ཤེས་དང་ཚོར་བའི་དེད་ནས་འོང་བའི་སྔ་གཞུག་དེ་ནས
ཁྱེད་ཀྱི་བྲང་ཁར་བསྙེས་འཇོག་མ་ཐུབ་པའི་མི་ང་རང་
ཁྲེལ་གཞུང་མེད་པའི་དུས་ཚིགས་ཤིག་གི་རྔོན་པ་བཞིན
ངེས་མེད་དུ་འོང་ནས ཐག་རིང་ནས་ལམ་ལ་བུད་དུས
སྙིང་ཉེ་བའི་ཐག་རིང་གི་ཁྱོད སེམས་འཁྱེར་བའི་ཁུ་ལོ་ཁྱོད
དུས་དེང་སང་ ཡུལ་ལུང་གང་ཞིག་ན་ཡོད་པར་སྙམ་དུས་ཀྱི་ང་
འདོད་ཆགས་ལས་བརྩེ་བ་བོར་བའི་འཁྱམས་པོ་ཁྲེལ་མེད་ཅིག
རྒྱུ་འབྲས་ནི དོན་དངོས་སུ་ཏག་ཏག་ཞིག་ཡོད་དམ
བརྩེ་དུང་ཡང་དེ་མཚུངས་བཞིན་ཐོབ་འོས་པ་ནས
ཐོབ་དུ་རུང་བའི་ལྷ་སྒྲུང་ཞིག་གི་གཏམ་རྒྱུད་ལས
ལས་ངན་ནང་གི་ལས་ཅན་རེ་ཟུང་ལ་ཐོབ་མྱོང་བར་གོ་མྱོང་བ་མ་གཏོགས
དོན་དངོས་སུ གནམ་འོག་འདིར་སུ་ཚང་གི་གོ་ཐོབ་དུ་གནས་ཡོད་པར་སྙམ་དུས
སེམས་སོང་བའི་རྒྱང་རིང་གི་ཁྱོད ཡིད་འཕྲོགས་པའི་ཁུ་ལོ་མ
ཁྱེད་རང་ ད་ལྟ་ནི་མི་ཁྱིམ་གཞན་ཞིག་གི་བདག་མོ་རེད་ཟེར
སྐད་ཆ་དེ་ནི་བདེན་པ་ཡིན་ནམ
བདག་པོ་དེ་ནི་ཅི་འདྲའི་ལམ་ཅན་ཞིག
བདག་མོ་ཁྱེད་ནི་དེ་འདྲའི་བཟང་མོ་ཞིག
ཏན་ཏན ཁྱོད་རང་གནས་པའི་མི་ཁྱིམ་དེ་ན
བརྩེ་དུང་ཞེས་པའི་དྲོན་པོ་ཞིག་དང་
སྙིང་གཏམ་ཟེར་བའི་ཉན་བདེ་བོ་ཞིག
གླུ་སྐད་ཅེས་པའི་དབྱངས་རྟ་སྙན་མོ་ཞིག
ངས་ཁྱོད་དང་ཁྱོད་ཀྱི་བདག་པོར་ཐོབ་ཡོད་པར
ཆེས་རིང་བའི་ས་ཞིག་ནས་རེ་སྨོན་བཅས་བརྟས་དེ་ཡོད
ཁྱོད་བདེ་བའི་སྐད་ཆ་དག་ནི ངའི་སེམས་པའི་དྲོད་ཅིག་རེད་ལ
ཁྱོད་སྐྱིད་པའི་འཚོ་བའི་སྐོར་ནི གོ་ན་ཡིད་དགའ་བའི་དོན་ཞིག་རེད
སྙིང་གི་ཁུ་ལོ་མ དུས་ཚིགས་ངེས་མེད་ཅིག་ལ
ཁྲེལ་གཞུང་མེད་པའི་ང་དྲན་མི་འོས
སྐྱོ་བ་ལས་ལྷག་པའི་འཚོ་བའི་བཀག་རྒྱ་གང་ཡང་མེད་དུས
ངའི་ཕྱོགས་སུ་བསམ་བློ་གཏོང་མི་འོས་ལ
ང་ཟེར་བའི་མིང་ཚིག་ཞིག ཁྱོད་ཀྱི་མིག་ལམ་དང་སེམས་ཁོང་ནས
དྭངས་ཞིང་གཙང་བའི་རྒྱུགས་ཆུ་ལ་སྐུར་རོགས
ལྷོད་ཅིང་འཇམ་པའི་བསིལ་རླུང་ཁྲོད་སྟོར་རོགས
ཡངས་ཤིང་མཛེས་པའི་རྩྭ་ཐང་ནས་བརྗེད་པར་གྱིས་ཤིག
ང་རང་ཆེས་དགའ་མྱོང་བའི་སྙིང་གི་ཁུ་ལོ་མ
དུས་དེ་རིང་ ང་ནི་བརྩེ་དུང་མེད་པའི་ཁྲམ་པ་ཞིག་དུ་གྱུར་ཡོད
དུས་དེ་རིང་ ང་ནི་ལས་འབྲས་བརྗེད་པའི་མི་ངན་དུ་གྱུར་ཡོད
དུས་དེ་རིང་ ང་ནི་དམ་བཅའ་དོར་བའི་སྐྱག་གཟན་ཞིག་ཆགས་ཡོད
དུས་དེ་རིང་ ང་ནི་ཁྱེད་ཀྱི་ཆེད་དུ་གང་ཡང་བྱེད་འཕོད་པར་གྲ྄་སྒྲིག་མེད
དུས་དེ་རིང་ ང་ནི་ཁྱེད་ལས་གཞན་པའི་སེམས་ཁྲལ་བྱེད་སའི་ཕྲུ་གུ་གཉིས་ཡོད
དུས་དེ་རིང་ ང་ནི་རིགས་རུས་བཙོང་བའི་མི་ལྟས་ངན་ཞིག་དུ་གྱུར་ཚར
དུས་དེ་རིང་ ང་ནི་ཡོད་མེད་གཉིས་ཀྱི་ས་མཚམས་ཤིག་དུ་ལུས་ཡོད
ཡག་པོ་རེད།