ཉིན་མ་འདི་དག་གི་རིང་དུ་ཨ་རི་བ་ཞིག་གི་སྐུ་དྲིན་དུ་དྲ་ལམ་དུ་ཉུལ་བའི་གོ་སྐབས་ཆེས་མི་ཉུང་བ་ཞིག་རེག་ནའང་། དོ་ནུབ་ནས་ཁོ་རང་ལ་རང་ཡུལ་དུ་ལོག་ཆོག་པའི་གོ་སྐབས་རེག་ཡོད་སྟབས། ཁོ་རང་གི་ཅ་དངོས་ཡོད་ཚད་བསྡུ་གསོག་བྱེད་ཀྱིན་པའི་སྐབས་ཏག་ཏག་ལ་ངས་དྲ་ཐོག་གི་སྤུན་ཟླ་དག་ལ་བདག་གིས་དེ་རིང་ནས་བཟུང་དྲ་ལམ་ནས་གནས་ཚུལ་གང་ཡང་ཤེས་ཐབས་མེད་པའི་སྐོར་ལ་འཕྲིན་ཐུང་འདི་བྲིས་པ་ཡིན།
ད་ལྟ་ང་རང་བདེ་ཐང་ཡིན་ལ། ཟས་གོས་གནས་མལ་གྱི་དཀའ་ཚེགས་གང་ཡང་མེད། ལྷག་པར་དུ་བལ་ཡུལ་གནས་བསྡོད་བོད་རིགས་སྤུན་ཟླ་ཆེས་མི་ཉུང་བ་ཞིག་གིས་ཉིན་རེ་བཞིན་ཟ་མ་ཁུར་ནས་བལྟ་རུ་ཡོང་གི་ཡོད་པ་མ་ཟད། ང་རང་ལ་ཅི་དགོས་རིགས་ཀྱི་མཐུན་རྐྱེན་མི་ཉུང་བ་ཞིག་སྤྱར་བཞིན་ཡོད། ངས་འདི་ནས་དེབ་མི་ཉུང་བ་ཞིག་ཀློག་པའི་གོ་སྐབས་ཀྱང་ཤར་ནས་ཡོད། ད་ལྟ་བལ་ཡུལ་བཀག་བསྐྱེལ་ཁང་འདི་ནས་ང་ལ་ནག་ཉེས་འདི་རེད་ཅེས་ཐག་གཅོད་གང་ཡང་བྱས་མ་སོང་ལ། གང་དུ་གཏོང་མིན་ག་རེ་བྱེད་མིན་གྱི་གསལ་ཁ་གང་ཡང་མེད་ཀྱང་། ང་རང་གི་དངོས་ནས་སེམས་ཁྲལ་གང་ཡང་བྱེད་ཀྱི་མེད། ངས་དུས་རྒྱུན་དུ་སྤུན་ཟླ་ཁྱེད་ཅག་ལ་ཞུས་པ་ལྟར། ང་རང་མ་ཤི་བར་དུ་བོད་མི་རིགས་ཀྱི་བདེན་པའི་སྐད་ཁུར་བའི་ཞི་བའི་འཐབ་རྩོད་པ་ཡིན་པའི་ཆོད་སེམས་དེ་ལ་གང་གིས་ཀྱང་འགྱུར་བ་གཏོང་ཐུབ་མེད་པ་ཐུགས་འཇག་འཚལ།
མི་རིང་བར་ང་རང་གིས་བྲིས་པའི་ཞི་བའི་འཐབ་རྩོད་ཀྱི་སྐོར་གྱི་ལེའུ་ཚན་བཅུ་ཡོད་པའི་ཡི་གེ་ཞིག་དྲ་ལམ་དུ་ཐོན་ངེས་ཡིན། དེ་ཡི་སྐོར་ལ་སྤུན་ཟླ་དག་གིས་བསམ་གཞིགས་ནན་ཏན་དང་བགྲོ་གླེང་ལྷུག་པོ། བོད་མི་སྒེར་བ་དཀྱུས་མ་ཞིག་གིས་རང་གི་རིགས་ལ་བཞག་པའི་སྐད་ཆ་ཞིག་ལས་གཞན་ངོམ་སོ་སོགས་གང་ཡང་མ་ཡིན་པ་ཐུགས་ལ་འཛིན