དེང་སང་དགའ་འོས་པ་ཞིག་ནི། བོད་ཕྱི་ནང་གཉིས་ཀྱི་གཙོ་བའི་བོད་མི་འདུས་བསྡོད་ཀྱི་ཡུལ་གྲུ་ཆེས་མི་ཉུང་བ་ཞིག་ན། བོད་མི་དག་གིས་རང་ངོ་ཟིན་ནས། རང་སྐད་ལ་དུངས་པ་ཞིག་རིམ་གྱིས་བཞུར་ནས་འོང་གི་ཡོད། དེས་ན་ང་ཚོས་བོད་སྐད་གཙང་མ་ཞིག་བཤད་པ་ལ་དམ་བཅའ་འཇོག་པ་དང་འབོད་སྐུལ་ཞུ་བ། ཉེས་ཆད་གཅོད་པ། ཕན་ཚུན་ལ་ངོ་མཚངས་འདྲི་བ་སོགས་བྱེད་འོས་སམ་ཟེར་ནས་གླེང་དགོས་པར་སྙམ། ངས་བསམ་ན་དེང་དུས་ཀྱི་བོད་མི་འདུས་བསྡོད་དང་འཚོ་གནས་ཀྱི་ཡུལ་ཆེ་ཤོས་ནི་བོད་ནང་ཡིན་ལ། བོད་ནང་གི་བོད་མི་དག་གིས་ཀྱང་རང་ཉིད་བོད་ཡིན་པ་དེ་ལ་བོད་སྐད་གཙང་མ་ཞིག་བཤད་པར་སྤོབས་པ་བསྐྱེད་དགོས་པ་དང་བཤད་ཤེས་པ་ནས་རྒྱ་ཁྱབ་དུ་གཏོང་དགོས་པར་སྐད་ཤུགས་ཅི་ཙམ་ཆེ་བ་དེ་ཙམ་གྱིས་ཕྱི་བསྡོད་བོད་མི་དག་གིས་དེ་དག་གི་རྐང་རྗེས་སུ་འགྲེང་བར་འབད་འབུངས་གང་ཐུབ་ཞིག་བྱེད་ཀྱིན་པའི་གཏམ་འདི་དག་ནི། བོད་མི་སུ་ཞིག་གོ་ན་ཉན་བདེ་བ། བསམ་ན་དོན་སྙིང་ཡོད་པ་ཞིག་དུ་འདོད་བཞིན་ཡོད།
དངོས་ནས་བཤད་ན། དེ་ནི་ལོས་ཡིན། མི་རིགས་ཤིག་ཉམ་ཉེས་ཀྱི་འགག་རྩ་ལ་ཐུག་བཞིན་པའི་སྐབས་སུ་དེ་ལྟར་བྱེད་རུང་བ་མ་ཟད། བྱེད་དགོས་པ་དེ་ནི་མི་རིགས་དེ་ཉིད་ལ་གཅེས་ཞེན་དང་དགའ་ཞེན། ལར་ཞེན་བྱེད་སྟངས་ཤིག་ལས། ཡུལ་སྡེ་གང་གི་ཁྲིམས་དང་ལུགས་སྲོལ་ལ་ཡང་འགལ་མེད་པ་ཡིན། འོན་ཀྱང་། བསམ་བློ་ཞིབ་མོ་ཞིག་བཏང་ནས་བཤད་དུས། བོད་མི་དག་གིས་ད་ལྟའི་འཆར་དངོས་ནས་བོད་སྐད་དམ་ཕ་སྐད་གཙང་མ་ཞིག་བཤད་ཐུབ་ཀྱི་ཡོད་དམ་ཞེས་དྲི་བ་ཞིག་རང་ཤུགས་ཀྱིས་སླེབས་ནས་འོང་གི་ཡོད།
བོད་ནང་དུ་མཚོན་ནས་བཤད་ན། བོད་སྐད་དམ་ཕ་སྐད་གཙང་མ་བཤད་པའི་ཁོར་ཡུག་མེད་པ་ནས་ཡོད་ལ། ཡོད་པ་ནས་ཡུལ་ལུང་མི་གཅིག་པ་དང་སྡེ་ཁག་མི་གཅིག་པ། འཚོ་གནས་མི་གཅིག་པ་བཅས་ཀྱི་དཀའ་ངལ་བཅས་མི་ཉུང་བ་ཞིག་ཡོད་ལ། དེ་དང་འབྲེལ་ནས་ལས་ཀ་དང་ཁོར