བརྩེ་བ་མེད་དུས་ཀྱི་ལོ་ཟླ་དེར། ཤི་སོང་ན་ཏག་ཏག་ཡིན།

མི་ཟེར་བ་ལ་བརྩེ་བ་ཟེར་བ་ལས་གལ་ཆེ་བ་ཞིག་གང་དུ་ཡོད། བརྩེ་བ་མེད་སའི་ཁྱིམ་དང་། བརྩེ་བ་མེད་སའི་གྲོགས། བརྩེ་བ་མེད་སའི་མི་རིགས། བརྩེ་བ་མེད་སའི་དགའ་རོགས། བརྩེ་བ་མེད་སའི་ཉེ་དུ། བརྩེ་བ་མེད་སའི་འགྲོ་བ་མི། བརྩེ་བ་མེད་སའི་སེམས་ཅན་དབུགས་ཤོག་གང་ན་སུ་ཡོད་ན། དེ་དག་གིས་དུས་རྟག་དུ་བསྡུག་བསྔལ་ཁོ་ན་མྱོང་གི་ཡོད་ལ། གཞན་དག་ལ་ཡང་བསྡུག་བསྔལ་ཁོ་ན་སྟེར་གྱི་ཡོད། དེ་ཡིན་དུས། བརྩེ་བ་མེད་སའི་ཁོར་ཡུག་ནས་གསོན་པ་ལས་ཤི་ན་ཏག་ཏག་ཆགས་ཡོད།

བརྩེ་བ་མི་དགོས་པའི་གནས་ཤིག་གང་ན་ཡོད། ས་ཆུ་མེ་རླུང་། རྩ་དང་རྩི་ཤིང་། འཛམ་གླིང་ཟླུམ་པོའི་སྟེང་གི་འགུལ་བསྐྱོད་ཀྱི་ནུས་པ་ཡོད་པའི་སུ་ཞིག་ལ་བརྩེ་བ་མི་འཁོ། བརྩེ་བ་མེད་དུས་ཀྱི་ལོ་ཟླ་ནི་དགུན་ཟླ་ཡིན་ལ། བརྩེ་བ་མེད་དུས་ཀྱི་གྲོགས་པོ་ནི་མྱ་ངན་ཡིན། བརྩེ་བ་མེད་དུས་ཀྱི་འཚོ་བ་ནི་དམྱལ་བ་དང་། བརྩེ་བ་མེད་དུས་ཀྱི་ཁྱིམ་ཚང་ནི་བཙོན་ར་རེད། བརྩེ་བ་མེད་དུས་ཀྱི་ས་གཞི་ནི་འགས་གཏོར་ཡིན། བརྩེ་བ་མེད་དུས་ཀྱི་མི་ནི་གདོན་འདྲེ་ཡིན་ལ། བརྩེ་བ་མེད་དུས་ཀྱི་ཁོར་ཡུག་ནི་ལྕགས་ཀྱི་ཚེར་མ་ཡིན། དེས་ན་བརྩེ་བ་མེད་དུས་སུ་ཏག་ཏག་ཤི་ན་ཡག གསོན་པ་ནི་བརྩེ་བའི་ཆེད་དུ་ཡིན། བརྩེ་བ་མེད་ས་ན་སྐྱིད་ཅིག་ཡོད་དབང་མེད།

དེས་ན་དེ་རིང་ངས་འདི་ནས་བརྩེ་བའི་ལྷ་ལ་འབོད། ང་ཚོ་ལ་བརྩེ་བ་གནོང་དང་། ང་ཚོ་ནི་འདྲ་མཉམ་ཡིན། ང་ཚོ་ལ་ཚོར་བ་ཡོད། ང་ཚོ་ཡང་འགྲོ་བ་མི་ཞིག་ཡིན། ང་ཚོ་ཡང་བདེ་སྡུག་གི་མྱོང་བ་ལྕི་བའི་དབུགས་ཐོག་གི་སྐྱེ་བོ་ཡིན། ང་ཚོས་ཀྱང་ཁྱེད་ཉིད་བསམ་ནས་ཉིན་མཚན་ལ་སྒུག་ནས་ཡོད། ང་ཚོ་ལ་ཡང་བརྩེ་བ་ཞིག་སྤྲོད་དང་། ང་ཚོས་བདེ་ཞིང་སྐྱིད་པའི་ཁང་ཁྱིམ་ཞིག་འདོད་ཀི ང་ཚོས་ཀྱང་ཕུ་ནུ་མིང་སྲིང་ཚོ་མཉམ་འཛོམས་ཤིག་བྱུང་ན་བསམ་གི ང་ཚོ་ལ་ཧམ་པ་མེད། ང་ཚོ་ལ་བརྩེ་བ་ཁྱེད་ལས་གཞན་གང་ཡང་མི་དགོས། དེ་ཙམ་ཡིན།