ཉེ་ལམ་ཨ་རིའི་གྲོས་ཚོགས་འོག་མའི་དམངས་གཙོ་ཚོགས་པའི་ལྕམ་ནེན་སི་པེ་ལོ་སི་མཆོག་གིས་སྣེ་ཁྲིད་དེ་གྲོས་ཚོགས་འཐུས་མི་བརྒྱད་བལ་ཡུལ་དང་རྒྱ་གར་དྷ་རམ་ས་ལ་སོགས་སུ་ཕེབས་པའི་སྐོར་ཕྱི་ཚེས་ ༡༦ ཉིན་ཨ་རིའི་གྲོས་ཚོགས་ནང་གསར་འགོད་ལྷན་ཚོགས་བསྐྱངས་ཏེ། འཐུས་མི་རེ་རེ་ནས་གཏམ་བཤད་གནང་སྐབས་སྐུ་ཞབས་ཇིམ་མེག་གྷ་ཝན་(Jim McGovern)ལགས་ཀྱི་གཏམ་བཤད་བོད་སྒྱུར་བྱས་ཏེ་བཀོད།
མགོ་ཁྲིད་ལྕམ་སྐུ་ཞབས་པེ་ལོ་སི་མཆོག་གིས་ང་རང་ཐེངས་འདིའི་ཕྱོགས་སྐྱོད་དུ་ཁྲིད་པར་ཐུགས་རྗེ་ཆེ་ཞུ་རྒྱུ་ཡིན། ༢༠༡༥ ཟླ་ ༡༡ ནང་ངས་ཁོང་མོ་དང་གྲོས་ཚོགས་འཐུས་མི་ལྕམ་སྐུ་བྷེ་ཊི་མེག་ཀ་ལམ་(Betty McCollum)དང་། དེ་བཞིན་ལྕམ་སྐུ་ཞབས་ཇོ་སི་བྷི་ཊི་ (Joyce Beatty) ལགས་བཅས་དང་མཉམ་དུ་རྒྱ་ནག་ཏུ་ཕྱིན་པ་ཡིན། སྐབས་དེར་རྒྱ་གཞུང་གིས་ང་ཚོ་བོད་དུ་སྐྱོད་ཆོག་པའི་ཆོག་མཆན་སྤྲད་པར་ཅུང་ཟད་ཡ་མཚན་སྐྱེས་སོང་། གང་ཡིན་ཟེར་ན། ང་ཚོས་ལོ་མང་ལ་ཐབས་ཤེས་བྱས་ཀྱང་། རྒྱ་གཞུང་གིས་ཨ་རིའི་གྲོས་ཚོགས་འཐུས་མི་བོད་དུ་སྐྱོད་པར་མུ་མཐུད་དེ་དམ་དྲག་བྱས་པ་རེད། རྒྱ་གཞུང་གིས་ང་ཚོ་བོད་དུ་བསྐྱོད་བཅུག་པ་ནི་རྒྱ་གཞུང་གིས་༸གོང་ས་མཆོག་དང་བོད་མིའི་ཐོག་འཛིན་པའི་སྲིད་བྱུས་ལ་བཟང་ཕྱོགས་ཀྱི་རྣམ་པ་ཞིག་ཡིན་པའི་རེ་བ་བྱེད་ཀྱི་ཡོད།
འོན་ཀྱང་། བློ་ཕམ་པ་ཞིག་ནི་བོད་ནང་གི་གནས་སྟངས་དང་རྒྱ་ནག་གི་སྟངས་འཛིན་ནས་བྲོས་བྱོལ་དུ་ཡོང་བའི་བོད་མི་ཚོའི་དཀའ་ངལ་ཇེ་སྡུག་ནས་ཇེ་སྡུག་ཏུ་འགྲོ་བཞིན་འདུག ང་ཚོའི་ཐེངས་འདིའི་ཕྱོགས་སྐྱོད་དེས་རྒྱ་ནག་གཞུང་ལ་བོད་ཀྱི་གནད་དོན་མ་སེལ་ནས་ཡལ་འགྲོ་རྒྱུ་ཞིག་མིན་པའི་བརྡ་ལན་སྤྲོད་ཆེད་ཡིན།
ང་ཚོ་དྷ་རམ་ས་ལར་༸གོང་ས་ཏཱ་ལའི་བླ་མ་མཆོག་དང་སྲིད་སྐྱོང་བློ་བཟང་སེངྒེ་ལགས་ཀྱིས་གཙོས་བོད་མི་སྟོང་ཕྲག་མང་པོས་བརྩེ་སེམས་ཆེན་པོའི་ཐོག་ཕེབས་བསུ་དང་སྣེ་ལེན་ཟབ་རྒྱས་ཞུས་པར་དགའ་ཚོར་ཆེན་པོ་བྱུང་།
