ཐའེ་ཝན་གདོད་མའི་མི་རིགས་ཀྱིས་ཞི་ཅིན་ཕིན་ལ་ཡི་གེ་བསྐུར།

རྒྱ་ནག་མི་མང་བཅིངས་གྲོལ་དམག་གི་སྤྱི་ཁྱབ་འགན་འཛིན་གཞོན་པ་ཧི་ལི་ (He Lei) ཡིས་ཐའེ་ཝན་རང་བཙན་ལ་རྒྱབ་སྐྱོར་བྱེད་མཁན་ཚོ་ནི་ལོ་རྒྱུས་ཀྱིས་སྡིག་དམོད་བྱེད་ས་དང་དམག་འཁྲུག་བསླངས་པའི་ཉེས་ཅན་དུ་འགྱུར་རྒྱུ་ཡིན་པའི་འཇིགས་སྐུལ་བྱས།ཁ་སང་ཐའེ་ཝན་གྱི་གདོད་མའི་མི་རིགས་ཀྱི་མི་གྲངས་ ༢༠ ལྷག་གིས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཞུ་ཡིག་ཅིག་བསྐུར་བའི་ནང་། ང་ཚོ་ནི་ཐའེ་ཝན་གྱི་གདོད་མའི་མི་རིགས་ཡིན་ལ། ས་འདིར་གནས་བཅས་ནས་ལོ་ངོ་སྟོང་ཕྲག་དྲུག་ལྷག་འགྲོ་བཞིན་ཡོད་པ་རེད། ང་ཚོ་རྒྱ་ནག་རྒྱལ་ཁབ་དེའི་གྲངས་ཉུང་མི་རིགས་ཤིག་མིན་པར་ཐེ་ཚོམ་རྩ་བ་ནས་མེད། ཅེས་བརྗོད་ཡོད་འདུག་ལ། ཨ་རིའི་རྒྱལ་ཡོངས་རྒྱལ་སྲུང་ཚན་པའི་མགྲིན་ཚབ་པ་གྷ་རི་ཊི་མར་ཁུ་སི་ (Garrett Marquis)ལགས་ཀྱིས་རྒྱ་ནག་གཞུང་གིས་ཐའེ་ཝན་ལ་བཙན་སྐུལ་མཚམས་འཇོག་བྱས་ཏེ་འབྲེལ་མོལ་བྱེད་དགོས་པའི་འབོད་སྐུལ་བྱས་འདུག

ཟླ་འདིའི་ཕྱི་ཚེས་ ༩ ཉིན་མཚོ་འགག་གཉིས་ཀྱི་སྲིད་བྱུས་ཉམས་ཞིབ་ཁང་གིས་ཐའེ་ཝན་མི་མང་ནས་ལྕམ་ཚའེ་ཡེན་ཝིན་དང་ཞི་ཅིན་ཕིན་གཉིས་ཀྱི་ལངས་ཕྱོགས་མི་འདྲ་བར་བསམ་ཚུལ་ག་འདྲ་ཡོད་ཞིབ་འཇུག་བྱས་ཏེ་གྲུབ་དོན་ཡོངས་བསྒྲགས་བྱས་པ་ལྟར་ན། ཐའེ་ཝན་མི་མང་བརྒྱ་ཆ་ ༨༥.༢ ཡིས་ལྕམ་ཚའེ་ཡེན་ཝིན་གྱིས་བཏོན་པའི་དགོས་ངེས་དོན་ཚན་ ༤ ལ་རྒྱབ་སྐྱོར་བྱེད་ཀྱི་ཡོད་པ་དང་། མི་མང་བརྒྱ་ཆ་ ༡༠.༩ ཡིས་རྒྱབ་སྐྱོར་བྱེད་ཀྱི་མེད་འདུག དེ་བཞིན་ལྕམ་ཚའེ་ཡེན་ཝིན་ལ་སྤྱི་ཡོངས་ནས་རྒྱབ་སྐྱོར་བྱེད་མཁན་གྱི་གྲངས་འབོར་འདས་པའི་ལོ་གཅིག་གི་ནང་ཆེས་མཐོ་ཤོས་སུ་བསླེབས་ཏེ་བརྒྱ་ཆ་ ༤༨.༤ ཟིན་ཡོད་སྐོར་བསྒྲགས་འདུག

