ཉིན་གོང་ཆུ་ཚོད་དང་བོའི་སྟེང་གི་རླངས་འཁོར་འཛིན་བྱང་ཉོས་དེ་གངས་མཚོ་ངེད་གཉིས་ཕྱིར་ཨེ་སི་རལ་གྱི་རྒྱལ་ས་རྗོ་སུ་ལམ་དུ་ཁ་ཕྱོགས་པ་ཡིན། ཨེས་ལ་གྲི་ ནས་ངེད་གཉིས་གངས་མཚོའི་གྲོགས་མོ་ཝན་གྱིས་རོགས་པ་བྱས་མེད་ཚེ་ངེད་གཉིས་རླངས་འཁོར་གྱི་རྗེས་མ་ཟིན། ངེད་གཉིས་བསྡོད་ས་ནས་ཡོང་བཞིན་པའི་སྐབས་དེར་ཝན་གྱིས་ངེད་གཉིས་ལ་ཁ་པར་འབྱོར་ནས་སེམས་འཁྲལ་མ་བྱེད་ང་རང་སོང་དེ་རླངས་འཁོར་ས་ཚིགས་ནས་ཁ་ལོ་བ་བཤད་དེ་ཁྱེད་གཉིས་ལ་སྒུག་ནས་བསྡད་ཆོག་ཟེར།
གང་ལྟར་ངེད་གཉིས་རྗོ་སུ་ལམ་གྲོང་ཁྱེར་ནང་དུ་འབྱོར་ནས་སྐར་ཆ་ཁ་ཤས་ཤིག་ལ་སྒུག གངས་མཚོའི་ཨ་མ་ངེད་གཉིས་བསུ་བར་རླངས་འཁོར་ས་ཚིགས་ཤིག་དུ་སླེབས། གངས་མཚོའི་ཨ་མའི་ནང་དུ་དགོང་ཟས་ཤིག་བཟོས་དེ་ཟོས་རྗེས་སུ་གངས་མཚོའི་གྲོགས་མོ་སྒྲ་ཝེ་ནས་སྐད་བཏང་བ་ལྟར་སྒྲ་ཝེ་གྱི་ནང་མི་དང་མཇལ་འཕྲད་བྱས་པ་དང་དགོང་ཟས་ཀྱི་རྗེས་ཀྱི་མངར་ཟས་ལ་ལྷན་དུ་རོལ།
ཕྱིར་གངས་མཚོའི་ཨ་མའི་ཁྱིམ་དུ་འབྱོར་ནས་ང་རང་གིས་གློག་ཀླད་དྲ་ཚིགས་ནང་གི་དུས་བབ་དང་བང་ཆེན། ཧི་གཟུགས་ཟིན་བྲིས་བཅས་སུ་རང་ཉིད་ཀྱི་ཟིན་བྲིས་སྤེལ་བ་དང་ཁ་བརྡ་དང་གཞན་ཟིན་བྲིས་ཁ་ཤས་ལ་བལྟ་ཀློག་བྱས་པ་དང་བསམ་ཚུལ་ཀྱང་རེ་ཟུང་བྲིས། ཉིན་མ་ཁ་ཤས་རིང་དུ་ང་རང་ཨེས་སི་རལ་གྱི་ལྷོ་ཕྱོགས་མངའ་ཁུལ་ཨེས་ལ་གྲི་ནས་ང་རང་བསྡོད་ས་དེ་ནས་གློག་ཀླད་ཀྱི་བརྡ་རྟགས་མི་འདུག་སྟབས། ཟིན་བྲིས་སྤེལ་ཐུབ་མ་བྱུང་བ་དང་། ཟིན་བྲིས་དེ་དག་བསྔོགས་རྒྱུ་ཡང་མ་བྱུང་། དྲ་ཐོག་གི་བོད་མིའི་སྐྱིད་སྡུག་བསྐོར་ཡང་ཐོས་ཐུབ་མ་སོང་། དོ་ནུབ་ངས་དྲ་ཐོག་གི་དྲ་ཚིགས་སོ་སོ་རུ་ཉུལ་བ་ཡིན། དྲ་གྲོགས་རྙིང་བ་བསྐོར་ཞིག་གི་སྟེང་དུ་དྲ་གྲོགས་གསར་བ་རེ་ཟུང་ཞིག་ཀྱང་མཐོང་རྒྱུ་འདུག ༢༣།༡།༠༩
