ཁ་སང་དྷ་རམ་ས་ལའི་གྲོང་སྡེ་ལས་ཁུངས་ཀྱིས་མགྲོན་ཁང་དང་ཟ་ཁང་སོགས་ཁྱོན་ ༢༩ ཡི་ཆུ་གློག་གཅོད་རྒྱུ་ཡིན་པའི་ཐག་གཅོད་དེ་ཕྱིར་འགྱངས་བྱས་འདུག
དྷ་ས་ས་གནས་སྲིད་གཞུང་གི་ཆོག་མཆན་མེད་པའི་ཐོག་ནས་འཛུགས་སྐྲུན་བྱས་པ་དང་། ཆོག་མཆན་ཐོབ་པའི་འཛུགས་སྐྲུན་དཔེ་རིས་ལས་བརྒལ་བའི་མགྲོན་ཁང་དང་ཟ་ཁང་། ཚོང་ཁང་། དེ་བཞིན་ཁང་གླ་གཏོང་མཁན་ ༡༠༠ ལྷག་ལ་ཞིབ་འཇུག་བྱས་པ་བརྒྱུད། ཟླ་འདིའི་ཕྱི་ཚེས ༢༧ ཉིན་དྷ་ས་མེག་གྷན་གཡས་གཡོན་གྱི་ཁང་པ་ ༢༩ ཡི་ཆུ་གློག་གཅོད་རྒྱུ་ཡིན་པའི་བཀོད་ཁྱབ་བཏང་ཡོད་ཀྱང་། ཕྱི་ཚེས་ ༢༨ ཉིན་ཉེས་ཆད་ཕོག་པའི་མགྲོན་ཁང་ཆེ་ཁག་འགའ་ཞིག་གིས་གཟའ་མཇུག་བསླེབ་གྲབས་ཡོད་སྟབས། ཡུལ་སྐོར་བ་མང་པོ་ཞིག་སྔར་ནས་མགྲོན་ཁང་དུ་བསྡད་ཟིན་ཡོད་པར་བརྟེན། ཉེས་ཆད་ཕྱིར་འགྱངས་གཏོང་རོགས་ཞེས་རེ་སྐུལ་ཞུས་པ་ལྟར་བདུན་ཕྲག་གཅིག་ཕྱིར་འགྱངས་བྱས་ཡོད་འདུག
ཆུ་གློག་བཅད་པའི་ཉེས་ཆད་དེ་འདི་ལོའི་དགུན་སྟོད་ནས་ལག་བསྟར་མགོ་འཛུགས་བྱས་ཡོད་པ་དང་། ད་ལྟ་ཚོང་ཁང་དང་། ཟ་ཁང་། མགྲོན་ཁང་ཆུང་བ་ཁག་ཅིག་ལ་ཆུ་གློག་གི་མཐུན་རྐྱེན་བཅད་ནས་ཟླ་གཅིག་ཙམ་རེ་འགྲོ་བཞིན་ཡོད་ཀྱང་། ཆེ་ཁག་ལ་མུ་མཐུད་ཆུ་གློག་གི་མཐུན་རྐྱེན་སྦྱོར་གྱི་ཡོད་པ་མ་ཟད། ཉེས་ཆད་ཐག་གཅོད་ཟིན་ནའང་ཕྱིར་འགྱངས་གོ་སྐབས་སྤྲོད་ཀྱིན་ཡོད་པའི་སྐྱོན་བརྗོད་དང་། མགྲོན་ཁང་ཆེ་ཁག་གིས་སྣེ་ལེན་ཁང་དང་རླངས་འཁོར་འཇོག་སར་གཞུང་གིས་ཆོག་མཆན་མེད་པར་ཚོང་ཁང་འཛུགས་ཀྱི་ཡོད་ཀྱང་། གཞུང་ངོས་ནས་ཇུས་གཏོགས་བྱེད་ཀྱིན་མེད་ཚུལ་སོགས་ཀྱི་གླེང་རྙོག་ཡོང་གི་ཡོད་པ་དང་། དེ་མཚུངས་དྷ་རམ་ཀོ་ཊིའི་མགྲོན་ཁང་ཆེ་ཁག་ཅིག་ནང་གཞུང་ངོས་ནས་ཆུ་གློག་བཅད་ཡོད་ཀྱང་། མགྲོན་ཁང་དེ་དག་གི་ཁང་པ་ཉུང་ཤས་ཤིག་ནང་ཆུ་གློག་གི་མཐུན་རྐྱེན་སྤྲོད་ཀྱིན་ཡོད་སྐོར་བརྗོད་ཀྱི་འདུག
འདི་གའི་གསར་འགོད་པས་དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་སུ། གནད་དོན་དེའི་ཐོག་མའི་བྱུང་རིམ་སྐོར་ལ་དྲིས་པར་ཁོང་གིས། ཐོག་མར་གནས་ཚུལ་དེ་སིམ་ལ་ནས་བྱུང་ཡོད་པ་དང་། གནས་དེར་གཞུང་གི་ཆོག་མཆན་མེད་པར་འཛུགས་སྐྲུན་བྱས་པ་དང་། ཁང་པ་དང་མགྲོན་ཁང་མང་པོ་ཞིག་གཞུང་གི་ཆོག་མཆན་ལས་བརྒལ་ཏེ་ཐོག་རྩེག་འཕར་མ་བརྒྱབས་དང་། ཡང་ན་ས་ཆ་འཕར་མ་བཟུང་བ་སོགས་ཀྱི་ཁྲིམས་འགལ་བྱ་སྤྱོད་དེ་དག་ལ་ཁ་མཆུ་དང་གླེང་སློང་བྱུང་བ་རེད། མཐར་གནས་ཚུལ་ཛ་དྲག་ཏུ་ཕྱིན་ནས་དབུས་གཞུང་གི་ཁོར་ཡུག་དོ་དམ་གྱི་ཁྲིམས་ར་མཐོ་ཤོས་ཏེ། ཨེན་ཇི་ཊི ( NGT) ཡིས་རྒྱ་གར་ཆེས་མཐོའི་ཁྲིམས་ཞིབ་ཁང་བརྒྱུད་སིམ་ལ་གྲོང་སྡེའི་ལས་ཁུངས་ཁག་གིས་ཆོག་མཆན་མེད་པར་ཤིང་ནགས་གཅོད་བྲེག་དང་། ཁང་པ་དང་མགྲོན་ཁང་འཛུགས་བསྐྲུན་བྱེད་དུ་བཅུག་པ་དེ་ནག་ཉེས་ཆེན་པོ་ཡིན་པ་དང་། དེའི་ཐད་ལ་ཞིབ་འཇུག་བྱ་དགོས་པའི་བཀོད་ཁྱབ་བཏང་བ་ལྟར་ལག་བསྟར་བྱས་ཡོད་པ་དང་། དེ་ལ་བརྟེན་ནས་དྷ་རམ་ས་ལའང་ཞིབ་འཇུག་བྱས་ཏེ་དངོས་སུ་སྙན་ཐོའི་ནང་ཟ་ཁང་དང་མགྲོན་ཁང་ ༡༥༥ ལྷག་གིས་ཁྲིམས་འགལ་འཛུགས་བསྐྲུན་བྱས་ཡོད་པ་འཁོད་ཡོད་པ་མ་ཟད། དེ་ལྟ་བུའི་གནད་དོན་བྱུང་དང་འབྱུང་བཞིན་ཡོད་པས་ཞིབ་འཇུག་ཞིབ་ཚགས་སུ་གཏོང་དགོས་པའི་བཀོད་ཁྱབ་བཏང་སྐོར་བརྗོད་བྱུང་།
ཡང་ཁོང་གིས། གནད་དོན་གསལ་པོ་མཁྱེན་དགོས་པ་ཞིག་ལ་བོད་པའི་ཁང་པ་དང་། ཟ་ཁང་མགྲོན་ཁང་། ཚོང་ཁང་གང་ལའང་ད་ལྟ་བར་དུ་གནད་དོན་བྱུང་ཡོད་པ་མ་རེད། དེར་ཐུགས་འཚབ་གནང་དགོས་པ་མ་རེད་ཅེས་ངས་གསལ་པོ་ཞུས་ན་བསམ་བྱུང་། མ་འོངས་པ་ལའང་དེ་འདྲའི་གནད་དོན་ཕལ་ཆེར་འཕྲད་མདོག་ཁ་པོ་མ་རེད་བསམ་གྱི་འདུག ད་ལྟ་ཡང་གནད་དོན་དེའི་འོག་ཏུ་བོད་རིགས་ཡིན་པ་གང་ཞིག་ལ་རྒྱ་གར་གྱི་མི་སེར་ལག་ཁྱེར་ཡོད་མཁན་ཁག་ཅིག་ཡོད་པ་རེད། དེ་ཡིག་ཆའི་འགྲོ་སྟངས་དང་མི་སེར་གྱི་འགྲོ་སྟངས་ལ་བརྟེན་ནས་ང་ཚོས་དམིགས་བསལ་གྱིས་བོད་པ་ཡིན་པའི་ངོས་འཛིན་ཞུ་དགོས་པའི་གནས་སྟངས་ཆགས་ཀྱི་ཡོད་པ་མ་རེད། ཅེས་བརྗོད་བྱུང་།