་རོགས་ཞུ།དུས་ཚོད་ཀྱི་ཆ་རྐྱེན་གྱི་རྐྱེན་པའི་ཞི་བའི་འཐབ་རྩོད་ཀྱི་སྐོར་ནས་ཞིབ་མོ་ཞིག་འབྲི་ཐུབ་མ་བྱུང་བ་དེར་དགོང་འགལ་མེད་པ་ཞུ། ཡིན་ཡང་། ལེའུ་ཚན་བཅུ་ཡོད་པ་དེ་ཡི་ནང་དུ་བཤད་དགོས་པ་དག་འདུས་ཡོད་ཅེས་ཞུ་ཆོག་པ་ཡིན། རིགས་ཀྱི་སྤུན་ཟླ་གངས་ཅན་པ་ཚོ། བོད་ལ་རང་དབང་དང་ཞི་བདེ་ཐོབ་ནས་༧གོང་ས་རྒྱལ་བའི་དབང་བོ་མཆོག་རང་ཡུལ་ཁ་བ་ཅན་ལ་མྱུར་དུ་ཕེབས་ཐུབ་པའི་སྨོན་འདུན་བཅས་བལ་ཡུལ་བཀག་བསྐྱེལ་ཁང་ནས་༢༧།༥།༡༢གླིང་ཚ་ཚེ་བརྟན་རྡོ་རྗེ་ནས་གུས་པ་དང་བཅས་ཕུལ།
རྗེས་སུ་ཡི་རང་ཡོད་་་་་་
ང་རང་མ་ཤི་བར་དུ་བོད་མི་རིགས་ཀྱི་བདེན་པའི་སྐད་ཁུར་བའི་ཞི་བའི་འཐབ་རྩོད་པ་ཡིན་པའི་ཆོད་སེམས་དེ་ལ་གང་གིས་ཀྱང་འགྱུར་བ་གཏོང་ཐུབ་མེད་པ་ཐུགས་འཇག་འཚལ༽ཞེས་པའི་ཁྱེད་ཀྱི་སྐད་ཆ་འདི་བོད་པ་ཞིག་ཡིན་ཚད་པོར་འདི་བཞིན་སྙིང་སྟོབས་ཤིག་ཡོད་དགོས་ལ། ཤེས་དགོས་པ་ཞིག་ཀྱང་རེད། ཁྱེད་ཀྱི་སེམས་ཤུགས་དང་ལྷག་བསམ་ལ་སྙིང་ནས་བདག་དགའ་བཞིན་ཡོད། མ་ཟད་ཁྱེད་ཐོག་མ་རྡ་སར་ནས་འགྲོ་བ་མཐོང་ཚེ་བདག་གིས་མིག་ཆུ་ཡང་བཞུར་སོང་། འོན་ཀྱང་གཡས་བཅོས་གཡོན་བཅོས་བྱེད་མི་ཤེས་པའི་བདག་ལ་མཚོན་ན་རྒྱ་ནག་གི་དར་ཆ་ཁྱེར་བར་དེ་ཙམ་འཐད་པོ་མ་བྱུང་། གང་ལྟར་ཁྱེད་ཀྱི་ཐུགས་རེ་བཞིན་འགྲུབ་པར་མ་ཟད་བར་ཆད་མེད་པར་སྨོན།
ཚིག་ཐོ
འགྲོ་བ་མི་རྣམས་ཀྱིས་རང་ཉིད་ལ་་ཅི་ཙམ་དགའ་བ་དེ་ཙམ་གྱིས་འགྲོ་བ་གཞན་དག་ལ་དགའ་ཐུབ་པ་ཡིན་ན་ནི་དངོས་ནས་འཇིག་རྟེན་འདིར་བདེན་པར་རྒྱལ་ཁ་ཡོད་པ་དང་ཞི་བདེ་དང་རང་དབང་གི་འཚོ་བ་ལ་ཁ་ཐག་ཉེ་རུ་འགྲོ་བ་ལས་རྒྱང་དུ་ནམ་ཡང་འགྲོ་བ་མི་སྲིད་པ་ཡིན།
གླིང་ཚ་ཚེ་རྡོར་ལགས་བཀའ་དྲིན་ཤིན་ཏུ་ཆེ། སྐུ་ཉིད་ཀྱི་སེམས་ཤུགས་དང་སྤོབས་པ་ལ་ཡི་རིང་ཡོད།