རྒྱ་གཞུང་གི་བཙན་གནོན་ལས་བྲོས་ཏེ་རྒྱ་གར་དུ་བཙན་བྱོལ་ལ་ཡོང་བའི་བོད་མི་སྟོང་ཕྲག་མང་པོར་རྒྱ་གར་གཞུང་དང་མི་མང་གིས་མཐུན་འགྱུར་རོགས་རམ་ཤུགས་ཆེན་པོ་བྱས་ཡོད་སྟབས། ང་ཚོས་བཀའ་དྲིན་རྗེས་དྲན་དང་རྗེས་སུ་ཡི་རངས་ཞུས་པ་ཡིན།
ང་ཚོས་རྒྱ་གཞུང་ལ་༸གོང་ས་ཏཱ་ལའི་བླ་མ་མཆོག་དང་བོད་མི་བཙན་བྱོལ་བ་རྣམས་རང་ཡུལ་དུ་ཕྱིར་ལོག་འཇུག་དགོས་པ་དང་། ༸གོང་ས་ཏཱ་ལའི་བླ་མ་མཆོག་གིས་དབུ་ཁྲིད་པའི་བོད་མི་བཙན་བྱོལ་བ་རྣམས་ལ་དབུ་མའི་ལམ་གྱི་སྲིད་བྱུས་འོག་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་སྤྲད་དེ། བོད་མི་རྣམས་ལ་སོ་སོའི་མི་རིགས་ཀྱི་ཐུན་མིན་ཆོས་དང་རིག་གཞུང་། སྐད་ཡིག་སོགས་རང་དབང་ཐོག་སྲུང་སྐྱོབ་བྱ་རྒྱུའི་ཐོབ་ཐང་འབུལ་དགོས་ཞེས་ཞུ་བཞིན་ཡོད་ལ། རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་བཀུར་དང་། ༸པཎ་ཆེན་རིན་པོ་ཆེ་མཆོག་གིས་གཙོས་བོད་མི་ཆབ་སྲིད་བཙོན་པ་ཚང་མ་གང་མགྱོགས་ཀློད་གྲོལ་གཏང་དགོས་ཞུ་རྒྱུ་ཡིན།
ང་ཚོས་ཡིད་ཆེས་བརྟན་པོ་བྱེད་བཞིན་པ་ནི། རྒྱ་ནག་གཞུང་ལ་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ཐག་གཅོད་བྱ་རྒྱུའི་ཐོབ་ཐང་མེད། བོད་ཀྱི་བླ་སྤྲུལ་ཡང་སྲིད་ཐག་གཅོད་བྱ་རྒྱུའི་ཐོབ་ཐང་དེ་༸གོང་ས་ཏཱ་ལའི་བླ་མ་མཆོག་དང་བོད་མི་ཁོ་ནར་ཡོད། ང་ཚོས་ཐེངས་འདིར་ཕྱོགས་སྐྱོད་སྐབས་ཐུག་འཕྲད་བྱས་པའི་གཞུང་དང་མགོ་ཁྲིད་ཚོར་བོད་དང་འབྲེལ་ཡོད་ཀྱི་གནད་དོན་དེ་དག་སེལ་ཆེད། བོད་རྒྱ་གཉིས་ཀྱི་གྲོས་མོལ་མགྱོགས་མྱུར་ཡོང་བར་འབད་བརྩོན་བྱེད་རོགས་ཞེས་འབོད་སྐུལ་བྱས་པ་ཡིན།
