ང་རང་གི་ཞི་བའི་གོམ་བགྲོད་འདི་འགོ་བཙུགས་སྟེ་ཉིན་གྲངས་ཁ་ཤས་ཤིག་ལས་མ་སོང་བའི་མཚན་མོ་ཞིག་ལ་རྒྱ་གར་བུད་མེད་ཅིག་གིས་ང་ལ་ཁ་པར་འབྱོར། ཁོ་མོས་ང་ལ་ཁྱོད་རང་བོད་བསྐྱོད་གོམ་བགྲོད་པ་ཚེ་བརྟན་རྡོ་རྗེ་ཡིན་ནམ་གསུངས། ཡིན་ཞེས་ལན་བཏབས་དུས། ང་རང་ལ་ཁྱེད་མ་བུ་གསུམ་གྱི་ཞི་བའི་འཐབ་རྩོད་འདི་ལ་རྒྱབ་སྐྱོར་ཡོད་པ་མ་ཟད། ད་དུང་། ཁོ་མོས་ཞལ་འདེབས་འབུལ་འདོད་ཡོད་ན་ཇི་ལྟར་འབུལ་དགོས་མིན་གྱི་སྐོར་ནས་ང་ལ་ཡང་དང་བསྐྱར་དུ་བཀའ་འདྲི་ཞུས་པའི་ལན་དུ། ངེད་མ་བུ་གསུམ་ལ་གནས་སྐབས་རིང་ཟས་སོང་སོགས་ཀྱི་དཀའ་ངལ་གང་ཡང་མེད་པའི་སྐོར་ཁོ་མོ་ལ་ཞུས་དུས། ཁོ་མོས་ང་ལ་དཀའ་ངལ་ག་དུས་འཕྲད་ན་ཁོ་མོའི་ཁ་པར་སྒོ་ཆུ་ཚོད་ཉེར་བཞིའི་རིང་དུ་ང་ཚོ་ལ་ཕྱེ་ཡོད་གསུངས་སོང་།
ངས་ཁོ་མོ་ནི་ངོ་མི་ཤེས་ལ། ཁོ་མོས་ང་ཡང་སྔོན་ཆད་གཏན་ནས་མཐོང་མྱོང་མེད་པ་མ་ཟད། ངའི་ཕ་མ་ཉེ་དུ་སུ་ལའང་འབྲེལ་བ་མེད་པ་ཞིག་ཡིན་དུས། ང་རང་གིས་ཁོ་མོས་ཕྱོགས་ལ་དོ་སྣང་གང་ཡང་མ་བྱས་པར་བཞག་པ་ཡིན། རྒྱ་གར་རྒྱལ་ས་ལྡི་ལི་ལ་འབྱོར་རེག་བར་དུ་ཁོ་མོས་ང་ལ་ཁ་པར་ཐེངས་མི་ཉུང་བ་ཞིག་ལ་འབྱོར་བ་དང་ང་ཚོའི་སྐོར་ལ་སེམས་ཁྲལ་དང་རྒྱབ་སྐྱོར་ཡོད་པའི་སྐོར་ཡང་དང་བསྐྱར་དུ་གླེང་དེ་འོང་བ་མ་ཟད། ང་རང་གི་ཁ་པར་གྱི་སྐུད་ལམ་ས་མཚམས་བརྒལ་ཡོད་པ་ཤེས་ནས་ནང་དུ་སྒོར་མོ་ཕྱིར་ཉིན་དེར་བཏང་འདུག ཉིན་དེར་ཁོ་མོས་ང་ལ་ཁ་པར་འབྱོར་དུས་སུ་ང་ཚོའི་འགྲམ་དུ་མི་ཆེས་མི་ཉུང་བ་ཞིག་ཡོད་སྟབས་ངས་ཁོ་མོ་ལ་ཁ་པར་རྒྱུད་དེ་བཀའ་དྲིན་ཆེ་ཡག་པོ་ཞིག་ཡང་ཞུ་ཐུབ་མ་སོང་། དེ་ཉིན་དེ་རུ་འབྱོར་བའི་བུད་མེད་ཅིག་གིས་ང་རང་གི་ཚབ་བྱས་སྟེ་ཁོ་མོ་ལ་སྐད་ཆ་བཤད་དུས། ཁོ་མོས་རང་གི་བཟའ་ཟླའི་མ་རྒན་ཅུང་ན་བཞིན་ཡོད་སྟབས་གང་མགྱོགས་ང་ཚོ་ལ་བལྟ་རུ་ཡོང་མ་ཐུབ་ཀྱང་། ང་ཚོ་ལྡི་ལིར་འབྱོར་ན་ཁོ་མོའི་ཚབ་དུ་མི་ཞིག་ང་ཚོ་ལ་ཐུག་འཕྲད་བྱེད་དུ་གཏོང་གི་ཡིན་གསུངས་འདུག
