ད་ལྟ་དེ་རིང་ནི་ཨེས་སུ་རལ་གྱི་རྒྱལ་ས་རྗོ་སུ་ལམ་གྱི་འགྲམ་གྱི་གྲོང་བརྡལ་ར་མོ་ཀྲི་ན། ངས་རང་གི་གཅེས་པའི་བུ་དང་བུ་མོ་ཁྱེད་གཉིས་ལ་རང་ཉིད་བོད་མི་རིགས་ཀྱི་ཉེན་འཕྲེང་གི་དུས་ཚོད་འདི་ཉིད་ལ་ཕོ་ཉྭ་ཞིག་བྱེད་དུ་འགྲོ་བར་སེམས་ཐག་བཅད་ཚར་བའི་རྗེས་ཡིན། ད་ལྟ་དགོང་མོའི་ཆུ་ཚོད་དགུ་དང་སྐར་མ་ཉེར་གཉིས་རེད། སྙིང་གི་གཅེས་ཕྲུག་མ། ཐར་མ་མཚོ། ཁྱེད་རང་གཉིད་དུ་གཡུར་ནས་ཆུ་ཚོད་གཅིག་སོང་ཡོད། ཁྱེད་ཀྱི་ནུ་བོ་ཁ་བའི་ལྷ་སྲས་ཨ་མའི་བང་དུ་བཟུང་ནས་གཉིད་འདུག་ལ། ཁྱེད་ཀྱི་ཨ་མ་དང་ཨ་མ་རྒན་མོ་གཉིས་ཀྱིས་བརྙན་འཕྲིན་ཐད་གཏོད་ལེ་ཚན་ཞིག་ལ་ཅེར་ནས་ཡོད།
ཕ་རྒན་ངས་འདི་ནས་ཁྱེད་མིང་སྲིང་གཉིས་ལ་སེམས་ཁོང་རུས་པའི་གཏིང་ནས་དགོངས་དག་ཞུ་བཞིན་ཡོད་ལ་ཞོར་དུ་འཕྲིན་ཡིག་ཐུང་ཐུང་བྲིས་ཡིན། དངོས་ནས་འཇིག་རྟེན་སྤྱིའི་འགྲོ་ལུགས་ལ་གུས་པ་ཡོད་པའི་ཕ་རྒན་ཞིག་གི་ངོས་ནས་བཤད་ན་ངས་དེ་རིང་ཁྱེད་གཉིས་ལ་ཁྲེལ་མེད་བྱས་ཡོད་ལ། ཁྱེད་གཉིས་ལ་འགན་འཁུར་མེད་པ་བདེན་པ་ཡིན། འོན་ཀྱང་། ང་རང་འོང་སའི་མི་རིགས་བོད་ཡིན་པ་དང་། ཕ་རྒན་ང་རང་དེང་ཐོག་རྒྱ་གར་ལ་བཙན་བྱོལ་དུ་ཡོང་དོན་ཡང་བོད་མི་རིགས་ཀྱི་དོན་དུ་ཡིན་ཟེར་ན་ཆོག་ན་ཡང་། བར་སྐབས་ནས་དོན་དག་ཆེས་མང་བོ་ཞིག་དང་འཕྲད་དེ། ད་ལྟ་བར་དུ་ང་ལ་འཚམ་པའི་ལས་འགུལ་ཞིག་མ་སྤེལ་ཐབས་མེད་ཀྱི་དུས་ཚོད་དེ་འདྲ་སླེབས་མེད་པ་མ་ཡིན་ཡང་། སེམས་ཐག་མི་གཅོད་ཐབས་མེད་ཀྱི་གནས་འདི་འདྲ་ལ་ཐུག་མྱོང་མེད་ལ། དེ་འདྲའི་དུས་ཚོད་དང་རན་པོ་ཡོད་པའི་མི་རིགས་ཀྱི་འཐབ་རྩོད་ཀྱི་དུས་ཚོད་ཅིག་མ་མཐོང་མོད། ད་ལྟ་ནི་དུས་ལ་བབ་ཡོད་པར་ངས་ཡིད་ཆེས་བྱེད་ཀྱི་ཡོད།