་ཡུག་གི་སྟབས་བསྟུན་བཅས་ཀྱི་གནོན་ཤུགས་ཀྱང་མི་ཉུང་བ་ཞིག་ཡོད་དུས། ཕ་སྐད་གཙང་མ་ཞིག་བཤད་པ་ལ་བཀག་མི་ཉུང་བ་ཞིག་ཡོད་པ་ནི། མིག་གིས་མཐོང་ཐུབ་པ་དང་བསམ་བློའི་དཔོག་ཐུབ་པ་ཞིག་ཡིན་མོད། དེ་དུས་མི་ཁས་ཀྱི་དེ་ལ་ཁག་བཞག་ནས། ཕ་སྐད་གཙང་མ་བཤད་པར་ལས་སླ་བོ་མེད་པར་འདོད་ཀྱི་ཡོད་ལ། དེ་ལ་དང་དོད་ཀྱང་དེ་འདྲའི་ཆེན་པོ་བྱེད་ཐུབ་ཀྱི་མེད་པའི་ཁྱིམ་དང་སྡེ་བ། གྲོང་བརྡལ་དང་གྲོང་ཁྱེད་གྱི་བོད་མི་ཆེས་མི་ཉུང་བ་ཞིག་ཡོད་པ་ཡིན།
དེ་དག་གིས་ཅི་ནས་ཀྱང་། འདོར་མི་འོས་པ་དང་དྲན་དགོས་པ་ཞིག་ཡོད་པ་དེ་ནི་རང་ཉིད་གང་དུ་སྐྱེ་བའི་རིགས་དེ་ལ་དགའ་ཞེན་དང་གུས་བརྩི། ལར་ཞེན་དང་སྤོབས་པ་བཅས་ཡོད་མཁན་ཞིག་བྱེད་པ་ལ། ཐོག་མའི་ཆ་རྐྱེན་དེ་ནི་ཕ་སྐད་བཤད་ཤེས་པ་དང་ཕ་སྐད་ལ་གོམ་འདྲིས་ཡོད་པ། ཕ་སྐད་གཙང་མའི་གླུ་གཞས་ལེན་ཐུབ་པ། ཕ་སྐད་གཙང་མའི་ཁོར་ཡུག་བསྐྲུན་དགོས་པ་བཅས་ཡིན་དུས། དམིགས་སུ་བཀར་ནས་བོད་མི་རེ་རེ་ལ་འགན་དེ་ཡོད་པ་ནི། སྐྱེ་རྒྱུད་དང་རུས་རྒྱུད། རིགས་རུས་སོགས་གང་ལ་བསམ་ན་ཡང་མ་ཤེས་ན་ངོ་ཚ་དང་། བཤད་མ་ཐུབ་པ་ཡིན་ན། རང་ཉིད་མི་རིགས་དེར་སྐྱེ་བའི་དོན་གོ་མ་འཁྱོངས་པ་རེད་ཅེས་བཤད་ཆོག་པ་ཡིན། དེ་ཡིན་དུས་བོད་ཁུལ་དུ་འཚོ་བསྡོད་བྱེད་མཁན་གྱི་བོད་མི་དག་གིས་ནང་མི་ཕན་ཚུན་དང་གྲོགས་པོ་ཕན་ཚུན་གྱི་བར་ལ་ཕ་སྐད་བསྲེས་ལྷད་མེད་པ་ཞིག་བཤད་པ་ལ་ལག་ལེན་འདེབས་དགོས་པ་ཡིན་ལ། ཐ་ན་རང་གི་སྤུན་མཆེད་ཅིག་ནས་ཁ་པར་ཨང་གྲངས་ཤིག་གཞན་སྐད་ནས་བཤད་ཀྱི་ཡོད་ན། དེ་མ་ཐག ཐད་ཀར་དེ་ཡི་གདོང་ལ་འབུད་པའི་སྙིང་སྟོབས་དགོས་པ་དེ་ཡིན།