ང་ཚོ་ལ་ལམ་བར་དུ་དེ་འདྲའི་དཀའ་ཚེགས་མང་བོ་ཞིག་མ་འཕྲད་པར་ལྡི་ལི་བོད་གཞིས་བསམ་ཡས་གླིང་དུ་ཉིན་གྲངས་ཉེར་གཅིག་གི་ཕྱི་དྲོར་འབྱོར་ནས། ཉིན་གཅིག་གི་ལས་རིམ་ཁ་ཤས་ཤིག་གོ་སྒྲིག་བྱས་སྟེ་བཞག་ཡོད་པ་ཡོངས་སུ་མཇུག་སྒྲིལ་ལ་ཉེ་བའི་ཕྱི་དྲོ་ཁོ་མོས་ང་ལ་མི་རིང་བར་གཞིས་སྒར་བསམ་ཡས་གླིང་དུ་ང་ཚོ་ལ་ཐུག་འཕྲད་བྱེད་དུ་འབྱོར་ངེས་ཡིན་ཞེས་ཁ་པར་འབྱོར།
ཁོ་མོ་ད་ལྟ་ལྡི་ལི་གནམ་ཐང་དུ་ཡོད་གསུངས་སོང་། ཁོ་མོ་དུས་རྒྱུན་གཞུགས་ཡུལ་རྒྱ་གར་ལྷོ་ཕྱོགས་ཅལ་ནེས་ཟེར་ས་རེད་འདུག
ང་ཚོ་མ་བུ་གསུམ་ཨེ་ཤ་ཡ་རང་དབང་རླུང་འཕྲིན་ཁང་གི་ཡན་ལག་ལས་ཁུངས་ཤིག་ལྡི་ལིར་ཡོད་པ་དེར་བཅར་དགོས་བྱུང་སྟབས། ང་ཚོ་བསྡོད་སའི་བསམ་ཡས་གླིང་གི་བོད་དགོན་འབྲས་སྤུངས་སྔགས་པ་གྲྭ་ཚང་གི་ཁྱམས་རྭ་ནས་ང་ཚོའི་ཚབ་དུ་མི་ཞིག་ཁོ་མོ་འབྱོར་ན་སྣེ་ལེན་བྱེད་རོགས་གནོང་ཟེར་ནས་སྒུག་བཅུགས་པ་ཡིན། ཆུ་ཚོད་གཅིག་ཏག་ཏག་གི་ཁ་པར་རྒྱུད་ནས་བཅའ་འདྲི་བྱེད་པའི་ལེ་ཚན་ཚར་མ་ཐག་ང་ཚོ་ཕྱིར་ཕྱིར་བསྡོད་གནས་སུ་འབྱོར་དུས། ཁོ་མོ་ང་ཚོ་ཉལ་སའི་ནང་གི་གདན་ཞིག་གི་སྒང་དུ་བསྡད་དེ་ང་ཚོ་ལ་སྒུག་འདུག ང་ཚོ་མཐོང་མ་ཐག་ལྷད་མེད་ཟོལ་བྲལ་གྱི་འཛུམ་མདངས་ཤིག་དང་བཅས་ང་ཚོ་རེ་རེ་ལ་འཐམ་ནས་མིག་ཆུ་ཤམ་ཤམ་དུ་བཞུར་ཞོར་འཚམ་འདྲི་གནང་སོང་། ངས་ཁ་པར་ལས་ཁོ་མོས་རང་ཉིད་ཀྱི་མིང་ལ་ཨ་ནེ་ཨ་ཤ་ཟེར་ནས་འབོད་ཀྱི་ཡོད་གསུངས་དུས། ངའི་མིག་ལམ་དུ་ཤར་ནས་འོང་བ་ནི་རྒྱ་གར་གྱི་བུད་མེད་ཤ་རྒྱགས་པ་དེ་འདྲ་ཞིག་ཤར་མྱོང་ནའང་། དེ་རིང་མི་ངོ་མ་མཇལ་དུས་ང་རང་དངོས་ནས་ཧ་ལས་སོང་། གཞོན་ཉམས་དོད་ལ་མཛེས་སྡུག་ཡིད་འོང་གི་གཤིས་ཀ་ལྡན་པའི་བུད་མེད་ཅིག་ང་ཚོའི་མིག་འདུན་བླངས་འདུག
ང་ཚོས་ཕན་ཚུན་ལ་གཏམ་གླེང་མི་ཉུང་བ་ཞིག་བྱས་རྗེས་སུ། ངས་ཁོ་མོ་སང་ཉིན་ང་ཚོ་དང་མཉམ་དུ་གོམ་བགྲོད་ལ་ཉིན་གཅིག་རིང་དུ་མཉམ་ཞུགས་བྱེད་མཁན་ཡིན་པ་ཤེས་སོང་ལ། ཁོ་མོས་ང་ཚོ་ལ་ལམ་བར་གྱི་འགྲོ་གྲོན་བྱེད་རོགས་གནོང་གསུང་ནས་ཧིན་སྒོར་ཉིས་ཁྲི་ལྔ་སྟོང་ལག་ཐོག་དེ་ནས་གནང་དུས་ངས་ད་ལྟ་མི་དགོས་པར་ཞུས་ཀྱང་ངོ་ཟློག་ཐུབ་མ་བྱུང་། ཁོ་མོ་༧གོང་ས་མཆོག་ལ་ཧ་ལས་པའི་དད་གུས་ཡོད་པའི་བུད་མེད་ཅིག་རེད་འདུག བོད་དགོན་དེ་ཡི་ནང་གི་༧གོང་ས་མཆོག་གི་སྐུ་པར་མདུན་ནས་ཁོ་མོས་འགོ་བྱས་སྟེ་ངེད་གཉིས་ཀྱིས་མཉམ་དུ་གངས་རི་རྭ་བའི་སྐོར་བའི་ཚིག་བཅད་དེ་མཉམ་གཅིག་དུ་བཏོན་པ་ཡིན།
ཕྱིར་ཉིན་ཞོགས་པ་དུས་ཚོད་བཟོས་པ་ལྟར་ཁོ་མོ་ཡང་ལྷ་ཁང་གི་ཁྱམས་རྭ་ང་ཚོ་ཡོད་སར་འབྱོར་ནས་ཞོགས་ཇ་སྟབས་བདེ་ཞིག་གོ་སྒྲིག་བྱས་སྟེ་བཞག་ཡོད་པ་དེ་ལ་རོལ་རྗེས་སུ། ང་ཚོ་བོད་པ་ཁ་ཤས་ཤིག་གི་བསྐྱེལ་མའི་ཁྲོད་དུ་ལམ་དུ་ཆས་པ་ཡིན། ཚ་བ་ཧ་ཅང་ཆེ་བའི་ཉིན་མོ་འདི་ལ་ཁོ་མོ་ང་ཚོ་དང་འགྲོགས་ནས་སྤྱི་ལེ་ཉི་ཤུ་མ་ཟིན་ཙམ་གྱི་ས་ལ་སླེབས་རྗེས། ཁོ་མོ་ལ་ཡང་དང་བསྐྱར་དུ་ཁ་པར་འབྱོར་ནས་བོད་མི་ཞིག་ཁོ་མོ་ལེན་དུ་ཡོང་གི་ཡོད་རབས་ཀྱི་ཁ་པར་འབྱོར། ཉིན་གུང་ཆུ་ཚོད་གསུམ་པའི་རྒྱབ་དུ་ཁོ་མོ་བསུ་རུ་འོང་བའི་མི་ཡང་སླེབས། ཁོ་མོས་ང་ཚོ་རེ་རེ་ཡི་སྐེ་རུ་འཐམ་ནས། ང་ད་ལྟ་རང་གི་ཡུལ་དུ་འགྲོ་བཞིན་ཡོད་པ་རེད། ཁྱེད་ཚོ་ཡང་རང་གི་ཡུལ་དུ་ལོག་བཞིན་ཡོད་པ་རེད། ང་རང་གི་ལུས་པོ་ཁྱེད་ཅག་དང་འགྲོགས་སྟེ་འགྲོ་མ་ཐུབ་ཀྱང་སེམས་པ་དུས་ནམ་ཡང་ཁྱེད་ཅག་དང་ལྷན་དུ་ཡོད་གསུངས་སྟེ་ལག་ཟུང་སྙིང་གར་སྤྱར་ཞོར་དུ་ཕེབས་སོང་།