རྒྱ་གར་གྱི་གསར་ཁང་ཁག་ཅིག་གིས་གནས་ཚུལ་སྤེལ་བ་ལྟར་ན། དྷ་རམ་ས་ལའི་གནས་སྟངས་དེ་ཐོག་མར་པདྨ་ཐང་གི་ཉེ་མཁྲིས་སུ་རྟེན་གཞི་བྱས་ཡོད་པའི་རྒྱ་གར་ཕྱི་འབྲེལ་ལྷན་ཁང་གི་ཡན་ལག་གིས་ཡར་ཞུ་བྱས་པ་ཡིན་ཚུལ་བརྗོད་འདུག་པ་དང་། དེ་ཡང་ཁོང་ཚོའི་སྙན་ཞུ་དེ་ཐོག་མར་ཧི་མ་ཅལ་མངའ་སྡེའི་གཞུང་གི་ནང་སྲིད་ལྷན་ཁང་གཙོས་པའི་ལྷན་ཁང་ཁག་ཚང་མར་ཕྱི་ལོ་ ༢༠༡༦ ནས་མགོ་བཙུགས་ཏེ་བཏང་ཡོད་ཀྱང་། ཧི་མ་ཅལ་གཞུང་གིས་དམིགས་བསལ་དོ་སྣང་གང་ཡང་མ་གནང་པ་ཡིན་འདུག སྙན་ཞུ་དེའི་ནང་དུ་ཕྱི་སྲིད་ལྷན་ཁང་གི་ཡན་ལག་ནས་༧གོང་ས་མཆོག་གི་ཕོ་བྲང་བར་དུ་ཁྲིམས་འགལ་གྱིས་མགྲོན་ཁང་དང་ཟ་ཁང་སོགས་འཛུགས་བསྐྲུན་གྱིས་རླངས་འཁོར་གྱི་འགྲོ་སྐྱོད་ལ་དཀའ་ངལ་བཟོ་གི་ཡོད་པ་དང་། ༧གོང་ས་མཆོག་གི་ཕོ་བྲང་དུ་ཛ་དྲག་ཐོག་བཅར་དགོས་པ་བྱུང་དུས་རླངས་འཁོར་འགག་པ་སོགས་ཀྱི་རྐྱེན་གྱིས་ཕྱིས་སུ་༧གོང་ས་མཆོག་གི་སྐུ་ཕྱྭར་ཉེན་ཁ་འབྱུང་ངེས་པ་སོགས་འཁོད་ཡོད་འདུག
ཊི་བྷོན་(Tribune)གསར་ཁང་གིས། སྙན་ཞུ་དེར་མངའ་སྡེ་གཞུང་ནས་ཡ་ལན་གང་ཡང་མ་བྱུང་བར་བརྟེན། མཐར་ཕྱི་འབྲེལ་ལྷན་ཁང་གི་ཡན་ལག་ལས་ཁུངས་དེས་རླངས་འཁོར་འགྲོ་སྐྱོད་བདེ་བའི་ཆེད་དུ་མ་རྩ་འབུམ་ ༡༢༥ བཏང་ནས་གཙུག་ལག་ཁང་གི་ཉེ་འཁྲིས་ལམ་འོག་ཏུ་རླངས་འཁོར་འཇོག་ས་ཞིག་གསར་རྒྱག་བྱས་ཡོད་ཀྱང་། ད་ལོའི་ཕྱི་ཟླ་ ༢ ནས་རླངས་འཁོར་འཇོག་ས་དེ་ཁྲིམས་འགལ་ཡིན་པའི་ནག་ཉེས་གཡོགས་ཏེ་བེད་མེད་དུ་བཞག་ཡོད་པའི་ཁར། ཁོ་ཚོས་ཞུ་གཏུག་བྱས་པའི་གནད་དོན་ལ་བདག་སྤྲོད་བྱས་མེད་འདུག
ད་ལྟའི་བར་དུ་དྷ་ས་ཁུལ་ནས་ཁྲིམས་འགལ་ནག་ཉེས་འོག་མགྲོན་ཁང་དང་། ཟ་ཁང་། ཚོང་ཁང་གྲངས་ ༡༦༠ ལ་ཆུ་གློག་བཅད་ཡོད་པ་དང་། དང་ཐོག་མགྲོན་ཁང་དང་ཚོང་ཁང་སོགས་གྲངས ༢༠༠ ལྷག་ལ་ནག་ཉེས་བཙུགས་ཡོད་ཀྱང་རིམ་བཞིན་ཞིབ་འཇུག་བྱས་པའི་མིང་ཐོག་ནས་ཉུང་དུ་ཕྱིན་ཡོད་འདུག དཔེར་ན། ལོ་སྔོན་མར་མགྲོན་ཁང་དང་ཟ་ཁང་ ༡༩༣ ལྷག་ལ་ཆུ་གློག་གཅོད་རྒྱུའི་བཀའ་རྒྱ་བཏང་ཡོད་ཀྱང་། དོན་དངོས་སུ་ ༡༣༠ ལྷག་ལ་མ་གཏོགས་ཉེས་ཆད་ཕོག་མེད་པ་རེད།
