བཙན་བྱོལ་བའི་མིང་ལས་རྒྱལ་དགོས་ན། བསམ་ཚུལ་འདིར་གཟིགས་ཤིག།

བོད་དོན་འཐབ་རྩོད་ཀྱི་ཁ་ཕྱོགས་བོད་ནང་དུ་དམིགས་དེ་སྤེལ་དགོས་པ་དང་བོད་ནང་ནས་ཐབས་ཤེས་སྣ་ཚོགས་ལ་བརྟེན་ནས། བོད་དོན་བདེན་མཐའ་གསལ་བའི་ལས་འགུལ་འདྲ་མིན་དང་གཞན་གྱི་ཚུར་རྒོལ་ཁྲོད་རང་ཉིད་ཀྱི་ཚེ་སྲོག་ལ་གནོད་པ་མ་སླེབས་བར་ཞི་བའི་འཐབ་རྩོད་བྱུང་བར་ཁ་ཕྱོགས་དགོས་པ་ལས། ཕྱི་རྒྱལ་ཡུལ་གྲུ་ཁག་ལ་ཁ་ཕྱོགས་དེ་དྲིལ་བསྒྲགས་ཀྱི་ལས་འགུལ་སྤེལ་བ་དང་ཕྱི་རྒྱལ་ཁག་ལ་ཕྱོགས་བསྐྱོད་བྱེད་པའི་དུས་ཚོད་དེ་ནི་གཡོལ་ཟིན་པ་ཡིན། བཙན་བྱོལ་གཞུང་འཛུགས་དགོས་པ་དང་བཙན་བྱོལ་སློབ་གྲྭ་དང་དགོན་སྡེ་སློབ་གཉེར་ལྟེ་གནས་བསྐྲུན་དགོས་པ་བཅས་ཀྱི་བོད་མི་བཙན་བྱོལ་བ་མི་ཐོག་རྒན་པ་རྣམས་ཀྱི་རྒན་པའི་རྨི་ལམ་ཡོངས་སུ་རྫོགས་ཟིན་པ་ནི། བོད་མི་རིགས་ཀྱི་བདེན་མཐའ་སེལ་བའི་ཆེད་དང་བོད་མིའི་རིག་གཞུང་གོམ་གཤིས་ཉམས་པ་སླར་གསོ་དང་མི་ཉམས་གོང་འཕེལ་གཏོང་ཆེད་ཁོ་ན་ལས། བོད་མི་རྣམས་གཞན་ཡུལ་ལ་གནས་སྤོར་གཞིས་ཆགས་རྗེས། གཞན་མིར་འགྱུར་བའི་ཆེད་དུ་གཏན་ནས་མིན་ལ། བོད་མི་ཚོར་བསྟུད་མར་བོད་མི་རང་གི་ངོ་བོར་གནས་ཐབས་སུ་རང་མི་རིགས་ཀྱི་རིག་གཞུང་དང་སྲོལ་རྒྱུན་རྒྱུད་འཛིན་བྱེད་ཐབས་སུ་བདེན་པ་རྩོད་ལེན་བྱེད་སའི་ཁོར་ཡུག་ཅིག་བསྐྲུན་པ་ལས། གཞན་ཡུལ་ནས་གཞན་མིར་འགྱུར་ཐབས་དང་གཞན་གྱི་རིག་གཞུང་གི་རྒྱུད་འཛིན་བྱེད་པའི་ཆེད་དུ་མིན། དེང་དུས་ཀྱི་བཙན་བྱོལ་བོད་མི་རྣམས་ཀྱིས་ཉམས་མ་བཞག་པའི་བྱེད་སྟངས་ཆེས་མི་ཉུང་བ་ཞིག བོད་མི་རྣམས་རང་གི་རིག་གཞུང་དང་གཏན་བྲལ་དང་བོད་མི་རྣམས་གཞན་མིར་འགྱུར་ཐབས། རང་གི་མི་རིགས་ཀྱི་སྲོལ་རྒྱུན་གོམས་གཤིས་ལས་གཞན་གྱི་མི་རིགས་ཀྱི་སྲོལ་རྒྱུན་གོམ་གཤིས་ཀྱི་ཤུལ་འཛིན་པར་འགྱུར་བ་དང་འགྱུར་བཞིན་པ། རང་གི་སྐད་དང་ཡི་གེ་ལས་གཞན་གྱི་སྐད་དང་ཡི་གེ་གོང་ཚད་ཧ་ལས་པའི་མཐོན་པོ་ཆགས་བཞིན་ཡོད་པ་རེད། གལ་སྲིད། དེ་དག་འགྲིག་གི་ཡོད་ཚེ། རྒྱ་ནག་སྲིད་གཞུང་གི་གདུག་རྩུབ་ཆེ་བའི་སྲིད་ཇུས་ཀྱི་དམིགས་ས་དང་རྒྱབ་ལྗོངས་ཀྱང་དེ་ལས་བརྒལ་བ་མེད་དུས། ང་ཚོས་དེ་ལ་ཡི་རིང་བྱས་ནས། བཙན་བྱོལ་བོད་མི་ཞེས་པའི་བཙན་བྱོལ་བའི་མིང་དེ་ནི་ཕྱིར་བསྡུ་བྱེད་པ་དང་མཇུག་བསྡུས་པར་བསྒྲགས་པ་ཡིན་ན་མ་འགྲིག་པ་གང་ཡང་མེད། ངས་འདི་ལྟར་རང་གི་རིགས་ལ་བཅིངས་པའི་ཤ་དང་རུས་པའི་ཞེན་པ་ལྕི་མོ། སྙིང་གི་དྲོན་མོའི་ཚིག་ལ་སྦས་དེ་འཆད་བཞིན་པ་སུ་ལ་འཕོག་ན། ངས་དེ་ལ་འགྱོད་བཤགས་བྱེད་དགོས་དོན་གང་ཡང་མེད། དེ་བས་ཀྱང་ངོ་གནོང་དགོས་དོན་མེད། ང་ཚོའི་བཙན་བྱོལ་ལ་ཕྱིར་བལྟས་ཤིག་བྱས་ན། ༧གོང་ས་མཆོག་གིས་དབུ་ཁྲིད་པའི་བཙན་བྱོལ་བ་མི་ཐོག་རྒན་པ་རྣམས་ཀྱིས་ཕྱོགས་སྣེ་མང་བོ་ཞིག་ནས་བཙན་བྱོལ་བ་གཞན་དང་མི་འདྲ་བར་གཞན་ཡུལ་ནས་རྒྱལ་ཁབ་མེད་པའི་མི་རིགས་ཤིག་གི་ངོ་བོ་ལས་བརྒལ་ནས། རྒྱལ་ཁབ་གཅིག་ལ་ཚང་དགོས་པའིི་མ་ལག་ཡོངས་སུ་རྫོགས་པ། འདས་པའི་མི་ལོ་ང་གསུམ་ནང་དུ་བསྐྲུན་ཐུབ་ཡོད་པ་དེ་ནི། བྱིས་པ་དམར་འབྱར་ཞིག་དྲིན་ཕ་མས་གཉོར་སྐྱོང་འོག་འཚར་ལོངས་བྱུང་བ་དེ་ད་ལྟ་ནི་མི་གྲལ་དུ་འཚུད་ཡོད་པ་རེད། མི་གྲལ་དུ་འཚུད་པའི་བཙན་བྱོལ་བོད་མིས་ད་ལྟ་རྩོད་ལེན་བྱེད་དགོས་པ་དེ་ནི། མི་གྲལ་ནས་མིའི་ཐོབ་ཐང་དང་བདག་དབང་། རིག་གཞུང་དང་སྲོལ་རྒྱུན་ལེགས་བྱུང་གི་རིན་ཐང་ལ་བདག་པོ་རྒྱག་དགོས་པ་དེ་ཡིན་པ་ལས། ཕ་མའི་བང་གི་བྱིས་པ་ལྟར་བདག་སྐྱོང་བྱེད་དགོས་ཟེར་ནས་སྡུག་སྐད་བཏོན་ནས་བསྡད་ན་གཏན་ནས་འགྲིག་ཐབས་མེད་ལ། ཉེ་འཁོར་གྱི་མི་རྣམས་ཀྱིས་ང་ཚོ་ལ་འཕྱ་དམོད་བྱེད་པ་ལས་སྣང་བ་འཇོག་རན་མེད་པ་དང་། འཇོག་ཐབས་མེད་པར་གྱུར་ཡོད་སྟབས། བོད་མིའི་བདེན་དོན་རྒྱལ་སྤྱི་ཅན་དེ་འགྱུར་མ་ཐུབ་པའི་གནད་འགག་ཡང་དེ་ལ་ཐུག་ཡོད་པ་ཡིན། བོད་མི་བཙན་བྱོལ་བ་རྣམས་ཀྱིས་དུས་དེ་རིང་གི་བར་དུ་ལས་འགུལ་འདྲ་མིན་སྣ་ཚོགས་ཤིག་སྤེལ་ཡོད་ཀྱང་། སྤེལ་ཡུལ་ཤུགས་ཆེ་ཤོས་ནི། རྒྱ་གར་ནང་མང་ཤོས་དང་གཙོ་བོ་ཆགས་ཡོད་པ་རེད། ད་ལྟའི་འཆར་སྤེལ་ཡུལ་གྱི་ངོ་བོ་འགྱུར་ནས། ཕྱི་རྒྱལ་ཁག་ལ་སྤེལ་དང་སྤེལ་རྩིས་ཀྱི་གྲ་སྒྲིག་མི་ཉུང་བ་ཞིག་ཡོང་གི་ཡོད་པ་རེད། དེ་ལ་ཉེན་འཚབ་ཤིག་ཡོད་པ་ནི། བོད་དོན་རྒྱལ་སྤྱིའི་ཅན་དུ་འགྱུར་རྒྱུ་ལས་ལྡོག་ནས། ནམ་ཞིག་ཕྱིའི་རྒྱལ་ཁབ་ཁག་ནས་བོད་མི་ཟེར་དུས། རང་གི་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོ་མཁན་ཞིག་ལས་མེད་པར་དགོངས་ནས། སྔར་ཡོད་ཕྱི་རྒྱལ་ཁག་གི་བོད་མིའི་འབྲེལ་ལམ་ལ་སྐྱོན་ཆགས་ཡོང་རྒྱུ་དང་། བོད་མི་གང་དུ་གནས་སྤོར་བྱེད་མཁན་དང་བོད་མིས་འགྲུལ་བཞུད་ཀྱི་སྒོ་མོ་མང་བོ་ཞིག་ཕྱི་ནང་གང་དུའང་དམ་དྲག་འགྲོ་བ་དང་ཆབ་ཅིག བོད་མིའི་རྩ་དོན་ལ་རོགས་སྐྱོར་བྱེད་པའི་ཀུན་སློང་ཙམ་པོ་བ་དེ་ཡང་ཉམས་མི་སྲིད་པ་མིན། དེ་ལས་བོད་མི་རྣམས་ཀྱིས་བོད་རང་གི་ས་ཐོག་ལ་བོད་མི་གཅིག་ཡིན་ཡང་བསྐྱོད་ཐབས་དང་འཚོ་གནས་བྱེད་ཐབས་ཀྱི་གོ་རིམ་ལ་འབད་ཚེ། ཕྱི་རྒྱལ་རོགས་ཚོགས་ཁག་གི་རྒྱབ་སྐྱོར་བྱེད་པར་སྟབས་བདེ་བ་དང་གནས་ལུགས་དང་མཐུན་པ་ཡིན། སྔར་ཡོད་ཀྱི་འབྲེལ་ལམ་དེ་དག་ཡང་བརྟན་དུ་འགྲོ་བ་དང་། རོགས་སྐྱོར་གྱི་ཀུན་སློང་ཙམ་པོ་བ་དེ་དག་ཀྱང་། ཀུན་སློང་དངོས་དང་ལག་ལེན་དངོས་ལ་བསྟར་བའི་ཁེ་ཕན་ཆེན་པོ་ཡོད་པ་ཡིན་ལ། འགྲོ་བ་མིའི་རང་དབང་གི་ཐོབ་ཐང་ལ་འགན་སྲུང་བྱེད་པའི་མི་སྡེ་ཤུགས་ཆེར་འགྲོ་ངེས་ཡིན། ལྷག་པར་དུ། རྒྱ་གར་གཞུང་གིས་ཀྱང་བོད་མི་རྣམས་བཙན་བྱོལ་བ་ཞེས་པའི་མིང་འོག་ནས། རྒྱ་གར་ས་ཐོག་ནས་བསྐལ་བའི་མཐའ་ལ་ཐུག་རེག་བར་དུ་འདུག་རྒྱུར་རེ་བ་བརྒྱབ་མེད་ལ། རྒྱ་གར་མི་མང