སོང་ན་ཤུལ་དུ་ལུས་པའི་སྣང་བ་ཞིག།
ཤུལ་ལ་བལྟས་ན་ཅི་ཡང་མེད་པ་འདི།།
གང་ཞིག་འདོད་ནས་ཅི་ཞིག་བོར་བ་ཡི།།
ང་ནི་ཕྱི་རོལ་གྲོང་ན་འདུར་ཞིང་འཚོ།།
བལྟས་ན་རིག་རྒྱུ་ཡོད་པའི་བྱིས་པ་དང་།།
གཉབ་ན་རེག་པ་མེད་པའི་སེམས་མཐུན་གཉིས།།
གཅིག་ལས་གཅིག་ནི་སྙིང་གི་བཙན་སར་འཛུལ།།
ཐ་མ་སུ་ལ་རྒྱལ་མིན་ཤེས་མ་སོང་།།
རྒྱང་ནས་བཞག་པའི་ཆུང་འདྲིས་བརྩེ་བའི་མི།།
རང་ལ་བྱམས་ཤིང་དུངས་པའི་དྲིན་ཆེན་གཉིས།།
མི་གཤིས་དར་རྒུད་རྒོད་པའི་ར་བར་ནས།།
ནམ་ཞིག་ལག་ནས་སུ་ཤོར་མི་ཤེས་ཀི།
ཉམ་ཐག་བྱིས་པ་མང་བོ་ལྟོགས་ནས་ཤི།།
ཕྱུགས་བདག་སྐྱེ་བོ་མང་བོ་སྨྱོས་ནས་ཤི།།
ཤི་སྟངས་མི་གཅིག་གནམ་འོག་འཚོ་བ་ལ།།
སྐྱེ་འཆི་གཉིས་ལ་ངོ་གསོ་གཏན་བྲལ་རེད།།
དགའ་དུས་དགོད་པ་ཚོར་བའི་འདེད་ཤུགས་རེད།།
སྡུག་དུས་ངུ་བ་སྐྱོ་བའི་སྨྲེ་སྔགས་རེད།།
དགའ་སྐྱོ་ཟུང་གི་བསྡུས་གཟུགས་ཕུང་བོ་འདི།།
མི་ཡུལ་ཁམས་ནས་སུ་ཡི་བྲན་དུ་ཡོད།།
རིགས་དང་རུས་པ་ཟེར་ནས་ཞེན་ས་ཞིག།
སྐད་དང་ཡི་གེ་ཟེར་ནས་བག་ཆགས་ཤིག།
གཅིག་ཉིད་མེད་ན་གཅིག་ཉིད་སྲུང་ཐུབ་མེད།།
འདི་གཉིས་ཡོད་ན་རིགས་ཀྱི་ཕྱུགས་ལགས་ཅི།།
སྐད་དང་རིགས་རུས་མང་བའི་ཐ་སྙད་ཀྱིས།།
འགྲོ་བ་མི་རྣམས་འཐབ་དང་རྩོད་པར་ཞུགས།།
དཀའ་ཚེགས་མང་བོ་སྐྱེ་ནས་འཆི་བར་བསྐྱལ།།
འཆི་བའི་རྗེས་སུ་འགྲོ་ཡུལ་གང་ཡིན་ནམ།།
དྲ་གྲོགས་ལགས། ཁྱེད་ཀྱི་དཔེ་དེབ་འདི་འདོན་སྤེལ་སྒྲུབ་བམ། ང་ལ་གནས་ཚུལ་འདི་ད་དུང་ཤེས་མ་བྱུང་། དཔེ་དེབ་འདི་བཀླག་པར་ཤིན་ཏུ་འདོད།
གྲོགས་པོ་ལགས།
དཔེ་དེབ་གསར་བ་འདོན་སྤེལ་བྱས་པ་ལ་དགའ་ནས་ཡོད་དོ།།