གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་བདུན།

གཟའ་པ་སངས་ཀྱི་གུང་གསེང་དུ་གཉིད་སྐྱིད་པོ་ཞིག་ཁུགས་ནས་བསྡད་ཡོད་ཁུལ་ཡིན་མོད། ཆུ་ཚོད་བཅུ་བ་ཡོལ་ནས་ཡར་བླངས་དུས། སྐེ་འགུལ་ལྕོགས་ཕྱོགས་གཅིག་མ་གཏོགས་རྒྱགས་མི་ཐུབ་པ་ཞིག་ཆགས་འདུག དེ་དུས་འོག་ཁང་དུ་ཡོང་ནས་མཛའ་མོ་ལ་དེ་ཡི་སྐོར་བཤད་པ་ན། ཁོ་མོ་ཧང་སངས་ཞོར་དུ། སྨན་ཁང་དུ་སོང་ན་ཟེར། ངས་དགོས་པ་མ་རེད། མྱེལ་འགོ་མ་བདེ་བ་འདྲ། ཕྱི་དྲོ་བར་དུ་ཕལ་ཆེར་དྲགས་བསྐྱེད་ཡོང་ངེས་སྙམ། ཁྱེད་རང་ཁྲོམ་དུ་འགྲོ་དགོས་ན་སོང་། ཕྱི་དྲོ་ང་ཚོ་ཁྱེད་རང་གི་ཨ་ཅེ་ཡི་ནང་དུ་ཁྱེད་རང་གི་སྐྱེ་སྐར་གྱི་ཆེད་དུ་འཛོམས་དགོས་ཀྱི་ཡོད་པ་མ་ཡིན་ནམ། ཁྱེད་རང་ཁྲོམ་དུ་སོང་ནས་དེ་ཡི་ཆེད་དུ་ཉོ་དགོས་པ་འདྲ་ཡོད་ན་ཉོས་ནས་ཤོག་ཞེས་བཤད་དུས། ཁོ་མོས་ཀྱང་ཉོ་དགོས་པ་ཁ་ཤས་ཤིག་ཡོད་ཟེར་ནས་བུ་མོ་ཁྲིད། རྒྱབ་ཁུགས་འཁུར། གྲོད་ཁོག་ཆེན་པོ་སྔུན་དུ་འདྲུད་ནས། སྐེས་འཛེགས་སྟེང་ནས་མར་བབས་ནས་འགྲོ་བ་དེར་བལྟ་བའི་ཚེ་ན། དངོས་ནས་སེམས་གཏིང་ནས་སྙིང་རྗེ་ནི་ཞིག་རེད། གྲོད་ཁོག་དེ་འདྲའི་ཆེན་པོ་ཞིག་ཡོད་ཀྱང་། ད་དུང་། ལོ་ན་གཉིས་ལ་སོན་མ་ཐག་པའི་བུ་མོ་ཐར་མ་མཚོ་ཁྲིད་ནས་འགྲོ་དགོས་པ་དང་། རྒྱབ་ཁུགས་ཀྱང་འཁུར་ནས་འགྲོ་དགོས་དུས། ངས་རོགས་ཤིག་བྱེད་དགོས་ངེས་ཡིན་མོད། ང་རང་གིས་ངལ་ཞིག་མི་གསོ་ཐབས་མེད་ཆགས་ནས་ཡོད།