ཐའེ་ཝན་གདོད་མའི་མི་རིགས་ཀྱིས་བསྐུར་བའི་ཞུ་ཡིག་ནང་། ང་ཚོར་མཐོང་ཆོས་སུ་གྱུར་པ་ནི་རྒྱ་ནག་གཞུང་གིས་བོད་དང་ཡུ་གུར་མི་རིགས་ཀྱི་ཆོས་དང་རིག་གཞུང་། དེ་བཞིན་སྐད་ཡིག་བཅས་འཆར་གཞི་ལྡན་པའི་ངང་རྩ་གཏོར་གྱིས། མཐར་ཁོང་ཚོར་བཙན་དབང་གིས་རྒྱ་རིགས་ལ་བསྒྱུར་ཐབས་བྱེད་བཞིན་པ་དང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ཀྱི་སྒྲོམ་གཞིའི་འོག ཧོང་ཀོང་མི་མང་གི་རང་དབང་དང་དམངས་གཙོ་ཇི་ལྟར་བརླག་བཞིན་པ་དང་ནུས་མེད་ཆགས་བཞིན་པ། དེ་ཙམ་མ་ཟད་རྒྱ་ནག་སྐམ་ས་ཆེན་མོའི་མི་མང་ཚོས་ཀྱང་རང་ཉིད་ཀྱི་མངོན་འདོད་དེ་རང་དབང་ངང་ཕྱིར་འདོན་ཐུབ་ཀྱི་མེད་པ་དང་། ཁོང་ཚོའི་རང་ཉིད་ཀྱི་འགྲོ་བ་མིའི་གཞི་རྩའི་ཐོབ་ཐང་ཁག་ལའང་སྲུང་སྐྱོབ་བྱེད་ཐུབ་ཀྱི་མེད་པ་དེ་རེད། ཅེས་བཀོད་འདུག

ཡང་ཞུ་ཡིག་དེའི་ནང་། མ་འོངས་པའི་ཐའེ་ཝན་ནི་གནས་འདིའི་གདོད་མའི་མི་རིགས་ཚུད་པའི་ཐའེ་ཝན་གྱི་མི་རིགས་གཞན་རྣམས་ཀྱི་རང་ཐག་རང་གཅོད་གཞིར་བཞག་པའི་རྒྱལ་ཁབ་ཅིག་ཡིན་པ་རེད་ལ། གཞུང་དང་ཆབ་སྲིད་ཚོགས་པ། ཚོགས་སྡེ་གང་འདྲ་ཞིག་གིས་ཕྱིའི་རྒྱལ་ཁབ་ཀྱི་དབང་ཤུགས་ལ་བརྟེན་ནས་གདོད་མའི་མི་རིགས་འདིའི་ས་ཁོངས་རྒྱལ་ཁབ་གཞན་ལ་ཟླ་སྒྲིལ་གཏོང་སྐབས། གནས་འདིའི་གདོད་མའི་མི་རིགས་ཀྱིས་རང་ཐག་རང་གཅོད་ལས་བྱུང་བའི་མོས་མཐུན་ངེས་པར་དུ་དགོས།  ང་ཚོ་ཐའེ་ཝན་གྱི་གདོད་མའི་མི་མང་རྣམས་ཀྱིས་བློ་སེམས་བརྟན་པོས་ངང་རང་ཉིད་ཀྱི་ཕ་ཡུལ་སྲུང་སྐྱོབ་དང་རྒྱུན་འཛིན་བྱ་རྒྱུ་ཡིན། ཞེས་བརྗོད་འདུག

