༧གོང་ས་མཆོག་ལ་ཐུགས་ཕམ་ཡོང་དོན་དང་ཐུགས་ཕམ་གསོས་སྟངས་སྐོར་གྱི་གཏམ་ཁ་ཚ་མ།
བོད་མི་ཚོས། ༧གོང་ས་མཆོག་སངས་རྒྱས་རེད། འཕགས་པ་སྤྱན་རས་གཟིགས་རེད། ཐམས་ཅད་མཁྱེན་པ་རེད་ཅེས་ཕྱག་འཚལ་ས་དང་སྨོན་ལམ་རྒྱག་སའི་ཡུལ་ཞིག་ལ་འཇོག་པ་དང་། སངས་རྒྱས་ནི་སངས་རྒྱས་རེད། ང་ཚོ་དང་བསྡུར་ས་གང་དུ་ཡོད་ཅེས། ༧གོང་ས་མཆོག་གིས་མི་སྐད་གསུང་། མི་ཆོས་སྒྲུབ། མི་དོན་བཞེས། མིའི་བདེ་སྡུག་གི་བླང་དོར་མཛད་ཀྱི་ཡོད་ཀྱང་། ང་ཚོ་མི་ཕལ་བས་གང་ཡང་མི་འཇོན་ཟེར་ནས་རྒྱང་དུ་ནུར་ནས། ༧གོང་ས་མཆོག་གི་གསུང་མ་བརྩིས། མཛད་རྗེས་སུ་མི་འགྲེང་བའི་ལན་པ་དེ་དག་ལས་༧གོང་ས་མཆོག་ལ་ཐུགས་ཕམ་བྱུང་གི་ཡོད་པ་དང་། གོང་ས་མཆོག་སྐུ་འདྲ་ལྟ་བུ་ཞིག་ལ་རྩིས་པའི་མ་འགྲིག་པ་ཡིན། ལྷག་པར་དུ། དེང་སང་བོད་མིའི་གྲལ་དུ། ༧གོང་ས་མཆོག་གི་གསུང་གིས་འཇིགས་སྐུལ་མ་གནང་ཟེར་མཁན་དང་། ༧གོང་ས་མཆོག་གི་གསུང་དྲང་མ་ཡོང་ཟེར་མཁན་མང་དུ་འགྲོ་བ་དེས། ༧གོང་ས་མཆོག་གིས་སྐུ་ཚེ་གང་བོར་སྐུ་ལས་གྱོན་པ་ངོ་མ་ཤེས་པ་དང་ཁས་མ་བླང་། ཚིག་མ་བརྩིས་སྟབས་ཐུགས་ཕམ་ཡོང་གི་ཡོད་པ་རེད། དཔེར་ན། ཕ་མས་བུ་ཕྲུག་གི་ཆེད་དུ་གང་ལ་ཡང་མ་འཛེམ་པར་དཀའ་ལས་རྒྱབ་ཀྱང་། བུ་ཕྲུག་གིས་ཕ་མའི་བཀའ་དྲིན་ལ་བསམ་ཤེས་མ་བྱས་པར་ཕ་མ་བློ་ཕམ་བྱུང་བ་དང་འདྲ་བ་ཡིན། ཁྱད་པར་དུ། ༧གོང་ས་མཆོག་གིས་ད་སྔ་བར་གང་གསུང་བ་དང་གང་མཛད་པ་དེ་དག་བོད་མིའི་ལག་ལེན་བྱེད་དགོས་པ་དང་བོད་མིའི་འཐབ་རྩོད་ཁྲོད་དངོས་སུ་བྱུང་འོས་པ་རྐྱང་ཡིན་པ་ལས། ༧གོང་ས་མཆོག་ལ་བརྟན་བཞུགས་རེ་ཕུལ་ནས། ཁྱེད་སྐུ་ཚེ་བརྟན་པར་ཤོག་ཅེས་ཁ་ཡག་རེ་སྐུ་སྒེར་ལ་ཡོང་ཆེད་དུ་མཛད་མེད་པ་རེད། ཕྱག་རེ་འཚལ། སྨོན་ལམ་རེ་བརྒྱབས་ཏེ་རྐུབ་བསྡབ་བསྡབ་རེ་བཏང་དེ་སྐྱུར་བཞག་ན། ༧གོང་ས་མཆོག་གི་སྐུ་ཚེ་བརྟན་པ་དང་བོད་དོན་བདེན་མཐའ་གསལ་བར་གང་ཡང་མི་ཕན། ༧གོང་ས་མཆོག་གིས་དེ་སྔ་ང་ཚོ་ལ་བཀའ་གསལ་བོ་གནང་མྱོང་བ་ཞིག་ལ་“ང་ཚེ་རིང་པོ་བསྡོད་མིན་དེ་ནི། བོད་མི་མང་གི་བསོད་ནམས་དང་དབང་ཐང་ལ་བལྟ་དགོས”གསུངས་པ་ལྟར། བོད་མིའི་བསོད་ནམས་དང་དབང་ཐང་འཕེལ་དགོས་ཚེ། བླ་མའི་གསུང་བརྩིས། བཀའ་སྒྲུབ་ནས་བླ་མའི་ཐུགས་ཕམ་དུ་མ་བཅུག་ན། བླ་མའི་སྐུ་ཚེ་བརྟན་པ་དང་བོད་མིའི་བདེན་དོན་གྱི་མཐའ་སེལ་བར་ཐག་ཉེ་བ་ཡིན། སྐབས་དེར་ཆེས་ཡིད་སྐྱོ་དགོས་པ་ཞིག་ལ། ༧གོང་ས་སྐུ་ཕྲེང་བཅུ་གསུམ་པ་ཚང་ཡང་། ཞིང་གཞན་དུ་ཕེབས་ཁར་ཐུགས་ཕམ་ཚད་མེད་དང་བཅས་ཞིང་གཞན་དུ་གཤེགས་པའི་ལོ་རྒྱུས་ཡོད་ལ། ད་ལྟའི་བར་༧གོང་ས་སྐུ་ཕྲེང་བཅུ་བཞི་བ་འདི་ཚང་གི་བཀའ་སློབ་གང་དུའང་། “ད་རེས་ང་བློ་ཕམ་ཅུང་ཙམ་བྱུང་”ཟེར་བའི་བཀའ་སློབ་ཕེབས་མྱོང་མེད་པ་དང་། ཐ་ན་༧ཁོང་གིས་བོད་མི་མང་ལ་བཅིངས་པའི་ཐུགས་བཞེད་ནི། ང་ཚོ་ལ་བཀའ་སློབ་འདི་འདྲ་ཞིག་གསུང་མྱོང་ཡོད་པ་རེད། “བོད་མི་མང་ལ་རང་དབང་ཞིག་མ་ཐོབ་བར། ང་ཤི་ན་དབུགས་འགྲོ་ས་མ་རེད”ཅེས་བཀའ་སློབ་ཕེབས་མྱོང་བ་མ་ཟད། ད་དུང་། ༧ཁོང་གིས“ངའི་བསམ་བློ་ཤེས་དགོས་མཁན་ཟེར་ན་རེད། དེ་ནི་བོད་མི་མང་ཆགས་ཡོད་པ་རེད། ངའི་བསམ་བློ་ཤེས་མི་དགོས་མཁན་ཟེར་ན་རེད། དེ་ནི་ཕྱི་རྒྱལ་མགོ་སེར་དེ་ཚོ་ཆགས་ཡོད་པ་རེད། ཡིད་སྐྱོ་བ་ཞིག་ལ་ནམ་ཞིག་ང་མེད་པ་དང་། ཏཱ་ལའི་བསམ་ཚུལ་གང་རེད་ཅེས་ངའི་ལོ་རྒྱུས་འཚོལ་དགོས་བྱུང་ན། ཕྱི་རྒྱལ་བས་ངའི་སྐོར་ལ་བྲིས་པའི་དེབ་དེ་ཚོ་ཀློག་རྒྱུ་ལས། བོད་རང་གི་བྲིས་པའི་དེབ་དེ་ཚོའི་ནང་རྙེད་ཁག་པོ་ཆགས་ངེས་རེད་སྙམ་པའི་བློ་འཚབ་ཡོང་གི་འདུག ད་ལྟ་ང་འཚོ་ཞིང་གནས་པའི་སྐབས་འདིར། ག་རེ་འདྲི་འདོད་ཡོད་ན་ང་ལ་དྲིས་པ་ཡིན་ན། ངས་གང་ཤེས་པ་དེ་ཚོ་ལན་རྒྱག་ངེས་རེད་ལ་རེད། མ་ཤེས་པ་དེ་ཚོ་མ་ཤེས་པ་རང་དུ་འཇོག་རྒྱུ་རེད”ཅེས་ཐོག་མཐའ་བར་གསུམ་ལ། བོད་མི་མང་གི་སྐྱིད་སྡུག་སྐད་ཅིག་ཙམ་ལ་ཡང་ཐུགས་ནས་འདོར་མྱོང་མེད་པ་དང་། དམིགས་སུ་བོད་མི་རིགས་ཀྱི་འདི་ཕྱི་གཉིས་ཀྱི་ཆེད་དུ་སྐྱེ་བ་བཞེས་ཡོད་པ་དང་བོད་མི་མང་གིས་རང་གི་༧བླ་མ་ངོ་ཤེས་དགོས་པ་དང་། ཤེས་ནས་བདག་པོ་རྒྱག་རན་ཡིན་ཚུལ་གྱི་སྔོན་བརྡ་ཡང་སྔ་ནས་བཏང་ཡོད་པའི་བཀའ་སློབ་གསལ་བོ་གནང་ཡོད་ཀྱང་། བོད་མི་ཚོས་ད་དུང་༧གོང་ས་མཆོག་ཟེར་ནས་རྒྱང་ཐག་སྟོང་ཕྲག་གི་ས་མཚམས་སུ་བཞག་ནས། ༧ཁོང་གི་བཀའ་གསུང་ནི་ལག་ལེན་ལ་བསྟར་ཐུབ་མེད་པ་དང་བསྟར་ཤེས་ཐུབ་མེད་པ་ལྟ་བུ་ཞིག་ལ་ངོས་འཛིན་བྱས་ཏེ། སྔ་ཕྱི་བར་གསུམ་དུ་སྣང་བ་རྒྱ་ཡན་ལ་བཞག་པ་དེ་ཡི་ཉེར་ལེན་གྱིས། ད་རེས་ཀྱི་ཐུགས་ཕམ་བྱུང་བའི་གནས་ཚུལ་འདི་ཐོན་པ་རེད། ༧གོང་ས་མཆོག་ནི་ང་ཚོས་ཕྱི་མའི་ལམ་སྟོན་དང་ཚེ་འདིའི་སྣེ་འཁྲིད་ཡིན་པར་ཁས་ལེན་མཁན་གྱི་བོད་མི་གང་ན་སུ་ཡོད་པ་དེ་དག་གིས་ཕྱི་མའི་ལྗགས་བྲོ་སྒྲུབ་རྒྱུ་དང་ཚེ་འདིའི་སྣེ་འཁྲིད་ཕྱོགས་སྟོན་གནང་བཞིན་པའི་ལམ་ནང་དུ། མི་རེ་ངོ་རེ་ནས་དྭང་དུ་བླང་སྟེ། གང་ལ་ཇི་འཇོན་གྱིས་ཉིན་རེའི་འཚོ་བའི་ཁྲོད་དུ་ལག་