དེ་རིང་ནི་ཇོའུ་མི་རིགས་ཀྱི་ལོ་སར་ཉིན་མོ་རེད་འདུག གངས་མཚོའི་ཨ་མ་ངེད་གསུམ་གྱིས་ཞོགས་པ་ནས་བྲེལ་འཚབ་ངང་དུ་ཡོད། ངས་ཁོ་མོ་ལ་རོགས་བྱས་དེ་མོ་རང་གི་སྤུན་མཆེད་དག་གི་བྱིས་པ་ཚོ་ལ་ལོ་སར་བའི་ལག་རྟགས་གྲྭ་སྒྲིག་བྱས། ཉིན་རྒྱབ་དུ་ང་རང་གིས་ཐབ་ཚང་ནང་གི་ལས་སུ་ཞུགས། ངས་བོད་ཟས་གྲགས་ཅན། ཤ་མོག་མོག ཤ་མེད་མོག་མོག་གཉིས་མི་འདྲ་བའི་བཟོ་དབྱིབས་ཀྱིས་བཟོས། གངས་མཚོའི་མ་རྒན་གྱིས་ཤ་བཙོས་པ་དང་། མོ་རང་གི་སྒོང་སྤོར་བཟོས། ད་དུང་མོ་རང་གི་མ་རྒན་གྱིས་བྱ་ཁུ་ཞིག་ཀྱང་བསྐོལ། གངས་མཚོའི་ཕུ་བོའི་རྒན་མོས་ཀྱང་བྱ་ཤ་བསྲེག་པ་དང་ཤིང་ཏོག་གི་མངར་ཟས་ཤིག་བཟོས་སོང་།
ངས་བོད་ཀྱི་ཁ་ཟས་ཤིག་གསར་གཏོད་བྱས་པ་ཡིན། དེ་ནི་ཤིང་ཏོག་སྐམ་པོའི་རིགས་ཀྱི་སྒོང་སྤོར་ཞིག་བཟོས་པ་དེ་ཡིན། ངས་བཟོས་པའི་ཤིང་ཏོག་སྐམ་པོའི་སྒོང་སྤོར་དེ་ལ་ཚང་མ་ཧ་ལས་པ་དང་ཞིམ་པོ་འདུག་ཟེར་བཤད་སོང་། དེ་ནི་གཅིག་བྱས་ན་ང་ལ་རང་གསར་དུ་སླེབས་པའི་མི་ཞིག་ལ་ཁ་ཡག་བཤད་པ་ཡིན་ཤས་ཆེ་ཡང་། རང་ཉིད་ལ་མཚོན་ན་གསར་དུ་བཟོས་པའི་ཤིང་ཏོག་སྐམ་པོའི་སྒོང་སྤོར་དེ་ཞིམ་པོ་བྱུང་། ཧ་ཅང་གྲྭ་རྒྱས་ཤིང་ཡིད་ཚིམས་པའི་ལོ་སར་བའི་དགོང་ཟས་དེ་རོལ་རྗེས་སུ་ཚང་མ་རང་རང་གི་ཁྱིམ་དུ་ལོག་འགོ་བརྩམས།
ང་དང་མོ་རང་གི་ཨ་ཅེ་ཀ་རན་གཉིས་ཀྱིས་གློག་དཀྲུས་སྒམ་གྱི་ནང་དུ་དཀར་ཡོལ་དང་ཤེལ་ཕོར། གང་གཤོང་ཚད་ཅིག་བླུགས་རྗེས་ལྷག་འཕྲོ་དག་དཀྲུ་བའི་ལས་སུ་ཞུགས་པ་ཡིན། སྟབས་མ་ལེགས་པར་གློག་དཀྲུས་སྒམ་གྱི་ཨང་གྲངས་སྣོན་སྟངས་ནོར་ནས་ལས་ཀ་བྱས་མ་སོང་། ཚང་མ་ཕྱི་རུ་བཏོན་ནས་ལག་པས་མི་དཀྲུ་ཐབས་མེད་ཆགས།
གངས་མཚོ་མོ་རང་གིས་མ་རྒན་གྱི་ཁང་བའི་ནང་ལོག་གི་ཁང་མིག་ཁ་ཤས་ཤིག་གཙང་མ་བཟོས་དེ་འདང་ནུབ་འཕྱི་བོ་ལུས་སྟབས། མོ་རང་ཐང་ཆད་ནས་རྐུབས་སྟེགས་རིང་བོ་དེ་ཡི་སྟེང་ནས་གཉིད་དུ་ཤོར་སོང་། མོ་རང་གི་མ་རྒན་གྱིས་ཅོག་རྩེ་སྒང་གི་སྣོད་ཆས་གང་ལུས་ཡོད་པ་དེ་དག་བསྡུ་གསོག་བརྒྱབས་སོང་། ངས་ཆུ་ཚོད་གཅིག་ལྷག་གི་རྗེས་སུ་སྣོད་ཆས་ཡོད་ཚད་གཙང་མ་དཀྲུས་ཚར་སྟབས། རང་ཉིད་ཉལ་ཁང་དུ་འགྲོ་ཞོར་གངས་མཚོའི་མ་རྒན་ལ་རྗོ་ཤུ་སྐད་ཀྱི་སྟེང་ནས་ཨ་མ་ལགས། གཟིམ་ཤག་གནོངས་ཞེས་བཤད་དེ་རང་ཉིད་ཐོག་ཁང་གི་སྐེས་འཛེགས་སྟེང་དུ་བུད།
དེ་རིང་གི་ཇོའུ་མི་རིགས་ཀྱི་ལོ་སར་འདི་ལ་གངས་མཚོའི་ཕ་རྒན་མ་གཏོགས་ནང་མི་ཚང་མ་འཛོམས་ཡོད། ལོ་ན་གྱ་བཅུ་གྱ་ལྔ་ལ་སོན་པའི་གངས་མཚོའི་ཨ་མ་རྒན་མོ། གངས་མཚོའི་ཕུ་བོ་བཟའ་མི་གཉིས་དང་བྱིས་པ་གསུམ། ཨ་ཅེ་ཚང་གི་བཟའ་མི་གསུམ། ང་དང་གངས་མཚོའི་ཨ་མ་བཅས་ཁྱོན་སྡོམ་མི་བཅུ་གཉིས་འཛོམ་དུས་སུ། བོད་ནང་གི་རང་ཉིད་ཀྱི་ནང་མི་ཡི་གྲངས་ཀ་དང་གཅིག་པ་ཆགས་སོང་། གང་ལྟར། ཐག་རིང་ཐུང་དང་སྐད་ཆ་བཤད་སྟངས། གོམ་གཤིས་དང་བརྩི་བཀུར་སོགས་གཅིག་པ་ག་ལ་ཡིན། གྲངས་ཀ་འདིའི་རང་ཉིད་ལ་བོད་ནང་དུ་ནང་མི་ལྷན་འཛོམ་ཞིག་བྱེད་པ་ལ་ཞུགས་མ་ཐུབ་པར་མི་ལོ་མང་བོ་སོང་ཚར་བའི་སྐྱོ་བ་དེ་དྲན་དུ་བཅུགས།
