གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་བརྒྱད།

སྔ་བོ་བླངས་ནས་འགྲོ་འདོད་ཡོད་ཀྱང་། དེ་འདྲའི་སྔ་བོ་ཞིག་འགྲོ་མ་ཐུབ་པར། ཆོས་སྒྲོན་དང་བུ་ཆུང་གཉིས་ཀྱིས་ཞོགས་ཇ་ཞིག་བཟོས་པ་དང་། ཆོས་སྒྲོན་གྱིས་བོད་ཇ་ཞིག་བཟོས་འདུག་པ་དེ་ནི་ཡུན་རིང་གི་རྗེས་སུ་རེག་པ་ཞིག་ཡིན། ཞོགས་ཇ་རྒྱགས་ཚད་ཅིག་ཟས་ན་མ་གཏོགས། ཁང་བ་སྤོར་ས་ནས་ང་ཚོ་ལ་ཟ་མ་ཟ་ཁོམ་ཡོད་མེད་གཏན་ནས་མི་ཤེས་ཟེར། བུ་ཆུང་གིས་སྒོ་ང་དཀྲུགས་མ་ཞིག་བཟོས་འདུག དེ་ཡི་མཉམ་དུ་བག་ལེབ། ང་ཚོས་ཞོགས་ཇ་ད་འཐུང་ཞིག་བྱས་རྗེས་སུ་ཀྲེ་ལ་བེས་ཀྱི་ཕྱོགས་སུ་བུ་ཆུང་གི་རླངས་འཁོར་རྙིང་ཀོག་དེ་ཡི་ནང་དུ་སོང་། ལམ་བར་དུ་བུ་ཆུང་གིས་ནམ་རྒྱུན་གྱིས་བསྲེས་སླད་ཅན་གྱི་བོད་སྐད་དེ་བཤད་ཀྱི་ཡོད་ལ། ང་ཚོས་ཀྱང་དེ་ལ་ཉན་ནས་ཡོད། དེ་བས་ཀྱང་ང་རང་གི་སེམས་ནང་དུ་མི་བདེ་བའི་ཚོར་བ་ཞིག་དྲངས་དེ་འོང་བ་ནི། ཆོས་སྒྲོན་དང་ཁོ་གཉིས་ཀྱིས་བར་དུ་མཚམས་རེར་དབྱིད་སྐད་རྒྱགས་པ་དང་སྐབས་རེར་རྒྱལ་ཁབ་འདིའི་སྐད་ཆ་བཤད་དུས་སུ། ངའི་སེམས་པ་ལ་ན་ཟུག་བཏང་བ་མ་ཟད། བོད་ཀྱི་མ་འོངས་གཞོན་སྐྱེས་དག་ཕྱི་རྒྱལ་ཁག་ནས་འདི་ལྟར་ཚར་རྒྱུ་ཡིན་ནམ་སྙམ་ནས་སེམས་པ་སྐྱོ་ན་ཡང་། སྐྱོ་བའི་གཏམ་དང་སྙིང་གི་ཟུག་འདི་ཁོ་གཉིས་ལ་བཤད་ཀྱང་ནུས་པ་མི་ཐོན་པ་བདག་གིས་སྔ་ནས་ཤེས་ཡོད།

བུ་ཆུང་གིས་ཆོས་སྒྲོན་དང་ལྷག་པ་གཉིས་མཚོ་འགྲམ་དུ་བསྐྱལ། ཆོས་སྒྲོན་གྱིས་སྒེའུ་ཁུངས་ཀྱི་འགྲམ་དུ་ཡོང་ནས་ཁོ་ལ་བདེ་མོ་བྱོས་ཟེར་ནས་དབྱིན་སྐད་ཀྱི་ཚིག་བཤད་ཞོར་དུ། ཁོ་རང་ལ་འོ་ཞིག་བྱས།  ང་ནི་དངོས་ནས་སྐད་ཡིག་དང་མི་རིགས་ཀྱི་དར་རྒུད་ལ་གསང་མྱུལ་བྱེད་མཁན་ལྟ་བུ་ཞིག་ཆགས་ཡོད་དུས། ངས་ཁོ་གཉིས་ཀྱིས་བྱེད་སྟངས་དེ་ནི་དངོས་ནས་ལྷད་མེད་ཀྱི་བརྩེ་བ་དང་དུངས་ཞེན་གྱི་འདང་བརྩེ་ཞིག་ཡིན་པར་རེ་སྨོན་བྱེད་པ་ལས། ཕར་ཕྱོགས་ཀྱི་གནས་ཚུལ་ཆེས་མི་ཉུང་བ་ཞིག་ང་རང་གི་མི་ཚེ་མིན་དུས། ངས་འདི་ནས་གླེང་བར་མི་རུང་བ་ཡིན་པར་སྙམ་ནས་ག་ལེར་བཞག་ཡོད། ཆོས་སྒྲོན་དང་ལྷག་པ་གཉིས་ཀྱིས་ལག་པ་གཡུགས་ཞོར་དུ་མཚོ་འགྲམ་དུ་བུད་སོང་། ངེད་གཉིས་བློ་དོན་གྱི་ཁང་བ་སྤོར་སའི་ཕྱོགས་སུ་བསྐྱོད་ཀྱིན་པའི་སྐབས་ཏག་ཏག་ལ། བུ་ཆུང་གིས་ཁོ་རང་གིས་གཟའ་འཁོར་སྔོན་མའི་གཟའ་མཇུག་གི་གུང་གསེང་གི་གཏམ་རྒྱུད་འཁྲིགས་པོ་དེ་བཤད་དུས། གནམ་འོག་འདིའི་ན་གཞོན་དག་གིས་དངོས་ནས་གང་ཞིག་འཚོལ་བཞིན་ཡོད་དམ་སྙམ་ནས་རྗེས་ལ་རྟགས་ཅན་གྱི་ཐ་མག་ཞིག་ལ་མེ་བསྒོས་དུས། བུ་ཆུང་ལ་གིས་ཁོ་རང་ལ་གཅིག་སྤྲོད་དང་ཟེར།

ངེད་གཉིས་ཀྱིས་བསམ་བློའི་ནང་དུ། བློ་དོན་གྱིས་ཅ་དངོས་ཚང་མ་བསྡུ་གསོག་སྔ་ས་ནས་བརྒྱབས་ཡོད་བཞག་གིས་ཁོ་རང་གི་ནང་དུ་འབྱོར་དུས། དེ་ནི་ངེད་གཉིས་ཀྱིས་རང་གི་བྱེད་ཕྱོགས་ཤིག་ཁོ་ན་ལ་བསམ་བློ་བཏང་བ་ཞིག་ཡིན་པ་མིག་གི་ལམ་དུ་བཤམས། གང་ལྟར། རོགས་བྱེད་དུ་ཡོང་བ་ཡིན་དུས། རོགས་གང་བྱེད་དགོས་པ་དེ་བྱེད་དགོས་པ་ཡིན། རོགས་བྱེད་པའི་འགོ་བཙུགས། ཅ་དངོས་གང་བསྡུ་གསོག་བྱས་ཡོད་པ་དེ་དག་ཅ་དངོས་བོར་འདྲེན་བྱེད་པའི་རླངས་འཁོར་ཆེན་པོ་དེ་ཡི་ནང་དུ་བསྐྱལ། གཅིག་གཅིག་གཉིས་གཉིས་བྱས་ནས་ནང་དུ་བླུགས་དེ་འོང་གི་ཡོད་དུས བློ་དོན་གྱིས་དབུགས་རིང་འཐེན་ཞོར་དུ། ཅ་དངོས་རྙིང་ཀོག་ཆེས་མི་ཉུང་བ་ཞིག་ལ་མཛུབ་མོ་འཛུགས་ཀྱིན། ཕར་ཕྱོགས་ཀྱི་ཅ་དངོས་དེ་དག་ཚང་མ་ཡང་དེ་རིང་འཁུར་དགོས་པ་རེད། ཁ་སང་བར་དུ་དེ་དག་འཁུར་དགོས་པ་ཞིག་བཤད་མེད། ཁ་སང་ཡོང་ནས་དེ་དག་ཡང་ངེད་གཉིས་ཀྱི་ཅ་དངོས་དང་མཉམ་དུ་འགྲོ་དགོས་པ་རེད་ཟེར། མིན་ཟེར་རྒྱུ་རེད། རྒན་མོའི་ཕུ་བོའི་རེད། ཡིན་ཟེར་རྒྱུ་རེད། དངོས་ནས་ཁག་པོ་འདུག་ཟེར།

ཡར་མར་གང་ལ་དེད་ཀྱང་། ཁོ་རང་ལ་ཡང་ཐབས་ཤེས་མེད་པ་ཡིན་དུས། ང་ཚོས་ཁོ་རང་གི་རྒན་མོའི་ཕུ་བོ་ཡི་ཅ་དངོས་རྙིང་ཀོག་མི་རབས་ཤིག་གི་གཏམ་རྒྱུད་ཀྱི་དེབ་དང་ཅོག་རྩེ། ཤིང་སྒམ་རྙིང་ཀོག རྐུབ་སྟེགས་རྙིང་ཀོག དངོས་ནས་བེད་སྤྱོད་མེད་པ་དེ་དག་འཁུར་རོགས་བྱས་དུས། དེ་ནི་ཁོ་རང་གི་ཕ་མ་དག་གིས་ཤུལ་བཞག་ཡིན་དུས་གཟབ་པར་འཚལ་ཞེས་སྐད་ཆ་ཡག་པོ་དང་གུས་པ་ཡོད་པའི་སྒོ་ནས་མི་བཤད་པར། ངར་ཤུགས་དང་ལྡན་པའི་སྒོ་ནས་འཐོར་ཟིན་པའི་རྙིང་ཀོག་གི་ཤིང་སྒམ་དེ་ང་ཚོས་གཟབ་པར་མ་བྱས་པར་ཁྲོ་བའི་རྣམ་འགྱུར་བསྟན་དུས། ང་ནི་དངོས་ནས་འཇིག་རྟེན་ན་བསམ་ཤེས་ཟེར་ན་རེད། རང་ཉིད་གཙོ་བོར་འཛིན་པའི་བསམ་བློ་འདི་ཡི་དབང་དུ་སྒྱུར་བའི་བྱེད་སྟངས་འདི་ནི་དངོས་ནས་མིའི་སྤྱི་ཚོགས་ཀྱི་དུག་མདའ་ཞིག་ཡིན་པ་ཤེས་སུ་བཅུགས་སོང་།

གང་ལྟར། ང་དང་བུ་ཆུང་། ཅུང་མ་འགོར་བར་གྲོགས་པོ་རྡོར་རྒྱལ་ཡང་སླེབས་ནས་རོགས་བྱས། ངེད་ཅག་ཚང་མ་རིགས་གཅིག་པའི་སྙིང་གི་གྲོགས་པོ་བློ་དོན་གྱི་ཆེད་དུ་ཟེར་ན་རེད། ཁོ་རང་གི་ནང་མིའི་ཁང་བ་སྤོར་རོགས་བྱེད་དུ་ཡོང་བ་ཡིན་དུས། ངེད་ཅག་གིས་རང་རང་གི་གང་ཐུབ་པ་དང་གང་ཤེས་པ་དེ་དག  ཆེས་ཚ་བ་ཆེ་བའི་ཉིན་མོ་འདི་ལ་ལུས་ཀྱི་རྔུལ་ཆུ་ལག་པས་གཞུ་ཞོར་དང་། ཆུ་ཁམ་པུ་ཁ་ཤས་རེ་འཐུང་ཞོར། ཉན་ན་མི་འདོད་པའི་སྐད་ཆ་ཆེས་མི་ཉུང་བ་ཞིག་ལ་ཉན་ཞོར། ཞོགས་པ་ཆུ་ཚོད་དགུ་བ་ནས་ཉིན་རྒྱབ་ཆུ་ཚོད་དང་བོ་བར་དུ་ཅ་དངོས་ཚང་མ་རླངས་འཁོར་ནང་དུ་བླུགས་ཚར་ནས། སྤོར་ཡུལ་གྱི་ས་ཆ་དེར་ཅ་དངོས་དེ་དག་ལེན་རོགས་བྱེད་པར་མི་དངོས་ནས་དགོས་འཁོ་ཡོད་དུས། གྲོགས་པོ་རྡོར་རྒྱལ་མ་གཏོགས། བུ་ཆུང་ངེད་གཉིས་འགྲོ་རྒྱུ་གཏན་འཁེལ་ནས་ཡོད། མ་བསམ་ས་ནས་ཁོང་ཚོས་ངེད་གཉིས་ཕྱིར་ཡོང་དུས་སུ། ཅ་དངོས་འདྲུད་བྱེད་ཀྱི་རླངས་འཁོར་ནང་དུ་ཁ་ལོ་བ་བརྩིས་པའི་མི་གསུམ་མ་གཏོགས་མི་གཤོང་བར་བཤད་ནས། ང་རང་མ་སོང་ན་འགྲིག་ཚུལ་བཤད།

