རང་ཉིད་ལ་བསྡིག་དོན་འདི་ཡིན།

འདོད་ཆགས་ཤ་ལ་འཐིམ་ནས་ལོ་མང་སོང་།།
འདོད་ཆགས་རུས་ལ་ཟུག་ནས་ལོ་མང་སོང་།།
འདོད་ཆགས་སེམས་ལ་འཛུལ་ནས་ལོ་མང་སོང་།།
ད་ནི་ང་རང་སྐྱི་འབག་ཁོ་ན་ཡིན།།

འདོད་ཆགས་ང་ལ་ཡོད་པའི་སྲེད་པ་ལྕི།།
འདོད་ཆགས་ང་ལ་མོད་པའི་མྱ་ངན་མང་།།
འདོད་ཆགས་ང་ལ་བདག་པའི་ཞེན་ཆགས་རྒོད།།
ཐོབ་པ་བརྩེ་དུང་མ་ཡིན་འདོད་ཆགས་ཉིད།།

འདོད་པའི་ཟོས་པའི་སྔ་དགོང་ཀུན་ལ་མིག་ཟུང་རིབ།།
འདོད་པའི་དེད་པའི་ཉིན་མཚན་ཀུན་ལ་སེམས་པ་སྨྱོས།།
འདོད་པའི་འདྲུད་པའི་སྔ་གཞུག་ཐམས་ཅད་ངོ་ཚ་བྲལ།།
སྐྱི་མོ་འདི་ལ་མི་མིང་ཐོག་པ་ཡ་ཞིག་ང་།།

འདོད་པ་དོན་དུ་གཉེར་བའི་འདོད་ལྡན་གྱི་སྐྱེ་བོ།།
ལུགས་དང་སྲོལ་ལ་མཐུན་ན་བདེ་མོ་རང་ཡོད་ཀྱང་།།
ཅི་འདོད་གང་འདོད་བྱེད་ལ་གོམ་ཤུགས་རང་ཆེ་དུས།།
འདི་ཕྱིའི་རྒྱུ་འབྲས་ཟེར་བ་ཡིད་ངོ་ནས་བརླག་སོང་།།

དུས་རྒྱུན་ངག་ལ་བྱང་བ་བྱམས་བརྩེ་དང་སྙིང་རྗེ།།
ནམ་རྒྱུན་སེམས་སུ་གཉེར་བ་འདོད་ཆགས་ཀྱི་བཙན་རྫོང་།།
འདི་ཉིད་བཤིག་ལ་སེམས་ཀྱི་སྟོབས་ཤུགས་རང་ཉམས་པའི།།
བརྩེ་དུང་མེད་པའི་དུད་འགྲོ་ང་ཉིད་འདི་བསྡིག་པ།།

ནང་གི་ཤེས་པ་ཕྲ་མོ་ད་ལྟ་རང་ཆད་ནས།།
ཕྱི་རོལ་རྒྱུས་མེད་འཇིག་རྟེན་ཕྱི་མ་ཞིག་ཡོད་ན།།
དེ་ཡི་མགྲོན་དུ་ང་རང་ད་ལྟ་རང་བོས་དང་།།
དགའ་སྣང་སྟོང་གི་བཟི་ནས་འགྲོ་འདོད་རང་ང་ཆེ།།

སྐྱེ་བའི་དོན་གོ་ཟེར་བ་ཁབ་ཤུལ་ཙམ་མེད་པའི།།
མི་ལུས་རིན་བྲལ་ཟེར་ཡང་སྟོང་གཟད་ལ་དཔྱངས་པའི།།
ཡུལ་མེད་འཁྱམས་པོ་གྲངས་མེད་གྲལ་མཐའ་ན་ལུས་པ།།
སྐྱག་གཟན་ལྟས་ངན་ང་འདྲ་རྒྱུ་མཚན་གྱིས་སྟོང་སོང་།།