ཕྱི་བསྡོད་བོད་མི་དག་གིས་ཀྱང་དེ་མཚུངས་ཀྱིས་གྲོགས་པོ་ཕན་ཚུན། བོད་མི་སུ་ཞིག་ལ་ཁ་བརྡ་བྱེད་པ་ལ་བོད་སྐད་ལས་གཞན་སྐད་བསྲེས་ལྷད་ཀྱི་སྐད་ཆ་མི་བཤད་པར་འབད་བརྩོན་བྱེད་དགོས་པ་ནི་བཤད་མི་དགོས་ལ། བོད་མི་ཞིག་ལ་དྲ་ཐོག་ནས་འབྲེལ་བ་བྱེད་པ་ལ། བོད་ཡིག་སྤྱོད་སྒོ་ཡོད་པའི་དྲ་ཚིགས་དང་གདོང་དེབ། གློག་འཕྲིན་སོགས་གང་ནས་ཡིན་ཡང་། བོད་ཡིག་ལས་ཡིག་རིགས་གཞན་དག་བེད་སྤྱོད་མི་གཏོང་བ། སྐད་ཡིག་གཞན་ནས་འབྲེལ་བ་མི་འཛིན་པར་འབད་འབུངས་བྱེད་ཐུབ་པ་ཡིན་ན། ཕ་སྐད་གཙང་མ་ཞིག་གི་ཡར་རྒྱས་དང་མི་རིགས་ཤིག་གི་ཕ་སྐད་ལ་བདག་པོ་བརྒྱབས་པར་བཤད་ཆོག་པ་ཡིན། དེ་མིན་རིག་གཞུང་ཚོགས་པ་རེ་ཟུང་དང་། སྐད་ཡིག་སྲུང་སྐྱོབས་ཚོགས་པ་ཁ་ཤས་ཀྱི་འགྲན་ཚོགས་རེ་བསྡུས་ནས་ཚར་བ་ལྟ་བུ་བྱས་ན། ང་ཚོའི་ཕ་སྐད་ལ་ནམ་ཡང་ཡར་རྒྱས་ཤིག་ཡོང་མི་ཐུབ། ངས་འདི་ནས་ཕ་སྐད་ཅེས་བཤད་ཀྱིན་པ་བོད་མི་རིགས་ཀྱི་སྐད་ཡིག་ལ་བཤད་ཀྱིན་པ་ལས། ཡུལ་ལུང་བྱེ་བྲག་པ་རེ་ཟུང་གིས་སྐད་ལ་སྣང་མེད་དུ་འཇོག་དགོས་པར་བཤད་ཀྱི་མེད་ལ། རང་ཉིད་གང་དུ་སྐྱེ་སའི་ཁོར་ཡུག་གི་སྐད་ནི། ཕ་སྐད་དུ་འབོད་ཆོག་ལ། མདོ་དབུས་ཁམས་གསུམ་གྱི་བོད་མི་སུ་ཞིག་ཡིན་ཡང་། ཕ་སྐད་ནི་བོད་མི་སྤྱིའི་གོ་ཐུབ་པའི་ཡིག་ཐོག་གི་སྐད་དེ་ལ་བཤད་ཀྱི་ཡོད་པ་ཐུགས་སུ་བཞག་ནས། ཞོར་དུ། རང་ཉིད་གང་དུ་སྐྱེ་བའི་ཡུལ་སྡེ་ཡི་སྐད་དེ་ཡང་ཕ་སྐད་ཅིག་ཡིན་ལ། དེ་ཉིད་ཀྱང་མི་ཉམས་གོང་འཕེལ་དང་འབྲེལ། བོད་ཁ་བ་གངས་ཅན་པའི་སྐད་ཡིག་གི་ཕ་སྐད་གཙང་མ་དེ་ཡི་མདུན་བསྐྱོད་ཕྱོགས་སུ་འབད་འབུངས་ལྷོད་མེད་ཡོང་བའི་འབོད་སྐུལ་དུ་བྲིས། དུས་ཚོད་ཀྱིས་དབང་གིས་ལྷོད་ལྷོད་དང་དག་པོ། གསལ་ཞིང་རྒྱས་པོ་ཞིག་འབྲི་མ་ཐུབ་ཀྱང་། བཤད་ན་འདོད་པའི་སྐད་ཆ་དག་ལུས་མེད་པར་སྣང་ངོ་། ཁ་བ་གངས་ཅན་པ་དག རང་ངོ་ཟིན་པ་གྱིས། རང་སྐད་མ་བརྗེད། ཕ་སྐད་མ་སྐྱུར། ཕ་གཞིས་སྐྱོངས་ཤིག
ཐོག་མར་རང་གི་སྐད་ལ་བྱང་བར་གྱིས། །
དེ་རྗེས་གཞན་སྐད་གང་ཞིག་སྤྱངས་ན་ཡང་། །
བཟང་བོའི་ཡོན་ཏན་ཟེར་བ་མཐའ་མེད་དུས། །
སྐད་རིགས་སྣ་མང་ཤེས་ན་ཀུན་ལ་ཕན། ། དགེའོ།
༢༩།༨།༡༡ལ།