དེ་དུས་དངོས་ནས་ང་རང་གི་ངལ་ཞིག་གསོས་དགོས་རན་ཡིན་ན་ཡང་། བུ་ཆུང་དང་བློ་དོན་གཉིས། ད་དུང་ཁོ་རང་གི་རྒན་མོའི་ཕུ་བོ་བཅས་ཀྱི་ཅ་དངོས་དེ་དག་བོར་ཐུབ་ཀྱང་། མི་མང་བོ་དགོས་པ་དེ་ནི་ཤེས་པ་དང་བུ་ཆུང་དང་བློ་དོན་གཉིས་ཀྱིས་ཀྱང་ང་རང་མཉམ་དུ་ཡོད་ན་བསམ་གྱི་ཡོད་དུས། བློ་དོན་གྱིས་ཁོ་རང་གི་རྒན་མོའི་ཅི་བསམ་དང་ཅི་བཤད་ལ་མ་བལྟས་པར། ཁོས་ངས་ཁོ་གཉིས་ཕྱིར་ང་རང་གི་རླངས་འཁོར་དུ་བསྐྱལ་ན་འགྲིག་གི་རེད། ངས་བསྐྱལ་ཆོག་ཟེར་ནས་ཁོ་རང་གིས་སྤོབས་པ་ཡོད་པའི་སྒོ་ནས་བཤད་དུས། རྒན་མོས་ཀྱང་དེ་ལ་མི་འདོད་པའི་རྣམ་འགྱུར་དང་མ་རེད་ཅེས་གང་ཡང་མ་བཤད་པར། དེ་ན་ཁྱེད་རང་གིས་བལྟས་ཟེར།

ཡར་ལམ་དུ་ང་དང་བུ་ཆུང་། བློ་དོན་གྱི་རྒན་མོའི་རླངས་འཁོར་བཏང་ནས་དེ་ཡི་ནང་དུ་བུ་མོ་ཆེ་ཆུང་གཉིས་དང་ངེད་བཞི་བོ་ཅ་དངོས་མི་ཉུང་བ་ཞིག་གི་མཉམ་དུ་སོང་། སྤྱིར་ཁོང་བཟའ་མི་གཉིས་བསྡོད་ས་ནི་ཀྲེ་ལ་བས་འགྲམ་གྱི་ཝ་མར་རྒན་ཟེར་བའི་གྲོང་ཁྱེར་དང་འདབས་འདྲེས་ཀྱི་གྲོང་བརྡལ་ཡིན་ལ། ཁང་བ་དེ་ནི་ཁོ་རང་གི་རྒན་མོའི་ཕ་མ་ཉེ་རིང་ལ་དབང་བ་ཞིག་ཡིན་པ་དེ་ཉེ་མི་རེ་ཟུང་ཞིག་གི་མིང་ཐོག་དུ་ཡོད་པ་ཚོང་སྟབས། ཁོ་གཉིས་གནས་གཞན་དུ་མི་སྤོ་ཐབས་མེད་ཡིན་དུས། ད་ནི་ཀྲེ་ལ་བས་ནས་རླངས་འཁོར་གྱི་ཆུ་ཚོད་གཉིས་དང་ཕྱེད་ཀའི་བར་མཚམས་ཀྱི་གྲོང་གསེབ་ཞིག་ལ་བསྡོད་གནས་རེ་ཞིག་རིང་གཏན་འཁེལ་བར་བཤད།