ཕྱི་དྲོ་མོ་རང་གི་བཟོས་པའི་ཀ་ར་གོ་རེ་དང་སྒོར་སྤོར་བསྡུ་གསོག་བརྒྱབས་ནས་ངེད་གསུམ་རྗོ་སུ་ལམ་ནས་མོ་རང་གི་ཨ་ཅེ་ཡི་ནང་དུ་ལམ་ལ་བུད། ལམ་གྱི་རིང་ཐུང་ནི་རླངས་འཁོར་ནང་དུ་ཆུ་ཚོད་གཅིག་ཙམ་འགྲོ་དགོས་ཀྱི་ཡོད། ངེད་གསུམ་དེར་སླེབས་དུས། ངེད་གསུམ་ནང་མི་ལྷན་འཛོམས་ཁྲོད་ཀྱི་གཞུག་མ་དེ་ཆགས་འདུག ཨོ་རེད། ནང་མི་ལྷན་འཛོམས་ཟེར་ནཡང་། མོ་རང་གི་ཕ་རྒན་ནི་ལྷན་འཛོམས་འདི་འདྲ་ཆེས་མང་བོ་ཞིག་ལ་ཡོང་ཐུབ་ཀྱི་མེད། ཡོང་འདོད་མེད་པས་མིན། མོ་རང་གི་ཕུ་བོའི་རྒན་མོ་དང་ལྷན་དུ་ཁ་བསྲེ་མེད་པར་ལོ་ངོ་ཁ་ཤས་ཤིག་སོང་ཡོད་པ་རེད། རྒྱུ་མཚན་དངོས་ནས་དེ་བཤད་མི་ཤེས་ཀྱང་། ཕར་བལྟས་ཚོད་ཀྱི་ཕུ་བོའི་རྒན་མོ་ནི། རང་གཤིས་ཚ་དྲགས་པའི་རིགས་ཀྱི་བུད་མེད་ཅིག་དང་། གཞན་ལ་ཕར་དང་བོ་བྱས་ནས་བརྩི་བཀུར་དང་མཐོང་ཆེན་བྱེད་པ་ལས། གཞན་གྱིས་རང་ཉིད་ཚུར་ཐོག་མར་གུས་བཀུར་དང་ངོ་བསྟོད་བྱེད་པར་སྒུག་ནས་བསྡོད་མཁན་གྱི་གྲངས་ཀྱི་བུད་མེད་ཅིག་ཡིན་དུས། ཁོ་མོ་ལ་ཐད་ཀར་སྐད་ཆ་བཤད་འཕོད་མཁན་གྱི་མི་དེ་ཡི་རིགས་ནི་ཁོ་མོ་དང་ག་ལེར་ཁ་བསྲེ་མེད་པར་འགྲོ་མཁན་གྱི་གྲངས་ཤིག་ཡིན་ཟེར་ན་འགྲིག་གི་ཡོད།

མོ་རང་གི་ཕུ་བོ་བཟའ་མི་གཉིས་ལ་བྱིས་པ་གསུམ་ཡོད་པའི་ནང་གི་གཉིས་བུ་མོ་ཡིན། བུ་མོ་གཉིས་ཀ་ནི་རྒྱལ་ཁབ་འདིའི་ནང་གི་བྱིས་པ་གཞན་དག་དང་འདྲ་བོ་ཡིན། ཀླད་པ་དང་སེམས་ཁམས་ལ་སྐྱོན་ཡོད་མཁན་དེ་འདྲ་མིན། བུ་ནི་ཅུང་ཙམ་ཀླད་པ་དང་སེམས་པར་སྐྱོན་ཤོར་བའི་གྲངས་ཤིག་ཡིན་དུས། སྐད་ཆ་ཡར་བཤད་མར་བཤད་དང་། ནང་ནས་ཡར་རྒྱུགས་མར་རྒྱུགས། ལག་པ་གང་ས་གང་དུ་སླེབས་ནས་གང་སར་རེག་ནས་བལྟ་ཚོད་དགོས་པའི་བུ་ཞིག་ཡིན་དུས། ཁོ་བོ་ཡོད་ས་རུ་ཧུར་ཟིང་ཆེན་པོ་ཡོད་པ་ཡིན། མི་གསར་བ་ཞིག་གིས་ཁོ་རང་མཐོང་བ་ཡིན་ན་དངོས་ནས་སྟབས་མ་བདེ་བ་ཡོང་ཁོ་ཐག་ཡིན་ངེས། ང་རང་ནི་ཁོ་རང་གིས་གང་བྱེད་སྲིད་པ་དང་གང་བཤད་སྲིད་པ་དག་ལ་གོམ་ནས་ཡོད་དུས། ཁོ་རང་གིས་ག་རེ་བྱས་ཀྱང་སྣང་མེད་ལྟ་བུ་ཆགས་ཡོད།