འདི་ལོར་མགྲོན་ཁང་དང་ཟ་ཁང་སོགས་ལ་ཉེས་ཆད་དེ་ཕོག་པར་བརྟེན། སྔར་དང་བསྡུར་ན་ད་ལོར་ཡུལ་སྐོར་སྤྲོ་འཆམ་པ་ཉུང་བ་ཡོད་འདུག ཉེས་ཆད་ཕོག་པའི་ཚོང་ཁང་དང་མགྲོན་ཁང་སོགས་རྒྱ་གར་གྱི་མིང་ཐོག་ཏུ་ཡོད་ཀྱང་དེར་ཚོང་ལས་གཉེར་མཁན་བོད་པ་ཡིན་པ་གང་འཚམ་འདུག དེ་བཞིན། དྷ་སའི་བོད་པ་བརྒྱ་ཆ ༧༠ ལྷག་ཙམ་ཞིག་རྒྱ་གར་གྱི་ཁང་པ་གཡར་ནས་སྡོད་ཀྱིན་ཡོད་པ་དང་། ཁང་བདག་དེ་དག་གིས་གཞུང་ལ་དཔྱ་ཁྲལ་ཏག་ཏག་སྤྲོད་ཀྱི་མེད་པ་དང་། མང་པོ་ཞིག་གིས་རང་སྣང་གང་ཤར་གྱིས་འཛུགས་བསྐྲུན་བྱས་ཡོད་པ་དེ་སེམས་འཚབ་འབྱུང་གཞི་ཞིག་ཆགས་ཡོད་ལ། ཁང་པ་མང་པོ་སྒོ་བརྒྱབས་པའམ་ཆུ་གློག་གི་མཐུན་རྐྱེན་བཅད་པར་བརྟེན། ཁང་པ་གཞན་དག་གིས་ཀྱང་ཁང་གླ་སྤར་བ་སོགས་ཀྱི་གནས་ཚུལ་འབྱུང་ངེས་པའི་སེམས་འཚབ་ཀྱང་བྱེད་ཀྱིན་འདུག
ཚེ་རིང་ནོར་བུ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཡུལ་ཆུ་ཐུང་ནས་ཡུལ་ཁྲིམས་སྲུངས་རྒྱུ་དང་མི་ཡུལ་བསྡད་ནས་
མི་སྐད་ཤེས་རྒྱུ་སོགས་ཕ་བཟང་བུ་གི་ཁྲེལ་དང་ངོ་ཚ་ཡིན་མོ་།
སྡུག་གྱོང་རེད། ལར་ཞེན་མེད་པའི་གཞིས་ཆགས་དང་། ཀུན་སྤྱོད་ངན་པའི་གསར་འབྱོར་བ། འདི་ནི་བོད་ནང་ཁུལ་གྱི་གནད་དོན་ཆེ་བ་ཁག་རེད་ཡ། ད་དུང་སྤྱི་འཐུས་དང་བཀའ་བློན། ས་གནས་རྒྱུན་ལས་ཟེར་བཞིན་ཡིན་མདོག་སྟོན། མ་གཞི་འདི་དག་ཚང་མ་ཕྱི་རྒྱལ་ནས་རོགས་སྐྱོར་ལེན་ཐབས་ཀྱི་རྣམ་པ་ཙམ་ལས་བོད་སྤྱི་པའི་དོན་ལ་ཅི་ཕན།
ཉེས་པའི་བུ་ལ་ཉེས་་པ་མ་བཏང་ན་བྱེད་པོ་ཐམས་ཅད་ཉེས་པའི་རྒྱུ་ལ་འགྲོ་།
བཟང་པོའི་བྱ་བར་བྱ་དགའ་མ་ཕུལ་ན་བཟང་སྤྱོད་ཟེར་བའི་རིན་ཐང་གང་ནས་ཡོང་།
བཟང་ངན་དབྱེ་བ་ཆོད་པའི་ཁྲིམས་མེད་ན་མི་གི་སྤྱི་ཚོགས་འདི་ཡང་དུད་འགྲོ་འདྲ་།
ཁྲིམས་སྲུངས་ངོ་ཚས་བླང་དོར་བྱེད་པ་སྨྲ་ཤེས་དོན་གོ་འཇིག་རྟེན་མི་གིས་འགན་།