ང་ཚོས་བལ་ཡུལ་གྱི་སྲིད་བློན་དང་ཕྱི་སྲིད་བློན་ཆེན། དེ་བཞིན། གྲོས་ཚོགས་ཀྱི་ཚོགས་གཙོ་དང་སྲིད་འཛིན་སོགས་འབྲེལ་ཡོད་མགོ་ཁྲིད་ཚང་མར་ཐུག་ནས་བོད་མི་རྣམས་ལ་ཐོབ་ཐང་ལག་འཁྱེར་དང་ཡིག་ཆ་སོགས་སྤྲད་དེ་ཁྲིམས་མཐུན་བཟོ་དགོས་པ་དང་། ཁྲིམས་མཐུན་ཐོག་ནས་བོད་མི་དེ་དག་སྡོད་ཆོག་པ་ཞིག་བཟོས་ཏེ་ལས་ཀའི་གོ་སྐབས་དང་ཚོང་འབྲེལ་གཉེར་ཆོག་པ་མ་ཟད། རྒྱལ་ཁབ་གཞན་ལ་རང་དབང་ཐོག་ནས་འགྲིམ་འགྲུལ་བྱེད་ཆོག་པ་ཞིག་བཟོ་རོགས་ཞུས་པ་ཡིན།
ཨ་རིའི་གཞུང་གིས་རྒྱལ་ཁབ་གཞན་དང་མཉམ་རུབ་ཐོག་བོད་དོན་རྒྱབ་སྐྱོར་ཚོགས་པ་བཙུགས་ནས་བོད་དོན་སྐོར་གླེང་སློང་ཡང་ནས་བསྐྱར་དུ་ཡོང་ཐབས་བྱེད་རོགས་ཞུ་རྒྱུ་ཡིན། ཇར་མན་དུ་ང་ཚོས་ཇར་མན་བདེ་སྲུང་སློབ་སྟོན་པ་དང་ཐུག་འཕྲད་བྱས་ཏེ་བོད་དོན་ལ་རྒྱབ་སྐྱོར་དགོས་པའི་འབོད་སྐུལ་ཞུས་པ་མ་ཟད། སྦར་སིལ་དུ་ཡོད་པའི་ཡུ་རོབ་སྤྱི་མཐུན་ཚོགས་པའི་གྲོས་ཚོགས་འཐུས་མི་རྣམས་ལ་མཉམ་རུབ་ཐོག་ནས་བོད་དོན་ལ་རྒྱབ་སྐྱོར་བྱེད་དགོས་པའི་རེ་འདུན་བཏོན་པ་ཡིན།
ང་ཚོས་ཨ་རིའི་གྲོས་ཚོགས་ནང་གི་ཆབ་སྲིད་ཚོགས་པ་ཐུན་མོང་གིས་བོད་དོན་རྒྱབ་སྐྱོར་གྱི་གྲོས་ཆོད་འདོན་རོགས་ཞུ་གི་ཡོད་ལ། རྒྱ་ནག་གི་མི་སེར་རྣམས་ཨ་རིར་རང་དབང་ཐོག་ནས་འགྲོ་འོང་བྱ་རྒྱུའི་ཐོབ་ཐང་ཡོད་པ་ལྟར། ཨ་རིའི་གཞུང་གི་ལས་བྱེད་དང་གསར་འགོད་པ། ཡུལ་སྐོར་སྤྲོ་འཆམ་པ་སོགས་རང་དབང་ཐོག་ནས་བོད་ནང་བསྐྱོད་ཆོག་པའི་ཆོག་མཆན་སྤྲོད་དགོས་ཞུ་རྒྱུ་ཡིན། ང་ཚོས་སྲིད་འཛིན་ཊི་རུམ་ཕི་ལགས་དང་ཁོང་གི་གཞུང་ལ་བོད་ཀྱི་གནད་དོན་དེ་གལ་ཆེ་ཤོས་ཤིག་ཏུ་བརྩིས་ཏེ། བོད་དོན་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་དགོས་པ་དང་། ༸གོང་ས་ཏཱ་ལའི་བླ་མ་མཆོག་དང་གང་མགྱོགས་མཇལ་འཕྲད་གནང་རོགས་ཞུ་རྒྱུ་ཡིན།