ང་རང་གི་སྐེ་འགུལ་བསྐྱོད་ཡག་པོ་བྱེད་ཐུབ་ཀྱི་མེད་དུས། མོ་རང་གིས་ཨ་ཅེ་དང་ཕུ་བོ་སོགས་ལ་རོགས་པ་གང་ཡང་བྱེད་མ་ཐུབ་པར་རྐུབས་སྟེགས་སྙི་མོ་རིང་བོ་ཞིག་ཡོད་པ་དེ་ཡི་སྟེང་ནས་ཟ་མ་ཟ་བར་སྒུག་ནས་བསྡད། ཞོར་དུ་མོ་རང་གི་སྐྱེ་སྐར་ལ་ཕ་རྒན་གྱིས་གསར་དུ་ལག་སྐྱེས་སུ་ཉོས་པའི་བརྙན་འཕྲིན་འཕྲུལ་ཆས་དེ་ཡི་ནང་ནས་ནང་མི་དག་གིས་ག་རེ་བྱེད་ཀྱི་ཡོད་མེད་བསྐོར་ལ་བརྙན་འཕྲིན་ཐུང་ཐུང་ཁ་ཤས་ཤིག་བརྙན་དུ་བླངས་རྗེས། ལོ་ན་གྱ་བརྒྱད་ལ་སོན་པའི་མོ་རང་གི་ཨ་མ་རྒན་མོ་དང་མཉམ་དུ་ཁ་བརྡ་ཞིག་བྱས། མོ་རང་གིས་ང་རང་ལ་དུས་རྒྱུན་དུ་བཤད་པའི་སྐད་ཆ་དེ་དག་ལ་ཉན། ཁྱེད་རང་གིས་བཟོས་པའི་ཟ་མ་ནི་ཞིམ་ཤོས་རེད། ཁྱེད་ཚོའི་ནང་དུ་ག་དུས་སླེབས་ན། དེ་དུས་དངོས་ནས་སྐྱིད་པོ་འདུག་གསུངས་སོང་།

ཨ་མ་རྒན་མོ་ལ་གཉོར་སྐྱོང་བྱེད་མཁན་གྱི་ཝས་ལས་ཕེན་གྱི་བུད་མེད་གཟུགས་པོ་ཆུང་ཆུང་སྙིང་རྗེ་མོ་དེས། ངའི་འགྲམ་དུ་ཡོང་ནས་འཚམ་འདྲི་ཞིག་བྱས་པ་དང་། ང་རང་གི་སྐེ་ན་བ་དེར་སྨན་ཞིག་ནང་དུ་ཡོད་རབས་བཤད་སོང་། ཁོ་མོ་ནི་ཨ་མ་རྒན་མོའི་མཉམ་དུ་ལས་ཀ་བྱས་ནས་ཟླ་ངོ་ཁ་ཤས་ཤིག་ལས་སོང་མེད་ཀྱང་། གདོང་གི་དབྱིབས་དང་ཆུང་ནས་གོམ་ཕྱོགས་ཤིག་ནས་ཁོ་མོ་ང་ཚོའི་ནང་དུ་ཡོང་ཐེངས་རེར། ཁོ་མོ་ང་དང་ལྷན་དུ་ཁ་བརྡ་ཐུང་ཐུང་རེ་བྱེད་པར་དགའ་བོ་བྱེད་ཀྱི་འདུག ལྷག་པར་དུ། ངའི་བུ་མོ་ཐར་མ་མཚོ་ལ་རྩེད་མོ་རྩེད་རོགས་བྱེད་པར་ཁོ་མོ་དངོས་ནས་དགའ་བོ་འདུག་པ་མ་ཟད། ངའི་བུ་མོས་ཀྱང་ཁོ་མོར་དགའ་བོ་བྱེད་ཀྱི་ཡོད། མཚམས་རེར་སྲང་ལམ་ནས་ཤར་ཕྱོགས་པའི་བུད་མེད་རེ་མཐོང་ཐེངས་རེར། རྗོ་བས། རྗོ་བས་ཟེར་ནས་ཁོ་མོའི་མིང་གི་འབོད་ངེས་ཡིན།

