དོགས་པའི་སེམས་ཁམས་སྐྱུར་མོ་འདི་ཉིད་ཀྱིས།།
དུས་རྒྱུན་གཡོག་ལ་བཀོལ་བའི་མི་གཤིས་འདི།།
གཡུགས་ནས་ཐག་རིང་གནས་ཀྱི་དཔེན་གནས་ཤིག།
ཟིན་པ་སྙིང་ནས་དགའ་ཡང་ལས་དེ་སྟོང་།།
བདེན་པ་གླུ་རུ་གྱེར་བའི་རང་དབང་དང་།།
ཁ་ལྕེ་གཅིག་དུ་འདྲེས་པའི་སེམས་གཏམ་ཞིག།
རྒྱང་རིང་དཔག་ཚད་མཚམས་ན་གནས་པ་ཡི།།
སྙིང་གི་གྲོགས་དེར་སྤྲིངས་འདོད་སེམས་ངལ་ལྕི།།
ཆུང་ནས་འདྲིས་པ་མེད་པའི་གོམ་གཤིས་ཤིག།
ཉིན་ལྟར་གཤིབ་དེ་འོང་བའི་མི་གྲོང་དུ།།
སྐད་རིགས་གཞན་གྱི་སེམས་ཟས་མ་བརྙེད་སྐབས།།
རིགས་ཀྱི་དུངས་པ་ཟབ་མོ་སྙིང་ནས་དྲན།།
རྒས་པའི་བྱ་ཡང་ལོག་པའི་གནས་ཚང་ཞིག།
དྲན་པའི་ཤེས་པ་ཞིག་གིས་འཕུར་བཞིན་ཡོད།།
འགྲོ་བ་མི་ཡི་གཤིས་སུ་འཐག་པ་ཡིས།།
དྲན་པའི་རང་ཡུལ་ཡོད་ཀྱང་ལོག་ས་མེད།།
མི་རུ་སྐྱེ་བ་སྔོན་གྱི་ལས་དང་འབྲེལ།།
མི་སྐད་ཤེས་ཀྱང་བཤད་ས་མེད་པ་ནི།།
མི་ཡི་ཐོབ་ཐང་ཟེར་བ་སྙན་ན་ཡང་།།
བོད་ཀྱི་མི་ཞིག་བྱེད་པར་དཀའ་ཚེགས་མང་།།
དྲ་གྲོགས་ལགས། ཁྱེད་ཚང་གི་ཟིན་བྲིས་ལ་ཡང་སྐྱར་སླེབས་ཡོད།
ཨེ་མ་བརྩེ་ལྡན་དྲ་གྲོགས་མཆེད་པ་འོས།།
སྙིང་གི་དཔྱིད་ཁྱོད་གདུང་བའི་ཚིག་གི་ཕྲེང་།།
མ་བཅོས་མ་བསླད་རང་བཞིན་སྨྲས་བ་དེས།།
བདག་ཡིད་སྙིང་གི་ཐིག་ལེར་རབ་ཏུ་འཁྱིལ།།
བཀླགས་ནས་འགྲོ་ཡིན།