དེ་རིང་ནི་ཕ་རྒན་ངས་རང་ཉིད་བོད་མི་ཞིག་ཡིན་པའི་འགན་བླངས་དེ་བོད་མི་རིགས་སྐྱོབས་པའི་ཞི་འབོད་དོན་ཚན་ལྔ་ཡོད་པ་ཞིག་འཁུར་ནས་ཕྱིར་རྒྱ་གར་དུ་སོང་ནས་བོད་མི་རིགས་ལ་རང་དབང་མ་ཐོབ་བར་དུ། རང་ཉིད་ཀྱི་ཚེ་སྲོག་བདེན་དབུང་དུ་བཞག་ནས་གོམ་བགྲོད་བོད་ལ་ཁ་ཕྱོགས་དེ་བྱེད་རྩིས་ཡིན། དེ་ཡིན་དུས་བུ་མོ་ཐར་མ་མཚོ་ཁྱེད་རང་ད་ལྟ་ལོ་གཉིས་དང་ཟླ་བདུན་ཙམ་ཡིན་ལ། བོད་སྐད་བཤད་མི་ཤེས་ཀྱང་། ཕ་རྒན་ངས་བཤད་པ་ཕལ་ཆེ་བ་ཞིག་གོ་ཡི་ཡོད་པ་དེ་ཡི་ཕ་རྒན་ང་ལ་དགའ་བདེ་ཚད་མེད་སྟེར་མྱོང་ཡོད། ལྷག་དོན་དུ་ཁྱེད་རང་ལ་ངས་མུ་མཐུད་དུ་བོད་སྐད་སློབ་མ་ཐུབ་པར་ང་རང་འདི་ལྟར་ལམ་དུ་མི་ཆས་ཐབས་མེད་ཆགས་དོན་ནི། བོད་མི་རིགས་ལ་ང་དང་འདྲ་བར་བཤད་ལ་དགའ་བའི་མི་མང་བོ་ཡོད་པ་ལས། ལག་ལེན་བསྟར་བའི་མི་ཉུང་སྟབས། ང་རང་གི་འགོ་བཙུགས་ནས་ཁ་ཞེ་མཚུངས་པའི་ལམ་ཞིག་མི་སྟོན་ཐབས་མེད་རེད། གཅིག་བྱས་ན། ངས་བསམ་བློ་བཏང་བ་དེ་དག་ནོར་འཁྲུལ་ཡིན་ཡང་སྲིད་ཀྱང་། ང་ལ་ཡིད་ཆེས་ཡོད། བོད་མི་རིགས་འདི་ལ་ཤེས་རབ་དང་བློ་གྲོས་ཡོད། སྤོབས་པ་དང་ཡོད། སྙིང་སྟོབས་ཡོད། འདི་དག་ནི་ང་ཡི་ཡིད་ཆེས་ཡིན་དུས། ཁྱེད་སྤུན་གཉིས་འཚར་ནས་འོང་དུས། ད་གཟོད་ཕ་རྒན་ངའི་དམ་བཅས་པའི་སྒྲུབ་བྱ་འདིའི་ཕ་རོལ་ཞིག་མཐོང་བར་ཡིད་ཆེས་ཡོད།
སྙིང་གི་གཅེས་པའི་བུ་མོ་ཐར་མ་མཚོ་ལགས། ཁྱེད་རང་འཚར་ལོངས་བྱུང་དེ་འོང་དུ། ཕ་རྒན་ཟེར་ནས་འབོད་ས་མེད་དུས་སུ། ཁྱེད་རང་ལ་ཁྱེད་ཀྱི་མ་རྒན་གྱིས་དེ་རིང་ངས་འདི་ལྟར་ཁྱེད་ཚོ་སྐྱུར་ནས་སོང་བའི་གཏམ་རྒྱུད་ཅིག་བཤད་ངེས་ཡིན་ལ། དེ་དུས་ཁྱེད་ཀྱི་མ་རྒན་གྱིས་གང