འདང་དགོང་གངས་མཚོས་ང་རང་ལ་གྲ་སྒྲིག་བྱས་པའི་ཅ་ལག་དང་ཟ་མ་སོགས་འཁུར་ནས་ངེད་གཉིས་ཞོགས་པ་སྔ་བོ་རྗོ་སུ་ལམ་ནས་ཨེས་ལ་གྲི་ལ་འགྲོ་བའི་རླངས་འཁོར་ས་ཚིགས་ཡོད་སར་ཡོང་བ་ཡིན། ཁོ་མོས་རླངས་འཁོར་ས་ཚིགས་ནས་མིག་ཆུ་འཕུད་ཞོར་དུ་ཁྱེད་རང་གི་དྲན་བཞིན་དུ་ང་རང་ལ་སྒོར་ཁུག་འཁུར་དགོས་པའི་དྲན་གསོ་མི་བྱེད་པར་གང་བྱེད་དགོས་ཟེར་ནས་ངུས། ངས་ཁོ་མོ་ལ་སྐྱོན་ཡོད་ནི་མ་རེད། མ་ངུ་དང་ང་རང་ལམ་ཁ་ནས་ཟ་རྒྱུ་དང་འཐུང་རྒྱུ་ཚང་མ་ཡོད་པ་རེད་ལ། ཨེས་ལ་གྲི་ལ་འབྱོར་ན་ཝན་ང་རང་བསུ་རུ་ཡོང་ངེས་རེད་ཅེས་བཤད་དེ་སེམས་གསོ་བྱས་པ་ཡིན།
རླངས་འཁོར་ནང་ནས་ང་རང་ལ་བུད་མེད་ཞིག་དང་འདུག་སྟེགས་ཉེ་འཁྲིས་སུ་འཁེལ་བ་དང་བུད་མེད་དེའི་མིང་ཡང་ང་རང་གི་དགའ་རོགས་གངས་མཚོའི་མིང་དང་གཅིག་པ་ཡིན་པ་མ་ཟད། མོ་རང་ལ་ཡང་རྒྱ་གར་དུ་བོད་པ་ལ་དྭགས་པ་ཞིག་དགའ་རོགས་ཡོད་ཟེར་བ་དང་ངེད་གཉིེས་ཀྱིས་རྒྱ་གར་གྱི་བསྐོར་ནས་ཁ་བརྡ་བྱས། ཁོ་མོ་ལམ་བར་དུ་བསྡད། ཁོ་མོས་ང་རང་ལ་རྗེས་ཕྱོགས་ཁྱེད་རང་ལ་རོགས་པ་རེ་བྱེད་དགོས་རྒྱུ་འདྲ་ཡོད་ན་ང་རང་ལ་ཁ་པར་གཏོང་ཕྱོགས་དང་ང་རང་གི་རོགས་པ་བྱེད་ཆོག་ཟེར་ནས་བཤད་པ་མ་ཟད། ང་རང་ལ་དྲན་བརྟེན་སྒོར་ཁུག་ཆུང་ཆུང་ཞིག་སྤྲད་སོང་། ང་རང་གི་དེའི་ཁ་ཕྱེ་ནས་བལྟས་དུས་སུ་ནང་དུ་དུ་ནག་འདུག ཡིན་ཡང་། ཁོ་མོས་ང་རང་ནི་དུ་ནག་འཐེན་མཁན་གྱི་བོད་པ་སྐྲ་རིང་ཞིག་རེད་བསམ་པ་ལོས་ཡིན།
ཨེས་ལ་གྲི་ལ་འབྱོར་དུས་རླངས་འཁོར་ས་ཚིགས་དུ་གངས་མཚོའི་གྲོགས་མོ་ཝན་གྱིས་རླངས་འཁོར་བཏང་ནས་ང་རང་བསུ་རུ་འབྱོར་འདུག་པ་དང་ངེད་གཉིས་འགྲོག་ནས་བསྡོད་ཁང་ཆུང་ཆུང་དུ་ཡོང་བས་ལམ་བར་དུ་ཁོ་མོས་ང་རང་གི་ལག་དུ་ཤིས་དཀར་སུམ་བརྒྱ་སྤྲད་དེ་འདི་ཁྱེད་རང་ལ་གངས་མཚོའི་སྤྲོད་ཤོག་ཟེར་གྱི་འདུག་ཟེར། ངེད་གཉིས་དེ་ནས་ལས་ཀ་བྱེད་སའི་ཡིག་ཚང་ལྟེ་བ་རུ་བྱིན་དེ་ཐོ་འགོད་བྱས་པ་དང་ང་རང་ལ་ཤོག་བྱང་ལས་ཀའི་སྔ་དགོང་དུ་ཐོ་འགོད་བྱེད་སྤྱད་ཀྱི་ཤོག་བྱང་ཞིག་དང་གོན་པ་བཅས་སྤྲད་སོང་། གྲོགས་མོ་ཝན་གྱིས་མོ་རང་འགྲོ་ཁར་ང་རང་ལ་ཁ་བརྡ་མང་བོ་ཞིག་བྱས་པ་ནི་ཁྱེད་རང་ལ་དཀའ་ཁག་དང་དགོས་མཁོ་འདྲ་བྱུང་དུས་ང་རང་ལ་འབྲེལ་བ་བྱོས་དང་ངས་ཁྱེད་རང་ལ་རོགས་བྱེད་ཆོག་ཟེར་ནས་ང་རང་ལ་མོ་རང་གི་ནང་གི་ཁ་བྱང་དང་ཁ་པར་ཨང་གྲངས་སོགས་ཤོག་བུ་ཆུང་ཆུང་ཞིག་གི་སྒང་དུ་བྲིས་དེ་སྤྲད་སོང་།
