རྒྱལ་ས་ལྷ་ས་བདེ་འཇགས་ཆེ་ཤོས་ཀྱི་གྲོང་ཁྱེར་རེད་ཟེར།

རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་དེ་རྒྱ་ནག་གི་གྲོང་ཁྱེར་ཆེ་ཁག་ ༣༨ ལས་བདེ་འཇགས་ཆེ་ཤོས་དང་དུས་རབས་དང་མཐུན་པའི་སྤྱི་ཚོགས་བདེ་འཇགས་ཚད་ཇེ་ཡག་ཏུ་འགྲོ་བཞིན་ཡོད་ཟེར། 
ཟླ་འདིའི་ཕྱི་ཚེས་ ༡༠ ཉིན། གོ་ལའི་དུས་བབ་ཟེར་བས་གནས་ཚུལ་སྤེལ་བ་ལྟར་ན། རྒྱ་ནག་གི་སྤྱི་ཚོགས་ཚན་རིག་བརྟག་ཞིབ་ཁང་ (China Academy of Social Sciences)ཟེར་བས་ལོ་ལྟར་རྒྱ་ནག་གི་གྲོང་ཁྱེར་ཆེ་ཁག་གི་བདེ་འཇགས་ཐད་ཞིབ་འཇུག་བྱེད་བཞིན་ཡོད་པ་དང་། འདི་ལོ་བོད་ཀྱི་རྒྱལ་ས་ལྷ་ས་རྒྱ་ནག་གི་གྲོང་ཁྱེར་ཆེ་ཁག་ ༣༨ ལས་བདེ་འཇགས་ཆེ་ཤོས་ཀྱི་གྲོང་ཁྱེར་ཨང་དང་པོ་དང་། གཉིས་པ་ཧྲང་ཧེ་གྲོང་ཁྱེར། གསུམ་པ་ཤ་མིན་ (Xiamen)དང་།  རྒྱ་ནག་གི་རྒྱལ་ས་པེ་ཅིན་ཨང་ ༡༤ པ་དེ་ཆགས་ཡོད་སྐོར་བརྗོད་ཡོད་འདུག

གནས་ཚུལ་དེའི་ནང་ལྷ་སའི་ནང་དུས་རབས་དང་མཐུན་པའི་སྤྱི་ཚོགས་བདེ་འཇགས་ཞབས་ཞུ་ཡིས་ལོ་རེར་དོན་རྐྱེན་གྱི་གྲངས་ཚད་ཇེ་ཉུང་དུ་འགྲོ་བཞིན་ཡོད་པ་དང་། དེང་སྐབས་ལྷ་སའི་ནང་ཉེན་རྟོག་ཁང་ ༡༠༠ ལྷག་ཡོད་པ་དང་། མྱུར་སྐྱོབ་སྐབས་ཉེན་རྟོག་ཁང་སོ་སོའི་གཙོ་ཁོངས་ས་ཁུལ་གྱི་དོན་རྐྱེན་བྱུང་ཡུལ་དུ་ཉེན་རྟོག་པ་སྐར་མ་གཅིག་གི་ནང་ཚུད་དུ་འབྱོར་ཐུབ་ཀྱི་ཡོད་པ་དང་། དེ་མིན་གྱི་ས་གནས་སུ་སྐར་མ་ ༣ ནང་འབྱོར་ཐུབ་ཀྱི་ཡོད་སྐོར་བརྗོད་འདུག

ལྷ་སའི་མི་མང་བདེ་སྲུང་ལྷན་ཁང་གི་ལས་བྱེད་ཝང་ལཱིང་ (Wang Liang) ཟེར་བ་ཞིག་གིས། ལྷ་སའི་མི་མང་གི་བདེ་སྲུང་ལ་གསར་གཏོད་རང་བཞིན་ལྡན་པའི་སྤྱི་ཚོགས་འཛིན་སྐྱོང་གིས་ལེགས་བཅོས་ཆེན་པོ་བྱུང་ཐུབ་ཡོད་པ་དང་། དེ་ལ་བརྟེན་ནས་ལོ་རེར་ཉེས་ཅན་དང་དོན་རྐྱེན་གྱི་གྲངས་འབོར་ཉུང་དུ་འགྲོ་བཞིན་སྐོར་བརྗོད་འདུག་ལ། འདི་ལོའི་ཕྱི་ཟླ་ ༡ ནང་ཚོགས་པའི་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཅིག་པའི་ཚོགས་འདུ་ཐེངས་གཉིས་པ་ཟེར་བ་ཐོག ཕྱི་ལོ་ ༢༠༡༨ ནང་ལྷ་སའི་ཡུལ་མི་ཚོའི་བདེ་འཇགས་དང་ཡིད་ཆེས་ཀྱི་ཚད་ནི་བརྒྱ་ཆའི ༩༩ ལ་ཟིན་ཡོད་པ་མ་ཟད། དོན་རྐྱེན་བྱུང་བའི་བརྒྱ་ཆ་ ༡༦ དང་ཤི་རྐྱེན་བྱུང་བའི་བརྒྱ་ཆ་ ༢༡ ལ་མར་ཆགས་ཡོད་སྐོར་བསྒྲགས་ཡོད་འདུག

རྒྱ་ནག་གི་སྤྱི་ཚོགས་ཚན་རིག་ཞིབ་འཇུག་ཁང་དེས་བསྟུད་མར་ལོ་ཤས་རིང་བོད་ཀྱི་རྒྱལ་ས་ལྷ་ས་ནི་རྒྱ་ནག་གི་གྲོང་ཁྱེར་ཆེ་ཁག་ཚོའི་ནང་གི་བདེ་འཇགས་ཆེ་ཤོས་ཨང་དང་པོར་ངོས་འཛིན་བྱས་ཡོད་པ་དང་། ཕྱི་ལོ་ ༢༠༡༧ ལོར་རྒྱ་ནག་ཀྲུང་དབྱངས་བརྙན་འཕྲིན་ཁང་གིས་བཏོན་པའི་སྙན་ཐོ་ཞིག་གི་ནང་། ལྷ་ས་ནི་མི་མང་གི་འདོད་བློ་ཁེངས་ཤོས་ཀྱི་གྲོང་ཁྱེར་དེ་ཡིན་སྐོར་སོགས་བསྒྲགས་ཡོད་ན་ཡང་། འདས་ལོའི་ཕྱི་ཟླ་ ༢ ཚེས་ ༡༧ ཉིན་གྱི་ཕྱི་དྲོར། ལྷ་ལྡན་གཙུག་ལག་ཁང་དུ་མེ་སྐྱོན་ཤོར་སྐབས། ཉེན་རྟོག་པ་དང་མེ་གསོད་རུ་ཁག་སོགས་ཡུན་རིང་མ་འབྱོར་སྟབས་ལྷ་ལྡན་གཙུག་ལག་ཁང་ལ་གནོད་སྐྱོན་ཚབ་ཆེན་བྱུང་ཡོད་པ་རེད།

རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་ནི་རྒྱ་ནག་གི་བདེ་འཇགས་ཆེ་ཤོས་ཀྱི་གྲོང་ཁྱེར་ཡིན་སྐོར་བརྗོད་པ་ནི་ཆབ་སྲིད་ཀྱི་གཡོ་བྱུས་ཤིག་ཡིན་པ་དང་། ཕྱི་ལོ་ ༢༠༠༨ ལོར་ལྷ་ས་གཙོའི་བོད་ས་ཡོངས་ནས་རྒྱ་ནག་གཞུང་ལ་ཞི་རྒོལ་བྱུང་བ་ནས། རྒྱ་ནག་གཞུང་གིས་བོད་ནང་དམག་མི་འབོར་ཆེན་འགྲེམས་འཇོག་བྱས་ཡོད་པ་མ་ཟད། བོད་ཀྱི་མདོ་དབུས་ཁམས་གསུམ་ནས་ལྷ་སར་མཆོད་མཇལ་དང་ཆོས་ཞུ་བར་ཡོང་མཁན་ཚོར་དམ་དྲག་དང་ལྟ་རྟོག་ནན་མོ་བྱེད་བཞིན་ཡོད་པ་མ་ཟད། ལྷ་སའི་ཁྲོམ་སྲང་ཀུན་ཏུ་བརྙན་མིག་བཞག་སྟེ་བོད་མི་ཚོའི་བྱ་སྤྱོད་ལ་སོ་ལྟ་བྱེད་དང་ཉུལ་ཞིབ་བྱེད་བཞིན་ཡོད་པ་རེད།

དེ་བཞིན་ཉེ་སྔོན་ལོ་སར་མ་ཚེས་གོང་གི་ཕྱི་ཚེས་ ༣ ཉིན། ལྷ་སར་ལོ་སར་སྐབས་དང་བསྟུན་བོད་རང་སྐྱོང་ལྗོངས་བརྟན་ལྷིང་སྲུང་སྐྱོང་དང་བཀོད་འདོམས་ཟེར་བའི་ཚོགས་འདུ་ཤིག་ཚོགས་ཡོད་པ་དང་། ཚོགས་འདུའི་སྟེང་བོད་རང་སྐྱོང་ལྗོངས་ཟེར་བའི་མགོ་འཁྲིད་ཆེ་དགྲ་ལྷས་ལོ་གསར་གྱི་སྐབས་དང་བསྟུན་ཕྱོགས་ཡོངས་ནས་བོད་ལྗོངས་བརྟན་བརླིང་ལ་ཧུར་བརྩོན་དང་ཁ་བྲལ་བའི་ངོ་རྒོལ་ལ་འཐབ་རྩོད་རྒྱུན་འཁྱོངས་དགོས་པ་དང་། ཟིང་འཁྲུག་ཞི་འཇགས་ཆེད་ཉེན་རྟོག་པ་དང་དམག་མིས་དུས་ཐོག་ཏུ་དོན་རྐྱེན་བསླང་མཁན་རྩ་མེད་དང་དོན་རྐྱེན་ཐག་གཅོད་མགྱོགས་མྱུར་ངང་བྱེད་དགོས་པ་སོགས་བརྗོད་ཡོད་པ་རེད།

གསར་འགོད་པ། ཀླུ་མགོན་ཐར།