་གསུང་ན་དེ་དག་ཚང་མ་བདེན་པ་ཡིན་ངེས་རེད་ལ། ཁྱེད་རང་གི་མ་ལོའི་ཁྱེད་མིང་སྲིང་གཉིས་ལ་བདག་སྐྱོང་བྱས་ནས་མི་གྲལ་དུ་བཅུགས་པ་ཡིན་དུས། ཁྱེད་དང་ནུ་བོ་ཁ་བའི་ལྷ་སྲས་གཉིས་ཀྱིས་རང་གི་དྲིན་ཆེན་མ་ལོ་ལ་བདག་པོ་ཡག་པོ་ཞིག་རྒྱགས་ཞོར། མི་ཚེ་འདིའི་ནང་དུ་འགྲོ་བ་མིའི་རང་དབང་ལ་མནར་གཅོད་གཏོང་མཁན་གྱི་རིགས་ལ་ངོ་རྒོལ་བྱེད་པའི་མིང་སྲིང་གཉིས་ཆགས་པར་རེ་བ་དང་ཞོར་དུ། ཕ་རྒན་ངས་ཁྱེད་གཉིས་འདི་ལྟར་བོད་མི་རིགས་ཀྱི་ཕོ་ཉྭ་ཞིག་བྱེད་པའི་ཆེད་དུ་སོང་བ་དེར་སེམས་གཏིང་ནས་འགྱོད་གཤེགས་ཡོད་ལ། གལ་སྲིད། སྟབས་ལེགས་ནས་བོད་དོན་བདེན་མཐའ་གསལ་ནས་ཕ་རྒན་ང་གསོན་ནས་བསྡད་ན། ངས་ཁྱེད་གཉིས་གཙོ་བའི་འགྲོ་བ་དག་གི་ཆེད་དུ་ལས་ཀ་ཞིག་བྱེད་ཁོ་ཐག་ཡིན་པ་སེམས་ལ་འཛིན་པར་ཞུ། སྙིང་ནས་གཅེས་པའི་བུ་མོ་ཐར་མ་མཚོ་དང་བུ་ཆུང་ཁ་བའི་ལྷ་སྲས་ལགས།
གཅེས་པའི་ཁ་བའི་ལྷ་སྲས་ལགས། ད་ལྟ་ཁྱོད་རང་སྐྱེ་ནས་ཟླ་ངོ་དྲུག་བདུན་གཅིག་གི་སོང་མེད་ལ། ཨ་ཕ་ཟེར་ནས་འབོད་ཐུབ་པ་ཕར་ཞོག ཨ་ཕ་སུ་ཡིན་ཡང་ཡག་པོ་མི་ཤེས་ཚད་འདིར་ངས་ཁྱེད་རང་སྐྱུར་ནས་འགྲོ་བཞིན་ཡོད་པ་རེད། ཁྱོད་རང་འགྲོ་བ་སྤྱི་མཚུངས་ལྟར་ག་ལེར་ཆེན་པོ་ཆགས་ནས་འོང་དུས། ཕ་རྒན་ཟེར་ནས་འབོད་ས་ཞིག་མེད་པ་དང་། ཕ་རྒན་ཟེར་ནས་སྟོན་རྒྱུ་མེད་པའི་དུས་དེ་ལ་ཁྱོད་ཀྱིས་རང་གི་ཨ་མ་ལ་ང་རང་གང་དུ་སོང་མིན་སྐོར་ཏན་ཏན་འདྲི་ངེས་ཡིན། དེ་དུས་ངའི་རེ་བ་ལ་ཁྱོད་རང་གི་མ་རྒན་གྱིས་ང་རང་བོད་མི་རིགས་ཀྱི་རང་དབང་དང་ཞི་བདེ་ཡི་ཆེད་དུ་ཁྱོད་རང་སྐུར་ནས་བུད་སོང་བ་རེད་ཅེས་བཤད་དུས། སྐབས་དེར་ཁྱོད་རང་གིས་མི་རིགས་ཟེར་ན་ཅི་ཞིག་ཡིན་པ་དང་རང་དབང་ཟེར་ན་ག་འདྲ་ཞིག་ཡིན་མིན་ཡང་མི་ཤེས་པའི་ཚད་ཅིག་ཏན་ཏན་ཡིན་སྲིད། འོན་ཀྱང་། ཁྱོད་རང་ཆེན་པོ་ཆགས་ནས་འོང་དུས་ཟླ་ངོ་དྲུག་མ་ཟིན་ཙམ་ལ་མ་གཏོགས་ཁྱོད་རང་གི་འགྲམ་དུ་བསྡོད་མ་ཐུབ་པའི་ཕ་རྒན་ལ་ཁོང་ཁྲོ་ཟ་སྲིད་ལ། གཅིག་བྱས་ན་སྤོབས་པའང་སྐྱེ་སྲིད། གང་ལྟར། ངའི་རེ་བ་ལ་ཁྱོད་རང་ཆེན་པོ་ཆགས་རྗེས། འགྲོ་བ་མི་ཞེས་པའི་ཚད་གཞི་ལ་གཙུག་དུ་བཀུར་ནས་གང་དུ་ཞི་བདེ་དང་རང་དབང་ལ་གོད་ཆག་བྱུང་གི་ཡོད་ཚེ། དེ་ནས་འགྲོ་བ་མིའི་ཞི་བདེ་དང་རང་དབང་གི་ཆེད་དུ་ལས་ཀ་རེ་བྱེད་པར་སྨོན།
ད་ནི་ངས་འདི་ནས་སྐད་ཆ་མང་བོ་མང་བོ་ཞིག་ཁྱོད་གཉིས་ལ་འདི་ནས་བྲིས་ཀྱང་། ཁྱོད་གཉིས་ཆེན་པོ་ཆགས་དུས་སུ་ཡི་གེ་འདི་ཁྱོད་གཉིས་ཀྱིས་ཀློག་ཐུབ་ཀྱི་ཡོད་མེད་གང་ལྟར་ཡང་། ཉི་མ་དེ་རིང་ནས་བཟུང་། ཁྱོད་གཉིས་ཀྱི་འགྲོ་འདུག་སྤྱོད་ཀྱི་བདག་ཡོད་ཚད་ངས་ཁྲིམས་ཐོག་ནས་ཁྱོད་གཉིས་ཀྱི་མ་ལོ་སྤྲད་ཡོད་པ་སེམས་ལ་བཟུང་ནས། བརྩེ་བའི་དྲིན་ཆེན་མ་ལོ་ལ་བྱམས་ཀྱིས་སྐྱོང་རོགས་ཞུ། བྲིས་ན་རྫོགས་མཐའ་མེད་པའི་སྐད་ཆ་མང་བོ་ཞིག་ཡོད་ཀྱང་། མཐའ་དོན་ཁྱོད་གཉིས་ཀྱི་འཚར་ལོངས་ཁྲོད་དུ་དཀའ་ངལ་མེད་པར་སྨོན་འདུན་ཡོད་ལ། ཕ་རྒན་ང་ཁྱོད་གཉིས་ལ་སེམས་གཏིང་ནས་བརྩེ་བ་ཟབ་མོ་ཡོད་པ་རྫུན་མིན་ཞེས་ཕ་རྒན་གླིང་ཚ་ཚེ་བརྟན་རྡོ་རྗེ་ནས། ༢༨།༢།༡༢
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
བུ་བུ་མོར་སྙིང་གཏམ་བཤད་ས་མ་དགོས།།
སྐྱེས་ཕོ་མོའི་སྐྱེ་སྒོ་འགོག་མཁན་ཞིག་ལ།།
ཕ་བུ་ལོའི་བར་ལ་ཇུས་དོགས་མེད་རུང་།།
མིག་མཆི་མས་དབང་མེད་མཁུར་མགོ་བརྒྱུད་ཐལ།།