ཁོང་ཚོས་གཞི་ནས་ཟ་མ་གྲྭ་སྒྲིག་ཟིན། ཅོག་རྩེ་སྟེང་དུ་ལུག་ཤ་རྩིབ་བསྲེགས་དང་བྱ་ཤ་བསྲེགས་མ། གླང་ཤ་སྣུམ་བསྲེག  ཞོ་ཁོག་བསྲེག་མ། གྲང་ཚལ། ང་རང་ལ་ཆེད་དུ་མོ་རང་གི་ཨ་ཅེ་ཡིས་ཤ་མེད་སྔོ་ཚལ་དང་ཐུག་པ་དཀྲུགས་མ་ཞིག་བཟོས་འདུག ཡིན་ཡང་། ཅོག་རྩེ་སྒང་དུ་བཞག་ཚར་རྗེས་སུ། དེ་ཟ་མཁན་ནི་ཚང་མ་ཡིན། ང་ཚོས་ཟ་མ་ཟོས་ཚར་དུས་སུ་ཕྱི་དྲོ་ཆགས་འདུག ཕྱི་རྒྱལ་བའི་ལུགས་སྲོལ་ལྟར་དུ། སྒོང་སྤོར་ཆུང་ཆུང་ཞིག་གི་སྟེང་དུ་ལ་སྒྲོན་ཞིག་སྒྲོན་ནས། མོ་རང་གི་སྐྱེ་སྐར་ལ་གླུ་དབྱངས་ལེན་པའི་འགོ་བཙུགས་སོང་། དངོས་ནས་ཡིན་ན་སྐབས་འདི་ལ་ལག་སྐྱེས་སྟེར་སྲོལ་ཡོད་པ་ཡིན་མོད། ངས་མོ་རང་གི་སྐྱེ་སྐར་ཏག་ཏག་གི་ཉིན་མོའི་ཞོགས་པ་དེར་དེབ་གསུམ་དང་རྒྱབ་ཁུགས་གསར་བ་ཞིག  ང་རང་ལས་ཀ་འགྲོ་བའི་ཞོགས་པ་སྔ་མོ་དེར། མོ་རང་གི་མྱེལ་འགོའི་འགྲམ་དུ་བཞག་ཚར་བ་ཡིན་དུས། ད་ནི་ཁོང་ཚོ་ལ་བལྟས་དེ་འདུག་རྒྱུ་དེ་ཡིན།

ང་རང་སྒོའི་ཕྱི་ལ་བུད་ནས་གྲོགས་པོ་བུ་ཆུང་ལ་ཁ་པར་བཏང་ནས། སང་ཞོགས་ངེད་གཉིས་སྔ་བོ་ནས་བློ་དོན་གྱི་ཁང་བ་སྤོར་རོགས་བྱེད་དུ་འགྲོ་དགོས་དུས། {རྒྱལ་ཁབ་འདི་ནས། གཟའ་པ་སངས་ཀྱི་ཕྱི་དྲོ་ནས་གཟའ་སྤེན་པའི་ཕྱི་དྲོ། ཆུ་ཚོད་ཉེར་བཞིའི་རིང་དུ་གཞུང་གི་རླངས་འཁོར་ཚང་མ་འགྲིམ་འགྲུལ་བྱེད་ཀྱི་མེད་པ་ཡིན། }ངས་ཁོ་རང་ལ་ང་རང་རྗོ་སུ་ལམ་དུ་སླེབས་ན་ང་རང་ལེན་དུ་ཡོང་རོགས་ཞེས་བཤད་པ་ལྟར། ཁོས་ཀྱང་དེ་སྟབས་བདེ་བོ་རེད། ཁྱེད་རང་ངའི་ནང་དུ་ཡོང་། དེ་ནས་ཞོགས་པ་སྔ་བོ་ངེད་གཉིས་མཉམ་དུ་གྲོགས་པོ་བློ་དོན་གྱི་ཁང་བ་སྤོར་རོགས་དུ་སོང་ན་འགྲིག་གི་འདུག་ཟེར།

