དེ་རིང་ནི་ཧ་ཅང་གལ་ཆེ་བའི་ཉིན་ཞིག་ཡིན། ནུ་མོ་དང་ངེད་གསུམ་གྱིས་ཞོགས་ཇ་འཐུང་མ་ཐག མེག་ལོར་ནས་རྡ་ཤོད་དུ་ལམ་ལ་བུད། རྡ་ཤོད་ཀྱི་དྲ་ཁང་ཞིག་གི་ནང་དུ་ངས་ཕ་ཡུལ་ལ་ཁ་པར་བཏང་ནས་དྲིན་ཆེན་ཕ་ལོ་དང་མཉམ་དུ་ང་རང་ཕྱི་རྒྱལ་གྱི་བུད་མེད་ཅིག་དང་འགྲོགས་དེ་མི་རིང་བར་ཕྱི་ལ་འགྲོ་བཞིན་ཡོད་པའི་སྐོར་ཞིབ་དུ་ཞུས་པ་ཡིན། ཁོང་གིས་ང་རང་ལ་རིགས་རུས་སོགས་གཞན་ལ་ཤོར་མི་ཉན་ཚུལ་དང་། རང་གི་རིགས་ཀྱི་འདུ་ཤེས་ཟབ་མོ་བཅིངས་དགོས་པའི་སྐོར་ཞིག་གླེང་དགོས་ན་ཡང་། ང་ཡི་ཕ་རྒན་ནི་བོད་མི་མང་ཤོས་ལྟར། ཡིག་རྨོངས་པ་མ་ཡིན་ཙམ་ཡིན། ཀློག་ཤེས་ཙམ་ལས་འབྲི་སྤྱོད་ནུས་པ་མེད་པ་ཞིག་ཡིན་དུས། མི་རིགས་ཤིག་གི་འདུ་ཤེས་སྲ་མོ་ཞིག་གི་སྐོར་ནས་གང་ཡང་གསུངས་མ་སོང་། གང་ལྟར། སོང་ས་ཞིག་ནས་ཤུ་རེ་བྱོས་ཟེར་ནས་གསུངས།
གངས་དཀར་ལྷ་མཚོ་དང་ནུ་མོ་གཉིས་དྲ་ཁང་དུ་བཞག་ནས་ང་རང་ཤོད་ནས་ཤོད་ལ་སོ་སྨན་པའི་སྨན་ཁང་དུ་སོང་ནས་སྨན་པ་ལ་སྒུག་ནས་བསྡད་པ་ཡིན། སྤྱིར་བཏང་ཡིན་ན་ཁ་སང་སོ་ཚབ་བཟོ་རྒྱུ་བྱས་ཡོད་ཀྱང་། ཁ་སང་སོ་སྨན་པ་ལ་དུས་ཚོད་ཀྱི་མ་འདང་བར་ལུས་པ་རེད། དེ་རིང་ཁོས་སྤྲད་པའི་དུས་ཚོད་ཀྱི་སྔོན་དུ་ང་རང་འདིར་ཡོང་ནས་སྒུག་དགོས་བྱུང་། སོ་ཚབ་བཟོས་མ་ཐག་ང་རང་ལ་ཁོ་མོས་སྤྲད་པའི་ཧིན་སྒོར་ཁྲི་གཅིག་དང་ཕྱེད་དེ་སོ་སྨན་པ་ལ་སྤྲད་དུས། སོ་སྨན་པའི་འཛུམ་མདངས་དང་བཅས། རྗེས་སུ་དཀའ་ངལ་འདྲ་བྱུང་ན་ཕྱིར་འབྲེལ་ཐུག་བྱེད་རོགས། འདི་ང་རང་གི་ཁ་བྱང་ཡིན་ཟེར།
ང་རང་ཆུ་ཚོད་གསུམ་པའི་སྟེང་ཕྱིར་མེག་ལོར་དུ་འབྱོར་དགོས་ཀྱི་ཡོད། སྐུ་སྲུང་ཟུར་བ་ཟླ་བ་རིན་ཆེན་ལགས་ཀྱིས་ང་རང་ལ་རོགས་པ་བྱས་ནས་སྤྱི་བདེ་གཉེན་རྟོག་ལས་ཁུངས་དུ་འགྲོ་རྒྱུ་བྱས་ཡོད། ཟླ་བ་རིན་ཆེན་ལགས་ནི་ང་རང་གི་དྲིན་ཆེན་ཞིག་ཡིན། ཁོ་རང་གིས་ང་ཡི་དེབ་དང་བོའི་སྤྱིན་བདག་གནང་མྱོང་བ་མ་ཟད། ཁོ་རང་གིས་ད་དུང་བོད་མི་གསར་འབྱོར་བ་གཞན་དག་ཁ་ཤས་ཤིག་ལ་ཁོ་རང་གིས་གང་ནུས་ཅི་འཇོན་གྱི་རོགས་རམ་བྱས་མྱོང་མཁན་ཞིག་ཡིན། ཁོ་ནི་དངོས་ནས་བྱེས་ཀྱི་བོད་མི་དམིགས་དཔེ་བྱེད་ཆོག་པའི་མི་ཞིག་ཡིན། ཁོ་རང་ལ་སྒེར་གྱི་འགྲིམ་འགྲུལ་ལས་ཁུངས་ཤིག་ཡོད། ངེད་གཉིས་གཉེན་རྟོགས་ལས་ཁུངས་སུ་བཅར་དུས། གཉེན་རྟོག་པ་ཞིག་གིས་ཁོ་རང་ལ་འཚམ་འདྲི་བྱས་སོང་། ངེད་གཉིས་དེར་བཅར་དགོས་པའི་རྒྱུ་མཚན་ཞུས་དུས། དེ་ཡི་སྐོར་ཤོད་ཀྱི་ལས་ཁུངས་ཨ་མར་འགྲོ་དགོས་པར་བཤད།
ཟླ་བ་རིན་ཆེན་ལགས་ཀྱི་རླངས་འཁོར་ཆུང་ཆུང་དེ་ཡི་ནང་དུ་བསྡད་ནས། ངེད་གཉིས་ཕྱིར་མེག་ལོར་དུ་མི་ཡོང་ཐབས་མེད་བྱུང་། ཤོད་དུ་འགྲོ་བ་ལ་འཕྱི་བོ་ཆགས་ཡོད་ལ། ཁོ་རང་ཡང་ལས་བྲེལ་ཆེ་བའི་མི་ཞིག་ཡིན། ངས་ཁོང་ལ་རོགས་པ་བྱས་པ་དེར་བཀའ་དྲིན་ཆེ་ཞུས་པ་དང་ལྷན་དུ་ཁོ་རང་གི་རླངས་འཁོར་དེ་ལས་ཕྱི་ལ་བུད།
དགོང་མོ་གངས་དཀར་ལྷ་མཚོ་ངེད་གཉིས་ཀྱིས་དག་ཞིང་ཟ་ཁང་ནང་གི་ང་རང་གི་ལས་རོགས་ཚོར་བདེ་མོ་འཇོག་པའི་ཆེད་དུ་ཟ་མ་སྟབས་བདེ་ཞིག་གི་སྤྱིན་བདག་བྱེད་ཁུལ་བྱས། དེ་ཡང་མོ་རང་གི་སྒོར་མོ་ལས་ང་རང་ལ་སྒོར་མོ་ཞིག་གང་དུ་ཡོད། ཐུགས་སྤྲོ་ཆུང་ཆུང་དེ་ཡི་སྐབས་སུ་བོད་ལུགས་ཀྱི་ཤ་བཙོས་པ་དང་སྡུར་རུ་སྐོལ། ཆང་དང་སྤི་རག ཤིང་ཏོག་གི་ཁུ་བ་སོགས་ངེད་གཉིས་ཀྱི་འཛོམ་ཚད་ཅིག་ལ་ང་ཚོས་ལྷན་དུ་རོལ། ༤།༩།༠༨
སྔ་མོ་ནས་ངེད་གཉིས་རྡ་ཤོད་ཀྱི་ལས་ཁུངས་དུ་སོང་། ཁོ་མོ་སྔོན་ཆད་དགེ་རྒན་བྱེད་སའི་སློབ་གྲྭའི་ནང་དུ་ཡང་བལྟ་ཙམ་བྱས། ང་རང་གཉེན་རྟོག་ལས་ཁུངས་དུ་བཅར་དུས། གཉེན་རྟོག་ལས་ཁུངས་ཀྱི་བཤད་རྒྱུར། བོད་གཞུང་བདེ་སྲུང་ལས་ཁུངས་ནས་རྒྱབ་གཉེར་ཡི་གེ་ཞིག་དགོས་ཟེར། ཁ་ཕྱིར་འཁོར་ནས་བོད་གཞུང་བདེ་སྲུང་ལས་ཁུངས་དུ་བཅར། བདེ་དོན་ལས་ཁུངས་དུ་སོང་ཟེར། ཁོར་ཡུག་ལས་ཁུངས་ཀྱི་འགྲམ་དུ་རང་བཙན་ལག་དེབ་དགོས་རབས་གསུང་བྱུང་། ང་རང་གིས་རང་བཙན་་ལག་དེབ་ལྡི་ལུ་ན་ཅ་དངོས་གཞན་དག་དང་མཉམ་དུ་ལུས་སོང་། ང་རང་ལ་ཉིན་བཞི་མ་གཏོགས་མི་འདུག་སྟབས། སྐུ་མཁྱེན། ཐབས་གཞན་ཡོད་དམ་ཞེས་དྲིས་དུས། བདེ་དོན་ལས་ཁུངས་དུ་སོང་ནས་སྐད་ཆ་དྲིས་ཟེར། བདེ་དོན་ལས་ཁུངས་ཀྱིས་བཤད་རྒྱུར་རང་བཙན་ལག་དེབ་མེད་པར་རྒྱབ་གཉེར་ཡི་གེ་སྤྲོད་ཐབས་མེད་པ་རེད་ཅེས་གསུངས་སོང་། ངས་ང་རང་གི་དཀའ་ངལ་དག་བཤད་ཀྱང་། ཁོས་ཁྱེད་རང་གི་དཔལ་འབྱོར་ལས་ཁུངས་ལ་འབྲེལ་བ་གནང་ནས་དྲིས་ཟེར་ནས་ཁ་པར་ཨང་གྲངས་ཤིག་སྤྲད་སོང་། དཔལ་འབྱོར་ལས་ཁུངས་ཀྱི་འབྲེལ་མཐུད་པ་དེ་ཡིས་བཤད་རྒྱུར་ང་རང་གི་ལག་དེབ་རྙིང་བ་ཡིན་ན་ས་གནས་གང་ནས་བཟོས་པ་དེ་ནས་མ་གཏོགས། འདི་ནས་ཐབས་ཤེས་མེད་པ་རེད་གསུངས།
དེ་ནས་ཐབས་ཤེས་ཡོངས་རྫོགས་ཟད་སོང་། གངས་དཀར་ལྷ་མཚོ་ལ་ཁ་པར་བཏང་ནས་རྒྱུ་མཚན་ཚང་མ་བཤད་དུས། ཁོ་མོས་མགྲོན་ཁང་ཕྱིར་སྤྲད་དེ་དོ་ནུབ་ལྡི་ལུར་འགྲོ་བའི་རླངས་འཁོར་འཛིན་བྱང་ཉོས་ཟེར་གྱི་འདུག དེ་མ་ཐག ཟླ་བ་རིན་ཆེན་ལགས་ལ་ཁ་པར་བཏང་ནས་ང་རང་ལ་ལྡི་ལུར་འགྲོ་བའི་རླངས་འཁོར་འཛིན་བྱང་གཉིས་ཐོ་འགོད་བྱེད་རོགས་ཞུས་དུས། ཁོས་ཁྱེད་རང་གི་ལས་ཀ་ག་རེ་བྱུང་སོང་ཟེར། རྒྱུ་མཚན་ཚང་མ་བཤད་དུས། ཁྱེད་ཀྱིས་ང་རང་ལ་སྐར་མ་ལྔའི་རྗེས་སུ་ཁ་པར་གཏོང་ཤོག་གསུངས། སྐར་མ་ལྔ་མ་འགོར་བར་ཁོང་གིས་ཚུར་ཁ་པར་འབྱོར་ནས། ཁྱེད་རང་གི་ལག་དེབ་ཀྱི་ཨང་གྲངས་དྲན་གྱི་འདུག་གམ་ཟེར། དེ་དྲན་གྱི་མི་འདུག་ཞུས་དུས། ད་ནི་ཐབས་ཤེས་མི་འདུག ཁྱེད་ཀྱིས་གནམ་གྲུའི་འཛིན་བྱང་དང་ཕྱི་བསྐྱོད་ཐོངས་ཆེན་ཚང་མ་ཟླ་གཅིག་ལ་ཕྱིར་མགྱངས་བྱེད་རྒྱུ་ལས་གཞན་ཐབས་ཤེས་ལྷག་མི་འདུག་གསུངས་བྱུང་།
གངས་དཀར་ལྷ་མཚོ་ཕྱིར་སློབ་གྲྭ་ནས་འབྱོར་བ་དང་ངེད་གཉིས་ཀྱི་ཡིག་ཆ་དེ་ལེན་པར་ལག་དེབ་དངོས་སུ་ལེན་པར་ཐབས་མེད་པའི་སྐོར་ཞིབ་དུ་གླེང་རྗེས། མོ་རང་གི་མིག་ཆུ་ནི་རང་དབང་མེད་པར་བཞུར་ཏེ་འོང་སྐབས། ང་རང་ལ་ཡང་སྐྱོ་སྣང་གི་ཚོར་བ་ཞིག་གིས་རང་དབང་མེད་པར་ཕྱོགས་དེ་འོང་། གང་ལྟར། ངེད་གཉིས་ལ་ཐབས་ཤེས་གཞན་གང་ཡང་མེད་དུས། དོ་ནུབ་ལྡི་ལུར་ལམ་ལ་འབུད་དགོས་པ་དེ་རེད།
ང་རང་གི་སེམས་ནང་དུ་ཨ་ཙི། ཁོ་མོ་ལ་ཅི་ཁག འགྲོ་སོང་མང་བོ་ཞིག་བཏང་བཏང་ནས་ཉིན་མ་བཞིའི་རྗེས་སུ་འགྲོ་རྒྱུ་ལ་ཐུག་ཡོད་པའི་སྐབས་འདིར། ཡིག་ཆ་དེ་ཙམ་ལེན་པར་བོད་གཞུང་གི་ལས་ཁུངས་ནས་བསམ་ཤེས་ཙམ་ཡང་བྱེད་ཀྱི་མེད་པ་དེར་ཁོ་མོ་ཧང་སངས་འདུག ཡིན་ཡང་། ཁོ་མོའི་བསམ་བློ་ནི་གཙང་མ་ཡིན་པ་ལས་བོད་གཞུང་ལ་མ་དགའ་བ་དེ་འདྲ་གང་ཡང་ཡིན་མི་སྲིད། གཞུང་ཞིག་གི་དངོས་ནས་བཤད་ན་ཡིག་ཆའི་ཆ་རྐྱེན་མ་ཚང་བར་ངེས་ལེན་བྱེད་ཐུབ་མེད་པ་དེ་ཡང་རྒྱུ་མཚན་ལྡན་པ་ཞིག་ལོས་ཡིན་མོད། འོན་ཀྱང་། རང་གི་གཞུང་གིས་རང་གི་མི་དམངས་ལ་གོ་སྐབས་བཟང་བོ་རེ་ཡོད་པ་དེ་དག་ལ་བསམ་ཤེས་དང་བཀའ་འདྲི་གསལ་བོ་ཙམ་ཡང་མི་བྱེད་པ་དང་། རང་གི་མི་དམངས་ལ་ཡིད་ཆེས་ཀྱང་བྱེད་ཀྱི་མེད་པ་དེ་ཡང་ཞན་ཆ་ཞིག་དུ་མཐོང་དུ་བཅུགས་སོང་། ༥།༩།༠༨
མུ་འགོད།
དྲ་གྲོགས་ལགས།
སྤྱིར་ཁྱེད་ཀྱི་ཟིན་བྲིས་འདི་ནི་ལོ་གསུམ་ཙམ་སྔོན་གྱི་ཟིན་བྲིས་རེད་འདུག་ཀྱང་ང་ལ་གསར་པ་ཡིན་པ་གང་ཞིག་ལ་ཉིན་གཅིག་ཀྱང་མ་ཆད་པར་ཀློག་གི་ཡོད། སྙན་པོ་འདུག
བོད་ཤ་ཁྲག་རུས་གསུམ་གྱི་རྩོམ་ལ་ཧ་ཅང་དགའ། ཁྱེད་ཀྱིས་མུ་མཐུད་ནས་སྤེལ་རོགས། ཧ་ཅང་སྙན་མོ་འདུག འདིའི་བརྒྱུད་སློབ་སྦྱོང་མང་པོ་ཞིག་ཐོབ་ཀྱི་འདུག
ཁོ་རེ་བསྟན་འཇམ་མིང་ཅན་ཁྱོད་ཁ་ཚུམས་ཨ། གཏམ་ཉོབ་ཀྱི་འདུག་ན་སུས་ཀློག་ལབ་སོང་། ཁྱེད་ལ་བཙན་དབང་གཏོང་མཁན་དང་རེ་སྐུལ་ཞུ་མཁན་ཡོད་པ་མ་རེད་ལོ། དེ་ལས་ཁ་ཁ་སྡོད།
གཞན་ཡུལ་ནས་ལས་ཀ་འཚོལ་སྟངས་རིང་གི ་རྫོགས་རྒྱུ་མེད་པའི་གཏམ་་ཉོབ་ཀི