ཞུ་ཡིག་གི་མཇུག་ཏུ།  གལ་སྲིད་ཉིན་ཞིག་རྒྱ་ནག་གིས་ལོ་རྒྱུས་དང་མི་རིགས་ལ་འཁྱོག་བཤད་མཚམས་འཇོག་དང་། ད་ལྟ་བརྗོད་བཞིན་པའི་རྒྱལ་ཁུངས་ཀྱི་ཚད་ཐིག་ཟེར་བ་ཕྱིར་བསྡུ་བྱས་ཏེ། དྲག་ཤུགས་སྤྱད་ནས་རྒྱ་ནག་ང་ཚོའི་ཕ་མར་གྱུར་བ་མ་ཡིན་པར་ཁྱིམ་མཚེས་རྒྱལ་ཁབ་བཟང་པོ་ཞིག་ཏུ་གྱུར་ཚེ། ང་ཚོས་ཁྱིམ་མཚེས་རྒྱ་ནག་དང་མཉམ་དུ་ཆང་ཕོར་བཏེགས་ཆོག་ལ། སྐབས་དེར་ཆང་ཕོར་ནི་རྒུན་ཆང་མངར་མོས་བཀང་ཡོད་པ་མ་ཟད། ང་ཚོས་ཀྱང་ལྷག་བསམ་རྣམ་དག་གིས་གདོད་མའི་ཁ་དཔེ་ལྟར་ཁྱེད་ཀྱི་དབུགས་རྒྱུན་ལ་ཆད་པ་མེད་ཅིང་ཞི་འཇམ་ཡོང་པའི་སྨོན་འདུན་ཞུ་རྒྱུ་ཡིན། ཅེས་བརྗོད་འདུགཁ་སང་རྒྱ་ནག་མི་མང་བཅིངས་གྲོལ་དམག་གི་སྤྱི་ཁྱབ་འགན་འཛིན་གཞོན་པ་ཧི་ལི་ (He Lei) ཡིས། ཐའེ་ཝན་རང་བཙན་ལ་རྒྱབ་སྐྱོར་བྱེད་མཁན་ཚོས་ངེས་པར་མཚམས་བཞག་སྟེ་གོད་ཆག་ལ་གཡོལ་དགོས་པ་ལས། རྒྱ་ནག་གིས་ཐའེ་ཝན་ལ་དྲག་ཤུགས་བཀོལ་དགོས་བྱུང་ཚེ། ཁ་བྲལ་ལ་རྒྱབ་སྐྱོར་བྱེད་མཁན་རྣམས་ནི་ལོ་རྒྱུས་ཀྱིས་སྡིག་དམོད་བྱེད་ས་དང་། དམག་འཁྲུག་བསླངས་པའི་ཉེས་ཅན་ཏུ་ངོས་འཛིན་བྱེད་དགོས་ངེས་ཡིན་སྐོར་བརྗོད་འདུག་ལ། གསར་འགོད་པས་ཐའེ་ཝན་ལ་དཔུང་འཇུག་བྱེད་པའི་གྲ་སྒྲིག་ཡོད་མེད་སྐོར་དྲིས་པར། ཐའེ་ཝན་གཅིག་སྡུད་བྱེད་པར་དྲག་ཤུགས་ནི་འདོར་ཐབས་མེད་ནའང་། དམག་དཔུང་གི་བྱ་སྤྱོད་ནི་ཐའེ་ཝན་གྱི་བློ་མཐུན་རྣམས་ཀྱི་བྱ་སྤྱོད་ཁོ་ནར་རག་ལུས་པ་རེད། ཅེས་བརྗོད་འདུག

ཕྱི་ལོ་ ༢༠༡༩ ལོའི་ལོ་གསར་ཚེས་གཅིག་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཐའེ་ཝན་སྐོར་ལ་གཏམ་བཤད་ཅིག་སྤེལ་བའི་ནང་། རྒྱ་ནག་དང་ཐའེ་ཝན་གཉིས་ཁ་བྲལ་ནས་ལོ་ངོ་ ༧༠ འགོར་ཡོད་པ་དང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་འོག་ཐའེ་ཝན་མེས་རྒྱལ་ནང་ཕྱིར་ལོག་དགོས་པ་ལས་ཐའེ་ཝན་རང་བཙན་ལ་ངོས་ལེན་བྱེད་ཐབས་མེད་ལ། མེས་རྒྱལ་གོང་བུ་གཅིག་ཏུ་བསྒྲིལ་བར་དགོས་ངེས་བྱུང་ཚེ་དྲགས་ཤུགས་སྤྱོད་རྒྱུ་ཡིན་ལུགས་བསྒྲགས་ཡོད་པ་རེད།

ཞི་ཅིན་ཕིན་གྱི་བསྒྲགས་གཏམ་དེར་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝིན་ (Tsai Ing-wen) ལགས་ཀྱིས་དེ་མ་ཐག་རྒོལ་གཏམ་སྤྲད་དེ། ཐའེ་ཝན་ཕྱོགས་ནས་རྒྱལ་ཁབ་གཅིག་ལ་ལམ་ལུགས་གཉིས་ཟེར་བར་རྩ་བ་ནས་དང་ལེན་མེད་པ་དང་། གཞུང་དང་གཞུང་གི་ངོ་བོའི་ཐོག་ནས་འབྲེལ་མོལ་བྱ་རྒྱུ་ཡིན་སྐོར་བརྗོད་ཡོད་པ་མ་ཟད། ཟླ་འདིའི་ཕྱི་ཚེས་ ༥ ཉིན་གསར་འགོད་གསལ་བསྒྲགས་ཤིག་སྤེལ་ཏེ། ལྕམ་ཚའེ་ཡེན་ཝིན་གྱིས་ཐའེ་ཝན་གཞུང་ནས་རྒྱལ་སྲུང་གི་ནུས་ཤུགས་གོང་འཕེལ་ཆེད་ནུས་པ་གང་ཡོད་འདོན་གྱི་ཡོད་པ་དང་། དམངས་གཙོའི་རིན་ཐང་ལ་གུས་བརྩི་དང་མཐོང་ཆེན་བྱེད་མཁན་ཚོས་ཐའེ་ཝན་དང་མཉམ་ལས་བྱེད་པའི་རེ་བ་ཡོད་སྐོར་བརྗོད་དེ། རྒྱ་ནག་གི་དྲག་ཤུགས་ལ་ཁ་གཏད་གཅོག་ཆེད་རྒྱལ་སྤྱིའི་སྤྱི་ཚོགས་ནང་རྒྱལ་སྲུང་གི་རོགས་རམ་དགོས་པའི་སྐུལ་སློང་གནང་བ་དང་སྦྲགས། ཐའེ་ཝན་ཀྱི་ངོ་ཚབ་ཐའེ་ཝན་ཡིན་པས་འཛམ་གླིང་གི་རྒྱལ་ཁབ་སུ་གང་གིས་ཀྱང་ཚབ་བྱེད་མི་ཐུབ་སྐོར་བསྒྲགས་ཡོད་པ་རེད།

ཐའེ་རྒྱ་གཉིས་བར་གྱི་གནད་དོན་ཐད་ཐེ་གཏོགས་ཤུགས་ཆེན་བྱས་པའི་ཨ་རི་གཙོ་བོར་གྱུར་བའི་སྟོབས་ཆེན་རྒྱལ་ཁབ་ཁག་གི་གནད་ཡོད་མི་སྣས་ལྕམ་ཚའེ་ཡེན་ཝིན་གྱི་ལངས་ཕྱོགས་ལ་རྒྱབ་སྐྱོར་བྱེད་ཀྱིན་ཡོད་པ་དང་། ཟླ་འདིའི་ཕྱི་ཚེས་ ༥ ཉིན། ཨ་རིའི་རྒྱལ་སྲུང་ཚན་པའི་མགྲིན་ཚབ་པ་གྷ་རི་མར་ཁུ་སི་ (Garrett Marquis) ལགས་ཀྱིས། རྒྱ་ནག་གཞུང་གིས་ཐའེ་ཝན་མི་མང་ལ་དྲག་ཤུགས་ཀྱི་ཉེན་བརྡ་བཏང་བར་ཨ་རིས་ངོས་ལེན་གནང་ཐབས་མེད་པ་དང་། ཕྱོགས་གཉིས་ཀྱི་འགལ་བ་ཞི་བ་དང་མི་མང་གི་འདོད་མོས་ལྟར་ཐག་གཅོད་བྱེད་དགོས་སྟབས། པེ་ཅིན་གཞུང་གིས་བཙན་སྐུལ་མཚམས་འཇོག་དང་དམངས་གཙོའི་ལམ་ནས་འདེམས་ཐོན་བྱུང་བའི་འཛིན་སྐྱོང་བར་གྲོས་མོལ་བསྐྱར་མཐུད་བྱེད་དགོས་སྐོར་བརྗོད་ཡོད་པ་རེད།

གསར་འགོད་པ། ཀླུ་མགོན་ཐར།