སེམས་འགུལ་ཐེབས་པའི་འཕྲིན་ཡིག་འདིའི་ང་སླར་ཡང་བསམ་གཞིགསཀྱི་འཆིང་རྒྱར་ལྷུང་། ངོ་མ་བཟང་གི
བོན་རྒྱ་ཟེར་བ་ལགས། ཁོས་བོད་དོན་ལ་ཁ་གཡར་ནས་ཆུང་མ་དེ་དང་ཁ་ཁ་བྱེད་འདོད་ཀྱིན་པ་དེ་རེད། ཁོས་དེ་སྔོན་ཞིག་ནས་ཆུང་མ་དེ་དང་ཁ་ཁ་བྱེད་འདོད་པའི་རྣམ་འགྱུར་མང་བོ་ཞིག་བསྟན་ཡོད་ཀྱང་། ཁ་གཡར་ས་མ་རེགས་ནས་ད་བར་ལྷག་པ་རེད། མྱི་ངན་འདི་ལ་ལས་རྒྱུ་བཅའ་རྒྱུ་ངོ་མ་མང་གི ཆུང་མ་གཡུག་ཐུབ་སོང་ན། དེ་ནི་ཁོས་པ་ངོ་མ་དེ་འགྲུབ་སོང་བ་རེད། བོད་དོན་ནི་ཁ་ཙམ་དང་ཆུང་མ་གཡུག་བྱེད་ཀྱི་ལག་ཆ་ཙམ་རེད།
(མཇུག་དེ་ག་རང་མཐུད་ཐུབ་པ་)མཇུག་དེ་གར་མཐུད་མ་ཐུབ་པ
(ཡིན་ནའང་། ཟིན་ཏུ་བསམས་ན་)ཡིན་ནའང་། ཞིབ་ཏུ་བསམས་ན། ཞེས་སུ་བཅོས་རོགས།
གྲོགས་ཤ་དང་ཁྲག་ད་དུང་རུས་པ། ཡང་ན་ལྷ་དང་ཀླུ་ད་དུང་གཉན། ལུས་དང་ངག་ད་དུང་ཡིད་ལགས། ཁྱེད་འདི་ལྟར་ཆོད་སེམས་བརྟན་པོས་ལམ་ལ་ཆས་པ་དེ་ནི་བློ་ཡིད་ལས་བརྒལ་བའི་གནས་ཚུལ་ཞིག་རེད། མ་གཞི་ནས་ཁྱོད་ལ་འུ་ཚུགས་ཆེ་ནི་རེད། བསམས་ནོ་དེ་ལས་དགོས་པ་མ་ཟད་ལས་ནས་མྱངས་དགོས་པ་དེ་ནི་ཁྱོད་ཀྱི་འདས་ཟིན་པའི་གཏམ་རྒྱུད་ལས་ཚུར་སྣང་ཐུབ་པ་ཞིག་རེད། དེའི་པྱིར་ཕལ་ཆེར་ཁྱོད་བཀགས་ནའང་ཁོག་རྒྱུ་མ་རེད། ཡིན་ནའང་། བོད་སྐྱོད་ཀྱི་ལས་འགུལ་འདི་འདྲ་སྔོན་ཆད་ཡང་ཐེངས་མང་བརྩམས་པ་མ་ཟད་ཞི་རྒོལ་ཆེན་མོའི་སྔ་གཞུག་ལའང་ཐེངས་ཁ་ཤས་ཆས་པ་རེད། བྲོས་ནས་སོང་ནའང་མ་ཐར་བ་རེད། དེའི་ཕྱིར་ཁྱོད་ཀྱང་ཐར་ཁེགས་པོ་ཡིན་རྒྱུ་རེད། སྤྱིར་ན་ལས་ཀ་མགོ་རྩོམ་རྒྱུ་གལ་ཆེན་རེད། མཇུག་དེ་ག་རང་མཐུད་ཐུབ་པ་དེ་སྔོན་གྱི་སྐྱེས་བུ་དམ་པ་རྣམས་ལའང་ཤིན་ཏུ་མང་བ་མ་ཟད། སློབ་དཔོན་ཟམ་གདོང་རིན་པོ་ཆེས་ཀྱང་