རྔ་བ་རྫོང་། སྒོ་ལྕགས་བརྒྱབ་པའི་ལྕགས་སྒམ་ཞིག

རྔ་བ་བློ་བརྟན།

ངའི་ཕ་ཡུལ་ཨ་མདོ་རྔ་བ་རྫོང་ཡིན། ངའི་ནང་མི་དང་གཉེན་ཉེ། གྲོགས་བཟང་ཚོར་འཚམས་འདྲི་བྱེད་འདོད། མི་ཚོས་ཁ་པར་དང་དྲ་ལམ་བརྒྱུད་ནས་འཚམས་འདྲི་དངའབྲེལ་ཏེ་དགའ་སྐྱིད་ལ་རོལ་བཞིན་ཡོད། འོན་ཏེ། ངའི་ཕ་ཡུལ་ལ་ཁ་པར་དང་དྲ་ལམ་བཀག་སྟེ་ཟླ་བ་ནས་ལོ་ལ་ཉེ་སོང་། ངའི་ཕ་ཡུལ་འདི་རྒྱ་གཞུང་གིས་ལྕགས་སྒམ་ཏུ་བཅུག་པ་མ་ཟད་སྒོ་ལྕགས་ཀྱང་བརྒྱབ་འདུག

ངས་ཇི་ལྟར་བྱས་ཏེ་ཕ་ཡུལ་གྱི་ནང་མིས་གཙོས་དགའ་ཉེ་ཚོར་འཚམས་འདྲི་དང་ཁ་བརྡ་བྱེད་ཐུབ་བམ།

ངའི་ཕ་ཡུལ་རྔ་རྫོང་འདི་ས་གོ་ལའི་སྒང་ལ་ཏན་ཏན་ཡོད་ངེས། འཛམ་གླིང་མི་མང་དང་བོད་ཡུལ་སྟོད་སྨད་བར་གསུམ་ལ་དྲ་ཡོད་པ་མ་ཟད། དྲ་བས་སྲིད་འབྱོར་རིག་གསུམ་གཙོས་ཡོད་ཚད་སྟབས་བདེ་བཟོ་བཞིན་ཡོད་ཅིང་། མི་རྣམས་ལ་ངེས་པར་དུ་ཡོད་དགོས་པ་དང་མེད་ན་མི་ཆོག་པའི་དུས་སྐབས་འདི་འདྲ་ཞིག་ལ། ངའི་ཕ་ཡུལ་རྔ་རྫོང་ན་དྲ་མེད་དོན་ཅི་རེད། ངའི་ཕ་ཡུལ་གྱི་ཕུ་ནུ་ཚོ་ལ་དྲ་ཉོ་བའི་དངུལ་མེད་སོང་བ་རེད་དམ། ཡང་ན་ངའི་ཕ་ཡུལ་གྱིས་དྲ་སྤྱོད་མི་ཤེས་པ་རེད། དེ་མིན་ན། བཙན་པོ་དབང་ཡོད་ཀྱིས་དྲ་ལམ་བཀག་སྟེ་རྔ་རྫོང་མི་མང་གི་ཕྱི་ནང་གི་འབྲེལ་ལམ་དང་ལས་དོན་སྣ་མང་ལ་ཆེད་དུ་འགོག་རྐྱེན་བཟོ་བཞིན་ཡོད།

ངའི་ཕ་ཡུལ་ལ་ཅི་ཞིག་མ་འགྲིག་པ་རེད། ངའི་ཕ་ཡུལ་གྱིས་ལས་ངན་ཅི་ཞིག་བསགས་པ་རེད། ངའི་ཕ་ཡུལ་འདི་ཅི་ཞིག་དབང་གིས་རྒྱ་གཞུང་གི་མིག་ལ་མ་མཛེས་པ་རེད། དེ་འདྲའི་སྡང་འདོད་ཅིག་དང་དེ་འདྲའི་བརྙས་བཅོས་ཤིག རྒྱ་ནག་རྒྱལ་ཡོངས་ལ་དྲ་ཡོད་ན་ངའི་ཕ་ཡུལ་ལ་ཅི་ཞིག་གིས་རེད། དབང་འཛིན་པ་ཚོ། ངའི་ཕ་ཡུལ་གྱི་སྡུག་ཉེས་ཅི་ཞིག་བསགས་སོང་། ཤོད་དང་། ས་སྟེངའདི་ལ་མི་ཤོང་བའི་སྡུག་ཉེས་ཤིག་ཤོད་རྒྱུ་ཡོད་དམ། ཡོད་ན་ཤོད་དང་། མེད་ན་ངའི་ཕ་ཡུལ་ལ་དྲ་ལམ་བཀག་ནས་ཅི་ཞིག་བྱ་རྩིས་ཡིན། མི་ཚང་མ་ལ་དྲ་དགོས་ན་ངའི་ཕ་ཡུལ་ལའང་ལོས་དགོས། ངའི་ཕ་ཡུལ་གྱི་མི་ཚོ་ཡང་འགྲོ་བ་མིའི་རིགས་ཡིན་པ་གཅིག་པ་རེད།

