ཁ་ལྕེ་མྱུར་བའི་དུས་ཚོད་ཙམ་ཞིག་མ་རེད།

བོད་ནང་དུ་མེ་མདའི་སྐད་སྒྲ་ཆད་མེད་དུ་གྱུར། མི་རོ་མང་བོ་ཇེ་མང་དུ་སོང་། ངུ་འབོད་ཁྲི་ཕྲག་གིས་བོད་ས་ཁོར་མོ་འགུལ་དུ་བཅུགས། ད་དུང་། རི་ཆུ་ནགས་གསུམ་གྱིས་བོད་ཡུལ་ཁམས་ལ་མྱ་ངན་བྱས། སྐབས་དེ་དང་བསྟུན་ནས་དུས་རབས་གློག་གི་དུས་འདི་ལ་དུས་རབས་ཀྱི་བརྡ་འཕྲིན་ཡོད་ཚད་ནས་བོད་ཀྱི་ཡི་གེ་ཡང་བཙོན་དུ་འཇུག་པའི་ལས་གཞི་སླར་ཡང་ལག་བསྟར་བྱས། བོད་དང་བོད་ཡིག་གི་རྣམ་ཤེས་ལ་གཏོར་ཞིང་རྒོལ་བའི་ལས་དབང་འདི་ལ། ད་ལྟ་མྱུར་སྐྱོབས་བྱེད་པའི་འགན་ངོ་མ་དེ་དག གནམ་འོག་འདི་ན་སུ་ལ་ཡོད་ཅེས་འདྲི་མཁན་ཞིག་བྱུང་བ་ཡིན་ན་ནི། ངས་འདི་ནས་དེ་ནི་བྱེས་སུ་བསྡོད་མཁན་གྱི་བོད་མི་རིགས་ཀྱི་མགྲིན་ཚབ་དུ་འདོད་པའི་བོད་མི་ཡོད་དོ་ཅོག་ལ་འཁྲི་བའི་ལས་འགན་ཞིག་ཡིན་ཞེས་བཤད་ན་འདོད་སོང་།

ལས་འགན་དེ་ཡང་འགོ་ནས་ཁྲིད་དགོས་པ་མ་ཟད། འགོ་ནས་བརྩམས་དེ་གཞུང་དང་སྒེར་བ་མེད་པར་བོད་མི་རིགས་ཀྱི་འཆི་གསོན་ལས་སྐྱོབས་པའི་འབོད་སྒྲ་འདི་དག་འཛམ་གླིང་མི་མང་གི་རྣ་བར་འཛུལ་ནས་སེམས་པའི་གཏིང་རོལ་ལ་ཟུག་རེག་བར་དུ། འགུལ་བསྐྱོད་བྱེད་དགོས་ཀྱི་འདུག དེ་ཡང་བོད་མི་འདུས་བསྡོད་ཀྱི་ཡུལ་གྲུ་གང་ས་ནས་བོད་མི་རིགས་སུ་སྐྱེ་བ་ལེན་མཁན་ཡོངས་ཀྱིས་ལས་འགན་གཅིག་དང་འདུ་ཤེས་གཅིག་པའི་རྣམ་རིག་དྲང་བོའི་སྒོ་ནས། མི་རིགས་ཤིག་སྐྱོབས་པའི་བདག་དབང་དེ་ཡང་མི་རིགས་རང་ཉིད་ལས་གཞན་སུ་ལའང་མེད་པའི་ཐོབ་ཐང་འདི་དག་གསལ་བོ་ངོ་སྤྲོད་བྱེད་དགོས་ཀྱི་འདུག སྐད་ཀྱི་གདངས་ནས། ཚེ་སྲོག་གི་གཏིང་ནས། སེམས་པའི་དཀྱིལ་ནས། ང་ཚོའི་རང་ཉིད་ཀྱི་འགོ་རྐང་རུས་གསུམ་གྱི་བདག་པོ་རང་ཉིད་ལས་གཞན་སུ་ཡང་མེད་པའི་ངེས་ཤེས་ཟབ་མོ་རྙེད་པ་དག་གིས་རྙེད་ལ་ཉེ་བ་དང་རྙེད་སྲིད་པའི་རིགས་ལ་བརྡ་སྐུལ་དང་ངོ་འཚང་འདྲི་བ་སོགས་ཀྱིས། ད་ལྟའི་དུས་ནི་བོད་མི་རིགས་གཉིད་ལས་སད་པ་དེ་ཙམ་མ་ཡིན་པར། རྨི་ལམ་དང་རེ་སྙེགས་ལས་ལག་ལེན་དང་གྲུབ་འབྲས་ལ་ཞུགས་པའི་དུས་ཚོད་ཏན་ཏན་ཞིག་དུ་འཁེལ་ཡོད་པའི་འདུ་ཤེས་མ་དོར་བར། ད་ལྟའི་བོད་ནང་གི་ཉེན་འཕྲེང་གི་ལས་འདི་ལས་སྐྱོབས་པའི་ལས་འགུལ་དང་བསྟུད་མར་ཤ་གཟད་རུས་ཐུག་ལ་སྤེལ་དགོས་པ་དེ་ནི་ལག་བརྡང་སྤྲེལ་ནས་སྤེལ་དགོས་པ་ལས། ཉིན་གཅིག་དང་དུས་ཚོད་གཅིག་གཉིས་ཤིག་གི་མི་རིགས་ཤིག་གི་གནད་དོན་སེལ་ཐབས་མེད་པ་ཤེས་པར་གྱིས་ཤིག བོད་ཀྱི་བྱེས་བསྡོད་སྤུན་ཟླ་བོད་མི་ཚོ། ང་ཚོས་རང་གིས་གདོང་ལ་བལྟས་དེ་རང་ཉིད་བོད་མི་ཡིན་པ་ཤེས་པར་གྱིས་ཤིག