བོད་ནང་གི་གླུ་མ་ཞིག་ལ་ཕུལ།
སྙན་མོ་གླུ་ཡི་འགྱུར་ཁུགས་ཀྱིས
རིགས་ཀྱི་ཞེན་པ་དཀར་པོ་གདངས་སུ་བཀུགས་ནས
ཡུལ་གཞན་ན་འཁྱམས་པའི་མྱི་ངའི་སྙིང་ཆུང་བརྐུ་མཁན་ཁྱོད
ག་དུས་ཤིག་ནས་ངའི་སེམས་ཀྱི་སྟེགས་བུར་འཛེགས
ཤ་གསེང་རུས་གསེང་དུ་ཟུགས་དེ་འོང་བའི་ཁྱོད་ཀྱི་སྐད་ངག
ལུས་ཀྱི་བ་སྤུ་རེ་རེ་བསྒུལ་ནས་ཡོང་བའི་ཁྱེད་ཀྱི་འཛུམ་མདངས
ག་དུས་ཤིག་ནས
དྭངས་གཙང་གི་ཆུ་བོ་དང་འདྲིས་པའི་སྐད
མཛེས་སྡུག་གི་ཡུལ་ལྗོངས་དང་བསྡེབས་པའི་གདངས
སེམས་ཀྱི་གཤིས་དང་བརླན་པའི་ཞེན་འདང་ཟབ་མོ
མཐོ་སྒང་གི་མི་རིགས ཁ་བ་གངས་ཅན་པ་ཚང་ལ་རེ་སྐུལ་ཞིག
རུས་དང་སྐྱི་མོ རྐང་དང་ཁྲག་གི་ན་ཟུག་བཞིན
ཤུགས་ཀྱིས་གྱེར་དུས
ང་ཕྱི་རོལ་ན་འདར་བཞིན་ཡོད
རང་དབང་མེད་པའི་མིག་ཆུ་ཞིག་སེམས་ནས་ཤོར
ཞི་དུལ་བག་ཡོད་ཀྱི་རྣམ་འགྱུར
ལྷད་མེད་ཟོལ་མེད་ཀྱི་བོད་ཀྱི་བུད་མེད་ཁྱོད་ཀྱིས
ང་གསོད་ས་ཟེར ང་བཟི་རུ་བཅུགས་སོང
ངས་ཡང་དང་བསྐྱར་དུ་ཉན
ཁྱོད་ཀྱི་སྐད་ངག་སྙན་མོ
ཁྱོད་ཀྱི་གླུ་སྐད་དྲོན་མོ
ངའི་ཤ་འདར་སོང་ ངའི་ངག་འདར་སོང་
ངའི་མིག་ཆུ་མེད་པའི་ལོ་ཟླ་ཞིག་ལ་སྒུག་འདོད་སྐྱེས
མཐོ་དབུས་མཐོ་སྒང་གི་རྩྭ་ཐང་དང་ལུ་གུ
སྤྲ་ནག་དང་རྟ་ནོར་ལུག་གསུམ
སྤང་ལ་བཀྲམ་པའི་ངང་ཚུལ་འདི་དག་དང་མཉམ་དུ
ཁྱོད་ཀྱི་རང་ཉིད་བོད་པའི་མི་རིགས་ཡིན་པར
ཡང་དང་བསྐྱར་དུ་གྱེར་ཞིང་
རྟ་ཕོའི་རྨུག་རྗེས་དང་འབྲི་མོའི་བཞོ་དབྱངས་ཁྲོད
ལུ་གུའི་འབབ་སྒྲ་དང་ཆུ་ཕྲན་དྭངས་མོའི་བཞུར་སྒྲའི་ཀློང་
དད་ལྡན་མི་རིགས་ཤིག་གི་ཉམ་ཉེས་ལ འོ་འབོད་ཡང་ཡང་བྱས
མཐའ་དོན་དེར བོད་ཀྱི་གླུ་མ་ཁྱོད་ལ
ངའི་སེམས་གཏིང་གི་སྨོན་འདུན་ཞིག་ཞུ་འདོད་ཀྱང་
ངས་བརྙན་འཕྲིན་གྱི་གཟུགས་རིས་ལས་མཐོང་བའི་ཕ་ཡུལ་དང་
ཡུན་རིང་རྒྱང་དུ་སྐྱུར་བའི་སྤུན་ཟླ་དག་དྲན་ནས
མགྲིན་པ་བརྣངས་སོང་
༢༦།༨།༡༡ལ་བྲིས།
བཀླགས་ཡོད། སྙན་མོ་འདྲ་ཞིག་བྲིས་འདུག་བསམ་སོང་།
བཀླགས་ནས་འགྲོ་ཞོར་དུ་ཁྱེད་ཀྱི་ཚོར་བའི་ཕ་རོལ་ན་ཅི་ཞིག་འཚོལ་ཡོད་པ་ཤེས་ཟིན།