བསྡོད་གནས་གསར་བ་འདི་ནི་རྒྱལ་ཁབ་འདིའི་ནུབ་ཕྱོགས། ཁྱིམ་མཚེས་རྒྱལ་ཁབ་ལེས་སྤེས་མེན་ལ་ཐག་ཉེ་བོ་ཡོད་པ་ཞིག་རེད་འདུག ཡིན་ཡང་། ཁོར་ཡུག་དངོས་ནས་བལྟས་ཙམ་གྱིས་སྐྱིད་སྣང་དོད་པོ་ཞིག་འདུག འབྲོག་པ་ཞིག་དང་བོད་ཡུལ་ནས་ཡོང་བའི་མི་ཞིག་ཡིན་ན། རི་མཐོ་ས་གཙང་ལ་དགའ་བ་ལྟར། རི་མགོ་མཐོ་ས་འདི་ནས་གྲོགས་པོ་བློ་དོན་གྱིས་རང་གི་ཕ་ཡུལ་བོད་ཡང་ཡང་དྲན་མི་སྲིད་པ་མ་རེད། ཁ་ཁུ་སིམ་ཞིང་། མཐའ་སྐོར་ཡོངས་རྫོགས་སྔོ་ལྗང་གི་བཀང་ནས་འདུག ཁོ་གཉིས་སྤོར་སའི་འགྲམ་དུ་བོད་པ་གཞན་ཞིག་ཡོད་ལ། ཁོ་བོའི་མིང་དུ་དོན་འགྲུབ་ཟེར་གྱི་ཡོད། ང་རང་རྒྱལ་ཁབ་འདིར་སླེབས་ནས་ཁོ་རང་ཐུག་པ་ད་རེབས་ཐེངས་གཉིས་པ་ཡིན། ཁོ་རང་ལ་བུ་གཉིས་ཡོད།  ཁོ་རང་གི་ལས་ཀ་ནི་ཁང་བ་གསར་བསྐྲུན་གྱི་ལས་གཞི་ཁྲོད་ནས་འགན་འཛིན་པ་ཆུང་ཆུང་ཞིག་ཡིན། དངོས་ནས་མི་བབ་ཆགས་པོ་ཞིག་ཡོད། ཁོ་རང་ཡང་བློ་དོན་གྱི་ཅ་དངོས་བོར་རོགས་བྱེད་དུ་སླེབས་སོང་།

