་རང་གི་མཛའ་མོ་དང་ཁོ་མོ་གཉིས་གྲོགས་མོ་བཟང་བོ་ཞིག་གི་སྟེང་ན་དེང་སང་ཨག་གསར་ཡོད་པའི་དུས་ཤིག་ཆགས་ཡོད་པ་རེད།

དེང་རབས་རོལ་དབྱངས་ཀྱི་འགོ་བརྩམས་སོང་། རོལ་དབྱངས་དེ་ཡི་ཁྲོད་ནས་མི་ཞིག་གིས་འདི་ནི་རོལ་དབྱངས་ཐ་མ་དེ་ཡིན། ང་ཚོ་ཚང་མ་ཕྱིར་རླངས་འཁོར་དུ་འགྲོ་བ་ལ་སྐར་མ་བཅོ་ལྔ་མ་གཏོགས་མེད། ཚང་མས་རོགས་སྐྱོར་ཚོགས་མི་དང་དེ་འབྲེལ་གྱི་མི་དག་ལ་བཀའ་དྲིན་མཚོན་བྱེད་དུ། དེང་རབས་ཞབས་བྲོའི་སྟངས་སྟབས་ལྷན་དུ་ཡིན་ཟེར་ནས་དབྱིན་སྐད་ཀྱི་སྟེང་ནས་བཤད་སོང་།

ལག་འཇུ་ནི་མི་དག་གི་བདེ་མོ་འཇོག་སྟངས་ཤིག་ཡིན། སློབ་མ་དེ་དག་གི་ཁྲོད་ནས་ཁ་ཤས་ཤིག་ང་དང་མཛའ་མོ་ཡོད་སར་ཡོང་ནས་བདེ་མོ་བཞག དེ་དུས་ངས་ང་ལ་ལག་འཇུ་གཏོང་མཁན་གྱི་བུད་མེད་དེ་གཉིས་ལ་ང་རང་གི་མཛའ་མོ་ལ་ཡང་ལག་འཇུ་བཏང་ནས་བདེ་མོ་བྱོས་ཟེར་ནས་ཞུ་རོགས་ཞེས་སྐུལ་མ་ཞུས་པ་ཡིན། སློབ་མ་དེ་དག་ནི་རེ་རེ་བཞིན་རླངས་འཁོར་དུ་འཚུད་ཚར་སོང་། ང་ཚོ་ཤུལ་དུ་ཡོད་པ་ནི། གྲགས་འགུལ་མེད་པར་གྱུར་བ་དུས་མཚུངས། ཅ་དངོས་དག་བསྡུ་གསོག་བརྒྱབས། སློབ་མ་དེ་དག་ནི་སྐོར་ཐེངས་གཉིས་བྱས་ནས་གཟའ་པ་སངས་དང་དེ་ཡི་རྗེས་སུ་ཕྱིར་རྒྱ་གར་བོད་གཞིས་གྲོང་གང་ནས་ཡོང་བ་དེར་ལོག་འགྲོ་མཁན་ཡིན་ལ། སྐོར་ཐེངས་ལྔ་བཅུ་རྗེས་མ་དེ་དག་ཡང་མི་རིང་བར་སླེབས་ངེས་རེད། ཁོམ་པ་དང་དུས་ཚོད་བྱུང་ན་གནམ་ཐང་ལ་དེ་དག་བསུ་མ་ཞིག་བྱེད་དུ་འགྲོ་དགོས།

བོད་མི་འདུས་བསྡོད་ཀྱི་ས་གནས་གང་དུ་ཡིན་ཡང་། སྐུའི་འཁྲུངས་སྐར་སྤྱི་ཟླ་བདུན་པའི་ཚེས་དྲུག་ལ་གཏོང་གི་ཡོད་མོད། ཕྱི་རྒྱལ་ཁག་མི་ཉུང་བ་ཞིག་ན། དུས་ཚོད་དང་ལས་ཀ་སོགས་ཀྱི་དབང་གིས་ཟླ་ཚེས་ཡར་མར་ལ་ནུར་བཞིན་ཡོད་པ་རེད། དེ་ཡིན་དུས། ང་ཚོས་ད་ལོ་རོགས་སྐྱོར་ཚོགས་པ་འདིའི་གོ་སྒྲིག་འོག སོ་ནམ་སློབ་མ་ལྔ་བཅུ་དང་འདིར་བསྡོད་འདོད་བོད་མི་ཁ་ཤས་ཤིག མགྲོན་དུ་ཡོང་མཁན་གྱི་རྒྱལ་ཁབ་འདིའི་སྐྱེ་ཕོ་མོ་མི་ཉུང་བ་ཞིག ནགས་ཚལ་ཞིག་ནས་སྤྱི་ཟླ་བདུན་པའི་ཚེས་གཉིས། གཟའ་སྤེན་པ་ལ་བཏང་།

ཅ་དངོས་དག་འཁུར་ནས་ཚེ་རིང་དབྱངས་སྐྱིད་དང་ངེད་གཉིས་སྔོན་དུ་འདུག མཛའ་མོས་བུ་མོ་ཁྲིད། ཤེས་རབ་ལྷ་མོ་ལ་སྒུག་ནས་བསྡད་འདུག དེ་དུས་ངས་ཚེ་རིང་དབྱངས་སྐྱིད་ལ་ལམ་སྐབས་སུ་ང་རང་གི་མཛའ་མོ་ལ་སྐད་ཆ་མང་ཙམ་བཤད་དགོས་པར་འབོད་སྐུལ་བྱས་པ་ཡིན།