ངའི་ཕ་ཡུལ་གྱི་ཕ་མ་དང་སྤུན་མཆེད་དག་ལ་དེང་རབས་ཀྱི་ཤེས་ཡོན་དང་དེང་རབས་ཀྱི་དཔལ་འབྱོར་གྱི་མཐུན་རྐྱེན་འདི་འདྲའི་འཛོམས་པོ་ཞིག་གཏན་ནས་མེད་མོད། འོན་ཀྱང་། ཆེ་བཀུར་ཆུང་བྱམས་ཀྱི་གོམ་གཤིས་ཐུན་མོང་མ་ཡིན་པ་ཞིག་ཡོད། འདིར་ཕན་ཚུན་ལ་ཆེ་བཀུང་ཆུང་བྱམས་ཀྱི་བརྩི་བཀུར་མི་འདུག་ལ། རང་རང་གི་གང་བྱེད་འདོད་པ་དེ་དག་ལ་ཕ་མ་ཚོར་བཀའ་འདྲི་ཡང་ཞུ་དགོས་ཀྱི་མི་འདུག འདི་ལྟར། ཁོང་ཚོས་རང་རང་གི་ས་མཚམས་སྲུང་དེ་དཔལ་འབྱོར་གྱི་བྲན་གཡོག་ལ་གོམ་གཤིས་ཆགས་གྲབས་འདུག་གྱང་། ང་རང་འདུག་སའི་ཁྱིམ་ཚང་འདིའི་ནང་གི་ང་རང་གི་མཛའ་མོ་གངས་མཚོ་ལ་ཐུན་མོང་མ་ཡིན་པའི་གོམ་གཤིས་ཤིག་འདུག ཁོ་མོ་ང་རང་གི་དགའ་རོགས་ཡིན་སྟབས། རང་གིས་ཕྱོགས་སུ་འཐེན་པ་མིན། ཁོ་མོ་ནི་གཙང་གྲྭ་བྱེད་པར་དགའ་ཞིང་ཉེ་འབྲེལ་ཚོ་ལ་མཐུན་འབྲེལ་དམ་པོ་ཡོད་པ་དང་། བསམ་ཤེས་ཀྱང་མང་བོ་ཞིག་བྱེད་ཐུབ་ཀྱི་འདུག ཡིན་ཡང་། ཁོ་མོའི་བསམ་བློའི་གཏོང་སྟངས་ཁ་ཤས་ཤིག་ད་དུང་མ་རྒན་ཞིག་གི་བང་དུ་ཡོད་པའི་བྱིས་པ་གཅིག་དང་འདྲ་བོ་ཡོད་པ་དང་བྱིས་པ་ཞིག་གི་སེམས་ཁམས་དང་ཐག་ཉེ་བོ་འདུག ༢།༡༠།༠༨
གནམ་འོག་གི་འཚོ་བ་བསྐྱེལ་ལུགས་སོ་སོ་དང་སྐད་ཡིག་བེད་སྤྱོད་བྱེད་སྟངས་ཀྱང་དེ་མཚུངས་ཀྱི་མིའི་རིགས་ཀྱི་གནས་བབས་དང་ནུས་པ་ལ་ཡང་མི་འདྲ་བའི་ཆ་ཡོད་པ་ནི་སྨྲ་མི་དགོས་པ་ཞིག་རེད། ཡིན་ཡང་། རྒྱལ་ཁབ་ཤོར་བའི་མི་བུ་ང་ལྟ་བུ་ཞིག་གཞན་ཡུལ་དུ་འབོད་པའི་རྒྱལ་ཁབ་དུ་འཚོ་བ་རོལ་ཆོག་མིན་དེ་ཡང་། རང་ཉིད་ལ་དབང་ཚད་ཅི་ཡང་མེད་སྟབས། གནས་ཡུལ་རྒྱལ་ཁབ་འདིའི་ཆོག་མཆན་མེད་པར་བསྡོད་ཐབས་མེད། དེ་རིང་ནས་བརྩིས་པའི་ཉིན་མ་ཁ་ཤས་ཤིག་གི་རྗེས་སུ་ང་རང་གིས་རྒྱལ་ཁབ་འདིར་བསྡད་ཆོག་མིན་གྱི་ཆོག་མཆན་ཞུ་རུ་འགྲོ་དགོས་པ་ཡིན། ཆོག་མཆན་རེག་སོང་བ་ཡིན་ན། གཞི་ནས་རྒྱལ་ཁབ་འདི་ནས་ལས་ཀ་བྱེད་ཆོག་པའི་ཆོག་མཆན་ཡང་ཞུ་དགོས། ཆོག་མཆན་དེ་གཉིས་ཀ་རེག་པ་ཡིན་ན། ད་གཟོད་ངས་རྒྱལ་ཁབ་འདི་ནས་རང་ཉིད་ཀྱི་ལས་ཀ་གང་ཞིག་ལ་ནུས་པ་འདོན་ཐུབ་པ་དེ་ཡི་ཕྱོགས་ཀྱི་ལས་ཀ་འཚོལ་དགོས་པ་དེ་ཡིན།
མཐའ་མཇུག་རྒྱལ་ཁབ་འདིར་བསྡོད་ཅི་ཙམ་ཐུབ་མིན་གྱི་གྲུབ་འབྲས་ཀྱང་ད་ལྟའི་འཆར་གླེང་ཐུབ་པ་ཞིག་གཏན་ནས་མིན། ༣།༡༠།༠༨
འདང་ནུབ་ང་རང་ལ་འདི་ཁུལ་དུ་ཡོད་པའི་བོད་ཨ་མདོ་རྨ་ཆུ་ནས་ཡིན་པའི་བོད་པ་ཞིག་གི་ཁ་པར་ཨང་གྲངས་རེག་པ་དེ་ཡི་སྟེང་ནས་ཁ་པར་བཏང་ནས་རང་ཉིད་ཁོ་ལ་ཐུག་འཕྲད་བྱེད་དུ་ཡོང་འདོད་ཡོད་རབས་ཞུས་པ་ཡིན། ཁོས་ཀྱང་དགའ་སྣང་དང་བཅས་གྲོགས་པོ་ཁྱེད་རང་གང་གི་ཡིན། ངས་ངོ་ཤེས་སམ་སོགས་དྲིས། ངས་ཁོ་རང་རྡ་ས་ནས་ངོ་ཤེས་ཀྱི་ཡོད་པ་ཞིག་ཡིན། འོན་ཀྱང་། ཁོང་ལ་ངེད་གཉིས་ཕན་ཚུན་ཤེས་མིན་གྱི་སྐོར་མ་བཤད་པར། ང་རང་དེར་སླེབས་ན་ད་གཟོད་ཤེས་ངེས་རེད་ཅེས་བཤད་དུས། དམྱལ་བ་བོ། ད་ཤོད་ལ་གཏོང་ཟེར།
ཁ་པར་གྱི་ལམ་ནས་ཁོ་རང་གང་དུ་བསྡོད་ཀྱི་ཡོད་མེད་སོགས་ངའི་མཛའ་མོས་ཁོ་རང་གི་རྒན་མོ་ལ་ཁ་པར་གྱི་ལམ་ནས་གསལ་བོ་དག་པོ་བཟོས། ང་ཚོས་དུས་ཚོད་བཟོས་པ་ལྟར། ངེད་གཉིས་ཉིན་རྒྱབ་དུ་གངས་མཚོའི་རླངས་འཁོར་རྙིང་ཀོག་དེ་བཏང་ནས་རྗོ་སུ་ལམ་ནས་ཀྲེ་ལ་བེས། ཝ་མར་རྒན་ས་གནས་ཀྱི་ཕྱོགས་སུ་ཡོད་པའི་བོད་རིགས་གྲོགས་པོ་བཟའ་མི་དེ་ལ་ཐུག་འཕྲད་དུ་བསྐྱོད། ངེད་གཉིས་དེར་སླེབས་དུས་ཁོ་བོས་ང་རང་མཐོང་མ་ཐག ངས་ཚོད་དཔག་བྱས་པ་ནོར་མི་འདུག་ཟེར་ཞོར་ལྷད་མེད་དྭངས་གཙང་གི་འཛུམས་མདངས་ཀྱིས་གངས་མཚོ་ངེད་གཉིས་ཁོང་བཟའ་མི་གསུམ་གྱི་ནང་དུ་བསུས་སོང་།
