གསོན་པའི་བྲང་དུ་གཏད་ནས་ངུས་ཤིག་དང་།།
ཤི་བའི་ལམ་དུ་ལུས་ནས་དགོད་མཁན་ཚོ།།
རིགས་རུས་སྙིང་ལ་བརྡབས་པའི་སྲང་བར་ན།།
མི་ཤི་རྟ་འགྱེལ་ཟེར་བ་མཐའ་མེད་རེད།།
བྲིས་ཚད་མཐོང་ཚད་ཡིད་ལ་འཐད་ན་ཡང་།།
སེམས་ལ་ཤར་བ་གང་གི་མི་ཤེས་པའི།།
བདུད་ཀྱིས་ཆོ་འཕྲུལ་དྲགས་པོའི་བསླུས་པའི་དུས།།
ཚོར་བའི་བྲན་གཡོག་ཟེར་བ་དེ་ལས་གང་།།
གཅིག་ཤེས་ཀུན་པོ་སྤྱངས་རབས་བཤད་རྒྱུར་གོམ།།
མི་ཤེས་བླུན་པོའི་རྩ་ལ་ཞུགས་པ་འདི།།
རིགས་ཀྱི་འདུ་ཤེས་མཁྲེགས་པ་མ་ཡིན་ཡང་།།
གསོན་པོའི་ལུས་ལ་ཤི་བོའི་རྣམ་ཤེས་གྲུབ།།
རྒྱུད་དུ་ཅི་ཡང་མེད་ཀྱང་བྱམས་བརྩེའི་སྟོབས།།
ཀུན་ལ་འཆད་པར་དགའ་བའི་གཤིས་ངན་འདི།།
འཚང་ལ་རྒོལ་ནས་ཡོང་དུས་ཁྲོ་བ་ཡིས།།
ལྕགས་ཀྱི་གཟུགས་ལ་གསེར་གྱི་ལྷན་པ་ཅན།།
ཁུ་བའི་སྔ་གཞུག་རྫོང་གི་ཁྱི་སྤྱོད་བཞིན།།
སེམས་ཀྱི་འདུ་རྒོད་རླུང་ཁའི་རྩྭ་ཐུར་བཞིན།།
སྔ་དགུང་གཉིས་ལ་ཕྱི་ནང་མ་གཅིག་པར།།
མི་ཡི་ལག་རྗེས་ཟེར་བ་གང་དུ་ཡོད།།
ཐག་རིང་ཕྱི་ནས་བལྟས་ན་མི་ཡི་སྐྱི།།
ཉེ་སའི་ནང་དུ་འཛུལ་ན་གཟུགས་མེད་འདྲེ།།
ལུས་པོ་གཅིག་ལ་མྱི་འདྲེ་མཉམ་གནས་ཀྱི།།
འཚོ་བའི་དགོས་དོན་ཟེར་ས་གང་ནས་ཡོད།།
མུན་པ་ནག་པའི་མཚན་མོ་རིང་དུ་བྱིན།།
སེམས་ཀྱི་མཛའ་དུངས་ཟབ་མོ་རི་ལ་བྲོས།།
གཅེས་ཤིང་དགའ་བའི་སྲོག་གི་ནང་རོལ་ན།།
ཕྱི་རོལ་བདེན་པ་སྐྱོང་བའི་ལས་དེ་ཚར།།
ཡག་པོ་བྲིས་྄འདུག