བོད་མིའི་འགན།

                                      བླ་མའི་རིགས་ཀྱི་“བོད་མིའི་འགན”།                    (གོང་འཕྲོས།)

བླ་མ་ནི། བོད་ཀྱི་ཡིད་ཆེས་བྱེད་ཚུལ་ཡིན་ན། བླ་ནི་གོང་ན་མེད་པའི་དོན་ཡིན་ཟེར་གྱི་ཡོད་དུས། བོད་ཀྱི་བླ་མ་རྣམས་ཀྱིས་“བོད་མིའི་འགན”བཞེས་སྟངས་དེ་ཡང་གོང་ན་མེད་པ་ཞིག་བྱུང་ན་རབ་དང་མ་བྱུང་ཡང་། མི་སེར་དཀྱུས་མ་ལས་ལྷག་པ་ཞིག་བྱ་དགོས་པ་ནི། མངོན་སུམ་ལ་བསྙོན་འཛུགས་པ་མིན་ཡང་། མི་སུ་དང་འཕྲད་ཀྱང་། “བོད་མིའི་འགན”བཞེས་མཁན་གྱི་བོད་མིའི་བདེན་དོན་འཆད་པར་ནམ་ཡང་ཕྱིར་ནུར་རྒྱགས་མི་རུང་བ་ཡིན། དེང་སང་བོད་ཀྱི་བླ་མ་མི་ཉུང་བ་ཞིག་གིས་ཟ་ས་འཐུང་ས་བོད་ཀྱི་རིག་གཞུང་བྱས་ཏེ། བོད་དོན་ལ་ཐུག་དུས་“ཆོས་པའི་ཆབ་སྲིད་མི་ཤེས”ཟེར་བ་དང་། སློབ་མ་དག་ལ་ཆོས་དང་ཆབ་སྲིད་མ་བསྲེས་ཤིག་གསུང་ནས་བཀའ་སློབ་གནང་གི་ཡོད། དོན་དངོས་ཐོག་བོད་ཀྱི་བདེན་པ་རྩོད་ཀྱི་ཡོད་པ་དང་ཆོས་པའི་བདེན་དོན་སྐྱོང་དགོས་པ་གཉིས་ནི། མཐར་གཏུག་ན་བོད་དོན་གྱི་མཇུག་འབྲས་སུས་གླེང་ཆོག་པ་ཡིན་དུས། བླ་མ་རྣམས་ཀྱིས་བོད་དོན་ལ་སྐད་ཆ་བཤད་མ་ཐུབ་ཚེ། བོད་ཀྱི་བླ་མས་“བོད་མིའི་འགན”མ་ཁུར་བ་དང་། “ཟ་ས་འཐུང་ས་རྒྱགས་དུས་བརྗེད་”ཟེར་བ་དང་གཅིག་པ་ཆགས་པ་ཡིན་ལ། དད་ལྡན་རྣམས་ཀྱིས་ཆེ་ས་ནས་མ་འགྲོ་བ་སེམས་ཅན་དང་། ཆུང་ས་ནས་བུ་སློབ་ཚོ་རྗེས་སུ་འཛིན་པར་ཡིད་ཆེས་བྱེད་ས་དེ་ནོར་བ་ཡིན། ཚེ་འདི་ཙམ་ལ་ཕྱོགས་སྟོན་དང་སྣེ་ཁྲིད་མི་ཤེས་པའི་བླ་མ་ཚོས་ཚེ་ཕྱི་མའི་ལམ་འདྲེན་ཟེར་བ་དེ་ནི་ཧ་ཅང་དགོད་བྲོ་བ་རང་ཆགས་པ་རེད།

                                          དགེ་འདུན་པའི“བོད་མིའི་འགན”།

དགེ་འདུན་པ་དང་བཙུན་མ་རྣམས་ཀྱིས་མི་ཡུལ་ཁམས་འདིའི་བདེན་པའི་དམ་ཚིག་ལྕི་ཤོས་དང་ཁག་ཤོས་དེ་ཁས་བླང་དམ་བཅའ་ཡོད་སྟབས། སྤྱིར་བཏང་གི་མི་ལས་འགན་ཧ་ཅང་ཆེ་བ་ཡིན་དུས། ནང་དགོས་བོད་ཀྱི་དགེ་འདུན་དང་བཙུན་མ་རྣམས་ལ་“བོད་མིའི་འགན”ཆེན་པོ་ཡོད་ལ། བོད་ཀྱི་བདེན་དོན་ཆེད་དུ། ད་ལྟའི་བར་དུ་བོད་མི་དཀྱུས་མ་ལས“བོད་མིའི་འགན”མང་བོ་བཞེས་མྱོང་ཡོད། དུས་ད་ལྟ་དེ་རིང་ཡང་དགེ་འདུན་པ་དང་བཙུན་མའི་སྡེ་ན། “བོད་མིའི་འགན”ཕྲག་པར་བླང་དེ་བོད་མིའི་བདེན་དོན་ཆེད། ཡོད་ཚད་བློས་གཏོང་མཁན་གྱི་རྒྱུན་མ་ཆད་པར་ཡོད་ཀྱང་། གྲངས་འབོར་གྱི་ཆ་ནས་ཉུང་དུ་འགྲོ་བཞིན་པ་དང་སྣང་མེད་དུ་གཡེང་བར་གོམ་པའི་རིགས་དང་། བདེན་དོན་བརྗེད་ནས་རང་གཞན་གྱི་རྒྱུ་དངོས་ལོངས་སྤྱོད་ལ་ཆགས་སྟེ། རང་གི་བླ་མར་ཁ་གཏོང་བ་དང་རང་ཉིད་ཀྱི་ཟ་ས་འཐུང་སའི་རིག་གཞུང་ལ་དྲིན་བཟོ་མི་བྱེད་མཁན། “བོད་མིའི་འགན”ཁུར་བའི་བདེན་པའི་ཟུངས་ཉམས་མཁན་གྱི་གྲངས་དེས། “བོད་མིའི་འགན”། བདེན་དོན་རྩོད་པ་ལ། འགན་མི་ཁུར་བའི་སྤྱི་ཚོགས་ཤིག་གི་ལག་ཆར་ཆགས་ཀྱི་ཡོད། དངོས་གནས་བྱས་ན། རང་གི་ཁས་བླང་བའི་དམ་ཚིག་བསྲུང་རྒྱུ་དེ་ནི། རང་གི་ཚེ་སྲོག་དོར་བ་ལས་ཀྱང་རྩ་ཆེ་བ་ཤེས་ཐུབ་ཚེ། “བོད་མིའི་འགན”ཁུར་དུ་བླང་བ་མ་ཟད། བོད་ཀྱི་དགེ་འདུན་པ་དང་བཙུན་མ་ཞེས་གླེང་དུས། ཚེ་འདི་དང་ཕྱི་མ་གང་ལ་ཡང་ངོམ་སོ་བྱེད་ཆོག་པ་ཞིག་ཆགས་པ་ཡིན། དེ་མིན“དཀོར་ཟས་དམྱལ་བའི་རྒྱུ”ཞེས་པ་ལས་འགྲོ་ས་ཞིག་གཏན་བྲལ་རེད།    མུ་འགོད།    དྲུང་ཡིག་དོན་ལྡན་ནས།