ཉིན་གོང་གི་ཟ་མ་ང་ཚོའི་ལྷན་དུ་དེ་ནས་ཟས་པ་དང་། ངེད་གཉིས་ཁོང་ཚང་གི་ཁང་བའི་འགྲམ་གྱི་ལྡུམ་རྭ་ཆུང་ཆུང་དེ་ནས་ཁ་བརྡ་འདྲ་མིན་སྣ་ཚོགས་ཤིག་བྱས་ནས་བསྡད་ཡོད་པའི་སྐབས་དེར། བོད་རིགས་ཕོ་གསར་གཞན་ཞིག་སླེབས་སོང་། ཁོང་གི་མིང་ལ་རྡོར་རྒྱལ་ཟེར་བ་དང་། ཕ་ཡུལ་ཨ་མདོ་མཚོ་སྔོན་མང་ར་ནས་རེད་འདུག རྡོར་རྒྱལ་གྱིས་ངའི་སྤུན་མཆེད་བཀྲིས་དོན་འགྲུབ་ངོ་ཤེས་ཀྱི་འདུག་ལ། ཁོ་རང་གིས་དེ་ཡི་སྐོར་སོགས་ནས་མཆེད་པའི་རྒྱ་གར་གྱི་གནས་ཚུལ་མི་ཉུང་བ་ཞིག་དྲིས་པ་དང་ང་ཚོས་ཁ་བརྡ་མུ་མཐུད་དུ་ཁ་བརྡ་བྱས་པ་ཡིན། རྡོར་རྒྱལ་སླེབས་ནས་ལོ་གཅིག་ཙམ་རེད་འདུག བློ་དོན་ཁོ་རང་སླེབས་ནས་ལོ་ངོ་གསུམ་སོང་འདུག
འདང་དགོང་ང་རང་ལ་ཁ་པར་ཨང་གྲངས་སྤྲོད་མཁན་གྱི་བུ་ཆུང་ལགས་ནི་འདིར་སླེབས་ནས་ལོ་ངོ་གཉིས་སོང་འདུག ཁྱོན་སྡོམ་རྒྱལ་ཁབ་འདིར་ང་དང་བཅས་པའི་བོད་པ་བརྒྱད། རྒྱལ་ཁབ་འདིའི་བུད་མེད་ཚོ་དང་ལྷན་དུ་རྒྱལ་ཁབ་འདིར་ཡོང་བ་ཤ་སྟག་རེད་འདུག དེ་ཡི་ནང་གི་ལྔ་བོད་ནས་རྒྱ་གར་དང་རྒྱ་གར་ནས་འདིར་ཡོང་བ་རེད་འདུག གཞན་གསུམ་དེ་ནི་རྒྱ་གར་གཞིས་ཆགས་ཁག་ནས་འཚར་ལོངས་བྱུང་བའི་བོད་མི་རེད། གང་ལྟར། ཁ་སང་དེ་རིང་གཉིས་ལ་ང་རང་བོད་པ་གསུམ་དང་ཐུག་འཕྲད་བྱུང་བའི་ནང་གི་དེ་རིང་གི་བློ་དོན་དང་རྡོར་རྒྱལ་གཉིས་ནི་ཨ་མདོ་ཡིན་དུས། ང་ཚོས་ཕན་ཚུན་ལ་སྐད་ཀྱི་གོ་བརྡ་མི་གཤོང་བའི་དཀའ་ངལ་མེད་པར་དངོས་ནས་གྲོགས་པོ་རྙིང་བ་ཞིག་དང་འཕྲད་པ་ལྟ་བུ་བྱུང་།
