ཁྱོད་ནི། ང་ཡི་སྤོབས་པ་དང་། རེ་བ་ཡིན།

བོད་མི་རིགས་ཟེར་བ་འདི་མེད་པ་ནས་ཡོད་པ། འཆི་ས་ནས་འཚོ་བ། འཐོར་བ་ནས་གཅིག་ཏུ་བསྒྲིལ་ཏེ། དེང་སང་མིག་གིས་མཐོང་རྒྱུ་ཡོད་པ། རྣ་བས་གོ་རྒྱུ་ཡོད་པ། ད་དུང་མི་རིགས་འདིའི་མ་འོངས་པའི་ཆེད་དུ་སྒྲིག་འཛུགས་ཡོད་པ། རང་གི་ངོ་བོ་ཉར་ཚགས་ཐུབ་ཡོད་པ། མི་མང་ལ་རང་གི་འདུ་ཤེས་དང་ལ་རྒྱ་ཡོད་པ། རྒྱལ་སྤྱིའི་ཁྲོད་ན་མཐོང་ཡོད་པ་མ་ཟད། བོད་དོན་ལ་རྒྱབ་སྐྱོར་དང་གདུང་སེམས་ཡོད་པ། འདི་དག་ཇི་ལྟར་བྱུང་བ་རེད།

དེ་ཙམ་མ་རེད། མི་རིགས་འདིའི་ནང་བསྟན་གྱིས་གཙོས་རིག་གཞུང་གིས་རྒྱལ་སྤྱིའི་ཤེས་རིག་གི་ཁྱབ་ཁོངས་ནས། ཚན་རིག་དང་མཉམ་དུ་འམ། ཡང་ན་ཕྱོགས་གཞན་ཞིག་ནས། ཚན་རིག་ལ་སྣེ་ཁྲིད་ཀྱིན་པ་འདི་དག་ཚང་མ་མི་གཅིག་གི་རྣམ་དཔྱོད་དང་ཤེས་རབ། འགྲན་ཟླ་བྲལ་བའི་གཟིགས་རྒྱང་ཁོ་ན་ལ་བརྟེན་ནས་ཡོད།

མི་སྒེར་བ་ཞིག་ལ་མཚོན་ནའང་། ས་གང་དུ་བསྡད་ཅིང་། གནས་གང་ཞིག་འགྲིམ་ཅིང་། ལས་ཅི་ཞིག་བྱས་ནའང་། ཉིད་ཀྱི་ཤུགས་རྐྱེན་དང་། མཚན་སྙན། ནུས་པས་ཞོགས་འདེགས་བྱེད་བཞིན་ཡོད། ཐ་ན། མི་ངོ་ས་ངོ་མི་སྤྲོད་པའི་སྐབས་ལའང་། ཁྱེད་ཀྱི་མཚན་ནས་བཟུང་ན། གོ་བརྡ་སྤྲོད་ཅིང་ད་དུང་དགའ་བའི་རྣམ་འགྱུར་སྟོན།

སྐུ་ཉིད་ས་འདིའི་སྟེང་ན། ཕྱི་གསལ་ནང་གསལ། དྲང་པོ་དྲང་བཞག འདྲ་མཉམ་གཉིས་ཕན། མཐོ་དམན་དྲག་ཞན་མེད་པར་འདྲ་མཉམ་དུ་ལྟ་ཐུབ་མཁན་གཅིག་བུ་དེ་གྱུར་ཡོད་པས། མིའི་སེམས་ལ་གཞན་སུས་ཀྱང་བསྐྲུན་ཏུ་མེད་པའི་བག་ཆགས་བཞག་ཡོད།

བག་ཆགས་དེའི་དབང་གིས་བོད་མི་རིགས་འདི་ཡང་གཤིས་འཇམ་དང་གཞུང་དྲང་། བྱམས་བརྩེ་ཅན་གྱི་མི་རིགས་ཤིག་ཡིན་པར་ཡིད་ཆེས་བྱེད་བཞིན་ཡོད། གཞན་གྱི་ཡིད་ཆེས་དེས་བོད་མི་སྒེར་བ་ཞིག་ལ་མཚོན་ནའང་། མི་གཞན་ལ་འབྲེལ་བ་བྱེད་པ་དང་། གཞན་དང་མཉམ་དུ་ལས་དོན་སྒྲུབ་པ། གཞན་ནས་ཡིད་ཆེས་བྱེད་པ། ལས་ཀ་སྤྲོད་པ་སོགས་ཉིན་རེའི་བོད་མི་ཚོའི་ཕོར་བའི་ཁ་ན། ཉིད་ཀྱི་མཛད་འཕྲིན་སླེབས་ཀྱིན་ཡོད། མཛད་འཕྲིན་དེས་འཚོ་བར་སྤྲོ་སྣང་དང་བདེ་སྐྱིད་བསུ་བཞིན་ཡོད།

མི་རིགས་འདྲ་མིན་ཁྲོད་ན། མགོ་བོ་བཏེགས་ཏེ་བོད་པ་ཡིན་ཞེས་འདྲ་མཚུངས་ངང་ལངས་ཐུབ་ཀྱིན་ཡོད། དེ་གང་གིས་རེད། ང་ལ་གཟུགས་སྟོབས་ཆེན་པོ་ནི་མེད། རྒྱུ་འབྱོར་འབོར་ཆེན་ནི་མེད། ཁྱད་འཕགས་ཀྱི་ཡོན་ཏན་དང་། ཐ་ན་རང་ལ་དབང་བའི་ས་སྤར་བ་གང་ཡང་མེད་མཁན་ཞིག་ལ། དེ་འདྲའི་སྤོབས་སེམས་དེ་གང་ནས་བྱུང་བ་རེད། མི་གཅིག་རང་གཅིག་ལས་འབྱུང་གིན་ཡོད། མི་འབོར་ས་ཡ་མང་པོར་བྱམས་པ་དང་སྙིང་རྗེ། རང་ལས་གཞན་གཅེས། ཞི་བདེ་དང་བདེ་གནས། བཟང་སྤྱོད་དར་སྤེལ་གྱི་སྟོན་པ་ཆེན་པོ། བོད་མིའི་ཤ་ཁྲག་ཏུ་འཁྲུངས་པས་རེད། དེ་འདྲའི་དོན་ལ་གནས་པའི་སྐྱེས་བུ་རླབས་ཆེན་ཞིག་ང་དང་རིགས་རྒྱུད་གཅིག་པ་ཡིན་པ། ངོམ་རྒྱུ་དང་སྟོན་རྒྱུ་ཡོད་པས་རེད།

བོད་དོན་ནམ། བོད་མི་རིགས་ཀྱི་མ་འོངས་པར་བསམས་ན། ད་ལྟའི་གནས་བབ་ལ་གཞིགས་ན། རེ་བ་མེད་པ་གསལ་བོ་རེད། རང་ས་རང་ཡུལ་ན་བོད་མི་རིགས་འདི་གྲངས་ཉུང་ཆགས་བཞིན་པ། བཙན་བྱོལ་དུ་འང་བོད་མི་ཚོ་རང་དོན་ཆེད་དུ། ཁ་འཐོར་གྱི་གནས་བབ་ཆེ་ནས་ཆེ་རུ་འགྲོ་བཞིན་པ། རྒྱལ་སྤྱིའི་ཁྲོད་དུ་རྒྱ་ནག་གི་འབྱོར་བ་ཆེ་རུ་ཕྱིན་པ་དང་བསྟུན། མང་གཙོ་དང་འགྲོ་བ་མིའི་ཐོབ་ཐང་རྩ་ཆེན་འཛིན་པའི་རྒྱལ་ཁབ་དག་གིས་ཀྱང་། འགྲོ་བ་མིའི་ཐོབ་ཐང་ལས་དཔལ་འབྱོར་འདེམས་ཀྱིན་པའི་སྐབས་འདིར། ཕྱི་ནང་གི་གནས་བབ་མཐའ་དག་ཐུགས་སུ་ཆུད་ཅིང་། མཁས་ཤིང་མཛངས་པའི་རྣམ་དཔྱོད་དང་། ཐབས་མཁས་བསྟུན་མཁས་ཀྱིས། བོད་མི་རིགས་འདི་འཆི་མི་དགོས་པར་གསོན་ཐབས་གཙོ་བོར་བཟུང་སྟེ། གཉིས་ཕན་དབུ་མའི་ལམ་གྱི་སྲིད་ཇུས་དང་། བོད་དོན་ཐད་ནས་དགོངས་བཞེས་སྟངས་དག་མཐོང་ཡོང་ན། རང་བཞིན་གྱིས་བོད་མི་རིགས་འདིའི་མ་འོངས་པའང་རེ་བ་མེད་པ་ཞིག་རེད་མི་འདུག་ཨང་། བསམ་པ་ཞིག་ཡིད་ལ་འཁོར་ཞིང་། རེ་བ་དེའང་། སྐུ་ཉིད་ཀྱི་རྣམ་དཔྱོད་དང་དཔའ་མཛངས་ཁོ་ན་ནས་འབྱོང་གིན་ཡོད།

གྲྭ་བ་གྲྭ་རྐྱང་ཞིག་མེ་མདའི་སོ་ཁ་ནས་ཐར་ཏེ། ཅི་ཡང་མེད་ས་ཞིག་ནས་བཙན་བྱོལ་བོད་མི་སྟོང་ཕྲག་མང་པོའི་ལྟོ་གོས་གནས་མལ་ནས། དེང་གི་ཤེས་ཡོན་ཅན་བར་དུ་བསྐྱལ་ཞིང་། བོད་མིའི་སྒྲིག་འཛུགས་ནས། བོད་དོན་འདི་རྒྱལ་སྤྱིའི་གནད་དོན་ཞིག་ཏུ་བསྐྲུན་ཏེ། བོད་དོན་འཐབ་རྩོད་ཀྱི་སྲོག་ཤིང་དུ་བཞེངས་ཤིང་། རྒྱལ་སྤྱིའི་དཀའ་ངལ་གྱི་སེལ་བའི་ལམ་སྟོན་པར་གྱུར་བའི་བརྒྱུད་རིམ་འདི་བསམས་ན། སྐུ་ཉིད་ལ་གཞན་སུ་ལའང་མེད་པའི་སེམས་ཀྱི་ནུས་པ་ཁྱད་པར་བ་ཞིག་དང་། རང་ཉིད་ཡོངས་སུ་བློས་བཏང་བྱས་ཏེ། ལྷག་བསམ་རྣམ་དག་དང་། དྲང་བོ་དྲང་བཞག་གིས། གཞན་དོན་ཁོ་ན་ཁུལ་དུ་འཁྱེར་ཐུབ་པ་འདི་འདྲ་ཞིག། ས་རྡོག་རྡོག་འདིའི་སྟེང་ན། ཁྱེད་ཉིད་གཅིག་བུ་དེར་ངེས་པས། ཁྱོད་ཀྱི་ཞབས་རྡུལ་སྤྱི་བོས་བླངས་ཏེ། ཉིད་ཀྱི་རྗེས་སུ་མི་འབྲང་བའི་རང་དབང་ཞིག་སུ་ལ་ཡོད་དམ།

རང་ས་གཞན་ལག་ཏུ་ཤོར་ཏེ། སྐྱབས་བཅོལ་ནས་སྐྱབས་བཅོལ་སྙེག་བཞིན་པར་བསམས་ན། སེམས་སྐྱོ་བ་དང་ཧ་ཅང་གི་དཀའ་ཚེགས་ཆེ་བའི་གནས་སྟངས་ཤིག་རེད་དེ། སྐུ་ཉིད་མཇལ་རྒྱུ་ཡོད་པ་དང་། གསུང་ཉན་རྒྱུ་ཡོད་པའི་སྐལ་བཟང་འདི་ལ་བསམས་ན། ལས་ངན་ནང་གི་ལས་ཅན་ཞིག་ཀྱང་ཡིན་པས། གོ་སྐབས་འདི་དམ་པོར་བཟུང་སྟེ། རང་གི་མི་ཚེ་འདི་གང་གི་བཀའ་དགོངས་ལྟར་བསྐྱོད་ཐུབ་པར་སྔར་ལྷག་ཧུར་གྱིས་འབད་རྒྱུ་ཡིན།