ང་ཚོས་ཟ་མ་ཞིག་ཟ་བའི་སྐབས་སུ་ངེད་གཉིས་ཀྱིས་ད་ལྟའི་བོད་ཕྱི་ནང་གི་སྐོར་ནས་གཏམ་གླེང་བྱས་དུས་སུ། མོ་རང་གི་མིག་ཆུ་ཤམ་ཤམ་དུ་བཞུར་ནས་འོང་བ་མཐོང་དུས་ངས་བཤད་མཚམས་བཞག་པ་ཡིན། ཁོ་མོས་རང་ཉིད་ལ་སྐུ་གཤེགས་དབའ་བོ་འཇམ་དཔལ་ཡེ་ཤེས་ཀྱི་གཟིམ་ཤག་དུ་བཅར་སྐབས་རེག་པའི་དབའ་བོ་འཇམ་དཔལ་ཡེ་ཤེས་ལགས་ཀྱི་སྐེ་འདོག བོད་ཀྱི་ས། ངའི་ཕ་ཡུལ། ངའི་རྒྱལ་ཁབ་ཞེས་པའི་བོད་ཀྱི་ས་ཁྲ་ཡོད་པ་ཞིག་མིག་ཆུ་དང་མཉམ་དུ་ང་ཡིས་སྐེ་རུ་བཏགས། དེ་རྗེས་སུ་ངའི་བརྩེ་བའི་མ་ལོ་ལ་ཁོ་མོའི་ལུས་དང་བྲལ་མ་མྱོང་བའི་སྒྲོལ་མའི་སྐུ་འདྲ་ཡོད་པའི་སྐེ་འདོག་ཞིག་ཁོ་མོའི་སྐེ་ནས་བླངས་སྟེ་ངའི་མ་ལོ་ལ་སྤྲད། ངའི་ནུ་མོ་ལ་༧གོང་ས་མཆོག་གི་སྐུ་པར་ཡོད་པའི་བྲང་འདོག་ཞིག་ཁོ་མོའི་བྲང་གར་བཏགས་སོང་།
ངས་ཁོ་མོས་ཉིས་སྟོང་གཅིག་ནས་འགོ་བཙུགས་སྟེ་བོད་དོན་ལ་ཁ་ཡོད་ལག་ཡོད་ཀྱིས་ཕྱག་ལས་ཚད་མེད་གནང་བའི་ལོ་རྒྱུས་མི་ཉུང་བ་ཞིག་ཡིག་ངག་གཉིས་ཐོག་ནས་ལག་སོན་བྱུང་རྗེས་སུ། ངས་ཁོ་མོའི་མཚན་ལ་བྱམས་བརྩེའི་བདག་མོ་ཞེས་བོས་པ་ཡིན་ལ། རང་གི་སེམས་གཏིང་ནས་དེ་ལྟར་བཀུར་ཡོད།
ཁོ་མོ་ད་ལྟ་རང་ལོ་ང་ལྔ་སོན་པར་ཉིན་གྲངས་ཁ་ཤས་ལས་མི་འདུག སྐྱེ་ཚེས་༡༩༥༧།༤།༨་རེད་འདུག བུ་མོ་གཉིས་ཡོད། བཟའ་ཟླའི་ཚོང་ལས་གཉེར་བཞིན་འདུག ཁོ་མོའི་མཚན། Aasha Reddy ངས་ཁོ་མོ་དང་ལྷན་དུ་ཆུ་ཚོད་ཁ་ཤས་ཤིག་གི་རིང་དུ་ལམ་ཞོར་དུ་གཏམ་གླེང་བྱས་དུས་སུ། ཁོ་མོའི་མ་འོངས་ལས་འཆར་དང་རྣམ་དཔྱོད་ལ་ང་རང་དངོས་ནས་ཧ་ལས་སོང་། ཁོ་མོས་གསུངས་ན་རང་གི་ཕྱག་ལས་འདི་དག་ལ་ནང་མིས་ཀྱང་རྒྱབ་སྐྱོར་ཐོབ་ཡོད་གསུངས་སོང་། མཐའ་དོན་ངས་འདི་ནས་ཁོ་མོའི་རླབས་ཆེ་བའི་ཐུགས་དགོང་ཡོངས་སུ་འགྲུབ་ནས་ང་ཚོ་གཞན་ཕན་གྱི་སྲུ་ཞུ་སྒྲུབ་པའི་གྲོགས་སུ་བསྐལ་བ་ཇི་སྲིད་བར་དུ་འགྱུར་བར་སྨོན་ཞེས་གླིང་ཚ་ཚེ་བརྟན་རྡོ་རྗེ་མ་བུ་གསུམ་གྱི་ཚབ་དུ་གླིང་ཚ་ནས་གུས་པ་དང་བཅས་གོམ་བགྲོད་ཀྱི་ལམ་བར་དུ། ༢ ། ༤ ། ༡༢