ང་རང་གི་ལས་ཁུངས་ནང་གི་ལས་བྱེད་བུད་མེད་ཤེས་རིས་དང་མཉམ་དུ་ཉིན་གོང་ཁ་ལག་ཟོས་རྗེས་ལས་ཀ་བྱེད་སའི་ཟ་ཁང་གི་སྒོ་འགྲམ་དུ་བར་མོ་རང་གི་བསྐྱལ་བ་དང་མོ་རང་གིས་ཀྱང་ལས་ཀ་དང་འབྲེལ་བའི་དཀའ་ངལ་ག་རེ་བྱུང་ན་ང་རང་ལ་ཐད་གར་ཁ་པར་གཏོང་ཤོག་དང་ངས་ཁྱེད་རང་ལ་རོགས་པ་བྱེད་ཆོག དེ་ལ་ངོ་ཚ་དང་ཡ་ང་དེ་འདྲའི་བྱེད་དགོས་ཀྱི་ཡོད་པ་མ་རེད་ཅེས་བཤད་དེ་འབུད་སོང་།
ང་རང་གི་ཆུ་ཚོད་ཕལ་ཆེར་གསུམ་ཙམ་ལ་ཐབ་ཚང་ནང་གི་ཡར་འགྲོ་མར་འགྲོ་བྱེད་ཞོར་དུ་གངས་མཚོ་ལ་ཁ་པར་ནང་གི་འཕྲིན་ཡིག་རེ་བསྐུར་ནས་ང་རང་གི་གནས་ཚུལ་ཐ་དག་ཁོ་མོ་ལ་བཤད་པ་ཡིན། ཁོ་མོ་ཡང་སེམས་པ་བྲེལ་བ་ཅུང་ཙམ་སྐྱེ་དགོས་བྱུང་བ་ནི། ང་རང་ཐབ་ཚང་ནང་དུ་ཆུ་ཚོད་གཉིས་གསུམ་རང་གཅིག་བུར་བསྡད་ཡོད་པ་དེའི་ཆེད་དུ་རེད། ཆུ་ཚོད་གསུམ་པའི་སྟེང་དུ་མ་བྱན་སླེབས། དེ་ནས་བཟུང་ལས་མགོ་བཙུགས་དེ་དགོང་མོའི་ཆུ་ཚོད་བཅུ་དང་སྐར་ཞེ་ལྔ་བར་དུ་ཐབ་ཚང་ནང་དུ་ལས་ཀ་བྱས་པ་ཡིན།
མ་བྱན་དང་མ་གཡོག་བུད་མེད་རྒྱགས་པ་དེ་གཉིས་ཀྱི་ང་རང་ལ་ཡང་ཡང་ཁ་ལག་ཟོ་ཟེར་ནས་བཤད་ཀྱང་། ང་རང་གིས་དོ་ནུབ་ང་རང་ལ་ནང་དུ་ཁ་ལག་ཡོད། འདི་ནས་མི་ཟ་སང་ཉིན་ནས་ཟ་ཆོག་ཞེས་བཤད་དེ་དགོང་མོ་བདེ་ལེགས་སང་ཉིན་ཆུ་ཚོད་གཉིས་པའི་སྟེང་དུ་མཇལ་ཆོག་ཟེར་ཞོར་དུ་ལག་འཇུ་ཞིག་བྱས་དེ་ང་རང་གི་ལས་འཛིན་ཤོག་བྱང་དེ་འཕྲུལ་ཆས་ཐོ་འགོད་ཡོད་སར་ལས་མཚམས་བཞག་པའི་ཐོ་འགོད་བྱས་ཚར་རྗེས་སུ་ཕྱིར་རང་གི་བསྡོད་གནས་སུ་ལོག་བཞིན་པའི་སྐབས་དེར་གངས་མཚོ་ལ་ཁ་པར་བཏང་ནས་ཉིན་བཀང་གི་ལས་དོན་སོགས་བཤད་དེ་ཕན་ཚུན་ལ་དགོང་མོ་བདེ་ལེགས་བཞག་ནས་ཁ་པར་གྱི་སྒོ་བརྒྱབ་པ་ཡིན། ནང་དུ་འབྱོར་ནས་རང་ཉིད་ཀྱིས་ཁ་སང་གངས་མཚོའི་ཨ་མའི་གྲོགས་མོ་དང་གྲོགས་པོ་རེ་ཟུང་ཞིག་ལ་བོད་ཟས་ཤིག་བཟོས་པ་དེའི་ལྷག་འཕྲོ་འཐེན་ཐུག་བརྔོས་མ་ཞིག་འཁུར་ནས་ཡོང་ཡོད་པ་དེ་ཚ་བོ་བཟོས་དེ་རང་ཉིད་གཅིག་བུས་ཁང་བ་ཆུང་ཆུང་ནང་ནས་ཁུ་སིམ་མེར་ཟོས་ཚར་རྗེས་སུ་ཉལ་སའི་ནང་དུ་འཛུལ་ནས་ཞོ་འགྱིག་སྣོད་ཆུང་ཆུང་འཐུང་ཞོར། ང་རང་ལ་དངོས་ནས་མགྲོན་ཁང་བརྫིག་པོ་དེ་ཡི་ནང་དུ་ལས་ཀ་རེག་པ་ཡིན་ནམ་སྙམ་ནས་སྟོང་འདང་གི་བསམ་བློའི་རྨི་ལམ་ཞིག་ཀྱང་གཏོང་དགོས་བྱུང་། ཨོ་རེད། ང་རང་ལ་ཆུ་ཚོད་གཅིག་གི་ནང་དུ་ལས་གླ་ཤིས་དཀར་ཉི་ཤུ་དང་ཟུར་ཆ་གཅིག་རེག་གི་ཡོད་པ་རེད། དེ་ནི་ཧིན་སྒོར་དུ་འཁུགས་ན་ཉིས་བརྒྱ་བཞི་བཅུ་ལྷག་ཞིག་རེད་འདུག ད་ནི་ལས་ཀ་འདི་ནི་ཉིན་རེ་ལ་ཆ་སྙོམས་ཀྱི་ཆུ་ཚོད་བརྒྱད་ལ་བྱས་པ་ཡིན་ན་ནི། ང་རང་ལ་ཤིས་དཀར་བརྒྱ་དང་བདུན་བཅུ་མ་ཟིན་ཙམ་ཞིག་རེག་གི་ཡོད་པ་རེད། དེ་ནི་ཧིན་སྒོར་ལ་འཁུགས་ན་ཉིས་སྟོང་ཙམ་རེད། ལས་ཀ་འདི་རྒྱུན་ལྡན་ཆགས་སོང་བ་ཡིན་ན་ནི་དངོས་ནས་ཡག་པོ་འདུག ང་རང་ལ་གློག་ཀླད་དང་རང་གི་རྩོམ་ཡིག་དང་བརྩམ་སྒྲུང་གི་སྔ་མ་ཡང་ག་ལེར་འབྲི་ཐུབ་ངེས་རེད། གང་ལྟར། བདུན་ཕྲག་གཅིག་གི་རྗེས་སུ་ལས་ཀ་འདི་རྒྱུན་ལྡན་ཆགས་མིན་ཤེས་ངེས་རེད། ཡིན་ཡང་། ལས་ཀ་འདི་མིན་པས་གངས་མཚོའི་གྲོགས་མོ་ཞིག་གིས་ཀྱང་ཟ་ཁང་ཞིག་གི་ནང་དུ་ལས་ཀ་བྱེད་མཁན་མ་བྱན་ཞིག་དགོས་ཀྱི་འདུག་ཟེར། དེ་ཡིན་དུས་ང་རང་ལ་ལས་ཀ་རེག་མི་རེག་ཟེར་བ་དེ་ནི་དཀའ་ལས་མེད་པ་ཆགས་ཡོད། ཡིན་ཡང་། གངས་མཚོ་ལ་བྱིས་པ་ཆགས་ཡོད་སྟབས། མོ་རང་ལ་ནི་ལས་ཀ་སྟབས་བདེ་ཞིག་རེག་མིན་མི་ཤེས་ཀྱང་། ང་རང་གི་ལས་ཀ་འདི་རྒྱུན་ལྡན་ཆགས་དེ་བསྡད་པ་ཡིན་ན་ནི། ངེད་གཉིས་ལ་གསོག་རྒྱུ་དང་བེད་སྤྱོད་བྱེད་རྒྱུ་གཉིས་ཀ་འདུག་ཨང་སྙམ་བཞིན། གློག་ཀླད་ནང་ནས་བརྙན་འཕྲིན་ཞིག་ལ་བལྟ་འགོ་བཙུགས། ༢༥།༡།༠༩
མུ་འགོད།
ལས་ཀ་རག་པ་ཡག་པོ་རེད།