ཤི་དང་གསོན་གྱི་བར་ན་སྙན་ངག་ཞིག།
ཚུར་ལ་གྱེར་བ་ང་ཡིས་ཐོས་ན་ཡང་།།
ཁྱེད་ལ་བྲིས་པ་མང་བ་མ་ཤེས་པར།།
མི་ལོ་མང་བོ་ནུབ་ཁའི་ཉི་མའི་སྤུན།།
མུན་ནག་ནང་དུ་རང་རློམ་ལྕི་མོ་ཞིག།
གྲུབ་མའི་རྒྱབ་ན་རང་སྡུག་ཐོལ་བ་ཞིག།
འཚོ་བའི་གསེང་ན་མྱ་ངན་མཐའ་མེད་ཅིག།
སེམས་ཀྱི་དཀྱིལ་ན་ཚོར་བ་ནག་པོ་ཞིག།
ཕར་ལ་འཁོར་དུས་མི་ཡི་གཟུགས་སུ་ཡོད།།
ནང་ལ་བལྟས་ན་གདོན་གྱི་བདག་པོ་ང་།།
མི་ལོ་སུམ་བཅུའི་ཐེམ་སྐས་བརྒལ་ན་ཡང་།།
རིགས་པའི་ལོ་ཚད་ད་དུང་བྱིས་པའི་སྐྱོ།།
ཞག་གསུམ་མཛའ་མོ་མེད་ན་མི་བཟོད་ལ།།
ལོ་གསུམ་སྙིང་གཏམ་མེད་ན་མི་སྐྱིད་པ།།
དུས་གསུམ་སྔ་ཕྱི་མེད་ན་འགག་འགྲོ་བ།།
མི་ལུས་སྐྱུར་མོ་འདི་ལ་སེམས་ཁྲལ་མང་།།
རིགས་ཀྱི་རུས་པ་དཀར་པོར་ནག་ཐིགས་བཏབས།།
སེམས་ཀྱི་འདུན་པ་རྒོད་པོ་རླུང་གིས་ཟོས།།
སྙིང་གི་གཅེས་པའི་མི་ཞིག་རིང་དུ་ལུས།།
ཚེ་ཡི་ལམ་འགྲོ་ཟེར་བ་སྟོན་མཇུག་ལོ།།
བྲིས་ན་འདོད་ཀྱང་ཡིག་རྩལ་ཞན་དྲགས་པ།།
བརྗོད་ན་འདོད་ཀྱང་ཁ་སྒོ་འགག་འགྲོ་བ།།
འགྲོགས་ན་བསམ་ཡང་འདྲིས་སའི་ཡུལ་མེད་པ།།
ས་མཐའི་བྱོལ་མ་ཞིག་གི་འཚོ་བ་སྐྱུར།།
ནམ་བླངས་ཉི་ཤར་ལས་ཀའི་ཆེད་དུ་རྒྱུགས།།
དཀའ་ཚེགས་འཕྲུལ་འཁོར་ལྟ་བའི་ལས་བྱས་ཀྱང་།།
རང་གཞན་གཉིས་ལ་ཕན་པའི་གསོག་དངུལ་མེད།།
ཤ་སྐམ་རུས་སྐམ་གྱུར་བ་དོན་སྟོང་གྱུར།།
དལ་མོའི་ངལ་ཞིག་གསོ་ས་ང་ལ་མེད།།
ལྷོད་མོའི་གཞས་ཤིག་ལེན་པའི་ངག་མི་བདེ།།
སྙན་ངག་ཁ་ཆལ་འགའ་རེ་དྲ་ངོས་སུ།།
འབྲི་བ་དེ་ནི་རང་གི་སྐྱིད་དུ་བཀུར།།
༢༣།༨།༡༡ལ་བྲིས།