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དྲྭ་གྲོགས་ཚོ།
ཨ་མ་ཨ་ཤ་རེ་ཀྲི་ལགས་ལ་བོད་དོན་སྐོར་ནི་ཁོ་མའི་བུ་མོ་མཐོ་སློབ་ལ་འགྲིམ་བཞིན་པའི་སྐབས་སུ་བོད་པའི་བུ་མོ་ཞིག་དང་མཉམ་དུ་ཉལ་ཁང་གཅིག་པ་འཁེལ་བས་དེའི་བརྒྱུད་ནས་འུ་ཅག་ལ་རྒྱབ་སྐོར་ཐོབ་པ་རེད། སྤུན་ཟླ་ཚོ། འུ་ཅག་ནས་རང་ཡུལ་གྱི་སྐོར་འགྲེལ་བརྗོད་ཐུབ་པ་ན། ཨ་མ་ཨ་ཤི་རེ་ཀྲི་ལྟ་བུ་མཇལ་བའི་རེ་བ་མངོན།
དྲྭ་གྲོགས་ཚོ།
ཨ་མ་ཨ་ཤ་རེ་ཀྲི་ལགས་ལ་བོད་དོན་སྐོར་ནི་ཁོ་མའི་བུ་མོ་མཐོ་སློབ་ལ་འགྲིམ་བཞིན་པའི་སྐབས་སུ་བོད་པའི་བུ་མོ་ཞིག་དང་མཉམ་དུ་ཉལ་ཁང་གཅིག་པ་འཁེལ་བས་དེའི་བརྒྱུད་ནས་འུ་ཅག་ལ་རྒྱབ་སྐོར་ཐོབ་པ་རེད། སྤུན་ཟླ་ཚོ། འུ་ཅག་ནས་རང་ཡུལ་གྱི་སྐོར་འགྲེལ་བརྗོད་ཐུབ་པ་ན། ཨ་མ་ཨ་ཤི་རེ་ཀྲི་ལྟ་བུ་མཇལ་བའི་རེ་བ་མངོན།
ཐོག་མར་མ་བུ་གསུམ་ལ་འཚམས་འདྲི་དང་། བོད་གཞིས་བྱེས་གཉིས་ཀྱི་ཚབ་བྱས་ནས་ཨ་སྲི་མཆོག་ལའང་ཐུགས་རྗེ་ཆེ་ཞུ་བཞིན་ཡོད། ངས་ཀྱང་ཁོ་མོ་ངོ་ཤེས་ཀྱི་ཡོད། སྤྱི་ལོ་༢༠༠༧་ལོར་གཞོན་ནུས་གོ་སྒྲིག་འོག་བོད་དོན་ཆེད་སྦང་ལོར་ནས་ཅི་ནཱེ་བར་གོམས་བགྲོད་ཞིག་བྱས་པ་རེད། དེ་དུས་ཀྱང་མོས་མཉམ་ཞུགས་དང་། རྒྱབ་སྐྱོར་གནང་བ་རེད། དངོས་གནས་བོད་དོན་གླེང་ཚེ་ལམ་སེང་ཁོང་གི་སྤྱན་ཆབ་བསིལ་གྱི་འདུག་ལ། ཁོང་གི་མཛེས་སྡུག་ཡིད་དུ་འོང་བའི་ལང་ཚོ་དག་ཀྱང་བོད་ཀྱི་ཆེད་དུ་བཞད་དེ་བོད་ཀྱི་ཆེད་དུ་སྐམ་གྱི་ཡོད་པའི་ཚོར་བའང་འགོག་མེད་དུ་སྟེར་བར་བྱེད། བྱམས་བརྩེའི་བདག་མོ་སྐུ་ཚེ་ཁྲི་ལོར་ཤོག
གླིང་ཚ་རྒྱལ་ལོ།
དེང་སྐབས་ཨ་ཤ་རས་ལྟ་བུ་མང་པོ་ཡོད་པར་ཤོག།