ཕྱི་དྲོ་གངས་མཚོ་ངེད་གཉིས་ཁོང་ཚོ་དང་ཁ་གྱེས་དེ་གངས་མཚོའི་ཚ་མོ་རྒ་ལས་ཡ་ཡི་ནང་དུ་སོང་། ཁོ་མོ་ནི་ང་རང་རྒྱལ་ཁབ་འདིར་སླེབས་དུས་ཐོག་མར་གནམ་ཐང་དུ་བསུ་བ་བྱེད་དུ་ཡོང་མཁན་གྱི་མི་གཅིག་བྱུང་མྱོང་བ་དེ་ཡིན། ཁོ་མོ་དང་འཕྲད་སྐབས་སྣང་བ་སྤྲོ་བོ་ཡོད་པའི་ངང་ཚུལ་རྟག་དུ་སྟོན་བཞིན་ཡོད། ང་རང་ཡང་ཁོ་མོ་དང་འཕྲད་ཐེངས་རེར་གྲོགས་པོ་རྙིང་བ་ཞིག་གི་འདུ་ཤེས་སྐྱེ་ཡི་འདུག
གངས་མཚོ་དང་རྒ་ལས་ཡ་ཡི་ཕུ་བོ། ངེད་མཚོ་མི་བཞི་ཀྲེ་ལེས་བས་ན་སྐད་གྲགས་ཆེ་བའི་ཉི་ཧོང་གི་ཟ་ཁང་ཞིག་དུ་སོང་། ཟ་ཁང་དེ་ནས་ཉི་ཧོང་གི་ཟ་མ་སྐད་གྲགས་ཡོད་པ། སོས་ཤས་ཟེར་བའི་འབྲས་སྐྱུར་མོའི་ལྷན་དུ་གཤེར་ཁུ་ཁ་ཚོ་བོ་ཡོད་པ་ཞིག་ཟས། ཟ་ཁང་དེ་ཡི་ནང་དུ་སྐུ་མགྲོན་ནི་འཚང་ཁ་ཤིག་ཤིག་གིས་ཡོང་གི་འདུག གང་ལྟར། སྐད་གྲགས་ཆེ་བའི་ཉི་ཧོང་གི་ཟ་མ་ཟོས་རྗེས་སུ། ང་རང་ལ་ཚོར་སྣང་ཞིག་བྱུང་བ་ནི། ཉི་ཧོང་གི་ཟ་མ་བཟོ་ལུགས་དེ་ནི་འཕྲོད་བརྟེན་ཅན་ཞིག་ཡིན་པ་ལྟ་བུ་མཐོང་སོང་། ༥།༩།༠༨
ཞོགས་པ་སྔ་བོ་ནས་ཡར་བླངས་དེ་ང་རང་གི་ཟླ་གཅིག་གི་དུས་ཡིན་རྫོགས་གྲབས་ཡོད་དུས། ཐོངས་ཆེན་ཞུ་སའི་ལས་ཁུངས་ལྟེ་བ་དེ་རུ་བཅར། ལས་ཁུངས་ལྟེ་བ་ཡོད་ས་ནི་རྗོ་སུ་ལམ། ཨེས་སུ་རལ་གྱི་རྒྱལ་ས་ན་ཡོད། ལས་ཁུངས་ཨ་མ་ནས་སླར་ཡང་ལབ་རྙོག་གང་ཡང་མེད་པར་ཟླ་ངོ་གསུམ་གྱི་འགྲིམ་འགྲུལ་ཐོངས་ཆེན་དེ་སྤྲད་སོང་། ཡང་བསྐྱར་རྒྱལ་ཁབ་འདིར་བསྡོད་ཆོག་པའི་ཆོག་མཆན་ཟླ་ངོ་གསུམ་ལ་ཐོབ་ཡོད་ཀྱང་། ལས་ཀ་བྱེད་ཆོག་པའི་ཆོག་མཆན་རེག་མེད། གང་ལྟར། གང་ཡང་མ་རེག་པ་ལས་རེག་པ་དེར་དངོས་ནས་གངས་མཚོ་མོ་རང་སེམས་གཏིང་ནས་དགའ་འདུག
མུ་འགོད།