བདེན་པའི་འུ་ཚུགས་ཀྱི་ལས་འཆར་ཚུན་ཆད་བྲིས་གནང་ཡོད་པ་རེད། ཡིན་ནའང་། ཐ་མར་འདིར་ལྟར་ལྷག་པ་རེད། ཁྱེད་ཀྱིས་ཀྱང་འདིར་ལྟར་ས་བསྒྲགས་གནམ་བསྒྲགས་བྱས་པ་དེ་ནི་ནོར་འཁྲུལ་ཅི་ཡང་མ་རེད། དེ་ནི་གངག་བསམ་དྲང་བོར་སྨྲས་པའི་བདེན་རྟགས་ཤྀག་ལས་ཅི་ཡང་མ་རེད། དེའི་ཕྱིར། ལས་འགུལ་དེ་མགོ་རྩོམ་རྒྱུ་ཡིན་ནའང་། མཇུག་བདེ་བླག་ངང་བསྡུ་རྒྱུ་དང་གླེན་རྟགས་མི་སྟོན་རྒྱུ་གལ་ཆེན་རེད། སྲོག་གཏོང་བ་ཙམ་ནི་དཔའ་བོ་ཅི་ཡང་མ་རེད། མི་ཅོལ་ཆུང་དག་གིས་སྲོག་མང་བ་གཏོང་གི་རེད། དཔེར་ན། ཕོ་མོའི་འདོད་བརྩེ་ཙམ་གྱི་ཆེད་དུའང་སྲོག་བཏང་བའི་མི་གྲངས་མེད་ཅིག་གནམ་འོག་འདིར་ཡོད་པ་རེད། དེ་དག་ལའང་རང་རང་གི་ཚོད་ཀྱི་བདེན་ལུགས་ཡོད་པ་རེད་ལ། གནོན་དཀའ་བའི་ཚོར་བའང་ཡོད་པ་རེད། ཡིན་ནའང་། ཟིན་ཏུ་བསམས་ན་དེ་ནི་གླེན་རྟགས་ལས་ཅི་ཡང་མ་རེད། སྲོག་གཏོང་བ་དེའང་སྤྲུལ་སྐུ་བསོད་བྷོ་ནང་བཞིན་སེམས་བསྐྱེད་ཀྱི་རྩིས་ཟིན་ནས་བཏང་ན་འདི་ཕྱི་གཉིས་ལ་ཡོད་པ་དང་དགེ་བ་ཞིག་རེད་དེ། དེ་འདྲ་དཀའ་རྒྱུ་རེད། དེའི་ཕྱིར་བོད་ཕྱི་ལོགས་ནས་མི་སྲོག་བཏང་ན་དེ་ལ་ངོས་ནི་སྙིང་བོ་ཞྀག་མཐོང་གི་མི་འདུག དེ་ལས་དོན་ཕན་ལྡན་པའི་ལས་འགུལ་རླབས་ཆེན་གཞན་ཡོད་རྒྱུ་རེད། དཔེར་ན། དེང་སང་ཤིང་བཟའ་རིན་པོ་ཆེ་སོགས་ཀྱི་ལས་འགུལ་དེ་འདྲའི་ནང་འཛུལ་ཞུགས་ཐུབ་ན་རླབས་ཆེན་རེད་ལ། དགོས་ངེས་ཀྱང་རེད། སྤྱིར་ན་ཁྱོད་འདིར་ཐོན་ན་མཉམ་འཛོམས་ཤིག་བྱུང་རྒྱུ་རེད། དེ་དུས་ཁ་བརྡ་བྱེད་དགོས་བསམས་ནས་ཡོད་དེ། དེ་རིང་འདི་འདྲ་ཞིག་ཤོར་སོང་། རྡ་སར་བསླེབས་ན་ངེས་པར་འབྲེལ་བ་ཞིག་གནོངས་དང་ག་ལེར་ཁ་བརྡ་བྱེད་དགོས།