ལོ་སར་ཞེས་པ་ཆུང་བྱིས་པའི་རེ་ཞིང་སྒུག་པའི་དུས་ཚོད་གལ་ཆེན་ཞིག་དང་། བོད་གནའ་བོའི་སྲོལ་རྒྱུན་གྱི་འབྲེལ་ཐག་དམ་པོར་ཡོད་པའི་ཆོས་ལུགས་ཀྱི་མཆོད་ཁ་དང་སྲོལ་རྒྱུན་གྱི་དུས་སྟོན། ཆུང་བྱིས་པ་དག་གིས་རང་རང་ཆེས་དགའ་བའི་ཞིམ་པོའི་ཟས་དང་། མཛེས་པའི་གོས་གྱོན་པའི་དུས་ཤིག་རེད། དེ་ལ་དགའ་དགའ་སྐྱིད་སྐྱིད་བྱེད་པར་མདུན་པ་ཡོད་མཁན་དག་ལ་དེ་ལྟར་མ་བྱེད་ཅེས་ཞུ་བཞིན་མེད། བྱེད་པར་འཚལ་ལོ། ངས་འདི་ནས་རང་ཉིད་ཀྱི་ལས་ཞོར་དུ་ཉིན་འདི་དག་གི་རིང་དུ་བསམ་བློ་ཞིབ་ཚགས་མང་བོ་ཞིག་བཏང་བའི་མཐར་སྐད་ཆ་འདི་འདྲ་ཞིག་ཞུ་ན་འདོད་སོང་། རྒྱ་ལོའི་ལོ་སར་ཞེས་པ་འདི་ནི་དམིགས་བསལ་གྱིས་བོད་མདོ་སྨད་ཁུལ་གྱི་ལོ་སར་སྟངས་ཤིག་དང་འབོད་སྟངས་ཤིག་རེད། རྒྱ་ལོ་ཟེར་བ་དེ་ཡང་རྒྱ་རིགས་ཀྱི་ལོ་ཟླ་བརྩི་ཚུལ་ལ་དེ་ལྟར་བཏགས་པ་ཞིག་ཡིན་པ་འདྲ། ང་ལ་ཁུངས་ལུང་བཙན་པོ་མེད་ཀྱང་། ངས་དེ་རིང་ཁ་སང་ལས་ཞོར་དུ་དེ་ལྟར་བསམ་སོང་། ཞུ་བྱ་གཙོ་བོ་ནི་རྒྱ་ལོའི་ལོ་སར་གྱི་ཚེ་གཅིག་ཉིན། ཁྱིམ་ཚང་རེ་ནས་མཆོད་མེ་བརྒྱ་ཚར་རེ་ཁང་ཐོག་དུ་སྒྲོན་རོགས་ཞུ། དེ་ནི་མེས་པོ་གོང་མ་དག་གི་ཤུལ་རྗེས་ལ་ཡི་རུང་མཚོན་བྱེད་དང་། ལོ་སར་བའི་སྟ་གོན་ལ་ལམ་ལྷོང་དང་། དགའ་ཉེ་སྤུན་གྲོགས་དག་ལ་ཞི་བདེ་དང་རང་དབང་ཐོབ་ཆེད། མུན་ནག་ལྟ་བའི་འཇིག་རྟེན་འདི་སྒྲོན་མེ་ཞིག་གི་འོད་ཀྱིས་བཀང་བར་རེ་མདུན་སོགས་མཚོན་བྱེད་དུ། ད་དུང་གཞན་ཞིག་གི་ཆེད་དུ། ང་ཚོའི་ཆེད་དུ། ང་ཚོའི་མུན་ནག་ལྟ་བའི་སེམས་ཁོང་འདིའི་མུན་པ་སངས་པའི་ཆེད་དུ། གལ་སྲིད། ཁྱེད་ལ་མཆོད་མེ་འདི་དག་ཅིས་ཕྱིར་སྒྲོན་བཞིན་ཡོད་དམ་ཟེར་ན། ཁྱེད་ཀྱིས་དེ་ལ་འདི་ནི་ང་ཡི་འཛམ་གླིང་ཞི་བདེ་ལ་སྨོན་འདུན་མཚོན་པའི་ཉིས་སྟོང་བཅུ་གཉིས་ལ་སྒྲོན་པའི་འོད་ཟེར་ཞིག་གི་འབོད་པ་ཡིན་ཞེས་ལན་བཏབ་ནའང་མ་ཆོག་པ་ཅི་ཡང་མེད། མཐའ་མཇུག་འདིར། ངས་རྒྱ་ལོའི་ལོ་སར་ལ་མི་ཚང་རེ་ནས་མཆོད་མེ་བརྒྱ་རེ་སྒྲོན་པར་རེ་ཞིང་སྒུག་ནས་ཡོད། ངས་ས་མཐའ་ཞིག་ནས་ཞག་སྒྲོན་བརྒྱ་ཚར་ཞིག་སྒྲོན་ནས་ཞི་བདེའི་ཆེད་དུ་སྨོན་འདུན་ཞུ་ངེས་ཡིན།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།