ཐུབ་དབྱིག
༄༅། །སྤྱི་ཟླ་གསུམ་པའི་ཚེས་ ༡༠ ཉིན་བཞུགས་སྒར་དུ་གསུམ་བཅུའི་དུས་དྲན་ཐེངས་ ༥༩ པ་སྲུང་བརྩི་ཞུ་བའི་མཛད་སྒོར་སྲིད་སྐྱོང་བློ་བཟང་སེངྒེ་ལགས་ཀྱིས་གསུངས་འཕྲིན་སྒྲོག་སྦྱང་གནང་བའི་ནང་ “ཕྱི་ལོ་ ༡༩༦༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་འོག་བོད་ཆོལ་གསུམ་ཆོས་བརྒྱུད་དང་བཅས་པའི་དབུ་འཁྲིད་ཚོས་གནས་མཆོག་རྡོ་རྗེ་གདན་དུ་ཆིག་བསྒྲིལ་གོང་བུ་གཅིག་གྱུར་བྱེད་རྒྱུའི་མནའ་གན་མཐུ་མོ་ཆེ་བཞག་པ་ལྟར། བོད་མི་ཚོ་ནང་ཁུལ་ཆོལ་ཁ་དང་། ཆོས་ལུགས། ལུང་ཚན་སོགས་ཀྱི་འཐེན་འཁྱེར་མེད་པར་བོད་མི་ནང་ཁུལ་ཆིག་བསྒྲིལ་དམ་ཟབ་ཡོད་ཀྱང་། བར་སྐབས་བཙན་བྱོལ་བོད་མིའི་སྤྱི་ཚོགས་ནང་ཆོལ་ཁའི་འཐེན་འཁྱེར་ཡོང་བཞིན་པའི་གནས་སྟངས་ནི་བློ་ཕམ་གྱི་རང་བཞིན་ལས་མ་འདས། དེའི་རྐྱེན་པས་གཞིས་བཞུགས་བོད་མི་མང་སེམས་ཤུགས་ཆགས་གཞི་དང། ལྷག་པར་བོད་མིའི་འཐབ་རྩོད་ལའང་གནོད་གཞིར་གྱུར་ན་དེ་བས་བློ་འཚབ་བྱེད་དགོས་པ་ཞིག་རེད། ང་ཚོ་བོད་མི་ནང་ཁུལ་གྱི་མཐུན་སྒྲིལ་ལ་དོ་ཕོག་བྱུང་ནས་བོད་མིའི་བདེན་དོན་འཐབ་རྩོད་ཀྱི་ནུས་པ་ཉམས་རྒྱུ་དེ་ང་ཚོར་མི་དགོས་པ་དང་རྒྱ་གཞུང་ལ་དགོས་པ་དེ་ཆགས་ཀྱི་ཡོད། དེ་བཞིན་ཅོལ་ཆུང་འགའ་ཤས་ཕ་རོལ་པོའི་བེད་སྤྱོད་འོག་ཚུད་ནས་བོད་མི་ནང་ཁུལ་འཁྲུག་གཞིའི་ལག་ཆར་འགྱུར་ན་ཚད་ལས་བརྒལ་བའི་ཐབས་སྡུག་གི་གནས་སྟངས་ཤིག་རེད། དེ་འདྲ་སོང་ཙང་བྱེས་འབྱོར་བོད་མི་ཚང་མས་ཆིག་བསྒྲིལ་གྱི་གོང་བུའི་ནུས་པ་སྲ་བརྟན་དགོས་པའི་འབོད་སྐུལ་ནན་པོ་བྱེད་རྒྱུ་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་དང་བཀའ་སློབ་ལམ་སྟོན་འོག་བོད་མི་རྣམས་ཡ་རབས་སྤྱོད་བཟང་དང་། ནང་ཁུལ་མཐུན་སྒྲིལ་དམ་ཟབ་ཡོད་པའི་རྒྱུ་མཚན་ལ་བརྟེན་ནས། རྒྱ་གར་དང་རྒྱལ་སྤྱི་ཁྱོན་ཡོངས་ནང་བོད་དང་བོད་མིར་རྒྱབ་སྐྱོར་དང་གདུང་སེམས་མཉམ་སྐྱེད་འཐོབ་བཞིན་ཡོད་པ་ཚང་མས་བློ་ངེས་དགོས་རྒྱུ་གལ་ཆེན་པོ་ཡིན “ ཞེས་གསུངས་འདུག གསུང་འཕྲིན་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དབུ་ཁྲིད་འོག་ཆོལ་གསུམ་ཆོས་ལུགས་དང་བཅས་པའི་དབུ་ཁྲིད་ཚོས་མནའ་འགན་མཐུ་མོ་ཆེ་བཞག་པ་ཞེས་པ་དེ་ལོ་རྒྱུས་ལ་ནོར་འཁྲུལ་རེད། བོད་ཤིང་ཕག་ཟླ་བ་༡༢ ཚེས་ ༧ ཉིན་གནས་མཆོག་རྡོར་རྗེ་གདན་དུ་བཞག་པའི་མནའ་གན་མཐུ་མོ་ཆེ་དེ་སྤྱི་ལོ་ ༡༩༦༠ ལོར་ཆོལ་གསུམ་ཆོས་ལུགས་དང་བཅས་པའི་འཐུས་མི་རྣམས་གནས་མཆོག་རྡོར་རྗེ་གདན་དུ་འདུ་འཛོམས་ཀྱིས་བརྟན་བཞུགས་བསྟར་འབུལ་དང་སྦྲགས་བླང་དོར་ཞུ་སྒོའི་མནའ་གན་དམ་བཅའ་ཕུལ་པ་གཅིག་ཡིན་པ་ལས་ (བོད་ཀྱི་དཔེ་མཛོད་ཁང་གིས་ངག་རྒྱུན་ལོ་རྒྱུས་དེབ་ཕྲེང་ ༢༤ ཤོག་གྲངས་ ༢༡༧ ནང་གསལ་ རྒྱ་གར་གྱི་ས་གནས་ཁག་ནས་ས་དགེ་བཀའ་རྙིང་དང་གཞུང་ཞབས་ལས་ཟུར། མི་འཐུས་བཅས་མི་འཐུས་གྲངས་ ༢༧ གྱི་མང་རྟགས་བཀོད་ཡོད་) སྲིད་སྐྱོང་བློ་བཟང་སེངྒེ་ལགས་ཀྱི་གཏམ་བཤད་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཆོལ་གསུམ་ཆོས་ལུགས་དང་བཅས་པའི་དབུ་ཁྲིད་རྣམས་ཀྱིས་མནའ་གན་མཐུ་མོ་ཆེ་བཞག་པ་ཞེས་པ་དངོས་བདེན་མིན། དེ་ཡང་ཡིག་ཆ་དེའི་ནང་གསལ་ “རབ་བྱུང་ ༡༦ པའི་བོད་ས་ཕག་ཟླ་ ༡༢ ཚེས་ ༧ ལ། དཔལ་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དང་། དཔལ་ལྡན་དམག་ཟོར་གྱི་རྒྱལ་མོ་རེ་མ་ཏི། བསྟན་སྲུང་དམ་ཅན་རྒྱ་མཚོ་དཔང་དུ་བཙུགས། ཕན་བདེའི་འབྱུང་གནས་ལུགས་གཉིས་ཀྱི་༸གོང་མ་ཁྲིམས་བདག་རིན་པོ་ཆེའི་༸ཞབས་དྲུང་དུ།” ཞེས་དང་། མཇུག་ཏུ་ཅེས་ “ཇི་སྲིད་བར་དེ་སྲིད་རྩ་འཛིན་སྤྱི་མཐུན་གན་རྒྱར་མིང་རྟགས་རིམ་འབུལ་ཞུས་གྲས” ཞེས་པའི་འོག་མིང་གནས་དང་ས་རྟགས་བཀོད་ཡོད། སྲིད་སྐྱོང་བློ་བཟང་སེངྒེ་ལགས་དང་བཀའ་ཤག་གིས་དེ་ལ་ནོར་འཁྲུལ་བཟོ་བཅོས་གནང་དགོས་པ་ཡིན།