དབང་འཛིན་པ་ཚོ། ངའི་ཕ་ཡུལ་ནས་རང་ལུས་མེར་སྲེག་མཁན་མང་པོ་བྱུང་སོང་། དེའི་རྐྱེན་གྱིས་དྲ་བཀག་པ་ཡིན་ན། དྲ་བཀག་པ་ལ་བརྟེན་ནས་རང་ལུས་མེར་སྲེག་མཁན་མང་དུ་འབྱུང་གི་འདུག ཡུལ་གྲུ་གཞན་དང་ས་གནས་གཞན་ན་མེད་པའི་ངའི་ཕ་ཡུལ་ལ་ཐུབ་ཚོད་དང་བསྙས་བཅོས་བྱེད་པ་མང་དྲགས་པས། རང་ལུས་མེར་སྲེག་བྱེད་དགོས་བྱུང་བ་རེད། དེ་རེད་མ་གཏོགས་ངའི་ཡུལ་མི་ཚོ་འཚོ་སྡོད་ལ་མི་དགའ་ཞིང་། རང་སྲེག་ལ་དགའ་དྲགས་ནས་མ་རེད།

དབང་འཛིན་ཚོས་ངའི་ཕ་ཡུལ་འདི་ཉེས་མེད་ཉེས་ཅན་པར་བརྩིས་ཏེ། དམར་གསོད་དང་འཛིན་བཟུང་། བཙོན་འཇུག་དང་ཁྲིམས་ཆད། འགྲོ་འདུག་ལ་དམ་དྲག དམག་མི་དང་ཉེན་རྟོག་པས་འཇིག་སྐུལ དཔུང་ངོམ། དྲག་གནོན་གྱིས་ལོ་དང་ལོ་མཐུད་པས། ངའི་ཕུ་ནུ་ཚོ་ཅི་བྱེད་འདི་བྱེད་མེད་པའི་གནས་སུ་བསྐྱལ་བ་མ་ཟད། ཁྱོད་ཅག་གིས་ལག་བསྟར་བྱེད་བཞིན་པའི་མནར་གཅོད་ལས། དམར་པོ་མེ་ཡིས་འཚིག་ནའང་བདེ་བ་ཚོར་གྱི་ཡོད། དབང་འཛིན་ཚོ། ཁྱོད་ཚོས་ངའི་ཕ་ཡུལ་གྱི་ཕུ་ནུ་ཚོ་གནས་སྟངས་ག་འདྲ་ཞིག་ལ་བརྫིངས་འདུག

རྒྱ་ནག་ལ་འགྲོ་བ་མིའི་ཐོབ་ཐང་ཧ་ཅང་གི་སྐྱོ་བོ་ཡིན་པ་ཡོངས་གྲགས་རེད། འོན་ཏེ་རྔ་བ་རྫོང་ལྟ་བུ་ཟླ་བ་ལོར་མཐུད་དེ་དྲ་ལམ་བཀག་འགོག་བྱེད་ཀྱིན་པའི་ས་ཁུལ་ཡོད་དམ།རྒྱ་ནག་ནང་ལོག་དང་བོད་ཁུལ་གཞན་ནའང་། དབང་འཛིན་པའི་འདོད་བློ་ལྟར་མིན་པའི་གནད་དོན་བྱུང་ནའང་། གནས་སྐབས་ཙམ་ལ་དྲ་ལམ་དམ་དྲག་བྱེད་པ་ལས་རྔ་རྫོང་ནང་བཞིན་ཟླ་བ་ལོར་མཐུད་དེ་དམ་དྲག་གི་ས་ཆ་ཞིག་མེད་ཚོད་རེད།

མི་དང་མིའི་བར་དུ་ཁ་པར་དང་དྲ་ལམ་སྤྱད་དེ། ཉིན་རེའི་འགྲོ་འདུག་སྤྱོད་གསུམ་ནས། ནང་མི་ནས་ནང་མིའི་བར་དང་གྲོགས་པོ་ནས་གྲོགས་པོའི་བར་དུ་སྐད་ཆ་ག་ཚོད་བཤད་རྒྱུ་ཡོད།ལས་དོན་ཆེ་ཆུང་ག་ཚོད་བསྒྲུབ་རྒྱུ་ཡོད། འདི་དག་ནི་ཉིན་རེའི་འཚོ་བའི་ཁྲོད་ཀྱི་སྤྱིར་བཏང་ཞིག་རེད། འདིས་ཅི་ཞིག་ལ་གནོད་ཀྱིན་ཡོད་དམ། འདིས་རྒྱལ་ཁབ་ཀྱི་བརྟན་བརླིང་ལ་གནོད་ཀྱིན་འདུག་ལབ་ན། རྒྱལ་ཁབ་ཀྱི་བརྟན་བརླིང་ལབ་ན་ཇི་འདྲ་ཞིག་རེད། ཁ་པར་དང་དྲ་ལམ་སྤྱད་ན་བརྟན་བརླིང་ལ་གནོད་ཀྱིན་ཡོད་ན། དེ་འདྲའི་གནོད་ཆོག་ཆོག་གི་བརྟན་བརླིང་མེད་པའི་རྒྱལ་ཁབ་ཅིག་ས་འདིའི་སྒང་ལ་ཁྱོད་ཚོའི་རྒྱལ་ཁབ་གཅིག་བུ་དེ་ཡིན་ངེས།