ནང་དུ་སླེབས་པར་སྐར་མ་བཅུ་དང་བཅོ་ལྔའི་བར་མ་གཏོགས་མེད་དུས་སུ། ངས་གྲོགས་པོ་བུ་ཆུང་ལ་ཁ་པར་བཏང་ནས་ང་རང་ལེན་དུ་ཡོང་རོགས་ཟེར་ནས་བཤད་པ་ལྟར། ང་རང་ནང་དུ་སླེབས་ནས་གཙང་སྤྱོད་དུ་གཅིན་པ་ཞིག་གཏོང་བཞིན་ཡོད་དུས། ཁ་པར་ཞིག་སླེབས་སོང་། ཁ་པར་ནང་གི་མིང་ལ་བལྟས་དུས་བུ་ཆུང་རེད་འདུག ཨ་རོགས་ཞེས་ཡར་བཀྱགས་པ་ན། ལན་རྒྱགས་མཁན་ནི་བུ་ཆུང་གི་དགའ་བོ་ཆོས་སྒྲོན་རེད་འདུག ཁོ་མོས་ང་ཚོ་སྐར་མ་ལྔ་ཡི་རྗེས་ཏག་ཏག་ལ་ཁྱེད་རང་གི་ནང་དུ་སླེབས་ཀྱི་རེད། གྲྭ་སྒྲིག་བྱོས་ཟེར། ངས་ཁོ་མོའི་སྐད་གོ་བ་དང་མཛའ་མོ་འོག་ཁང་དུ་ཡོད་དུས། མཚན་མོ་འདི་འདྲ་ཞིག་ལ་ང་རང་ཕྱི་ལ་འགྲོ་བཞིན་ཡོད་དུས་བུ་མོ་ཞིག་གི་སྐད་གོ་ན་བདེ་བོ་མི་འདུག་བསམ་ནས། མགྱོགས་པོ་ཡ་ཡ་ཞེས་ཁ་པར་གྱི་སྒོ་བརྒྱབས། འོག་ཁང་དུ་ཡོང་ནས་མཛའ་མོ་ལ། བུ་ཆུང་ཁོ་རང་སླེབས་འདུག  ད་ལྟ་རང་ཁ་པར་འབྱོར་སོང་། ང་འགྲོ་རྒྱུ་ཡིན། བདེ་མོ་བྱོས་ཟེར་ནས་རྒྱབ་ཁུག་ནང་དུ་སོ་དཀྲུས་དང་བརྗེ་བོ་རྒྱགས་རྒྱུའི་གོན་པ་ཁ་ཤས་ཤིག་བསྡུས།

ཁོ་མོ་ཅུང་ཙམ་སྐྱོ་བའི་རྣམ་པ་འདུག  རྒྱུ་མཚན་ནི་ང་རང་གི་སྐེ་ན་བཞིན་ཡོད་ན་ཡང་། ད་དུང་། ཁང་བ་སྤོར་རོགས་བྱེད་དུ་འགྲོ་བ་དེར་མོ་རང་གིས་སེམས་ཁྲལ་གནང་གི་ཡོད་པ་དེ་ངས་ཤེས་ཀྱི་ཡོད། ངས་ཀྱང་རང་གི་སྐེ་སང་ཉིན་ཇེ་བཟང་དུ་འགྲོ་བར་རེ་བ་ཡོད་ལ། དངོས་ནས་ཞོགས་པ་ལས་ཅུང་དྲགས་དུ་བྱིན་འདུག་ཞེས་བཤད་དེ་ཁོ་མོ་འདོད་མོས་ཡོད་མེད་ལ་མ་བལྟས་པར། རང་གི་རོགས་བྱེད་པར་ཟླ་གཅིག་གི་སྔོན་ནས་ཁས་བླངས་པ་དེར་སྒྲུབ་དུ་སོང་།