ཅ་དངོས་དེ་དག་ཡར་ནང་དུ་བླུགས་པ་ལས། ནང་ནས་ཕྱི་ལ་བཏོན་པར་མགྱོགས་པ་དང་དཀའ་ངལ་མེད་ཀི སྐད་ཆ་འདྲི་དགོས་ས་ཡོད་ཀྱང་། དང་བོ་ནང་དུ་བོར་དུས་ཀྱི་དཀའ་ངལ་དེ་དག་གཏན་ནས་མེད་པ་ཡིན་དུས། ང་ཚོས་ངལ་གསོ་ཞོར་དུ་ཅ་དངོས་ཚང་མ་ཆུ་ཚོད་གཅིག་དང་ཕྱེད་ཙམ་གྱི་རིང་དུ་ནང་དུ་བོར་ཚར་སོང་། སྟབས་མི་བདེ་བ་ཞིག་ཡོད་པ་དེ་ནི། རྡོ་སྐེས་ཐེམ་པ་བཅོ་ལྔ་བཅུ་དྲུག་ཞིག་མར་འབབ་དགོས་པ་དེ་རེད། དཀའ་ལས་ཁག་ཤོས་དེ་ནི་ང་ཚོས་འཁྱག་སྒམ་བོར་རྒྱུ་དེ་ཆགས་སོང་། གང་ལྟར། དཀའ་ལས་ཀྱི་ཐ་མ་དེར་གྲུབ་འབྲས་ཡོད་པ་ཡིན་དུས། ང་ཚོས་ཚང་མ་ཚར་བ་དང་ཟ་མ་ཟོས་ནས་གཟུགས་པོ་ཞིག་དཀྲུས། བློ་དོན་གྱིས་རང་གི་རྒན་མོའི་ག་རེ་བསམ་མིན་ལ་མ་བལྟས་པར་ངེད་གཉིས་ཕྱིར་བསྐྱལ་བའི་ལམ་དུ་བུད། ངེད་གཉིས་ཀྱིས་ཁོ་རང་གི་རྒན་མོ་ལ་བདེ་མོ་བྱོས་ཟེར་ནས་བཤད་ཀྱང་། རྒན་མོས་ངེད་གཉིས་ལ་བདེ་མོ་བྱོས་དང་ཐུགས་རྗེ་ཆེ་ཟེར་བའི་ཚིག་འབྲུ་གཅིག་ཀྱང་ཁ་ནས་ཐོན་མ་སོང་བ་དེ་ཡི་སྐབས་སུ། དངོས་ནས་ང་རང་ཧ་ལས་སུ་བཅུགས་སོང་། མ་གཞི་ནས་ང་ཚོའི་བར་གྱི་འབྲེལ་བ་བཟང་བོ་ཡིན།

བློ་དོན་ཁོ་རང་ཡང་དངོས་ནས་ནང་དེ་ཡི་བདག་པོ་ཞིག་ཡིན་དུས། ལས་ཀ་ལྕི་མོ་མང་ཤོས་ཤིག་ཁོ་རང་གིས་མི་བྱེད་ཐབས་མེད་ཆགས་ཡོད། ཁོ་རང་དངོས་ནས་ཐང་ཆད་ཡོད་ངེས་ཡིན།  ཁོས་བོད་པ་ཚང་གི་བཀའ་དྲིན་ལ་བསམ་ཤེས་དང་རོགས་རམ་ལ་གུས་སྲོལ་བྱེད་སྲོལ་ཡོད་པ་ལྟར། ངེད་གཉིས་ཆུ་ཚོད་གཉིས་དང་ཕྱེད་ཀའི་ལམ་ཐག་ཀྲེ་ལ་བས་བར་དུ་བསྐྱལ་བའི་ལམ་བར་དུ། ཀྲེ་ལ་བས་ནས་རྗོ་སུ་ལམ་དུ་སྐར་མ་ལྔ་བཅུའི་ལམ་བར་གྱི་ང་རང་བསྡོད་ས་དེར་ང་རང་བསྐྱེལ་བར་ཡང་ཁས་ལེན་བྱས་པ་དང་། ངེད་གཉིས་ལ་སེམས་གཏིང་ནས་བཀའ་དྲིན་ཆེ། སྤྱིར་ཡིན་ན་ངས་ཁྱེད་གཉིས་ལ་དེ་རིང་བཀའ་དྲིན་མཚོན་བྱེད་དུ་སྒོར་མོ་ཁ་ཤས་ཤིག་སྟེར་འདོད་ཀྱང་། རྒན་མོས་སྒོར་མོ་བླངས་མི་འདུག་ཟེར། དེ་དུས་བུ་ཆུང་གིས་སྐད་ཆ་དེ་འདྲ་ཞིག་གཏན་ནས་གླེང་གི་མ་འདུག་ཟེར། ངས་ཀུ་རེ་ཞིག་བྱེད་ཞོར་དུ། ངེད་གཉིས་ལ་མང་བོ་མི་དགོས། ཤིས་ཀར་གཅིག་སྟོང་གཅིག་སྟོང་སྤྲད་ན་འགྲིག་གི་འདུག་ཞེས་བཤད་པ་ཡིན།