ལེན་ངོས་ལ་ཞུགས་དགོས་རྒྱུ་དེ་ནི། བོད་གཞིས་བྱེས་གཉིས་ཀྱི་བོད་མི་ཚང་མས་ཁ་ཙམ་མ་ཡིན་པར་དོན་དག་ལ་འཁྱོལ་བ་ཞིག་བྱུང་ཚེ། འཛམ་གླིང་མི་མང་ཧ་ལས་པའི་ཚད་དུ་སྐྱེལ་བར་གདོན་མི་ཟ་བ་ཡིན་ལ། ༧གོང་ས་མཆོག་གི་ཐུགས་ཕམ་གསོས་པར་ཕན་རྒྱུར་ཐེ་ཚོམ་བྱེད་མི་དགོས་པ་ཡིན། དེ་མིན། མུ་མཐུད་དུ་༧གོང་ས་མཆོག་གིས་ང་ཚོ་ལ་འཚེ་བ་མ་བྱེད་ཅེས་གསུངས་སྟབས། ང་ཚོ་ལ་ལས་ཀ་བྱེད་རྒྱུ་གང་ཡང་བསྡད་མི་འདུག་ཟེར་མཁན། བོད་མིའི་སྙིང་ལ་རྒྱ་འདྲེའི་མཐུ་ཞུགས་པ་ཚོས་བྱེད་སྟངས་དེར་ཡིད་འགུ་ནས། ༧་གོང་ས་མཆོག་གི་གསུང་ལ་མ་ཉེས་ཁ་གཡོག་བྱས་ཏེ་འཚོ་བ་ལྷོད་སྡོད་དང་༧གོང་ས་མཆོག་གི་བཀའ་གསུང་གི་དགོངས་དོན་དག་མ་རྟོགས་པར་གཞུང་དམངས་གཉིས་ཀྱིས་སྔར་རྒྱུན་ལྟར། ༧གོང་ས་མཆོག་གི་གམ་དུ་བཅར་ནས་མིག་རེ་བཙུམ། ལག་ཟུང་སྙིང་ཁར་སྦྱར། མི་མང་ཁྲོད་དུ་འོང་ནས་༧གོང་ས་མཆོག་ལག་པ་འཕྱི་ས་ལྟ་བུ་བྱས་ཏེ་བཞག་ན། ༧རྒྱལ་དབང་ཚངས་དབྱངས་རྒྱ་མཚོས་“མ་འོངས་ལུང་བསྟན་ལས། ནོར་བུ་རང་ལ་ཡོད་དུས།།ནོར་བུའི་ནོར་ཉམས་མ་ཆོད།།ནོར་བུ་གཞན་ལ་ཤོར་དུས།།འགྱོད་པ་གཏིང་ནས་སྐྱེས་སོང་།།”ཞེས་པ་འབྱུང་དགོས་ཐུག་ཚེ། ངུས་དེ་མིག་ནས་ཁྲག་བཞུར་ཡང་མི་ཕན་ཞིང་། འགྱོད་ནས་བྲག་དང་གཡང་ལ་མཆོང་ཡང་གནས་ཚུལ་སླར་ལྡོག་ཡོང་མི་སྲིད། སློབ་དཔོན་པདྨ་འབྱུང་གནས་མཆོག་གིས་ཀྱང་། བོད་ལས་ངན་དྲིན་བཟོ་མི་ཤེས་པའི་ང་ཚོའི་མི་རབས་འདི་འདྲ་ཞིག་སླེབས་རྒྱུར་མ་འོངས་མངོན་གཟིགས་ཀྱིས་བརྡ་ཞིག་བཏང་ཡོད་པ་ནི། “བོད་ལ་དྲིན་ཆེན་བྱས་ཀྱང་དྲིན་མི་གོ”གསུངས་མྱོང་ཡོད། ང་ཚོ་ཤོར་ཟིན་པའི་ཉམས