སྒོ་ཕྱི་ལ་བུད་ནས་ལམ་ཁ་ནས་མར་ཅུང་ཙམ་སོང་བ་ཡིན། དེ་མིན་མོ་རང་གི་ཨ་མ་ནི་ཨ་མ་རྒན་མོ་བསྐྱེལ་དུ་སོང་ནས་ཕྱིར་སླེབས་གྲབས་ཡོད། ཁོང་ཚོ་འདིར་ཡོང་བ་དང་ཁོ་མོའི་མ་རྒན་ནང་དུ་སླེབས་པ་གཉིས་འཕྲད་ཚེ། མ་བསམ་ས་ནས་དོགས་པ་ཞིག་སློང་ངེས་རེད་སྙམ་ནས་རང་ཉིད་འཚབ་ཞོར་དུ། གོམ་པ་མགྱོགས་ཙམ་བླངས་དེ་སོང་། བུ་ཆུང་དང་ཆོས་སྒྲོན། ལྷག་པ་ཁོ་གསུམ་མཉམ་དུ་ཡོང་འདུག བུ་ཆུང་གིས་ང་རང་བསྡོད་ས་ཤེས་ན་ཡང་། ཁོ་མོ་གཉིས་ཀྱི་ང་རང་བསྡོད་ས་གང་རེད་ཅེས་དྲིས་དུས། བུ་ཆུང་གིས་རླངས་འཁོར་གྱི་སྒེའུ་ཁུངས་ནས་ཕར་ཕྱོགས་ཀྱི་ཁང་བ་དེ་རེད་ཅེས་ང་རང་གི་མཛའ་མོའི་མ་རྒན་གྱི་ཁང་བ་དེར་མཛུབ་མོ་བསྟན་དུས། ང་རང་གིས་མཛའ་མོའི་མ་རྒན་དང་གདོང་ཐུག་བརྒྱབས་ཡོང་བསམ་ནས་ཅུང་འཚབ་ན་ཡང་། སྟབས་ལེགས་ནས་སྐབས་དང་འཁེལ་མ་སོང་།

བུ་ཆུང་གི་ནང་དུ་སླེབས་དུས་འཕྱི་བོ་ཆགས་འདུག བུ་ཆུང་ངེད་གཉིས་ཀྱིས་གདོན་འདྲེ་ཡི་གློག་བརྙན་ཞིག་ལ་བལྟས་པ་ན། ཆོས་སྒྲོན་དང་ལྷག་པ་གཉིས་ཉལ་སོང་། ཆོས་སྒྲོན་དང་བུ་ཆུང་གཉིས་མཉམ་དུ་ཉལ་ཁྲི་གཅིག་གི་སྒང་དུ་ཉལ་ཡོད་ལ། ང་རང་ཉལ་གདན་ཞིག་ཐང་དུ་བཏང་ནས་དེ་ཡི་སྟེང་དུ་ཉལ་ས་བཟོས། ལྷག་པ་ཡང་ཉལ་ཁྲི་ཆུང་ཆུང་ཞིག་གི་སྒང་དུ་མོ་རང་གཅིག་བུ་ཉལ། ངས་མུ་མཐུད་དུ་གློག་བརྙན་ལ་བལྟ་རྩིས་བྱས་དུས། ཆོས་སྒྲོན་གྱིས་ང་རང་ལ་ཉལ་ན་ཡག་གི་རེད། སང་ཞོགས་སྔ་བོ་ནས་བློ་དོན་གྱི་ཁང་བ་སྤོར་རོགས་བྱེད་དུ་འགྲོ་དགོས་དུས་མ་ཉལ་ན་དཀའ་ལས་ཁག་གི་རེད་ཟེར། སྐད་ཆ་དེ་ནི་དངོས་ནས་བདེན་པ་རེད། ད་ནི་མ་ཉལ་ན་འགྲིག་གི་མི་འདུག་སྙམ་ནས་ཆུ་ཚོད་ལ་གཅིག་བལྟས་དུས། ཆུ་ཚོད་བཅུ་གཉིས་ཟིན་གྲབས་འདུག ང་ཚོ་ཚང་མ་ཉལ་ས་ནི་ཁང་བ་གཅིག་ཡིན་ན་ཡང་། རྒྱ་གར་རྡ་རམ་ས་ལ། མེག་ལོར་གྱི་མི་རྐྱང་མང་བོ་མཉམ་དུ་ཉལ་སའི་ཁང་བ་དེ་དག་དང་གཏན་ནས་བསྡུར་ཐབས་མེད་ཀི ༢༩།༧།༡༡

མུ་འགོད།