སྲིད་སྐྱོང་བློ་བཟང་སེངྒེ་ལགས་ཀྱིས་ཡིག་ཐོག་གཏམ་བཤད་སྒྲོག་སྦྱང་གནང་རྗེས་ངག་ཐོག་གཏམ་བཤད་གནང་བའི་ནང་ད་དུང་བློ་འཚབ་བྱེད་དགོས་པའི་གནད་དོན་ཁག་གཅིག་གསུངས་པ་ནི་ད་ཡོད་སྤྱི་ཚོགས་ནང་མ་མཐུན་པའི་འགལ་ཟླ་ཡོད་པ་དེ་གསལ་ཐབས་ལས་ལྡོག་སྟེ་དཀའ་རྙོག་འདི་མུ་མཐུད་རྒྱུན་གནས་རྒྱུའི་ཆ་རྐྱེན་བསྐྲུན་སོང་སྙམ། སྲིད་སྐྱོང་བློ་བཟང་སེངྒེ་ལགས་ཀྱིས་འདས་པའི་དུས་སུ་ཆོལ་ཁ་གསུམ་ཀ་ནས་ཞབས་འདྲེན་ཞུ་མཁན་བྱུང་ཡོད། དབུས་གཙང་ནས་ཞབས་འདྲེན་ཞུ་མཁན་བྱུང་ཡོད། ཁམས་པ་ནས་ཞབས་འདྲེན་ཞུ་མཁན་བྱུང་ཡོད། ཨ་མདོ་ནས་ཞབས་འདྲེན་ཞུ་མཁན་བྱུང་ཡོད་ཅེས་གསུངས་པ་བཞིན་ཆོལ་ཁ་སོ་སོ་ནས་ཞབས་འདྲེན་ཞུ་མཁན་སུ་དང་སུ་ཡིན་སྲིད་སྐྱོང་བློ་བཟང་སེངྒེ་ལགས་ལ་མིང་འདོན་གནང་རྒྱུ་ཡོད་ཀྱི་རེད། དེ་བཞིན་བཀའ་ཤག་གི་ཐག་གཅོད་གནང་ཕྱོགས་ལ་ངོ་རྒོལ་བྱེད་མཁན་དང་འདོད་པ་མེད་མཁན་ཚོས་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུགས་བྱེད་ཆོག་གི་རེད་ཅེས་གསུངས་ནས་བཀའ་ཤག་ལ་ཁྲིམས་གཏུགས་བྱ་རྒྱུར་སེམས་བསྐུལ་བཏང་བ་རེད། མང་གཙོའི་ལམ་ལུགས་ལ་དེ་འདྲ་ཞིག་ཡོད་པ་ཀུན་གྱིས་ཤེས་ཀྱི་ཡོད་ནའང། བོད་མིའི་གནས་བབས་འདི་འདྲ་ཞིག་ལ་མང་ཚོགས་ཀྱིས་བཀའ་ཤག་ལ་ཁྲིམས་གཏུགས་བྱེད་པ་སོགས་མི་དགོས་པ་ཞིག་རེད། གཅིག་བྱས་ན་སྲིད་སྐྱོང་བློ་བཟང་སེངྒེ་ལགས་སུ་ཁ་མཆུ་དེ་ནས་རྒྱལ་ཁ་ཐོབ་རྒྱུའི་གདེང་ཚོད་དང་ཡིད་ཆེས་ཡོད་སྲིད། འོན་ཀྱང་ཁྲིམས་གཏུག་གི་དུས་ཡུན་དེའི་རིང་འཛིན་སྐྱོང་གི་དུས་ཚོད་དང་མི་རྒྱུའི་འགྲོ་གྲོན་གཏོང་དགོས་པ་མ་ཟད། མང་ཚོགས་ནང་དོན་མེད་ལབ་གླེང་རྒྱུན་མི་ཆད་པར་གནས་རྒྱུའི་གཞི་རྩར་འགྱུར་ཉེན་ཡོད། བཀའ་ཤག་གིས་བོད་མིའི་ཆིག་བསྒྲིལ་དང་བརྟན་ལྷིང་གལ་ཆེར་དགོས་པའི་འདུན་པ་དང་ངོས་འཛིན་གནང་གི་ཡོད་ན། དེ་འདྲིའི་གཏམ་བཤད་གནང་རྒྱུ་ནི་ཐབས་ཇུས་བཟང་པོ་ཞིག་གཏན་ནས་མིན།
བཀའ་ཤག་གི་གསུང་འཕྲིན་ནང་བར་ལམ་ནས་ཆོལ་ཁའི་འཐེན་བྱུང་བ་དང་དེས་རྒྱ་ཕྱོགས་ལ་དགོས་པ་ཞིག་ལས་རང་ཕྱོགས་ལ་དགོས་པ་ཞིག་མིན་སྐོར་གསུངས་ནས་བོད་མི་ཚོར་ཆིག་བསྒྲིལ་དགོས་པའི་འབོད་བསྐུལ་གནང་འདུག བཀའ་ཤག་གིས་དེ་ལྟར་འབོད་བསྐུལ་གནང་བ་དེ་དགོས་ངེས་དང་འོས་ཤིང་འཚམས་པ་ཞིག་རེད། འོན་ཀྱང་སྲིད་སྐྱོང་བློ་སེངྒེ་ལགས་ཀྱིས་དབུ་ཁྲིད་པའི་བཀའ་ཤག་གིས་ད་ཡོད་ཆོལ་ཁའི་འཐེན་འཁྱེར་ཟེར་བ་དེ་མ་བྱུང་གོང་སྤེན་པ་ཚེ་རིང་ལགས་ལས་མཚམས་འཇོག་དགོས་པའི་ཐག་གཅོད་གནང་སྐབས་ཞིབ་ཏུ་དགོངས་པ་བཞེས་ཐུབ་ཡོད་དམ་ཞེ་ན། ད་བར་གྱི་བྱུང་རིམ་ལ་དཔྱད་ཚེ་དེ་འདྲའི་ཐུགས་ཞིབ་ཟབ་ནན་དང་སྤྱི་ཚོགས་ཆམ་མཐུན་དང་ལྷིང་འཇགས་ལ་འགན་འཁུར་བཞེས་མེད་པ་དེ་གསལ་པོ་རེད། བཙན་བྱོལ་བོད་མིའི་སྤྱི་ཚོགས་དུམ་བུར་སོང་བའི་དཀའ་ངལ་གྱི་རྐྱེན་རྩ་ནི་བཀའ་ཤག་གིས་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་གློ་བུར་ལས་མཚམས་འཇོག་དགོས་པའི་ཐག་གཅོད་ཀྱི་བརྒྱུད་རིམ་དེ་ཡིན་པ་དང་། སྲིད་སྐྱོང་བློ་བཟང་སེངྒེ་ལགས་དང་བཀའ་བློན་རྣམས་ཀྱིས་ཐག་གཅོད་དེ་གནང་སྐབས་བོད་མིའི་ཆིག་བསྒྲིལ་ལས། སོ་སོའི་བསམ་བློ་དང་མངོན་འདོད་རྩ་བ་ཆེ་བར་ངོས་འཛིན་གནང་ཡོད་པ་དེ་ནི་ཐག་གཅོད་ཀྱི་བརྒྱུད་རིམ་ནས་གསལ་པོ་རྟོགས་ཐུབ། སྤྱི་འཐུས་ཚོགས་གཙོ་ཟུར་སྤེན་པ་ཚེ་རིང་ལགས་ནི་སྲིད་སྐྱོང་གི་འོས་མི་གཅིག་ཡིན་པ་