དངོས་ནས་བཤད་ན་ནི། ངེད་གཉིས་ཀྱིས་གྲོགས་པོའི་ལ་རྒྱ་དང་རིགས་ཀྱི་འདུ་ཤེས་སོགས་ཀྱི་ཚོར་བ་དེ་ཡི་དྲངས་ནས་བློ་དོན་ཁོ་རང་ལ་རོགས་པ་བྱེད་དུ་སོང་བ་ལས། སྒོར་མོ་ཞིག་རེག་ཡོང་བསམ་ནས་ཁོ་རང་ལ་རོགས་པ་བྱེད་དུ་ཡོང་ནི་མིན་པ་ཁོས་ཀྱང་ཤེས་ན་རེད་ལ། ཁོས་ཀྱང་ཁ་ནས་སྐད་ཆ་དེ་འདྲ་ཞིག་དངོས་ནས་བཤད་པ་ལས་མ་བཤད་པར། ཁྱེད་རང་རོགས་བྱེད་དུ་ཡོང་བ་དེར་སེམས་གཏིང་ནས་ཐུགས་རྗེ་ཆེ་ཞེས་པའི་སྐད་ཆ་དེ་གཅིག་པོ་ངེད་གཉིས་ལ་བཤད་ན་འོས་ཤིང་འཚམ་ན་ཡང་། ཁོ་རང་གིས་བཤད་ཚར་བ་དང་ངེད་གཉིས་ཀྱིས་གོ་ཚར་བ་རེད། གང་ལྟར། ཁོ་རང་གི་བསམ་པ་ནི་དཀར་པོ་རེད། བསམ་པ་དེ་བཤད་པ་རེད། དེ་ཡང་མི་འགྲིག་རྒྱུ་མེད་ཀི

མཚན་མོའི་ཆུ་ཚོད་བཅུ་གཅིག་ཡོལ་ནས་ང་རང་གི་སྒོ་འགྲམ་དུ་སླེབས་སོང་། སྒེའུ་ཁུངས་ལས་གློག་གཟིམ་ནས་བཞག་ཡོད་པ་མཐོང་དུས། མཛའ་མོ་དང་བུ་མོ། མཛའ་མོའི་མ་རྒན་བཅས་སྔ་ས་ནས་ཉལ་ཟིན་པ་ཤེས་ཐུབ་ཀྱི་འདུག ངས་བློ་དོན་ལ་བདེ་མོ་བྱོས། འདི་བར་དུ་བསྐྱལ་ནས་ཡོང་བ་དགའ་ནི་ཡིན། གལ་སྲིད། ཁོམ་པ་དང་སྟབས་འགྲིག་སོང་ན། ངེད་ཀྱི་བུ་མོའི་སྐྱེ་སྐར་ལ་ཁྱེད་བཟའ་མི་བཀང་བོ་ཕེབས་རོགས་ཞུ། ངས་མི་རིང་བར་ཁ་པར་རྒྱགས་ཆོག ཁོས་ང་རང་ཡོང་ཨེ་ཐུབ་ལ་བལྟ་ཆོག་ཟེར། ང་རང་གིས་ནང་གི་སྒོ་ཕྱེ་ཞོར་དུ། བློ་དོན་ཁོ་རང་གིས་ལམ་བར་ནས་ངས་བསྟན་པའི་ལམ་ཁ་དེ་ནས་མགོ་མ་འཁོར་བར་གྲོགས་པོ་བུ་ཆུང་གི་ནང་དུ་སླེབས་ཐུབ་ཡོང་ངམ། བསམ་བློ་དེ་ཡི་ཕྱོགས་སུ་འཁོར་བཞིན། ག་ལེར་ཉལ་དུ་སོང་། སང་ཞོགས་སྔ་བོ་ནས་རྒྱུན་ལྡན་ལྟར་ལས་ཀ་བྱེད་དུ་འགྲོ་དགོས་པ་རེད། སྐེ་ན་བ་འདི་ཇེ་སྡུག་འདི་མི་འགྲོ་བར་རང་གིས་རང་ལ་ཡིད་ཆེས་བྱས་པ་ཡིན། ༣༠།༧།༡༡

མུ་འགོད།