་གིས་ཀྱང་རང་གིས་ཐོག་ནས་མི་རིགས་གཞན་གྱིས་ཁུངས་ཆེ་རུ་སོང་བ་དང་མཉམ་དུ། རང་མི་རྣམས་མི་རིགས་གཞན་གྱི་ཞབས་ཞུ་བ་བྱས་དེ་བསྡོད་རྒྱུའི་རེ་བ་ནམ་ཡང་བཅིང་མ་མྱོང་ལ། བཅིངས་ཀྱང་མི་སྲིད་པ་ཞིག་ཡིན་པ་བཙན་བྱོལ་བོད་མི་རྣམས་ཀྱིས་ཡིད་དུ་མ་དྲན་ཐབས་མེད་དུ་གྱུར་བའི་གནད་དོན་གལ་ཆེན་ཆགས་ཡོད། དེ་དང་ཆབ་ཅིག་གཞིས་ལུས་བོད་མི་རྣམས་ཀྱིས་ཀྱང་བཙན་བྱོལ་བོད་མི་རྣམས་ནི་ཕྱིར་རང་ཡུལ་མི་ལོག་པའི་བོད་མིའི་ཚོ་ཁག་ཅིག་ཆགས་རྒྱུར་རྨི་ལམ་དུའང་རེ་བ་རྒྱགས་མྱོང་མེད་པ་རེད། ངས་བསླེངས་པའི་ཞི་བའི་འཐབ་རྩོད་པ་བྱེད་རྒྱུ་ནི། དེང་དུས་ཀྱི་རྒྱལ་ཁབ་གཅིག་གི་སྲིད་འཛིན་བྱེད་པ་ལས་དཀའ་ངལ་ཆེ་བ་མེད་ཀྱང་ཆུང་བའང་མེད། རྒྱལ་ཁབ་ཀྱི་སྲིད་འཛིན་དག་ནི། མང་ན་ལོ་བཅུའི་ལས་འཁུར་དང་ཉུང་ན་ལོ་ལྔའི་ཡུན་ཚད་ཀྱི་ལས་འཁུར་ཡིན་ཡང་། ཞི་བའི་འཐབ་རྩོད་པ་བྱེད་པར། རིང་ནས་མི་ཚེ་གང་བོ་དང་ཐུང་ན་བོད་ལ་རང་དབང་དང་ཞི་བདེ་མ་ཐོབ་བར་དང་༧གོང་ས་མཆོག་བོད་དུ་ཆིབས་སྒྱུར་བསྐྱངས་རེག་བར་ཆགས་ཡོད་པ་དེ་ཡིན་ལ། རྒྱལ་ཁབ་ཀྱི་སྲིད་འཛིན་ཞིག་ཡིན་ན། རང་ཉིད་ཀྱི་ལས་འཁུར་དང་མཉམ་དུ་སྐབས་རེར་ཁྱིམ་མི་ཉེ་དུ་དང་ལྷན་འཛོམས་བྱེད་ཆོག་པ་དང་། ཚེ་སྲོག་གི་བདེ་འཇགས་སྲུང་སྐྱོབས་བྱེད་མཁན་གྱི་མངའ་འབངས་ཀྱང་ཡོད། ལས་འཁུར་གྱི་དུས་ཡུན་རྫོགས་པ་དང་རྒྱུན་ལྡན་གྱི་འཚོ་བ་རོལ་རྒྱུ་ཡོད་པ་རེད། ཞི་བའི་འཐབ་རྩོད་པ་ཞིག་བྱས་ཉིན་ནས་ནང་མི་ཉེ་དུ་ལྷན་འཛོམས་ཀྱི་གོ་སྐབས་ཤིག་དཀོན་པོ་ཡིན་ལ། ཚེ་སྲོག་གི་བདེ་འཇགས་ལ་སྲུང་སྐྱོབས་བྱེད་མཁན་དེ་བས་ཀྱང་ཁག་ལ། ནམ་ཞིག་རང་ཁྱིམ་དུ་ཕྱིར་ལོག་ནས་རྒྱུན་ལྡན་གྱི་འཚོ་བ་རོལ་ནས་ལྷོད་བསྡོད་ཀྱི་དུས་ཚོད་ཀྱང་རྩ་བྲལ་དུ་སོང་ཡོད་པ་ཡིན།།
༢༠༡༢/8/29ཉིན་བལ་ཡུལ་བཙོན་ཁང་ནས།                  དྲུང་ཡིག་དོན་ལྡན་ནས།