ཇར་མན་དང་རྒྱ་གར་ནང་ང་ཚོས་ཚོང་པ་གྲགས་ཅན་མང་པོ་ཞིག་དང་ཐུག་སྐབས། རྒྱ་ནག་དང་མཉམ་དུ་བོད་ཀྱི་གནད་དོན་དང་གཞན་ཡང་རྒྱ་ནག་ནང་ཡང་ཡང་དྲག་གནོན་བྱེད་བཞིན་པའི་འགྲོ་བ་མིའི་ཐོབ་ཐང་སྐོར་གླེང་སློང་བྱེད་དགོས་པའི་རེ་འདུན་བཏོན་པ་ཡིན། ཚོང་གི་ཁེ་བཟང་དང་འབྲེལ་ལམ་ལ་ཁག་གཡར་ནས་ཅི་ཡང་མི་སྨྲ་བར་བསྡད་ན་འགྲིག་གི་མ་རེད། བོད་ནང་གི་གནས་སྟངས་གང་འདྲ་ཡོད་པ་ཤེས་བཞིན་དུ་ཁ་བཙུམས་ནས་བསྡད་པ་དེས། རྒྱ་གཞུང་གི་དྲག་སྤྱོད་ལ་རྒྱབ་སྐྱོར་ཡོད་པ་མཚོན་གྱི་ཡོད།
མཐའ་དོན། ཁྱེད་ཚོ་ལྟར་ངས་ཀྱང་རྒྱ་ནག་དང་ང་ཚོའི་བར་འབྲེལ་བ་བཟང་པོ་ཞིག་བྱུང་ན་བསམ་གྱི་ཡོད། ངས་རྒྱ་མི་རིགས་དང་རྒྱ་ནག་གི་རིག་གཞུང་། ལོ་རྒྱུས་བཅས་ལ་གུས་བརྩི་དང་བསྔགས་བརྗོད་ཞུ་བཞིན་ཡོད།
རྒྱ་ནག་ནི་འཛམ་གླིང་གི་སྟོབས་ཤུགས་ཆེན་པོའི་རྒྱལ་ཁབ་ཅིག་རེད། འོན་ཀྱང་། རྒྱ་ནག་གཞུང་གིས་༸གོང་ས་ཏཱ་ལའི་བླ་མ་མཆོག་ལ་དོགས་ཟོན་བྱ་རྒྱུ་མཚམས་འཇོགས་བྱེད་དགོས། ང་ལ་ཆ་བཞག་ན། འཚེ་མེད་ཞི་བ་དང་བྱམས་བརྩེ། དྲང་བདེན་གོང་མཐོར་གཏོང་གནང་མཁན་འཇིག་རྟེན་གྱི་མི། འཛམ་གླིང་ཀུན་གྱིས་དགའ་མོས་ཞུ་ཡུལ་༸གོང་ས་ཏཱ་ལའི་བླ་མ་མཆོག་ཁོང་ལྟ་བུ་ཞིག་ལའང་རྒྱ་ནག་གཞུང་གིས་ཞེད་སྣང་བྱེད་པ་དེར་ཡ་མཚན་སྐྱེ་བཞིན་འདུག ཁོང་གིས་རྒྱ་ནག་ཁ་བྲལ་གཏོང་བའི་ཉེན་ཁ་མེད། ཁོང་གིས་རང་ཡུལ་བོད་དུ་བོད་མི་ཚོའི་མཉམ་དུ་ཕྱིར་ལོག་ནས་རང་གི་མི་ཚེ་སྐྱེལ་བའི་ཐུགས་འདོད་གནང་གི་ཡོད་པ་རེད། ངས་ཉིན་མོ་དེ་གང་མགྱོགས་འཆར་བའི་སྨོན་འདུན་ཞུ་གི་ཡོད།
གསར་འགོད་པ། ཉི་མ་ཚེ་རིང་།
བོད་མི་ལབལ་ཡུལ་གཞུང་གི་ཁྲིམས་མཐུན་གྱི་ཆོག་མཆན་ནམ་ངོ་སྤྲོད་ཡིག་ཆ་རག་པའི་ཆ་རྐྱེན་དེ་ཀུན་སྤྱོད་བཟང་པོ་མེད་པས་མི་སྤྲོད་པ་རེད་འདུག
དེ་མིན་སྐྱལ་བཅོལ་བོད་རིགས་ལ་བལ་ཡུལ་ཡོད་ན་དེ་སྐྱིད་དང་། དགུ་ཡངས། རང་དབང་འདྲ་བ་ཞིག་ས་གང་ནའང་མི་འདུག་ཞེས་བོད་པ་ཁོ་རང་ཚོ་ཟེར་གི་ཡོད་རེད།