དབང་འཛིན་པ་ཚོ། ཁྱོད་ཚོར་དགོས་པའི་རྔ་རྫོང་མི་མང་ནི། ཁ་གྲག་མི་ཤེས་པའི་ལྐུག་པ་རྐྱང་དང་། ཡང་ན་ཁྱོད་ཚོའི་གང་བཤད་ལ་ལེགས་སོ་རྐྱང་ལབ་མཁན་ཞིག་ཡིན་དགོས་ཀྱང་། རྔ་རྫོང་མི་མང་ལ་ཁྱོད་ཚོས་ཅི་ཞིག་བྱེད་ཀྱིན་ཡོད་པ་དང་། ཁ་ནས་བརྟན་བརླིང་ཟེར་བཞིན་དོན་ལ་ཁྲིམས་སྒྲིག་ལ་འང་ལྟོས་མི་དགོས་པར་རང་སྣང་གང་དྲན་དང་། རང་དོན་ཁོག་བཅུག་གིས་ཆུང་ཆུང་དག་ཆེན་པོ་བཟོས་ཏེ། མི་མང་ལ་དྲག་གནོད་དང་མནར་གཅོད་ཁོ་ནའི་སྲིད་ཇུས་ཤིག་ལག་བསྟར་བྱེད་ཀྱིན་ཡོད། དེ་དག་དངོས་སུ་མཐོང་ཐོས་མྱོང་གསུམ་ཡོད་མཁན་རྔ་རྫོང་མི་མང་ཡིན། དངོས་ཡོད་གནས་སྟངས་དེས་རྔ་རྫོང་མི་མང་ཡར་ལངས་འཇུག་གི་ཡོད་ཅིང་། མང་ཚོགས་ཀྱི་ཁྲོམ་སྐོར་ནས་རང་ལུས་མེར་སྲེག དེ་ནས་གཅིག་བུར་ཁེ་རྒྱུག་གི་ངོ་རྒོལ་གྱི་ལམ་ལ་དེད་སོང་།དེར་བརྟེན་རྒྱལ་ཁབ་ཀྱི་བརྟན་བརླིང་མེད་པར་བཟོ་མཁན་དེ་ས་གནས་མི་མང་མིན་པར་རྒྱ་དཔོན་ཁྱོད་ཚོ་ཡིན་པ་འདི་རེད།

མདོར་ན། རྔ་རྫོང་མི་མང་ལ་རྒྱ་གཞུང་གིས་བཙན་གནོན་དང་ཐུབ་ཚོད་ག་འདྲ་བྱས་ནའང་། སྔར་ལྷག་ནང་ཁུལ་མཐུན་སྒྲིལ་དང་རང་གི་ཡི་གེ་དང་རིག་གནས་དགའ་ཞེན་ཇེ་ཆེ་ནས། སེམས་སྟོབས་བསྐྱེད་དེ་གོང་ས་རྒྱལ་བ་རིན་པོ་ཆེའི་ཞལ་མཇལ་གསུང་ཐོས་ཀྱི་སྐལ་བཟང་ཞིག་ལ་རེ་ནས་བསྡད་ཡོད་པ་རེད་ལ། ངའི་ཕ་ཡུལ་གྱི་མི་མང་ཚོ་གསོད་ཆོག་ཆོག་ཅིག་མིན་ལ་ཤི་ཆོག་ཆོག་ཅིག་དེ་བས་ཀྱང་མིན།

༼ཟུར་ཞུ། རྩོམ་འདི་དེ་སྔོན་ཞིག་ལ་བྲིས་པ་ཡིན་ལ། འདོད་པ་ཚིམ་ནི་ཞིག་མ་བྱུང་བས་གད་སྙིག་ནང་གཡུགས་ཡིན། དེ་རིང་གད་སྙིག་གཙང་མ་བཟོ་སྐབས་མཐོང་བས་བསྐྱར་ཀློག་ཅིག་བྱས་ཏེ། དེ་མུར་ནག་བསུབ་བཏང་བ་ལས། ཡག་ན་རྩོག་ན་སོ་སོའི་ཟིན་བྲིས་སུ་བཀོད་ན་མ་འགྲིག་པ་ཅི་ཡོད་བསམས་ཏེ་འདིར་དྲངས་པ་ཡིན།༽