་མྱོང་མང་པོ་ཡོད་ལ། ཤོར་ལ་ཉེ་བའི་དུས་ཚོད་དམ་འཛིན་བྱེད་དགོས་སའི་བྱ་བར་ཅི་གསུང་བཀའ་སྒྲུབ་གནང་དགོས་པའི་མདུན་བསྐྱོད་ལས་ཕྱི་ནུར་དང་རྒྱབ་ཞུགས་བྱེད་མི་རུང་བའི་བྱ་བཞག་མང་པོ་ཡོད་པ་རེད། ༧གོང་ས་མཆོག་གིས་“ང་ལག་པ་འཕྱི་ས་གང་ཡིན་སར་མ་བྱེད། ཕན་ཐོག་པ་ཞིག་ཡིན་ན། ༧རྒྱལ་བ་རིན་པོ་ཆེ་ཡིས་དེ་འདྲ་གསུང་གི་འདུག ངས་དེ་ལ་དགག་བྱ་མེད་པར་རྒྱབ་སྐྱོར་ཡོད། དེ་མིན་གང་ཡིན་སར་ངའི་མིང་ཁྱེར་ན་ཡག་པོ་མ་རེད”ཅེས་བོད་མི་ཚོས་༧ཁོང་གི་བཀའ་སློབ་བེད་སྤྱོད་བྱེད་སྟངས་གང་འདྲ་གནང་དགོས་པ་ལ་སོགས་ཀྱི་མཚོན། བོད་མི་མང་ལ་ཆོས་འཇིག་རྟེན་གང་ཡིན་ཡང་། བྱེད་ཕྱོགས་དང་སྒྲུབ་ཕྱོགས་ཐད་མ་གསུང་བའི་བཀའ་སློབ་གང་ཡང་ལུས་མེད་ཅེས་བཤད་ན་ཧམ་པ་གཏན་ནས་ཆགས་མེད་པ་རེད། “བོད་ལ་ཤ་ཚན། རྩིས་པ་ལོངས་ཞར་ལ་ལྟོས།”ཟེར་སྲོལ་ཡོད་ཀྱང་།“ཤ་ཚ་བའི་གཏམ་ལ་སྙན་པོ་མེད”ཟེར་བ་ཡིན་དུས། ང་རང་བོད་ཀྱི་སྤྱི་མི་ལ་དབང་མཁན་གྱི་མི་ཞིག་ཆགས་ཡོད་སྟབས། ང་རང་གི་སྐད་ཆ་གང་ཡིན་ཡང་སྤྱི་དོན་ལ་རན་པོ་ཡོད་མེད་དང་དུས་ཚོད་དང་འཚམ་མིན་ལ། ངས་འབད་འབུངས་བྱེད་བཞིན་པའི་བཤད་སྒྲུབ་གཉིས་ཀྱི་མི་ཚེའི་ནང་ནས། བོད་མི་མང་ལ་ར་སྤྲོད་ཡོང་ངེས་ཡིན་པས། ང་ལ་འཇིགས་དོག་དང་སྐྲག་དགོས་ས་གང་ཡང་མེད་ཞུ་རྒྱུ་ཡིན།། མཆན་༧གོང་ས་མཆོག་ལ་ཐུགས་ཕམ་བྱུང་བའི་བཀའ་སློབ་དེར་ཉན་རྗེས། ཉིན་ཁ་ཤས་ལ་བློ་བདེ་བོ་མ་བྱུང་སྟབས། གཏམ་ཁ་ཚ་མ་འདི། རིགས་ཀྱི་རུས་པ་སྲ་མོ་ཡོད་མཁན་དག་ལ་དྲན་སྐུལ་ཞིག་གི་ཚབ་ཏུ་བལ་ཡུལ་རྒྱལ་སའི་བཙོན་ཁང་ནས་བྲིས། ༢༨/༩/༡༢ དྲུང་ཡིག་དོན་ལྡན་ནས།