མ་ཟད། ཁོང་ལ་རྒྱབ་སྐྱོར་བྱེད་མཁན་མི་མང་གང་ཙམ་ཡོད་ཅིང་། མང་ཚོགས་ནང་ཁོང་ནི་བོད་པ་མི་རབས་གསར་པའི་ནང་འཇོན་ཐང་ཅན་ཞིག་དང་ལྷག་བསམ་ལྡན་པ་ཞིག་ལ་ངོས་འཛིན་བྱེད་ཀྱི་ཡོད་པ་དེ་བཀའ་ཤག་གིས་དགོངས་པར་མངའ་དགོས་པ་དང་། སྤེན་པ་ཚེ་རིང་ལགས་ལས་མཚམས་འཇོག་དགོས་པའི་ཐག་གཅོད་ཀྱི་གསལ་བཤད་དང་རྒྱུ་མཚན་གསུངས་པའི་ནང་ཁོང་གིས་སྐུ་ཚབ་དོན་གཅོད་ཀྱི་ལས་དོན་གནང་ཕྱོགས་དང་གཞུང་གི་སྲིད་བྱུས་ལས་འགལ་འཛོལ་བྱུང་བ། ཡང་ན་ལྐོག་ཟ་རུལ་སུངས་དང་གཞུང་དངུལ་སྒེར་སྤྱོད་བྱས་པ། ལས་འགན་ཞུ་ཕྱོགས་ལ་འཐུད་ཤོར་ཆེན་པོ་བྱུང་བ་བཅས་རྒྱུ་མཚན་ལ་བརྟེན་ནས་ཐག་གཅོད་གནང་ཡོད་ན། སྤྱི་ཚོགས་ནང་ད་ལྟའི་གནས་སྟངས་འདི་ཡོང་ཐབས་མེད། འོན་ཀྱང་བཀའ་ཤག་གིས་དོན་ཚན་བཅུ་ཅན་གྱི་གསལ་བསྒྲགས་དེའི་ནང་གནད་དོན་དེ་འདྲ་གཅིག་ཀྱང་མེད་པ་མ་ཟད། སྤེན་པ་ཚེ་རིང་ལགས་ཀྱིས་ལས་མཚམས་བཞག་རྗེས་དོན་ཚན་སོ་སོར་གསལ་བཤད་ལན་འདེབས་གནང་རྗེས་བཀའ་ཤག་གིས་དེ་དག་ལ་ལན་འདེབས་གང་ཡང་གནང་མེད་པ་དེས་མང་ཚོགས་ནང་བཀའ་ཤག་གིས་སྤེན་པ་ཚེ་རིང་ལགས་ལ་ཐག་གཅོད་གནང་ཕྱོགས་དེ་དྲང་བདེན་མིན་པར་ངོས་འཛིན་བྱས་ཏེ། སྲིད་སྐྱོང་བློ་བཟང་སེངྒེ་ལགས་ལ་ངོ་རྒོལ་དང་བཀའ་ཤག་ལ་སྐྱོན་བརྗོད་བྱེད་ཀྱི་ཡོད། སྲིད་སྐྱོང་བློ་བཟང་སེངྒེ་ལགས་དང་སྤེན་པ་ཚེ་རིང་ལགས་གཉིས་ཆབ་སྲིད་ཀྱི་ཁ་གཏད་ཡིན་པར་བརྟེན་བཀའ་ཤག་གི་ཐག་གཅོད་གནང་བ་དེ་འོས་བསྡུའི་སྐབས་ཀྱི་ཁ་གཏད་ལ་དགྲ་ཤ་ལེན་པར་ངོས་འཛིན་བྱེད་མཁན་ཡང་ཡོད། གནས་ཚུལ་དེས་རྐྱེན་གྱིས་བཙན་བྱོལ་བོད་མིའི་སྤྱི་ཚོགས་ནང་སྲིད་སྐྱོང་བློ་བཟང་སེངྒེ་ལགས་སུ་ངོ་རྒོལ་དང་སྐྱོན་བརྗོད་བྱེད་མཁན་ཚན་པ་གཅིག་དང་། དེ་ལ་ཁ་གཏད་དང་སྲིད་སྐྱོང་བློ་བཟང་སེངྒེ་ལགས་ལ་རྒྱབ་སྐྱོར་བྱེད་མཁན་སྡེ་ཚན་གཅིག་བཅས་ཤོག་ཁ་གཉིས་ཡོད། ཤོག་ཁ་གཉིས་ཀའི་ནང་ཆོལ་ཁ་གསུམ་གྱི་མི་མང་ཡོད་པར་བརྟེན་ད་ལྟ་བཙན་བྱོལ་བོད་མིའི་སྤྱི་ཚོགས་ནང་དཀའ་རྙོག་ཡོད་བཞིན་པ་འདི་བཀའ་ཤག་གིས་གསུང་པ་བཞིན་ཆོལ་ཁའི་འཐེན་འཁྱེར་ལས་བྱུང་བ་ཞིག་ཡིན་པ་ངོས་འཛིན་བྱེད་དཀའ།
འདིར་བརྗོད་པར་འདོད་པ་དེ་ནི་གསུམ་བཅུའི་དུས་དྲན་གྱི་གསུང་འཕྲིན་ནང་ཆིག་བསྒྲིལ་གལ་ཆེའི་སྐོར་གསུངས་པ་དེ་བཀའ་ཤག་ལ་དོན་དམ་གྱི་ཐུགས་འཚབ་དང་ཐུགས་འགན་གཅིག་བཞེས་གནང་གི་ཡོད་ན། གནས་ཚུལ་དེ་མ་བྱུང་གོང་སྲིད་སྐྱོང་དང་བཀའ་བློན་རྣམས་ཀྱིས་བོད་མིའི་ཆིག་བསྒྲིལ་དང་སྤྱི་ཚོགས་ལྷིང་འཇགས་གལ་ཆེར་དགོངས་པ་ཅིའི་ཕྱིར་བཞེས་ཐུབ་མེད་དམ། དེས་མ་ཚད་ཐག་གཅོད་དེ་གནང་རྗེས་སྤྱི་ཚོགས་ནང་བརྟན་ལྷིང་མེད་པའི་གནས་སྟངས་ཡོད་མུས་སུའང་། སྲིད་སྐྱོང་བློ་བཟང་སེངྒེ་ལགས་ཀྱིས་ནུབ་ཕྱོགས་ཡུལ་གྲུར་གཟིགས་བསྐོར་གནང་སྐབས་རྨ་ཁ་དེ་གསོ་རྒྱུའི་ཚབ་ཏུ་གསུང་བཤད་ངར་ཤུགས་ཆེ་ལ་ངོ་རྒོལ་དང་ཞུ་འབོད་བྱེད་མཁན་རྣམས་རང་གི་ཁ་གཏད་ཡིན་པར་ངོས་འཛིན་གནང་ལྟབ་་བུའི་སྐྱོན་བརྗོད་གནང་ཡོད། གལ་སྲིད་ཆིག་བསྒྲིལ་གལ་ཆེར་དགོངས་ཀྱི་ཡོད་ན་བོད་མིའི་སྒྲིག་འཛུགས་ཀྱི་དབུ་ཁྲིད་ཚོས་ངོ་རྒོལ་བྱེད་མཁན་ཚོར་ཐུག་འཕྲད་གནང་ནས་གསལ་བཤད་གནང་རྒྱུའི་ཐབས་ཤེས་ཅིའི་ཕྱིར་གནང་གི་མེད་དམ། ད་དུང་ད་ལྟ་འཚོག་བཞིན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སྐབས་སྲིད་སྐྱོང་བློ་བཟང་སེངྒེ་ལགས་དང་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་བགྲེས་གཞོན་རྣམ་གཉིས་དབུས་སྤྱི་འཐུས་རྣམ་པ་བཅས་ཀྱིས་གནས་སྟངས་དེར་གདོང་ལེན་དང་ཐག་གཅོད་ཇི་འདྲ་ཞིག་གནང་འཆར་ཡོད། སྤྱི་ཚོགས་ནང་ཟང་ཟིང་དང་བརྟན་ལྷིང་མེད་པ། ནང་ཁུལ་མ་མཐུན་པའི་གནས་སྟངས་ཀྱི་སྐབས་སུ་ཆབ་སྲིད་དབུ་ཁྲིད་ཚོས་སོ་སོའི་འདོད་ཕྱོགས་དང་ཁེ་ཕན་རྣམས་བློས་གཏོང་གནང་ནས་སྤྱི་བའི་སྒྲིག་འཛུགས་གལ་ཆེ་བའི་འགན་འཁུར་བཞེས་ཐུབ་ན་དེ་ནི་རླབས་ཆེན་གྱི་དབུ་ཁྲིད་གཅིག་རེད། སེམས་འཚབ་བྱེད་དགོས་པའི་གནད་དོན་གཞན་གཅིག་ནི། བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནས་ཚུལ་དེ་བྱུང་རྗེས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་པའི་ཁོངས་སུ་ཕན་ཚུན་ཡིད་ཆེས་ཆུང་བ་དང་། གཅིག་གིས་གཅིག་ལ་བསམ་ཚུལ་བརྗེ་ལེན་བྱེད་རྒྱུར་དྭོགས་ཟོན་བྱེད་དགོས་པའི་གནས་སྟངས་ཐབས་སྡུག་ཡོད་གནས་གོ་རྒྱུ་འདུག་པ་དེ་ནི་ཧ་ཅང་བློ་འཚབ་བྱེད་དགོས་པ་ཞིག་རེད།
ངེས་དངོས་གནས་ཧ་གོ་ཡི་མི་འདུག
བོད་མི་སྤྱི་ནོར་གོང་ས་སྐྱབས་མགོན་ཆེན་པོ་མཆོག་ལ་དད་པ་ཡོད་ལབ་ཀྱི་ཡོག་རེད།ནང་པ་སངས་རྒྱས་ཀྱིས་ཆོས་བྱེད་བཞིན་ཡོད་ཟེར་གྱི་ཡོག་རེད།བོད་མི་འགའ་ཤས་ཀྱི་བྱེད་སྟངས་དུད་འགྲོ་ལས་སྡུག་བས།གཞིར་མེད་སྐྱོན་བརྗོད་གང་ཐུབ་ཐུབ་བྱེད་བཞིན་ཡོད་པ་དེ་བོད་མི་བཟང་སྤྱོད་རེད་དམ།གལ་ཏེ་དངོས་ཡོད་ཀྱི་གནས་ཚུལ་ཡོད་ན།སེམས་ཤུགས་ཡོད་ན་ཁྲིམས་ཁང་དུ་སྐྱེལ་ནས་གཙང་མ་བཟོས་ན་འགྲིག་གི་རེད་བ།སྤྱང་ཀི་ནང་བཞིན་ངུར་བསྡད་ན་ཕན་ཐོག་ག་རེ་ཡོག་རེད།སྤྱང་ཀི་སེམས་ཅན་གཞན་དག་བཟའ་རྒྱུ་རག་མ་སོང་ཟེར་ངུར་གྱི་ཡོག་རེད།ཁྱེད་ཚོས་དེ་ནང་བཞིན་རེད།ཤེས་སོང་ངམ།
༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་འོག་ཞེས་པའི་” འོག་” དེའི་གོ་དོན་རྟོགས་མི་འདུག་བ། ཧ་ཧ་ཧ་ཧ་འོག་ཞེས་པའི་གོ་དོན་ག་རེ་ཡིན་ནམ། ད་དུང་གཞི་མེད་སྐྱོན་བརྗོད་འདྲ།་་་་་་་་་་
དམར་ཚོགས་སྤེན་ཚོགས་གཉིས་མིང་ཙམ་མ་གཏོགས་དམིགས་ཡུལ་གཅིག་།